《我的MK妹同桌》: 8
之後我同呀詩都好乖，做下功課溫下書，兩個人係喱個細小嘅空間入面，係幾幸福。
真正嘅幸福，唔係在於我有無同呀詩扑嘢，錫啊之類，而係你哋兩個可以咩身體接觸都無，舒服地做自己，仍然會有嗰一種幸福感。
愛意並唔係只有靠咸濕嘢衍生出嚟，有時一個眼神已經足夠睇到佢嘅靈魂。
我好想就咁將時間停係喱度，無限loop就好。
不知何解，有呀詩係度我溫書溫得特別專心特別入腦，有種好熱血嘅感覺。
好快呀媽就煮好飯叫我哋出嚟食飯。
「老豆呢？」
「返緊嚟啦。」呀媽講完嘅下一秒，就聽到鎖匙聲，「嗱，就講就到。」
老豆一返嚟，呀媽就叫佢埋位食飯，老豆愣住咁望呀詩，然後一聲驚呼，問呀媽：「呀仔咁快帶女朋友上嚟？」
「係囉，我都估唔到咁快。」呀媽明知咩事，都照幫呀爸口，不禁令我懷疑佢哋係咪想chock我⋯⋯
「唔係囉，我同佢只係同學⋯⋯」無人權嘅我俾老豆老母無視。
「嗨，同學仔，你叫咩名啊？」老豆好快坐低飯枱度，勁nice咁問呀詩，完全當我無到。
「Hi Uncle，我叫呀詩啊。」呀詩係大人面前好有禮貌，扮到好成熟，形成一種好突兀嘅反差感。
「老婆，乜今日咁好餸啊？」老豆望住成枱餸，開心地道。
我以為保守嘅佢哋會為難呀詩，點知咁nice，咁順利？定我諗多咗？
餐飯食得好溫馨，好似呀詩已經係我條女，我哋依家見緊家長咁。
食完飯後，呀詩好自動自覺咁幫手執碗洗碗，呀媽仲同佢有傾有笑，個畫面成個愛回家咁⋯⋯
我老媽子落order叫我執好間客房俾呀詩，我哋搞掂之後就輪沖涼，我哋紛紛叫呀詩沖先，因為佢係客人。
呀詩沖完涼出嚟，入我間房叫我沖涼。佢一邊擦乾自己嘅頭髮一邊行入嚟，好想同佢生活，一定好精彩⋯⋯夜晚，嘻嘻！
佢著住我件T恤，因為大件得制而變成oversize，嗰陣唔知咩係oversize，總之就覺得好靚好性感，就算著住我條大碼短褲，都遮唔住佢嘅性感。
甚至我覺得女仔著睡衣仲靚過著婚紗。
「到你啦。」呀詩一嘢坐落嚟。
坐係我隔離，利用嗰僅餘嘅位置慢慢推我走，好明顯佢係嚟搶我位⋯⋯
「喂！」我俾佢咁嘅動作整笑咗，邊有人好似佢咁無賴㗎？
「快啲去啦，去去去。」佢隻手好似趕狗咁樣。
我執好衫之後，就搔佢癢。
「喂啊～～～～」呀詩淘氣地係塊面度鼓起兩個波，最後嗰兩個波爆撚咗氣，忍唔住笑出嚟。
我係間房一行出嚟關埋門，就撞正老豆係間房行出嚟，我老豆同老媽子唔一樣，老媽子平時份人好似無乜殺傷力，但其實背後係收埋一把刀；老豆就真係好鬼馬，大癲大肺咁。
老豆用隻手俾咗個like，用力地拍我膊頭，似乎想同我講：你真識食。
入到廁所，仲殘留住呀詩嘅香兒。
沖涼係思考嘅最好時候，好多學術啊學問等理論都係沖涼嗰陣領悟出嚟。我一邊聞住呀詩留係度嘅香氣，察覺到自己對呀詩嘅鐘意一次比一次強烈，甚至強烈到唔介意佢所有嘢，只要擁有佢就足夠。
搞掂曬之後就安排呀詩去客房度，忽然間佢一本正經地同我多謝。
