《我哋已經到達終點站⋯⋯》: 第七章

星期六起身，梗係睇下有無車揸下。

「大佬今日有無窿有得攝下呀？」

「102囉。」

「好。」

「咁嚟西九廠攞車啦？」



我搭車出到去，而今日又接到另一部82XX，今次部82XX反應好好，吹疏聲又好好聽，係幾開心嘅。

做幾轉之後有得抖下，撞正下午茶時間。無錯，梗係去飲咖啡啦。

去到咖啡店，入面有兩個阿太坐喺度傾計，而Alice就坐喺另一邊。

「Alice。」

「係，Hi Charlie。」



「熱Mocha呀唔該。」

「好。」Alice微笑道。

佢嘅微笑，係會令到人感到好舒服。

一如既往，佢好快就沖好一杯咖啡比我。

今次我揀咗坐喺Alice原本嗰張枱度。



「唔介意嘛？」我問。

「梗係唔介意啦。」

「係喎，唔見你婆婆嘅今日？」

「婆婆今日同朋友去遊山玩水呀。」

「所以你自己一個喺度？」

「係呀。」

「唔會好悶咩？」

「唔會呀，聽住音樂時間就好快過㗎啦。」



我點點頭，表示同意。

「況且依家咪有人嚟同我傾計。」Alice望住我微笑。

不得不承認，嗰下真係比佢電親嘅。

結果我係一時反應唔到，紅都面曬。

「係喎，你今年幾歲？」我腦一片空白，唯有求其搵啲嘢講。

「年齡係女仔嘅袐密呀～」

之後佢示意我伸前個頭，之後佢喺我耳邊輕輕咁講。



「我今年⋯⋯歲。」

「吓？聽唔到喎。」

「我講一次㗎喳，聽唔到無辦法啦。」

「唔好咁啦，講多次啦。」

「遲啲先啦，一定有機會嘅。」

「咁好啦。」

「唔洗咁失望喎，又唔係唔同你講。」

「你啱。」我笑一笑。



我望望隻錶，差唔多夠鐘返去準備開車。

「走啦，下次再傾啦。」

「好呀，我等你。」Alice再次露出微笑。

頂，又比佢電多獲添。

「Byebye」

「Byebye」

返到去，套咗架83XX比我，但又如何？我無興趣。



我淨係知我諗住佢搞到差啲飛曬啲站。

講下笑啫，未去到咁嚴重。