《六樓B室》: 特別篇 - Hazel視角 (十)
特別篇 - Hazel視角 (十)
我：「究竟你想講咩呀？」
Hailey︰「我唔知你知道我哋幾多嘢，不過我相信，阿傑可能同你講咗好多，因為你喺佢心目中應該佔一個好重要嘅席位。」
Hailey好像在言語間責怪我和阿傑過從甚密。
我：「我想講，我真係唔會干涉你哋之間嘅感情，我完全冇諗過！」
Hailey︰「就算冇你嘅干涉，我同阿傑都唔會長久。唉，呢啲都唔再重要喇，我已經決定同佢分手！」
我：「吓！」
Hailey︰「我會喺佢醒番之前離開佢，之後唔會俾佢再搵到我。Hazel，到時阿傑醒番，你可唔可以將我陣間講嘅說話講番俾阿傑聽？」
我：「唔……好，你講啦！」
我不知我再可以說甚麼，只有細心去聽Hailey所講的每一句說話。
Hailey︰「你叫阿傑唔好怪責自己，我選擇離開，完全唔關佢懷疑我係徐欣欣嘅事。我同阿傑嘅相識、相戀，都係由謊言同隱瞞開始。自從我發覺我鍾意咗佢開始，我覺得，我哋就算拍得成拖，亦都唔會長久。」
Hailey接續道：「事情係我先講大話，無論以後係點發展，阿傑只會經常疑神疑鬼，會懷疑我仲有其他嘢隱瞞佢，咁樣會好辛苦。不如趁依家我同佢感情唔算好深嘅情況之下分手，我覺得係最好。」
其實，我很想以阿傑的朋友身份，去勸阻Hailey不要離開阿傑。我知阿傑非常喜歡Hailey，不想和她分開。但我有私心，我怕我一開口，Hailey回心轉意，二人復合，他們的關係就會變得更加穩固。我竟然有這種想法，我覺得我真的很可怕！
Hailey繼續說：「我原諒唔到我自己，我呃咗太多人，阿傑、細賢同蘭姨都俾我呃咗。係呀，我仲有一樣嘢想拜托你，你可唔可以應承我？」
我：「可以！」
Hailey︰「蘭姨佢已經醒番，我今日晏晝過嚟睇過佢。佢一見到我，就話我做乜要假扮欣欣，之後就發咗癲咁，喺病房周圍揼嘢，仲話以後唔想再見到我。我已經連番道歉，但蘭姨心情太差，想趕我走，佢仲話如果我唔走，就會自殺。」
Hailey說到這裡，已流下兩行眼淚。
Hailey︰「Hazel，你可唔可以幫我睇住蘭姨？至少你幫手接佢出院，同埋頭幾個禮拜多啲留意吓佢。」
Hailey的語氣好像永遠都不會再回來似的。她不會自尋短見吧！
我：「好，我應承你！」
Hailey：「你叫阿傑死咗條心啦，我今次係好堅定，並唔係想耍啲咩手段，唔係為咗激阿傑，搏佢嚟搵我、氹番我。我會cut咗我用開嘅電話卡，而佢亦都唔能夠再經whatsapp、facebook或IG搵到我。」
我：「你就算點避阿傑，阿傑都會鍥而不捨咁搵你。」
Hailey︰「我都話你同阿傑唔止係朋友咁簡單啦，睇你幾了解佢。」
我：「我……」
Hailey︰「我走喇，記住等阿傑醒番之後，同佢講番我頭先講過嘅說話。」
Hailey說完這句，就轉身離去。
※※※※※時間線 - 第三十五章※※※※※
Hailey的說話，一直在我腦內無限loop。我生怕到時會講漏，所以一直都不敢忘記。
而且，我有了乘虛而入的念頭，想趁現時阿傑和Hailey之間的緊張關係，去從中介入。我很想擁有阿傑！
有這種想法，我真的看不起自己！
第二日，我依舊到醫院探望阿傑，可惜他依然未醒。