我滿頭問號，問：「做咩無啦啦講多謝啊？」
「多謝你俾咗個家我，就算係呀彥屋企，無都喺喱度感受得咁強烈，而且我好羨慕你有個咁好嘅屋企。」
「哈哈。」我乾笑兩聲，「咁⋯你想唔想做我女朋友啊？」
我股起第二次勇氣，唔知係咪開放心胸，今次問起上嚟無上次咁緊張、咁猶疑。
「我好想⋯⋯」呀詩好坦白，「但我同呀彥未解決完，我知你可能會唔介意，會理得佢死，但我過唔到自己。」
「而且我唔想做咩MK妹⋯」
「你知唔知我點解咁努力讀書？之前點蒲法，我都會俾心機讀書，因為我真係好想改變我自己，我想變好，我剩係得讀好啲書去改變自己將來。」
「之前做MK妹都係想改變，但好似行錯咗路。」呀詩苦笑道。
呀詩嘅苦笑真係令我好難忘，其實我知佢都受咗唔少苦，佢想要嘅，係好簡單嘅一份溫暖。
好似今晚平平無奇嘅一餐飯，卻係佢最珍而重之嘅溫暖。
「做MK妹唔好咩？」我笑著反問佢。
「咁你想唔想做呀彥咁樣嘅人啊？」我反駁唔到。
「道不同便不相為謀㗎啦。」
「咁你幾時同呀彥斬纜啊？」我怕我遲下忍唔住啊⋯⋯
「快㗎啦，我依家都仲驚緊佢，反屋企都驚啊。」MK仔癲起上嚟真係認真癲啊⋯同古惑仔同level。
「一係咁啦，聽日開始我送你返屋企囉，我唔會俾佢搞鳩你！」我幾難得先man一次。
「係啦係啦。」呀詩甜甜一笑，瞇起隻眼也很動人。
「你知我鐘意你咪得囉。」呀詩再補一句。
因為佢喱句，我已經做好打架嘅心理準備，有啲位，無得怯。
「做咩啊？唔捨得走啊？」呀詩見我呆咗咁企係度唔郁。
「係啊。」我老實答。
「你屋企人係度㗎，如果唔係佢哋會當我係啲咩唔三唔四嘅女仔。」
「快啲返去瞓啦！」呀詩推我出房。
我個處男之夜啊⋯⋯講笑，哈哈！我暫時無咁樣諗，想保留到最好最合適嘅時機吧？
嗰晚我自己係房打咗兩次飛機先平復得落嚟。
第二朝起身，係呀詩叫我起身，隱約見到佢已經換好曬校服，我一陣失落，我仲想睇多啲佢睡衣嘅模樣⋯⋯
「起身啦，返學啦。」呀詩柔聲地道，好似天使咁把聲，有一刻仲以為自己發緊夢，好唔真實，load咗陣機先上線。
「死身啦咸濕仔！」
我平時有賴床嘅習慣，我會想攤多陣。
「嗯⋯⋯知啦。」
呀詩重複叫咗我幾次都係咁，正想轉身走，我就醒了。
我想捉住佢，點知我捉到佢隻腳，而佢個腳位啱啱好無俾條裙擋到，我諗大約係膝頭對上小小嘅位⋯⋯
我一嘢攬住佢隻腳，成個變態咁摸呀詩個大脾，呀詩俾我嚇撚親。
「喂⋯⋯仆街仔，你狼死到咁？」
呀詩一路走，我就俾佢拖落床，我死都唔放手㗎啦。
「你個死變態，跌落床都唔撚起身。」
「你起身我就獎勵下你啦。」聽到喱句，我雙眼發亮，呀詩俾得嘅獎勵一定係好嘢！
我繼續瞓係地下，鬆開呀詩隻腳，然後伸隻手俾呀詩，示意叫佢拉我上去。
係佢面前，我可以戇鳩，可以小朋友。亦因為可以係佢面前可以做返自己，而令我愛得越嚟越深。
愛有幾深，就可以有幾痛。有時愛就係一把利刃，越深就越痛。
