《我哋已經到達終點站⋯⋯》: 第三十章

我帶點疑惑咁跟住Alice，之後跟埋佢上樓，去到某一個單位，佢拎出鎖匙打開大門。

「童童嚟到啦，仲有哥哥仔。」

睇嚟哩度係Alice屋企。

「婆婆～」Alice行咗去攬住婆婆。

「等婆婆煮埋啲餸就食得飯啦，你兩個傾陣計先啦。」



「嗯～」

我跟住入去，屋入面採用咗簡約設計，望落空間都幾實用。入到去，我同Alice坐喺梳化上面傾計。

「哩度係你屋企？」

「係呀，我同婆婆兩個人住。」

「咁你點解喺筲箕灣咁遠開咖啡店嘅？」



「因為嗰個舖位係我爸爸㗎囉。」

有樓有舖，究竟係幾咁有錢，不過唔係有錢嘅話都唔會打本畀個女做生意。

「哦～」

「恕我多口問句，你爸爸媽媽喺？」

「佢哋移咗民去外國啦。」



果然係有錢人，唔怪得知可以移民外國。

「原來係咁。」

。

食飯嗰陣，婆婆都有同我哋兩個傾計。

「係喎哥哥仔你叫咩名呀。」

「叫我俊仔得啦。」

「俊仔呀，我個乖孫童童係咪又靚又叻呢，不如你考慮一下呀～」

如果Alice肯嘅，我一定狗衝啦。



「喂，婆婆你唔好亂講嘢啦⋯⋯」

「Alice條件咁好，一定好受歡迎啦，邊輪到我呢。」

「喂呀，你哋兩個呀～」

Alice怕羞個樣比平時更加得意呀～～

「俊仔係好男仔嚟㗎，童童你要珍惜佢呀。」

「我知㗎啦。」

結果成餐飯都有傾有講，氣氛十分溫馨。



。

食完飯，食埋生果都差唔多時候返屋企。

「都夜啦，我都係時候返屋企啦。」

「咁好啦，俊仔你多啲上嚟食飯啦。」婆婆執埋隻碟，轉身走向廚房。

就喺哩個時間，Alice突然伸個頭去我耳邊，細細聲講嘢。

「下次再嚟接我放學呀，仲要車我去玩㗎喎～」

唔好咁啦，我驚我真係忍唔住將你推倒呀～

「好啦，我應承你。」我喺返佢耳邊講。



「嘿。」Alice偷笑，同時伸出尾指。

喺我面前係一個充滿童真嘅少女，咁我就同你勾手指尾啦。

「我真係走啦，下次見啦。」

「記住呀～」

「係啦長氣妹，我走啦。」

「好啦，ByeBye。」

。



喺揸車返屋企嘅途中，我諗返起啱啱發生嘅事，忍唔住笑起嚟。

返到屋企樓下泊車，估唔到我隔離個車位泊嘅係一部NSR250SE，睇嚟嗰個車主幾識貨喎。

就係咁完成咗充實嘅一日啦～～～