《女朋友全家變咗隻蛋》: 06

從佢哼歌嘅腔調細聽，佢疑似係一隻兔女。
 
哼到一半，佢又突然低頭哀泣，神態十分詭異。
 
等佢慢慢遠離附近，我同宋文德先繼續心顫嘅逃亡之旅。就喺我哋跑唔夠十秒，去到要落一條石梯嗰陣，領頭帶路嘅宋文德突然仆親！成個人跌落翻滾到石梯下面......
 
「宋...！」
 
同時間，我發現地上有條繩，更糟糕嘅係隔離居然放住幾個汽水罐，宋文德咁樣仆一仆，間接令到嗰幾個汽水罐都滾落石梯下面。
 




「噹...噹...噹...噹噹...噹噹噹...噹噹噹噹噹！！」汽水罐每跌一級，就響一下。
 
我最唔想嘅事情，發生咗。
 
我回頭一望原本應該遠離我哋嘅紅目視線，已經回首瞪住我嘅位置。
 
我腦內一片空白，只有一個字......
 
「逃」
 




兔女發出鳥叫嘅怪聲後，即以凌厲嘅叫聲跑向我哋！
 
我跨級跑落樓梯，有幾下腳顫到差啲仆埋一份。
 
「宋文德！你點啊？佢追緊過嚟啊！！」我跑到落去見佢仲未起身，而係半跪緊喺地下，額頭仲滲住一行血。
 
夜裡喺山林周圍爬嘅曱甴，喺宋文德隻皮鞋上不斷攀爬。
 
「我...我隻腳，好似拗柴...嗄。」我睇得出佢試企咗幾次，但隻腳腕就係發唔到力，企都企唔穩。
 




「我扶你！」我扶住佢半身前進，但呢種速度肯定唔洗一陣就俾兔女追到。
 
「無用。」佢推開咗我，然後自己拐住去顆樹到，望向啱啱條石梯：「仲識整陷阱......」
 
「......」我望住佢。
 
佢拎出一枝煙含住，試圖喺風中之中，用火柴出火。
 
「拎住。」我俾塊八方鏡佢。
 
「...」佢望住我，等緊我講下一句。
 
「我會背住你落山，但以佢嘅速度，佢點都會追到過嚟！嗰陣......你應該識做。」八方鏡已經，交到佢手上。
 
「好...」佢騎上我背脊。




 
果然，我跑唔夠一陣，兔女嘅聲音已經好似厲鬼咁喺背後傳出，就喺大概四米距離嗰陣，宋文德向後舉起八方鏡，兔女一望即刻不斷尖叫！追勢亦都緩和落嚟。
 
最後，我哋兩個終於跑出成座山，去到新娘譚路。
 
「向右行...有民居。」宋文德指示我。
 
我費盡最後一份力向民居嘅地方跑去，直至見到有塊牌寫住「金門」兩字，我先攰到腳軟，連同宋文德一齊喺大馬路訓低。
 
「嗄...嗄......嗄...」雨水從未停過。
 
宋文德舉手，望望手錶：「六點...已經六點。」
 
個天，開始破曉。
 




喘住一大輪氣之後，我先扶宋文德起身，然後兩個人一齊走去鄰近嘅士多鋪。鋪頭就落哂閘未開，但見到人為嘅建築，就已經足夠，就已經好有安全感。
 
我哋兩個乏力咁坐喺一間士多嘅鐵閘前。
 
長長夜雨終於結束。
 
整低毛毛嘅雨粉，散落喺街道之上。
 
天上曙光，亦柔和咁打落剛才仲黑暗不己嘅山上。
 
死中求生、九死一生、死裡逃生，咩成語......
 
