二零五零年 – 我女神係暴徒: 第二十一章

「啪!」突然間好大聲…似乎係有張凳跌左落地下既響聲。
 
本身坐隔離枱食緊飯既男人, 突然衝埋黎推左我落地下, 「哇!」 佢用體重壓住左我唔比我起身。
 
「你條死狗仔!!! 屌你老母!!!」「啪!」個男人一拳打左落我塊面度…
 
「拉開佢!」「停手呀!」「停呀!」Felix嘗試叫停佢, 而迪儀就跑左埋黎想拉開個男人。
 
「屌你老母! 黑警死全家呀!」「啪!」個男人又打左我一拳…「邊個拉住我打邊個呀!」
 


個男人本來想推開拉住佢果個人, 但回頭望左一眼見係迪儀, 個男人就停止左反抗之後企番起身, 退開左幾步。
 
我伸手想迪儀扶番起我, 但迪儀無咁做就企埋左一邊, 我坐番直個人望一望四周…大家望住我既眼神, 彷彿都充滿仇恨。
 
「Felix…到底乜野事? 你尋日都已經知我老豆係武警…頭先大家都無咁大反應…點解?」
 
「阿熊…熊正理呢條仆…嗯…佢就係當年向鄭特首提議送被捕人士番大陸臨時監獄既黑警…數以十萬計既人…就係因為佢呢個提議…從此就係世界上消失左啦!」
 
「熊正理當時只係總督察, 憑住佢呢個建議, 當時得到中聯辦既高度賞識, 係警隊改編為武警之後, 佢升職既速度就好似搭白金升降機一樣, 快速由武警上尉(總督察)晉升為上校, 坐上總區副領導既位置。」
 


乜野話?...老豆平時咁蠢…點可能做到謀士幫特首出謀獻策呀…?
 
「邊有可能呀!…你地又點解咁肯定係老豆既提議呀? 可能根本係鄭特首自己諗出黎既!」
 
「你老豆正正因為呢個功績, 當年獲頒大紫荊勳章…佢立呢個功當時每份報紙都係頭條激讚。之後佢係微博被數以百萬計既同胞封為英雄…有幾年既國慶都有邀請佢去現場睇。唔通呢D都係假嫁咩?」
 
係我腦海入面…突然間浮起老豆件軍服…上面果個金光閃閃既勳章…老豆一直都當呢個勳章係寶物…我又諗起…老豆間書房一直都有一疊過晒膠既舊報紙…佢定時定候都會拎番出黎重睇一次。
 
「請大家比D時間我…我想番去同老豆傾下, 如果我能夠說服到老豆做番D野補償當年既錯, 大家可唔可以比我幫手出一分力?」