「喂⋯」
「快啦。」我要求。
最後佢唔情願咁拉住我，點知俾我一嘢拉咗落嚟，我以為自己會好似啲偶像劇咁好型好sweet㗎嘛。但現實真係兩回事⋯⋯
唔好睇戲太深啊大佬，睇故好啦，夠貼地。
因為我一拉呀詩落嚟，諗住嘴落去，點知拉落嚟嗰一嘢，撞落個頭度，痛到仆街。
呀詩起身嘅時候直呼痛痛痛，我也同樣。
「你仆街，叫你起床就要搞咁多嘢！」
「Sorry⋯⋯」我見到呀詩痛到就嚟喊咁，我無可能唔知呀詩有幾痛，因為我同佢一樣痛過。
我憐惜地摸著呀詩嘅額頭，而佢都好受落，成隻小貓咁。
佢搥咗我幾下，責備地道：「下次唔叫你起身啦！」
「好啦好啦，起身啦。」我唔會再玩嘢。
點知原來真係差啲遲到，趕頭趕命咁返學校。
而係入學校嗰陣撞到同班嘅健三，佢嗰個眼神唔方係咩好嘢⋯⋯
係學校，當你見到一男一女返學校，大多數係有嘢，所以俾人撞到然後誤會都已經實屬正常。
我哋只好硬住頭皮咁行入班房，接受眾人嘅眼光。
嗰一日放學，我送呀詩返屋企，我諗係我第一次入公屋，嗰個環境真係幾惡劣，而呀詩就住係最入面，我護送到呀詩門口，而經過呀彥屋企嗰陣，佢嗰度係緊閉嘅。
「多謝你送我返嚟啊⋯⋯」呀詩係門口同我講。
「但佢無出現喎，我以為佢會係度等你添。」我頭先嚟嗰陣都做好心理準備。
「無咪由佢囉，佢你出現唔係仲好咩？」呀詩似乎鬆咗口氣。
「好啦，你自己小心啲啦，你有咩事記得搵我喎。」
「知道啦！」呀詩笑了笑，然後我哋揮手道別。
「記得打俾我啊！」臨走前我叮嚀。
係我落到樓下行返去地鐵站搭車走嗰陣，路經一張乒乓波枱，見到呀彥拖住條女坐係張乒乓波枱上面。
我睇唔過眼，行過去，好撚惡咁同呀彥講：「喂！死MK仔。」
我平時份人好鵪鶉，但一諗起呀詩都為我做咁多嘢，我就把幾火，我人生中從未試過咁嬲，我都俾自己嚇親。
「乜料啊？」佢串柒柒咁款。
「話鳩你啊，唔得啊？」我指撚住隔離條MK妹，「隔離嗰位呀嬸邊位啊？」
「乜撚嘢呀嬸啊細佬。」喱條MK妹染咗一邊紫色嘅頭髮，留住一個齊陰咩咩頭，化勁濃裝，叼住死人煙，著住件背心，係個膊頭位有一個紋身。
大家同是MK妹，喱個MK妹帶點邪氣，同呀詩無得比，其實呀詩心地不知幾善良。
不禁令我諗起當初喺圖書館遇見嗰個四眼仔當值員，我到依家先徹底相信呀詩嘅善良。
「佢邊位啊！？」我大聲地向呀彥喝道，成條走廊都係我啲回音。
「關你撚事啊？」呀彥一嘢係乒乓波枱跳落嚟。
「關呀詩嘅事就關我條撚事啦！」我無俾佢落嚟下氣勢嚇親，依家好似背後有股力量係度燃燒緊，推動緊我。
「挑⋯⋯你咁鐘意條舊菜咪俾你囉，反正我都已經玩厭咗啦，件二手閪留俾你慢慢玩啦。」呀彥好撚囂張。
我再忍不住了，一嘢打落呀彥塊面度。
「屌你老母，死仆街！」我隻手仲痛緊，可見我打出去真係幾大力，原來打人都會痛。
條MK仔後退咗幾步，呆咗幾秒，然後用粗口鬧返我：「仆你個臭街！」
