《我的MK妹同桌》: 11
「咁你鍾唔鍾意啊？」我忍住痛問，提起佢嗰隻已經戴咗手繩嘅手，輕撫住問。
「鍾意就代表你可以呃我啦？」我感覺到呀詩態度開始軟化落嚟，只不過睇嚟佢對呃佢喱樣嘢好介懷，不禁令我諗起呀彥喱條MK仔對呀詩做過啲咩。
「好⋯⋯我唔應該呃你。」我投曬降，將呀詩輕擁入懷。
績道：「我想俾個驚喜你，我知你唔捨得買個手繩，覺得佢好貴，我哋依家錢真係唔多，平時lunch食個35蚊嘅飯都嫌貴，但我哋啱一齊無幾耐，咪當喺定情信物囉。」
喺熙來攘往嘅朗豪坊入面，我拉住呀詩企埋一邊。
「都唔知你係邊度學埋曬啲咁sweet嘅嘢！」呀詩係我懷裡柔聲地道，「講！係咪出面有第二個教你嘅！」
「邊有啊⋯⋯」我係呀詩額頭上輕輕一吻，擁有佢，已經係最幸福嘅事了。
「我知呀彥之前對你唔好，而我又未拍過拖，你經驗多過我，我有時會有得唔好嘅時候⋯⋯」
「我想你捉住我隻手，一步步教我，一步步同我向前行。」
「而且我好傻仔㗎，我唔明感情世界爾虞我詐，我淨係識得交個心出去咋。」
「我想你好好地保管好我個心⋯⋯好似條手繩咁。」
「傻仔先呃你嚟喱度，買條咁貴嘅手繩俾你咋！」
「哦！你肯認你係呃我嚟啦咩？」呀詩泛紅嘅臉龐帶著幾分羞澀，問道。
「喱啲叫驚喜！咩呃呃聲咁難聽。」我反駁道。
呀詩俾我逗笑，然後主動係我嘴唇上印落嚟。
「我咁MK，點解你仲咁鍾意我嘅？」一吻過後，呀詩突發其想地問我。
「鍾意一個人有點解嘅咩？之前我無同你講過點解咩？」我記得明明有講過囉。
「咩啊？邊有啊？！」
「呢，小巴嗰次呢⋯⋯」我提佢，我記得都有講啊，又問？
「邊度有！明明就無。」由呀詩飄忽嘅眼神我就知道，呀詩好明顯係死撐。
「我話無就無啦！」呀詩使出絕招——賴地硬。
「係咪依家講多次都唔得姐？」
「得得得。」有點無奈地道，啲問題難答過啲試題。
我哋一邊行下旺角一邊傾喱個問題，講幾多次都喺同一個答案，而之後嘅日子，喱個問題從來都唔會缺乏㗎喎，周不時都會問我一次，間唔中會改變下個形式嚟問。
例如：你愛唔愛我、你鍾意我啲咩、邊個同我，你鍾意邊個多啲。
初初我都唔明，甚至覺得煩厭，問完又問⋯⋯做乜鬼姐。
但漸漸我就明白，男人嘅角度，好多時唔想咩都講出口，行動最實際，男人老狗真係唔好咁婆媽；而女人，係鍾意你講出口，即使佢心入面比任何人都清楚，瞭解你係愛佢，但佢就係想親口聽你確認一次。
無非都係想要啲安全感姐。
「我鍾意你MK底下嘅率直，唔造作，就算你平時再點樣扮曬堅強都好，其實你內心係好脆弱，好細膩，好溫柔。唔慢慢去了解你，係根本發現唔到。」
「其他人對你有好多誤解，係因為佢哋唔了解你。當我慢慢因為鍾意你而想去了解你嘅時候，就知道你其實受咗好多委屈，我唔想你自己一個死撐死頂，其實我可以幫你分擔，只要你想。」
「鍾意上你可以好簡單，但愛上你就好複雜，點講都講唔完咁。」我哋一路掃街一路係度講，無啦啦變咗認真討論嘅題目都有，好撚跳脫。
呀詩話佢請掃街喎，話見我洗咗咁多錢，唉⋯⋯我買完之後真係無乜錢，好彩呀詩話請我，食咗塊台灣雞排同一碗燒賣魚蛋就收皮。
第一次係會答得詳盡啲，後尾就越答越hea。
「你愛唔愛我啊？」
「愛。」
「你鍾意我啲咩啊？」
「夠MK。」
「你鍾意我身上咩部分啊？」
「條腿。」
「姐係話我無波啦？」