都形容唔到今次經歷。
 
「所以，你死之前最後做嘅一件事，係會食住枝煙？」無聊嘅我，笑住問起。




 
我見到頭先宋文德仆咗街，腳都傷埋之後，就連求生嘅意欲都無。
 
佢怔咗一陣，答：「我諗，就係。」
 
「...」
 
「咁你，如果就算唔係今次，可能係下一次，你發現自己玩完......你會做啲咩。」宋文德反問我。
 
我答唔到，因為呢一刻，
 
我只係想間士多快啲開鋪，等我可以食過餐腿麵。
 
「哇，走呀走呀！我要開鋪，死去第二到訓！」半個鐘後，有個阿叔拎住枝掃把過嚟攻擊我哋，當正我哋係流浪漢。
 




「我哋要食嘢......」我哋傷痕累累咁講。
 
阿叔開鋪後，我同宋文德每人叫咗六、七碗公仔麵。成日無食過嘢，加上消耗咗大量體力，令我哋好似食幾多都唔會飽咁。
 
「你哋搞咩嚟？成晚出街跑山啊？成身泥水跡嘅。」士多阿叔煮緊第八碗麵時，好奇咁問。
 
「可以咁講......」宋文德連味精湯都飲埋。
 
「但你哋感唔感覺到地震？我琴日訓訓下好似feel到地震咁。」阿叔講起又講。
 
地震。
 
即係嗰時內村發出嘅地震，其他人都感受到。
 
「你覺得......嗰陣點解會地震？」宋文德私底下問我。
 
「我覺得點都關我哋掉咗個信徒入井事......」我說。
 
「然後，唔知數量有幾多嘅兔人，仲同時間聚集喺山上搵我哋。」宋文德放低隻碗，說：「我諗，個水井未來會係一個關鍵。」
 
食到咁上下，我望下手機，發現泉叔打咗俾我幾次，於是我就即刻打返俾佢，但係電話唔通。
 
我諗佢又係訓緊覺？
 
「之後你有咩打算？」宋文德用紙巾抹好嘴，問。
 
「我想帶你去見一個人，佢叫泉叔，係個獵兔人。」佢兩個都對兔子人有研究，唔企埋同一陣線會好浪費。
 
「原本我今次嘅任務都差唔多結束，因為我主要都係想將對付兔子人嘅八方鏡交俾你。」宋文德將塊鏡俾返我，繼續講：「但係，「重生會」，宜個邪教令我好在意。」
 
「係？」
 
「而且，我隻眼已經見過第二個世界。」宋文德撳住眼鏡，眼神沉沉：「知道真相嘅人，係唔可能逃避真相。」
 
「你想......」
 
宋文德將一直收喺袋嘅求導者嘅吊咀，掛喺頸上。
 
我諗...
 
我大概明白佢之後想點做。
 
「就去見見你嗰位泉叔吧。」宋文德企喺身，到宜家行路仲係一拐一拐：「我覺得「兔子人」同「重生會」有住不可分割嘅關係。」
 
「我都咁覺得，雖然宜家未睇到住，但你唔洗再坐下？你宜家連行路都成問題......」
 
「仲坐？春天都就快過一半。」宋文德微笑，走出士多。
 
我心悅誠服點頭，不得不認同佢嘅行動力。
 
出去之後，我哋叫咗嫁就近嘅的士，出發去譚國源屋企，亦即係泉叔所在。喺車入面，我順便講埋譚國源嘅事俾宋文德知，令佢跟到一下進度。
 
「後面個阿叔做咩追住我哋？」司機望下倒後鏡，問。
 
係士多阿叔，我哋好似未俾錢佢。
 
 
 
