《明戀暗愛補習社》: 外傳（下）-澄叔的話
等我轉返粵文先。連載故事去到上集就完，今集係講我對呢個故事嘅少少感想，同埋有一個意想唔到嘅彩蛋。
-
一個由上年六月初開始嘅連載故事，竟然去到一年後嘅十月先完結？其實唔係嘅。連載故事已經喺後記完結，而後記係一個虛構結局，接住第五集嘅故事。咁點解又會有新集數呢？正如上集，我有一次出街見到佢。
-
見到佢別來無恙之後，我就諗除咗一個傷心嘅結局，不如都寫一個現實、而且比較開心少少嘅結局，徹徹底底要令到自己放低呢件事。所以大家就會見到整多個外傳，就係咁解喇！
-
之前喺IG收集咗讀者嘅問題，我就將啲問題整合，喺度一次過答大家。
-
Q：究竟呢個「戴綠帽」嘅故事係咪真㗎？
-
A：其實除咗後記係虛構嘅之外（梗係啦，如果子南死咗又點會有外傳呢！），其他都係我嘅真人真事嚟，甚至遺憾修正師嘅環節都係。遺憾修正師就當然唔係我或者故事台啲編輯去寫，而係一個著名嘅作家叫「理想很遠」去撰寫嘅。嗰陣時佢搞咗個遺憾收集箱，係收集大家嘅遺憾，咁我就去咗投稿。我亦都喺度多謝理想絲先。
-
Q：點解外傳（上）最尾句心底話最尾係「From 一位熱心乖學生」嘅？
-
A：問得呢句，咁你肯定唔記得之前嘅情節，快啲去睇返啦！就係因為之前佢生日，我就send咗段文字俾佢，而嗰段文字嘅下款係咁。亦都係呢段message，我同佢先再次打開話匣子，所以就用返嚟做首尾呼應，暗示返呢個故事真係完，用呢句作為我哋之間嘅開頭，同時亦都用返呢句做我哋兩個人嘅結尾。
-
Q：聽聞你而家又有去補習，會唔會再有《明戀暗愛補習社》第二輯㗎？
-
A：我可以好肯定咁答你，一定冇。我補呢個數學班完全冇女，全部都係仔嚟。所以呢個故事應該應該應該（重要嘅事要講三次）唔會再有乜乜第二輯㗎！
-
Q：咁你當初有冇因為呢件事而傷心？
-
A：傷心就當然有嘅，但「人總需要勇敢生存」，所以就慢慢振作返嚟。大個回想返，呢啲都係人生一個小事啫，冇事嘅。
-
Q：其實個故事係咪你自己一廂情願㗎？
-
A：我都希望係自己嘅一廂情願，如果有多次，我會當初將對佢有好感嘅秘密收埋，咁樣就唔會因為我而傷害佢。
-
Q：如果現實嘅子南睇到呢個故事，你會點？
-
A：吓！睇咗都冇辦法㗎！咁咪多謝佢睇我啲作品囉！同埋多謝佢令到我成長。最後就係希望佢睇完篇文而唔好嬲我，尤其係外傳（上集同下集），因為佢真係好靚好靚好靚，我都唔自覺咁望咗佢一陣。
-
Q&A環節完，多謝各位讀者留言提問。題外話，呢個故事係我第一個自己寫嘅連載故事，一個橫跨一年四個月先完嘅連載故事，呢個故事真係見證住我啲文筆由好垃圾，變成冇咁垃圾，不過都仲係有好多改善空間嘅。最後請各位繼續支持我。
-
《明戀暗愛補習社》呢個故事去到呢度就圓滿結束，唔知大家鍾意邊個結局呢？歡迎留言話俾我知。
-
喂喂喂！大家唔係覺得去到呢度就完呀嘛，去到呢度得一千字鬆啲咋喎！說好了的彩蛋呢？
-
其實本來個故事真係去到上面就完嘅，因為要講嘅都講晒。點知……
-
我又見到佢。
-
你冇睇錯，我都冇打錯，我又見到佢，呢篇文截稿前一日，我又見到佢、我再次見到佢。
-
復課第一日，我去完荔枝角買嘢之後，諗住搭隧巴返屋企嘅，點知我又Miss咗班車，咁唯有搭地鐵，費事企喺街，熱死辣辣咁等下班車。
-
去到金鐘，等緊車之際，有個著住白色校裙嘅女仔喺我後面兜過，咁我用眼尾嘅餘光望咗一下，個女仔熟口熟面，但當然冇認真望啦！話晒佢企喺後面，所以諗住上到車先再確認。
-
上到車，望下個著住白色裙嘅女仔一眼，真係佢，真係子南嚟，佢真係好靚。
-
件事聽落好荒謬，好似我唔夠字就求其搵啲嘢寫咁，但呢件事都係真嘅。絕無因為係故事嘅關係而加鹽加醋。不過之後電話嘅音樂app先更加荒謬，上到車，隨機播放突然播住古巨基嘅《戀無可戀》
-
［共你親到無可親密後，便知友誼萬歲是盡頭。別似親人那麼懷抱我，也別勉強共老朋友手拖手。］
-
呢首歌都未係最癲，最癲嘅係播完呢首講戀愛之後，再嚟一首疑幻似真嘅愛《幻愛》
-
［埋藏著這夢幻，埋藏著這浪漫。明明送我溫柔愛卻很難，流連樂與悲之間。］
-
嘩！我頂啊！乜而家啲隨機播放歌單識得讀心嘅咩。呢兩首歌就好似完全打中我個心咁，曾經係喺心入面最重要，最後都係變咗陌路人，究竟呢段所謂透過文字嘅「感情」係咪我一個人嘅「幻愛」呢？
-
列車穿過隧道，進入高架段，子南放低電話，戴著耳筒聽住歌，望住車外嘅景色，佢嘅背影都係好靚。窈窕嘅身形仍舊，只係我已經唔再係企喺佢隔離嘅人，惟有默默咁望住佢，唔知會唔會其實佢都見到我呢？如果，我係話如果，有日我哋真係相見，你仲會唔會笑住咁同我打招呼，就好似當初我哋見面咁？隨住時間嘅流逝，我哋大概冇可能好似以前咁樣，只會剩低尷尬嘅無言以對。
-
6分鐘嘅車程都係話咁快就完，而喺上集話，如果有機會見到佢，我會親口多謝佢，但我見到佢真係唔敢講。唔通冇啦啦喺地鐵入面行過去同佢講多謝咩！如果咁做，我敢肯定車上嘅乘客都以為我係狗公啦！
-
完喇！完喇！真係冇額外彩蛋㗎喇！唔會再有外傳（下下）集，大家信我。
-
《明戀暗愛補習社》外傳 完
-
P.S.究竟呢篇文有幾多次話佢好靚呢？我都數唔到，因為佢真係好靚。
IG：chingchingstory