自從同呀詩一齊之後，我哋之間多咗好多回憶，會留底喺學校一齊做下功課，放學諗下去邊度玩，飲飲食食。
本來平時嘅錢會拎啲去買點數，依家個荷包好似俾人斬開一舊舊咁，死無全屍。
周邊嘅人見我哋成雙成對咁，已經司空見慣。
我老豆媽子見我最近頻頻問攞零用錢，已察覺不妥，成日旁敲側擊我做咩成日出街，成日咁夜返屋企。
最後仲問我係咪拍拖添，叫我中學唔好掛住諗埋啲情情塔塔嘅嘢，下年就揀科啦。
我當然無同佢哋講啦，只要我成績ok，佢哋就無嘢講㗎啦。
一開始我同呀詩係好甜蜜，但都無可避免地迎來第一次嗌交。
呀詩脫MK後，個look都慢慢開始回復正常，但壞習慣無因為咁而回復正常。
佢仍然keep住食煙嘅習慣，我都話過佢好幾次，輕輕提點下佢，話食煙無益。
「我戒緊㗎啦，以前一日半包，依家一星期先一包。」呀詩苦惱地道。
「但你可唔可以唔好同我出街嗰陣食啊？我唔想成日行行下街你走去話食支煙先。」當意見出現分歧嘅時候，亦係魔鬼嘅出場時候。
「我都好努力忍㗎啦，你俾啲時間我好無？」
我亦都明，戒煙唔係話戒就戒，都係需要時間。
只不過，呀詩身上面嘅煙並無減少，當佢越變返普通女仔，越係成日企係街度食煙，嗰種格格不入嘅感覺，實在令我睇唔順眼。
我學TVB嗰啲電視劇啊，鏗鏘集，警訊啊等等嘅橋段，諗咗條橋。
唉屌，點知原來一早TVB已經係伏到咁，警訊更加無咩公信力，咁大佬我已有嘅知識係咁，盡咗力㗎啦。
我同呀詩講：「如果你仲係Keep住食煙，好啊！我陪埋你一齊食！」
我係呀詩包煙度拎咗一條，諗住轉身去士多買打火機。
呀詩終於忍唔住佢火爆嘅性格，認真地屌道：「你依家姐係威脅我姐？」
「我都係想為你好姐，我唔想你遲下啲牙又黃又剩，係你話想變好，我先⋯⋯」接住落嚟，我都唔想講落去。
「我知你為我好，但我唔想你咁樣威脅我，仲要用你自己嚟威脅我？」當呀詩講出喱句後，我就知自己錯，想伸手去捉住呀詩嘅時候，俾佢甩開咗，內心驚到驚。
「唔好掂我！你知唔知我最緊張嘅就係你，我自己知衰，但我估唔到你會話要咩陪我一齊食，真係好戇鳩。」呀詩當街當巷嘈起上嚟，好羞家。
「好啦，唔好嬲啦，我知係我唔好，我都係嚇下你姐。」其他嘅目光放曬落我哋身上。
「⋯」呀詩對我不瞅不睬，但無頭先咁抗拒。
我拖住佢行咗一條街，佢都無講到嘢，支煙食到一半都唔食了。過程中我哋無講過嘢，而我係度諗⋯⋯自己真係太戇鳩，咩要陪佢一齊食，自己大個咗睇返，真係低B到無論，如果真係咁樣走去做煙隡就更加戇鳩。
真係得以前先會咁戇鳩，中三人仔，其實我哋都未成熟，未識諗，根本唔知外面嘅世界係點。
單純地覺得對方就我全世界。
以前嘅單純亦可以喺一種無知。
「嬲完未啊？」我放下身段去問呀詩。
「係我衰仔啦，以後唔講啦好無？」
「你知唔知點解我會食煙？」呀詩喺我講完一大輪後，打破沈寂，問咗一條無關我之前講嘅嘢。
「我唔知啊。」我沒頭沒腦地答。
「因為我都係俾人威脅。」呀詩看似輕鬆，但其實好爭扎，我感覺得出。
「嗰陣時呀彥佢哋成班都食煙，唯獨我唔食，佢哋成日都叫我食煙，話食完成個人會爽好多，係咁叫我試下。」
「本來都係笑笑口，講講下，拒絕咗幾次之後，佢哋就周不時叫我試下啦，試下都無壞姐，連呀彥都係咁講。後來成班變咗集體煲煙，但唔會叫埋我，得返我一個傻仔咁係度唔知做咩，而佢哋一邊食煙一邊有講有笑。」