「唔洗理，條友痴線。」我對司機講。
 
我從倒後鏡中，凝視住靜靜望緊窗外風景嘅宋文德。
 
有時識咗十年嘅朋友，都未必夠某個同你出生入死一晚嘅人。
 
坐咗接近一個半小時，終於到譚國源屋企樓下。臨入屋之前，宋文德提議自己變裝上去，因為對方既然係重生會信徒，咁自己著埋求導袍上身，加埋個吊咀，自然可以套到佢料。
 
我同意依個計劃，因為個信徒真係好口密，就算俾泉叔拔哂啲指腳甲，就算我冒認細佬，佢都係講唔出任何有用嘅線索。
 
可能真係得呢招，先有用。
 
「人喺脆弱嘅時候，最易俾眼前嘅事物欺騙。」宋文德係都要補充一句滿含哲學性嘅說話。
 
就係咁，我叫變咗裝嘅佢，先喺走廊等陣。
 
喺門口前面，我撳門鐘。
 
「消失咗一日嘅，政？以為你俾兔人食咗。」泉叔瞇住眼，應該都係啱啱訓醒：「你隔離呢位係......？」
 
「我之前同你講過嗰位網友，佢一陣會入嚟扮重生會嘅成員套譚國源料。」我交代計劃。
 
泉叔點點頭，俾我入去先。
 
一入去，只見到譚國源渾渾噩噩咁坐喺梳化，雙眼虛無縹緲。不過雙手同雙腳，依然俾泉叔綁住。
 
「我見到真理！我見到教主，只要俾選上就可以去到「樂園」享受快樂......」譚國源不斷喺到對住空氣講嘢。
 
「佢做咩？你虐待到佢傻咗......？」我愣然。
 
「係大麻，我俾佢吸咗大麻。」泉叔淡然咁講。
 
「大麻...即係毒品？」
 
「可以咁講。」泉叔搵個位坐低，解釋點解要咁做：「我見佢一直唔講嘢，咪去重慶大廈問人買咗啲大麻，再塞佢食。果然佢一食之後，就係咁講嘢，雖然唔知係真係假，但我都拉咗錄音機一直錄緊。」
 
泉叔呢個套料方法......
 
真係邊有人會諗到。
 
以我所知，大麻係一種食完，會令到人嘅腦袋轉頭好快，仲會令人嘅戒心降低，變得容易快樂。
 
所以一般食用者，吸食完之後都會乜都講一餐，就算係自己嘅黑歷史，因為喺嗰個快樂嘅一刻，一切都變唔重要。
 
其實，呢個係我年輕時食用過一次嘅感受。
 
「咁你哋計畫仲進唔進行？」泉叔問。
 
「我諗無問題......」我低聲喺泉叔耳邊，講：「宋文德佢好聰明，佢自然會有方法引導譚國源講出一啲資訊。」
 
「好。」
 
「一陣間佢會入嚟，扮係營救信徒，我哋會扮輸俾佢，盡量演真啲就得。」我望一望喺到傻笑緊嘅譚國源：「算，反正佢都睇唔出。」
 
一切準備就緒之後，我喺雪櫃拎定枝蕃茄醬，然後手機通知外面嘅宋文德撳門鐘。
 
「叮噹」門鈴響起。
 
「咦！有人喎，阿政，我哋一齊去開門啊？」泉叔啲演技......
 
「嗯。」我簡單應一句，然後同泉叔一齊行去門口。
 
行緊過去嘅途中，泉叔仲要爆肚加一句：「希望唔會係重生會嘅人嚟救佢。」
 
「......」
 
行到暗角位，我極速噴咗蕃茄醬落大家個身到，然後開門俾宋文德。宋文德一入嚟就拎住我借俾佢把狩獵小刀，扮同我哋打鬥，最後我同泉叔當然輸咗，訓喺地下扮死。
 
之後落嚟，就係宋文德嘅時間。
 
聽到打鬥聲嘅譚國源，呆呆望向大門嗰邊：「你...你係......重生會嘅求導者！」佢瞪大眼睛，好似唔敢相信自己見到嘅人一樣。
 
「我嚟救你。」宋文德淡然地對佢講。
 
「你係求導者！」即使係食咗大麻，譚國源都居然表現出敬畏嘅姿態，向宋文德跪拜。
 
點解...
 
佢要對求導者下跪？大家唔係都一樣係成員？
 
除非，「求導者」喺重生會中，算係比較高階嘅位置。
 
相信依一刻，宋文德同我有相同諗法。
 
「辛苦你。」宋文德靠前，向佢伸出一隻手。
 
譚國源雖然大過佢，但呢一刻就好似小弟咁，慢慢抬高個頭，猶如得到救贖一樣。
 
佢呢種眼神......
 
