[少甜][短文] 一日女朋友: 男生角度

到底係邊一日開始，我同妳就開始唔停咁send訊息呢？
 
有時候我會一直拎住電話，因為要睇妳由在線上變返最後上線。
 
我會諗除左我，妳仲會同邊個send訊息呢？
 
有時候我會突登好夜先覆妳，因為要等妳睡著。
 
咁樣我就唔駛每一晚都心掛掛妳覆我啲咩。
 




有時候我唔中意妳係屋企，因為妳成日都覆得好慢。
 
後尾妳同我講，原來妳返到屋企會將部電話掉埋一邊，要好好休息。
 
我淨係覆妳sticker唔係因為我懶得覆妳，而係想睇下妳仲有咩話題可以同我傾。
 
好彩，妳一直都會諗到唔同既話題。
 
我地從來唔講曖昧既說話，最多只會讚下對方我型妳靚。
 




好似讚妳靚，我就彷彿見到妳個開心樣。
 
就算有少少曖昧既說話，都只會輕輕咁帶過。
 
但我好享受咁樣既對話。
 
就算係咁，我都唔可以對妳講更多曖昧既說話，因為我身邊有佢……
 
今年既生日應該係我最後一個可以同妳過既生日。
 




所以我就問妳：
 
「可唔可以做一日我既女朋友？」
 
真係好想親眼睇下妳既反應係點。
 
「唔要。」妳拒絕左我。

「就一日，就當係我既生日禮物。」
 
哩個爛藉口妳應該更加唔會應承我掛？
 
估唔到……
 
「我仲諗住妳唔會黎，妳點解會應承我既？」




 
「我只係當同朋友行下街。」
 
「但係今日妳唔係以朋友身分喎。」
 
「我知，但係唔一樣咩？」
 
傻妹，點解會咁樣諗呢？
 
「點會一樣？哩個就不同啦。」我拖起妳隻手。
 
「唔得。」
 
妳拒絕我，但妳唔將隻手抽返出黎係咩意思？
 




「點解？唔係講好左一日女朋友咩？」
 
「但係你已經有女朋友，咁樣好似唔係咁好？」
 
原來係因為哩個原因……
 
「今日，我單身。」
 
我咁樣講可以……掛？
 
妳碌大對眼望住我，我真係好想錫落去。
 
「行啦，去睇戲啦。」
 
次次我都突登同妳講哩套戲好似幾好睇，今次終於睇到啦！




 
係戲院入邊，我用十指緊扣既方法扣住妳。
 
睇到妳好似低左一下頭，係咪怕醜呢？
 
我突登飲妳飲過既水，因為可以同妳間接接吻。
 
我突登要食妳餵既爆谷，因為我覺得更加甜。
 
我慢慢鬆開妳隻手，放係妳膊頭到，再慢慢咁跣去妳條腰到。
 
或者因為燈光暗既原因，妳冇推開我，由得我隻手係妳條腰到遊走。
 
其實我更加想放係妳膊頭同腰中間既位置……
 




電影完左之後，我係妳耳邊細聲講左句：
 
「好唔好睇？真係唔想咁快睇完。」我仲享受緊攬住妳既感覺。
 
「咁睇多次？」
 
「可以？」
 
「梗係唔可以，我餓啦。」
 
聽到妳問再睇一次個陣，仲以為妳都享受哩種感覺……
 
不過妳肚餓梗係要第一時間去食飯啦，如果唔係妳會發睥氣，嘻嘻。
 
我知妳唔中意俾人望住妳個樣，所以我就一直望實妳。
 
睇到妳怕醜個樣，更靚更可愛。
 
食完飯，梗係要去散下步。
 
我拖住妳漫步，感覺到妳隻手有啲凍。
 
「凍唔凍？」我問妳。
 
「有啲。」
 
「咁樣有冇好啲？」我攬住妳條腰。
 
哩個動作令到我地更貼近，好似連妳既呼吸聲都聽到。
 
坐係張櫈到休息個陣，妳將妳個頭輕輕挨落我膊頭到。
 
我個心有種小鹿亂撞既感覺，好耐都冇哩種感覺啦。
 
「妳今日開唔開心？」
 
「哩個問題應該問你，今日係你生日。」
 
「好開心，多謝妳。」我一手將妳攬實。
 
好似感受到妳既心跳，好似更能夠聽到妳既呼吸聲。
 
「Er……我真係有啲凍，我地返去好唔好？」
 
「好啦，我送妳返去。」
 
我真係好中意拖住妳隻手行每一段路。
 
送到妳屋企樓下，我唔捨得就咁結束：
 
「我可唔可以要生日禮物？」
 
「你唔係話今日就係你既生日禮物咩？」
 
「我貪心，想要多一份。」
 
「係咩？」
 
我帶住加速既心跳，向住妳的嘴哄埋去，等緊妳合埋眼既樣。
 
但妳推開左我……
 
「點解？」我個心好似碎左一下。
 
「我唔要。」
 
「宜家仲未到12點，所以妳仲係我女朋友。」
 
「我就係唔要。」妳再次拒絕我。
 
「咁妳陪我坐多陣。」
 
今次妳冇答我，反而主動拖起我隻手向公園方向行過去。
 
「除左個份禮物，你仲想要咩？」
 
「哩個。」我需要一個擁抱作為今日既結束。
 
「生日快樂。」妳係我耳邊講。
 
到左12點，我地離開公園，各自返去自己既屋企。
 
宜家妳唔再係我既一日女朋友啦……
 
我攞起電話，準備同妳講我放係心入邊好耐既說話。
 
睇到妳輸入中，又慢慢咁變返在線上。
 
當我打好，但一直㩒唔落個個發送掣。
 
妳一定覺得我係到寫文係咪？
 
但妳唔會諗到，妳等既個篇文竟然只有五個字：
 
「我要結婚啦。」
 
等左一陣，我睇到妳都輸入中。
 
「叮。」收到訊息。
 
「屌！」我睇個訊息後第一個反應。
 
原來我要結婚對妳黎講根本唔係啲咩。
 
哼，冇錯，佢同我講「恭喜你。」