跟住衝埋嚟起腳踢落我個肚度，係佢踢埋嚟嘅一瞬間捉住佢隻腳，將佢拉出去，佢成個人飛咗出去。個MK妹即刻撲過去關心佢，點解咁撚仆街嘅MK仔都咁多人鐘意？啊⋯⋯唔係，已經唔係仆街了，係人渣。
「你試下搞鳩呀詩，我真係會同你死過，我就睇你其他MK仔有幾把炮！」我指撚住兩條死MK嚟屌，一邊走一邊屌。
因為我見到呀彥好似想企起身打鳩我，成隻癲狗咁，我淆到想即刻走。但又唔想走得咁無霸氣，唯有裝作好似咩都唔撚怕咁款，只不過心裡面驚到要死姐⋯⋯
我就好似古惑仔入面山雞、大天二係球場嗰幕咁，最後跑走嗰下俾人喝咁。
我快步行走個屋村，我驚遲下好幾個MK仔圍住我，我見呀彥無追嚟，算係成功逃脫。
仆你個街，我隻腳仲軟緊，毒撚嚟，我今日都算勇啦！睇你班MK仔仲敢唔敢恰啲毒撚。
不過通常啲MK仔都係欺善怕惡㗎啦，對住佢哋無得淋㗎，一定要硬起來⋯⋯
掌頭就留俾MK仔啦，碌鳩就留俾MK妹。
唔知呀詩係咪俾人戴綠帽呢？係返屋企嘅途中我諗咗好耐喱個問題。
係咪應該同呀詩講呢？等佢仲對呀彥咁認真，話要解決完先⋯⋯唉，內心十分之忐忑。
翌日，我返到學校，無幾耐呀詩都跟住入嚟，我見佢一臉倦容，令我懷疑琴晚呀彥係咪有搞佢。
「你個樣咁攰嘅？」我試探著問佢。
「下？會咩？」呀詩不以為然。
「可能琴日溫書溫得晏掛，都瞓唔夠。」
哦，溫書姐，嚇親我。
「做咩要溫書嘅？」
「下？乜你唔知咩？今日有三科小測喎。」唉仆你個⋯⋯唔講太多粗口啦。
唔係掛？我溫都無溫過⋯⋯
「做咩啊？咁嘅樣嘅？」呀詩關心我。
「因為我完全唔知囉，我都未溫過。」我諗住即刻喺書包拎嘢出嚟溫下，臨急抱下佛腳都要。
「大佬，你連溫邊都未知喎⋯⋯」
係喱個時候，嗰個淨係講書面語嘅戇鳩班長又嚟追功課，不知就係嚟追我嘅。
見到佢望住呀詩，神情有啲怯，淆到一直企係我側邊，間唔時會偷偷地瞄下佢。
「請交功課。」班長要求道。
「我無做數學啊。」其他我咩都交齊，我望一望呀詩，佢明我要講啲咩，好自然就答我：「我一返嚟就交咗先啦。」
「還有⋯⋯你⋯⋯你⋯你們會去我們的班會活動嗎？」班長戰戰兢兢地問，個「們」字都拖住嚟問，好明顯係想問埋呀詩但又唔夠膽，驚呀詩融咗佢咩？
「一陣答你啦！咪阻住呀叔溫書啦。」我趕咗班長走。
呀詩略有所思地低著頭。
「做咩事啊？驚一陣小測炒粉啊？」我大約猜得出佢擔心啲咩，但一定唔係小測囉，我故意亂講。
「痴線啦你，你擔心下自己好過啦！」呀詩喺佢書包拎咗佢本筆記出嚟俾我，我估唔到要一個MK妹教返我讀書轉頭⋯⋯
咁佢成績真係好啊嘛，我吹佢唔漲拉佢唔長。
「我諗緊去唔去嗰個班會活動好⋯⋯」睇得出呀詩真係好猶豫，你睇下佢條眉就嚟可以夾死烏蠅。
「去囉，洗乜諗姐。」我比較擔心我個小測多啲。
本來我並唔著緊自己啲成績，覺得無咁重要，但我唔多唔少都俾呀詩影響咗，因為當你見到一個MK妹都發奮圖強咁讀書，你就會好想同佢行喺同一條路上面。
係咪好勵志呢？