「我好唔鍾意嗰種感覺，好似俾人排擠咁，而作為我條仔嘅呀彥，連埋佢哋一齊排擠我，喱樣我真係估唔到佢，嗰個明明之前係我最無助嘅時候幫過我，煮過麵俾我食，依家話變就可以變成咁。」
「我都仍然堅持唔想食煙，其他佢哋想玩要我去試下嘅，我都會試，我會想融入佢哋。」
「直到呀彥話如果唔同佢哋一齊食嘅話就分手啦。」
「佢話唔想要個咁撚柒廢嘅女，影衰曬佢。」呀詩咬咬唇道。
我忍唔住插句話，問：「咁你明明咁多委屈，做咩之前唔同我講姐？」
呀詩諗咗幾諗，說：「可以講出嚟嘅委屈算係委屈咩？有咩好周圍同人講姐？唔係話信唔過你，唔係話唔想同你講，只不過時機唔啱姐。」
「我仲好記得呀彥點樣同我講，其實唔係話真係咁鍾意嗰班人，只不過係無朋友之下，唔想無朋友先咁樣做。」呀詩兜返個話題返嚟。
「聽完呀彥咁講我好嬲，好似想逼我，威脅我咁，然後就衝動起上嚟啦，嗰陣我嘅諗法係咁：食囉屌！驚你哋咩？咁撚想我食我咪食俾你睇囉，又唔係食唔撚起。」
「於是乎，我一開始就食得好狼，佢哋見到我咁chur法仲驚過我，之後開始加返我玩，之後又黑曬面咁，又俾說話我聽，最嬲係俾說話呀彥聽，而呀彥又好撚易受人影響，人哋話咩都覺得人哋啱⋯⋯」
『你條女咁唔食得煙，點得啊⋯⋯』
『佢都唔食煙㗎啦，叫佢出嚟做咩姐？』
「自此我好唔鍾意人要脅我。」呀詩坦言。
「下次可唔可以唔好咁？」呀詩問道，但我聽得出佢仲好委屈，而嗰種委屈像係積積埋埋。
「好啦，我應承你，但你⋯⋯可唔可以應承我之後都唔食煙啊？我真係想你好。」
而最估唔到嘅係，喱一句「我想你好」，會成為綁架彼此嘅道具。
「好。」
「咁你之後有嘢真係要同我講喎，唔好成日收收埋埋得唔得啊？」因為呀詩喱個MK嘅過去，周不時都會令我無安全感。
一場嚟得好快，去得好快嘅嗌交，每次嗌交我都覺得好似行近咗一步。
之後嘅拍拖生活係幾豐盛，但我哋硬係好似差咁啲嘢，有啲嘢突破唔到，無進展咁。
姐係好似有時多身體接觸，又錫又攬，但每次都會覺得唔夠喉，成身好似俾蟻咬咁，當街當行又知道無得咁猖狂，咁囂張。
我哋無講出口，但每次打完茄輪嗰種渴望嘅眼神，深深傳入我心入面。
而接住落嚟會迎來一個重要嘅節日。
——聖誕節。
一個攞正牌歡愉嘅日子。
又到聖誕⋯⋯
又到聖誕⋯⋯
聖誕老人 終身監禁
騎著鹿仔去殺人
見到靚女 剝衫剝褲
見到超人 露底褲
以前唔知由邊個開始創嘅歌詞，仲未興有討論區嘅世界，但可以一路流傳，街知巷聞。
差唔多踏入12月嘅時候，人人都知跟住落嚟係咩日子，學校、出面街度都開始佈置緊啲嘢。
我哋班啲女同學有時間就會係櫃桶攞啲嘢出嚟織，我哋男同學，最想就係收到自己心儀嘅對象織一條溫暖牌嘅頸巾，可以係咁寒冷嘅天氣，戴住自己鍾意嘅人織嘅頸巾，一件幾咁青春，幾咁溫暖嘅事情。
屌⋯⋯我都想收返條啊！
但我唔知點同呀詩講，話我聖誕禮物想收你織嘅頸巾啊⋯⋯真係好柒㗎嘛。
又唔知應該點暗示喎，我真係諗爆頭都諗唔掂。
喱幾日，我都係度煩緊點樣開口嘅時候，呀詩比我更加早行動，係一個小息嘅時候問我：「你聖誕想收咩啊？」
我知機會嚟啦飛雲！我支支吾吾咗一陣，都諗唔到點講，最後答佢：「我都諗唔到喎。」
「只要係你送嘅，我咩都鍾意㗎啦。」我再補多句，我知女仔鍾意聽喱啲說話，我自己都學咗唔少嘢。
「超！口花花。」呀詩笑笑咁講。
嗱，see？
「送禮物真係好煩啊⋯⋯又要錢。」佢苦惱地同我講。
