二零五零年 – 我女神係暴徒: 第二十三章

「乜…點解…外國唔係無晒網絡咩?? 中央電視台明明話中國係現時唯一擁有互聯網技術既強國! 點解會有IP地址顯示係外國地方…?」Felix聽到我既疑問之後露出左憐憫既神情。
 
「熊主任…你不會連漢堡包是由中國發明出來也都相信吧???」 迪儀用望住外星生物咁樣既眼神望住我, 我睇唔透佢既眼神入面有冇包含住愛意。
 
「金拱門是中國企業…漢堡包當然就是中國發明的啊!」迪儀突然迴避開我既視線…彷彿佢個表情好似唔想望住嚿屎咁, 但迪儀並無捵住個鼻, 所以…應該只係一場誤會。
 
「哇! 咩事?」突然間部電腦響出警報聲, 然後見到畫面有好多程式碼係度跳緊…最後顯示左「Disconnected」。
 
「哦, 因為時間到啦, 我地而家用黎突破網絡封鎖既程式, 只係支持到幾分鐘時間, 程式會一直偵察住武警監控系統既偵查進度, 然後自動斷線避開武警既監測。」
 


「唔怪得你頭先個帖咁簡短啦…但係…到底乜野係網絡封鎖呀??」
 
「阿熊, 簡單而言, 並唔係外國無左互聯網, 只係中國政府單方面中斷左我地連接到國外既網絡, 令我地只係上到中國既網站。然後…就係國民通識科入面教育你地中國係唯一擁有互聯網既國家…」
 
上網明明係法例上係所有市民大眾既基本人權…國家可以咁樣去操作咩?? 但係諗深一層…可以輕易出手剷除異己既國家…又有乜野係做唔出呢?
 
「阿熊…外面既世界係好大嫁! 雖然我呢一刻無能力比你同迪儀自由自在咁接觸外面既世界, 但你地呢一代人唔可以輕易放棄!」
 
「Felix 你講到中國政府係萬能咁樣…點樣唔放棄呀? 既然政府乜野都可以操縱, 所有人既一舉一動都監視住, 我地重點樣同佢鬥?」
 


「只要喚醒到大眾對自由既追求, 只要大家都願意放低自己既個人利益而為下一代人爭取應得既人權同自由, 只要大家再企出黎堅持抗爭落去, 無野係無可能!」
 
而家既市民大眾…連自己應該有乜野權利都唔知, 又點會自己企出黎爭取呢? 一隻係動物園鐵籠入面長大既獅子, 又點會想像得到係草原奔跑既果種快樂呢?
 
「Felix…你地幾十年黎, 你話你同其他義士都無放棄過, 你地呢份信念…實在令我好敬佩。」
 
「革命既火焰咁多年黎都從未熜滅過, 抱住相同理念既義士仍然係唔同既崗位上面等待機會, 累積各自既實力, 我地都正等待緊呢粒仍然好似星星咁細小既火苗再次點燃。」
 
「只要時機成熟, 我地將呢粒火苗放番入草叢上面既話, 星星之火燃起之日, 就係革命燎原之時。」