唔係講笑。
 
係真係完全信任一個人，乃至到極感動，
 
先會流露出嘅神色。
 
「求導者....可唔可以......」譚國源已經失去食大麻嘅渾噩表情，相反係一面嘅虔誠：「俾教徒一啲指引我，我都想要獲得求導嘅資格......我都想要再次獲得重生！」
 
「但你必須誠實回答我問題。」宋文德說。
 
「明白......」譚國源仍然誠懇。
 
佢表明自己身份係教徒，咁意味住「教徒」係比「求導者」低嘅身份，但可以確定嘅係，兩者都屬於重生會嘅架構之中。
 
「你記得，自己成為教徒一員之前嘅身份？」宋文德開始問。
 
「記得。一個迷途嘅世人，等待死亡來臨嘅人。」對方真誠回答。
 
呢條問題確定咗，教徒就係重生會嘅第一層身份。
 
「你記得，你入教時嘅情況？」
 
「記得...我處於...處...於......人生嘅絕望處。」譚國源跪喺地上，說：「所以我一直為教會做事，只希望可以喺求導路上，得到一席嘅資格......」
 
呢個表示，教徒會為咗成為「求導者」，而為教會做事......
 
可能包括，
 
做任何事。
 
宋文德好似迫不及待，想要知道呢個邪教嘅一切：「將你進入「重生會」之後嘅種種事情同感受全盤話我知，以表示你嘅虔誠。」
 
譚國源毫不猶豫，將一切講俾宋文德同我哋聽。
 
佢嘅故事，大概係咁。
 
一年前嘅某個黃昏時份，因為知道身體有腫瘤而佢從醫院絕望咁走出嚟嘅譚國源，遇上咗自稱「重生會」嘅人。
 
喺對方關心下，獨居嘅譚國源感到一絲慰藉，而參加之後嘅座談會。喺座談會中，譚國源識到一班同樣正經歷人生低處嘅同路人，佢開始感到並不孤單。
 
再喺之後「重生會」舉辦嘅幾次活動中，佢幫手招攬新會員、成為開解別人嘅一份子，譚國源逐漸喺重生會搵到自己嘅意義，而正式成為信徒。
 
而宜一切，都係之後漸漸走向極端。
 
為咗尋求重生、尋求快樂、尋求通往永生樂土嘅「樂園」，佢哋必須要成為求導者。
 
而成為求導者，就需要為重生會付出某樣重要事物。
 
只要完成，就可以進行「重生儀式」，成為求導者一員。
 
簡單嚟講，「重生會」就係一個誘騙他人邪教。
 
先喺醫院宜類地方，搵神情絕望，人生處於谷底嘅目標。
 
一百個人入面，可能會搵到十個。
 
再招攬佢成為一員，開解佢令佢得到溫暖感。
 
十個人入面，可能有六個得到開解後離開。
 
然後，歡迎佢加入「重生會」大家庭，俾佢成為信徒，同時灌輸佢「要獲得重生」等等嘅極端思維。
 
四個人入面，可能得兩個會相信。
 
最後，要佢為重生會付出一樣重要嘅事物。
 
兩個人入面，得一個會真係願意毫無保留地付出。
 
呢一個人，
 
 
就會成為「求導者」。
 
難怪喺鎖羅盆村嘅影片入面，只係見到二十幾個教徒。因為成為「求導者」嘅條件，係經過層層篩選，而且過程極度苛刻。
 
但咁樣，的確係最有效保持教會隱密性。
 
真係好想知......
 
背後控制住重生會嘅到底係咩人。
 
睇嚟可以問嘅，應該都係咁上下。
 
畢竟譚國源身份只係一個信徒，最重要嘅線索應該要喺求導者身上先搵到。
 
「咁你，點解仲未為重生會，奉獻出一樣重要嘅事物。」宋文德問咗條，可有可無嘅問題。
 
「因...為...我暫時未有勇氣奉獻......」譚國源口顫顫，說：「一旦決定奉獻，就必須七日內完成......否則就會遭收到紅神目天譴！原諒我，求導者......我未有勇氣付出......」
 
「何解？」
 
「我唔講得......」
 
「你必須對我毫無保留，我先可以助你求導。」只能說，宋文德已經扮到入型入格。
 
「因...為...我聽另一名，信徒講，佢接受咗奉獻，但要奉獻嘅居然係......」譚國源好難吐出個兩隻字：「家人，佢侄女......」
 
「...你為咗保護家人，而唔接受奉獻，放棄求導機會？」宋文德神情稍為動搖。
 
「唔係！而係我根本無家人，我唔可以奉獻家人俾重生會！萬一重生會要我奉獻家人！咁樣我根本就無辦法完成......」
 
「垃圾。」聽完佢嘅解釋之後，宋文德冷冷一腳踩落譚國源個頭。