我見機會難得，就話：「咁有啲禮物可以唔洗錢嘅。」
「咩啊？」
「呢⋯⋯嗰班女咪日撚日織緊囉。」
唔誇張，有時搭地鐵返學都會見到有女係度日織夜織，心諗你返屋企織啦好無⋯⋯
「屌，咁撚無新意，我先唔鍾意囉。」呀詩不屑。
然後子晴行過嚟我哋位，話一齊去廁所，佢哋真係越嚟越fd。
我百無聊賴，而男仔堆嗰度無啦啦圍起上嚟，我都跟埋過去，去湊熱鬧。
「咩咩咩啊？你哋講緊啲咩啊？」我入去插個話。
「嗱！問佢就啱啦，依家佢好有經驗啦。」其中一個男仔講道。
「係囉，聖誕節就同女爽啦。」搭話嗰個係呀ken。
細問之下，原來係傾緊蕃薯仔送咩聖誕禮物俾班花子晴好。
個重點係，唔知蕃薯仔約唔約到子晴出嚟，約到就已經成功咗一半啦。
「咁約咗子晴未？」
「屌，就係未依家先傾，佢都唔敢約。」
蕃薯仔面對眾人嘅提問尷尷尬尬咁，大家都係抱住睇戲食花生咁嘅態度，都唔係真係想幫佢。
蕃薯仔就係好人嘅表表者，份人膽小鵪鶉，仲要唔識得拒絕人。
其實佢會俾人怡都唔出奇，只不過我哋班男仔都係善良嘅，唔會做喱啲嘢，呀Ken係狗公，黑人憎咗啲，但未至於去到欺凌。
蕃薯仔一早成為我哋成日串鳩佢嘅對象。
「你有幾多錢先？」我問道。
「下⋯⋯5000左右囉我諗。」蕃薯仔一臉薯樣，老實講，我覺得溝到子晴機會幾渺茫。
「5000!?!?!?」眾人齊聲嘩然。
「哇，你咁大手筆？」5000蚊真係好多下，當時IPhone4出咗無幾耐，已經可以買部IPhone啦。
「唉，你去叫隻雞好過啦。」某個男仔又講得幾中肯。
係喱個時候，呀詩同埋子晴去完廁所返嚟，MK妹同女神可以fd到，都可算喺一大奇蹟。
「喂，你去問下呀詩囉，佢依家同子晴幾fd喎，chock下子晴囉。」健三提議道。
我返去問呀詩，佢話女仔嘅嘢，咁八做咩⋯⋯
但佢有講話叫蕃薯仔落啲力啦，力都唔落下點溝女啊，我都如實同蕃薯仔，佢聽完成個人充滿動力。
之後嗰啲日子，我同呀詩再無傾過聖誕禮物喱個問題。而我每日都會有期待佢會問下啦，但無⋯⋯
我間唔時都會俾啲暗示佢，唉做到咁真係好瘀⋯其實。
『哇，估唔到今日凍成咁，最衰我無頸巾啦。』
『屌，一早叫你買返條啦。』
『嗰條友戴嘅頸巾幾靚喎⋯⋯』
『都唔靚，黑色咁普通。』
每日慢慢咁過，聖誕節亦就嚟到，我先開始察覺⋯⋯
原來我仲未準備呀詩嘅禮物！！！
雖然依家仲趕得切，但我仲未諗到要送咩好，話曬今次係我哋一個聖誕，係應該有意義啲。
我思索咗幾日，一有空閒嘅時間就諗。
有時我會覺得，人真係自己乜都無嘅時候，啲嘢先會顯得珍貴、難得；反而越嚟越方便，越容易得到，就無咗份格外珍愛嘅情感。
依家要準備份禮物，睇一睇ig上面有咩別出心裁嘅禮物，落個訂就有，或者跟住做就有。
諗咗幾日，我決定親手整一份禮物，比起買，我覺得自己親手做嘅禮物更加有意思得多。
我諗住摺好多心心俾佢，然後裝成一個盒，喺每個心心底下，都有我寫嘅嘢。
唔折嘅話係唔會知，而我覺得最鍾意嘅，係心心包住啲字，包住嘅喺一顆顆真心。
最後我花咗幾晚通頂整起佢，去買材料，上網睇片學摺紙，一張一張紙咁樣寫，堆下堆下就堆滿曬成個盒，就咁樣變成一份禮物。
當成功製造出嚟喺好有成功感，而最後最後，最期待就係呀詩收到份禮物，拆開佢嘅表情。
光喺想像都足夠興奮，而一諗到呀詩嗰個驚喜嘅表情，就覺得咩都值了。