「佢朋友到底講過乜野?同佢失蹤有冇關係?」此刻我感到心情沉重,反而女人卻沒有表現出過份哀傷的神情。
「我知道佢傷得Monica好深,好深..........佢係嗰種經常將自己包裝成對女朋友情心一往嘅人,如果由佢依種人對妳講一生愛妳,至死不渝嘅話,咁妳就要好小心啦...........」
「唔好意思,其實我今日嚟嘅真正目的係想知道佢點解會失蹤,我都好擔心Monica,姨姨妳有冇報警?」
「報警?冇人會幫到佢,一切都要靠佢自己..........」
「靠佢自己?唔係好明點解?」女人的說話令我一頭霧水。
「遲D妳就會知道.........」女人說話時面容僵硬,表情亦顯得空洞。

由於查不到半點頭緒,喝完香草茶本想立即離開,卻遇上外面風雨交加,女人勸我再多留一會,我無奈應承。我和女人在餐桌旁對坐,看著她衣衫襤褸的樣子,很難想像到她平素如何在這種偏僻的地方獨自生活。

由於一時納悶,便在客廳內到處參觀,適逢客廳的一角擺放著一具玩具人偶,從它的衣著款式估計該玩具的造型以成年女性作為參考對象。


「姨姨,件玩具公仔整得好靚好精緻,係咪Monica買返嚟架?」
「係我搵人整嘅,個公仔代表我,另外屋企有一個少女造型嘅公仔代表住Monica,佢哋原本係一對咁擺埋一齊,估唔到依家少女公仔同我個女一齊咁失蹤.........剩番個大人嚮度。」
「係咪Monica鍾意儲公仔同玩佢哋?」
「擺設娃娃公仔其實係墨西哥人嘅傳統,我哋認為D公仔有靈性,識得同人溝通。」
「妳講真?」一道閃電突然劃破天空,強光透過釘在窗戶上用作遮蓋的木板之間的隙縫滲入,竟令女人黑黝黝的面容一瞬間變得無比蒼白,驟眼看上去猶如變成另一個人。
「等我講個娃娃島嘅故仔俾妳聽.........」女人話音方落,外面立即打了一個響雷。
已有 0 人追稿