《我哋已經到達終點站⋯⋯》: 第二十三章

之後嗰幾日都係咁返工，嚟到星期五嘅下晝放工時間，垃圾鐵路公司又壞，地鐵過海段要慢駛，所以比平時仲多啲人搭巴士。而我就啱啱返到車廠泊車。

「師兄你加唔加走？」車廠寫字樓人員問我。

「好，加走962系？」如果揸962系返屯門就可以近啲返屋企。

「Ok，咁你出去拎車啦。」

「拎咩車都得。」



「有就拎啦，出邊打曬仗咁款。」

我喺車廠周圍睇，睇吓有無車拎得，終於比我搵到部可以出街嘅車。

「師傅，架車行得街？」我問工程部師傅。

「出得，啱啱整好。」

我即刻返去同寫字樓講。



「我拎架80XX出去啦。」

「得得得，出摩頓台啦。」

「Ok。」

跳上車之後即刻着車，揸住架飛人直落摩頓台。

「師兄你依家出菲林明道做962X啦。」摩頓台站長話。



「得。」

去完洗手間嘅我又跳返上車，出去陪塞。

。

。

。

慢慢喺銅鑼灣塞到落灣仔，喺菲林明道後面等人放車。

「師兄你等架962走咗之後，喺中線泊住架E11啦，我幫你睇位。」望落頗高級嘅人同我講。

「好。」



前面架962走咗之後，就搞好八仔機同電牌，再拉前架車停喺E11側邊上人。

上緊客途中，架E11司機隻窗開咗。

「咁啱呀俊仔。」晴姐喺E11嗌過嚟。

「我都係收工加走喳嘛。」

「係咩，我都係收工單喎，佢又爆單大嘅阻我收工。」

言談之間，我部962X同架E11都上曬客可以走，所以同晴姐揮個手就走。

沿途同另一架962X玩424，所以嚟到砵典乍街都仲可以執多幾個上車。



「唔該幫幫手，行入啲。」我開咪講。

喺砵典乍街上埋個OL就頂閘走人。停燈嗰陣有人拍一拍我手臂，我下意識縮一縮。

「喂，做咩唔理我呀？」

「阿姐，我揸緊車點理你呀？」

「唓～講一兩句都得掛～」

「有咩放工先講啦。」