「但我同佢哋都唔熟，而且我知佢哋唔多鐘意我，因為我MK囉。」呀詩坦然地道。
我知呀詩其實係想改變，想慢慢行出MK界，只不過每一次改變都會遇上好大阻力。
「咁難得人哋會想問你，咁當俾個機會人，俾個機會自己囉。」
「佢哋邊度有想問我啊？」
「你無睇到頭先個戇鳩班長咩？佢係問我哋啊，我⋯⋯哋，OK？」我指住自己跟住又指住呀詩，佢唔似咁蠢喎。
「咁⋯⋯」佢都仲係15，16。
「放心，有我係度喎，怕乜姐！」
原來呀詩係度改變自己嘅同時，我自己都係，我自己都因為咁而變得勇敢，應該係話必須勇敢吧？
啲人話愛情係盲目，會改變一個人，原來係真㗎。
「咁你幫我同佢講啊⋯⋯唔該！」我第一次見呀詩會淆底，平時佢天不怕地不怕咁款㗎嘛。
睇得佢係真心，想試下同我哋班嘅人融入一齊。
然後我就幫呀詩報名，而是次班會活動，係去石澳BBQ，身為一個港島撚，石澳BBQ已經去過好多次，不過今次係我哋班第一次搞喱啲活動。
當我同班長講呀詩都去嘅時候，佢隻眼大到就嚟可以望得穿我。
「喂，幫你報咗名啦。」我返嚟同呀詩講，「每人要俾住100蚊買嘢食先喎。」
「好啊！」呀詩滿掩內心嘅雀躍，因為咩都寫曬係塊臉上。
時間定係今個禮拜六，聽聞今日搞班會嘅係一個係班上平時好雀躍嘅男仔，世界仔嚟。
又多女又多仔fd，每班入面，都總有一個係負責搞下氣氛嘅，有時唔一定係一個，可能係兩個，甚至係一班人咁。
而嗰個男仔就係搞氣氛嗰個。
包括啲咩呢？
包括上堂鳩講下嘢，串下老師，引下班女同學笑啊，同埋問下啲無聊問題。
仲有搞班會活動，好似今次咁。
喱幾日開始轉涼。秋天，係搞BBQ嘅好時機。
我約咗呀詩係筲箕灣站等，一陣就一齊坐小巴入石澳。因為我哋已經遲入去，所以睇下仲有無咩嘢要加，然後係對面筲箕灣街市度買嘢入去。
我同呀詩唔同台，但都要用㗎啦，我仲用緊Sony Ericson嘅推機，係地鐵站入面等緊呀詩。
呀詩姍姍來遲，我好似第一次見呀詩著便服，平時都係校服居多，原來已經發生咗咁多事。
呀詩佢今日著得好MK，果然陣MK味仲係度。
佢著一條牛仔熱褲，然後隻腳著絲襪，配上一對Converse經典版，俗稱公廁鞋。上身著咗件黑色T，配一件灰色開胸有帽外套，揹住返學用嘅Outdoor書包。
呀詩只不過係一個外表MK嘅MK妹，而上次嗰件喺由頭到腳，由內到外都徹徹底底地MK。
「快啦，我哋遲到啦。」我催趕佢。
「Sorry我瞓遲咗⋯⋯」呀詩一臉唔好意思，然後快步行係我前面，匆匆忙忙咁。
望住呀詩嘅背影，我覺得佢慢慢變緊，反而令我有種陌生感。
我打俾啊搞手，問下有咩買，佢話漏咗買雞翼叫我買啲雞翼入嚟，買大約15人份量就夠。
我同呀詩買完之後就坐車入去，係小巴上面，呀詩無乜點出過聲，睇落好似唔開心咁款。
我都自動自覺唔煩佢，等佢自己靜下。
落車後，我哋行去搵BBQ場，落車無幾耐，呀詩就忍唔住同我講：「我今日好唔開心。」