我又過去探望一下蘭姨。我不覺得蘭姨情緒特別差，可能在我心目中，蘭姨一向也是這樣瘋瘋癲癲。她也只是正常用對待鄰居的態度來對待我，沒有甚麼特別。
一直到晚上，我仍不願離開。我想阿傑醒來的時候，第一眼看見的是我。唉，譚志傑，究竟你有何魔力，去令到我為你茶飯不思！
「Hailey！」阿傑突然大聲叫喊。
我立即撲過去阿傑的病床，緊緊地攪實他。
我：「阿傑！你終於醒喇！嚇死我呀！」我不禁流下眼淚。
阿傑：「冇事喇，我醒咗喇，冇死到！你可唔可以扶我坐起身？」
我扶阿傑坐在病床上。
阿傑：「我暈咗幾耐？」
我︰「差不多兩日㗎喇，依家係夜晚十一點。」
阿傑：「Hazel，好多謝你呀，你陪我陪到咁夜！好多謝你！」
我︰「唔好多謝我，你頭先醒番，第一個都唔係嗌我個名，枉我陪你陪咗咁耐！」
我不知自己為何要這樣說，阿傑醒來嗌Hailey是正常的，我又為何要呷這種乾醋呢！
阿傑不知怎樣回答我的野蠻行為。
我︰「我講笑咋！醒番第一個梗係嗌自己女朋友個名啦！」
阿傑：「Hazel，你對我好，我係知道㗎。我唔知點樣報答你……」
我搶著說︰「我一落機，返到屋企樓下已經知有大獲嘢，知道你中槍入咗醫院，我就即刻仆過嚟睇你喇！你好返之後，你要請我食幾餐飯啦！」
我伸一伸舌頭，扮可愛來遮醜。
我還有一個重要任務要做。
我︰「我有件事，一定要同你講清楚。」
阿傑：「哦。做乜突然咁認真嘅？」
我︰「喺你仲係昏迷緊嘅時候，Hailey嚟過。」
阿傑：「佢係咪仲嬲緊我懷疑佢係徐欣欣？」
我︰「佢冇嬲，只係嬲佢自己。」
我將Hailey昨晚在醫院跟我講的說話，一五一十講給阿傑聽。阿傑聽到半路，已經流下了男兒淚。他，的確很愛很愛Hailey。
阿傑：「唔係咁㗎，件事唔係咁㗎。我唔會再唔信佢㗎喇！」他立即拿起手機，想打電話給Hailey。
我︰「冇用喇，Hailey今次好決絕，佢已經改咗電話號碼，連facebook同IG都剷走埋，佢唔會再俾你搵到。」
阿傑：「點解會咁㗎！點解會咁㗎！」
我由得他繼續大哭，現在甚麼安慰的說話，對他來說都應該不管用。
過了數分鐘，他終於收到聲。
我︰「仲有一樣，就係蘭姨喺你昏迷緊嘅時候醒番。Hailey有去睇過佢，蘭姨好似發咗癲咁，喺病房周圍揼嘢，話Hailey呃佢，仲話以後唔想再見到Hailey，如果唔係，就會自殺咁話。可能係因為你，加埋蘭姨，令到Hailey想走。」
其實，我還想跟阿傑講，Hailey有少許誤會我和他之間的關係，但說來又好像沒有意思，最後沒有說。
※※※※※※※※※※
我從醫院接回阿傑和蘭姨回家之後，大家的生活好像又變回平常一樣，除了阿傑失去了Hailey這件事情之外。
在日本巧遇的舊朋友，最近經常約我去街。雖然我借故拒絕了他數次，但他還是鍥而不捨地約我，最終我也赴會。可是，雖然我對他也有少許好感，但和他相處的時間，我竟然想著阿傑，這樣對他實在太不尊重。
唉！我不知往後的日子如何，也不知阿傑最終能否找到Hailey。作為阿傑朋友的我，其實很想看見他們能夠開心結果。但在我內心深處，我真的有一絲希望阿傑找不到Hailey，想他們會分手收場。這就是最壞的心眼嗎？
(特別篇 - Hazel視角 完)