嗯⋯我feel到，但我同佢講：「你想講就同我講啦，你依家唔想講就唔好講啦，一陣去BBQ就開心返㗎啦。」
呀詩沈思咗一陣，覆我一個嗯字。
去到BBQ場，搵咗先搵到，佢哋霸咗個最入面嘅爐，去到佢哋已經起曬爐，開開心心，圍威威咁燒緊了。
「哇！你終於嚟啦？」個搞氣氛嘅世界仔叫呀Ken，幾高大有型，又無乜MK味，聽聞班上有幾個女仔都鐘意佢。
「嗱！」我遞俾佢之後就同呀詩搵咗位坐。
「嗨⋯」其他人都尷尷尬尬咁同呀詩打招呼，更顯得呀詩格格不入。
「唔洗理佢哋㗎，你玩得開心就好。」呀Ken安慰呀詩，緩和下喱個尷尬嘅氣氛。
本來我對呀Ken都無乜防備心，只係見佢純粹搞笑，想大家開心啲咁啦。
但後來見佢對呀詩獻曬殷勤就知佢唔係咁簡單。
不過我又係衰仔嘅，俾健三佢哋捉咗去同佢哋吹水，佢哋拉住我坐去佢哋嗰邊。
咁我喺班上面又唔係無朋友嘅，但呀詩唔係，我見呀詩對我欲言又止，最後無奈地向我報以微笑。
自己坐埋一邊燒緊嘢食，本來已經唔開心好似又再唔開心多一層。
當時嘅我唔夠成熟，亦覺得應該陪下班朋友，自以為可以兩邊都拿捏得好，但原來唔係。
呀Ken無幾耐見呀詩自己孤伶伶無陪咁，人與人之間嘅隔膜可以好容易打破，亦可以隔重山。
呀Ken就行埋去幫呀詩燒嘢食，坐係對面嘅我將所有過程都看在眼內，本來呀詩都有禮貌咁婉拒，卻係呀Ken嘅熱情底下（係我眼入面只係死纏爛打），呀詩都接受咗。
我心入面好不是味兒，為咗呀詩，我個心都唔知酸咗幾多次了。
而呀Ken喱款世界仔就係狗公嘅前身，對咩人都好有一套，對女更準備了另一「套」。
無幾耐，我就將自己燒嘅嘢留低，一塊扒兩隻雞翼，幾粒丸，用個碟裝起佢就坐返埋佢度。
「嗱。」我遞俾佢。
「做咩姐？我自己唔識燒咩？」呀詩傲嬌地說，努力地燒緊佢條腸。
「攞嚟啦。」我搶過佢手上面嘅腸仔嚟燒。
「洗乜姐！你去搵你班fd囉⋯⋯」好難得嘅，竟然會係呀詩口中聞到陣醋味。
心入面係幾開心㗎，因為呀詩至少喺喱啲位係著緊我，但煩惱嘅係唔知點氹返佢。
「我唔想俾嗰條友幫你燒，更唔想你食佢燒嘅嘢。」
本來呀詩都仲死都唔敢放手，佢聽到我講之後先肯放手，走去食我燒嘅嘢食。
「屌你！濃嘅？」又要食，又要嫌，又要屌曬鬼。
「混你個帳，咁唔好食囉？」我想搶返返嚟。
「嗱，我食過㗎，有我啲口水尾㗎。」天真嘅佢以為咁就威脅到我？實在太傻啦。
「你覺得我會怕你啲口水尾咩？啲口水尾仲好食過隻雞翼啊。」
我作勢想奶佢食緊嘅雞翼，呀詩驚呼：「喂啊！死核突佬。」
呀Ken喱個時候走埋嚟，問呀詩：「我喱啲有個啱啱燒好嘅雞扒啊，你要唔要試下啊？」
呀Ken一出場，我就知道係一場戰爭，其實小毒撚又邊夠人鬥啊？但小毒撚都會為咗人做佢哋想像唔到嘅事，只要你唔睇小自己。
「你見唔見到佢咁多嘢食啊？佢邊度食得曬啊？你去問下其他人食唔食啦。」
簡單啲講，姐係叫佢「滾」。
呀Ken走咗之後，呀詩笑笑口地同我講：「但佢隻雞翼望落幾好食喎。」
「佢嗰塊雞扒嚟㗎喎。」我駁返呀詩，「雞翼係我燒㗎喎！」
「嘻嘻！佢頭先都有燒啊。」呀詩調皮地道。
「唔準啊！！！」
我唔理旁人嘅眼光點樣望我哋兩個，相信依家實有人覺得我哋係度打情罵俏，因為就係頭先同健三佢哋坐嘅時候，佢哋同我傾過一個問題。
「喂呀強！」喱位叫呀偉嘅同學仔嗌我，我哋班嘅男仔都算玩得，雖然無健三啊小二嗰啲咁熟，但都不俗的。
「嗯？」我仲係度望緊呀詩同呀Ken，好想知佢哋係度傾緊啲咩，繼呀彥之後又多咗個呀Ken。
「你係咪鐘意呀趙完鬆啊？」佢問道。
我聽到呀偉問我咩，我猶豫咗幾秒，諗緊係咪應該講真話，係我諗緊嘅同時，呀偉以為我聽唔到，就推一推我。
「咩啊？」我只好裝作聽唔到。
「我話，你係咪鐘意呀趙完鬆啊？」
「係啊。」我想坦白承認，同埋我都想宣傳出去，等個呀Ken不要太囂張。
「下？真係㗎？」佢哋有啲唔係幾信。
「係啊做咩啊？」
「屌我都話㗎啦！又唔信。」蕃薯仔係一旁撘嗲。
「頂，我點知佢會鐘意個公廁先得㗎。」班友把口真係臭過公廁。
「你哋唔知頭唔知路就咪嗡咁多啦屌你哋。」我臉帶嚴肅。
「咁佢有無真係做過援交啊？」然後又多一個嚟插嘴，仲要睇嚟問咗個其他人都好想知嘅問題，因為我感受到佢哋熾熱嘅眼光。
「屌你哋班撚樣，積下口德得唔得啊？」今鋪已經第二次，正正我知佢份人係點，我先會咁理直氣壯咁屌柒佢哋。
「咩姐，我哋都係想知咋嘛。」佢哋俾我屌到縮一縮，我已經唔再係以前怕事嘅我。
「你哋又了解過佢幾多姐？人哋MK啲就話人援交。」我唔敢講得太大聲，因為呀詩係度，如果唔係，佢想埋堆都埋唔到。
「呀詩唔係你哋諗到咁，你都未撚試過去接觸人就覺得人哋點點點。」
「我哋怕你鐘意人，點知中伏咋！」好彩嘅係，健三佢哋都仲係心平氣和咁講，我心入面怕因為咁就反面。
我靜落嚟，同時間想俾自己冷靜一下。
「我知㗎啦，正因為我知佢係咩人，我先會咁講，呀詩唔係你哋諗到咁。」隔咗一陣我同佢哋講道。
「你知就得㗎啦，明明鐘子晴正咁多，做乜鐘意個MK妹呢？」蕃薯仔鐘意子晴鐘意到出曬面，一個毒撚鐘意乖乖牌女神，個鴻溝分分鐘仲大過MK妹。
子晴係幾靚嘅，白哲嘅皮膚，精緻嘅臉蛋，加上乖乖女嘅氣質更顯得佢文質彬彬咁。如果話港女嘅前身係MK妹，咁文青女嘅前身就係喱一type。
只不過咸魚白菜各有特色，各花入各眼，我更喜歡呀詩嘅直率，俾我一種舒服感，而係子晴面前會周身唔自在。
而我哋喱班男仔，成日都做波俾蕃薯仔同子晴。雖然我哋男仔平時成日講邊個邊個靚，邊班嘅班花啊，甚至仲要揀埋級花，但真正鐘意嘅，往往唔會係喱啲人選，對不？
蕃薯仔要鬥嘅，喺咩女都溝嘅呀Ken，同埋隔離班嘅瘋狂追求者，喱個又可以寫另一個故仔了。
「係你唔識食姐！」我惡返啊蕃薯仔轉頭。
後尾有人叫蕃薯仔去燒嘢食俾子晴食，轉走咗個話題，佢先至燒隻雞翼過去，真係踢一踢先郁一郁，仲怕醜話唔係幾敢⋯⋯