《我的MK妹同桌》: 22
我知其實咁樣唔好，但又控制唔到自己咁，成個人好矛盾，無乜理性，呀強係第一個俾我咁與別不同嘅感覺我。
而個天好似俾咗機會我同呀強咁，係前一晚條友已經帶埋條新菜上嚟，俾個下馬威我咁款。
其實我無乜太大感覺，面對佢哋可以好平靜，鬆咗口氣咁，我都唔知咩原因去驅使我哋繼續一齊。
我同呀強係沙灘度講清楚，個傻仔仲要走去打咗呀彥一鑊，做咗一件我一直都想做嘅事，可惜我無得係現場見證啊⋯⋯如果唔係我實會拍手鼓掌。
「我諗我依家真係可以同呀彥劃清界線啦⋯⋯」
其實再明顯不過⋯⋯好多次我都忍唔住想講出口，我一向都係有嗰句講嗰句，但喱啲時候我真係唔好意思講出口，我自己都感覺到塊臉熱熱地，一定好紅啦⋯⋯
真係「最怕空氣突發安靜」啊，喱啲時候真係好啱播喱首歌。
我係度期待緊眼前喱個傻瓜講多次之前講嘅嘢，誰不知佢可以成碌木咁坐係度，成個佛咁款。
最後都係我打破僵局，條正廢柴！
「傻瓜傻瓜傻瓜！！！」
你個木頭成日都要人做到咁白先會明嘅，明白明白，應該明咗再白啊嘛，佢調返轉嘅。
對於佢為我做咁多嘢，我好似一路都係做接收嗰個，感動轉化為衝動，個腦只要想一想，下一秒就已經攬住呀強。
此時此刻，我只係想捱係呀強嘅懷抱度。
見住佢因為呀彥嬲，咁著緊我嘅模樣，就覺得佢威風凜凜咁，好似一隻手就可以保護到我咁。
好彩⋯⋯佢最後都有開口問，以佢咁遲鈍嘅個性，佢唔開口我都覺得唔奇怪。
我諗，唔需要再多講啲廢話，好好地享受喱一刻就足夠。
喱一吻，有陣甜味，我感受到呀強對我嘅寵溺、溫柔。
同埋我最想擁有嘅幸福。
對於喱段新開始嘅關係，我再無初戀嘅感覺，並唔係話我唔珍惜呀強，只係有啲嘢無咗就無咗，唔會再經歷返。
如果我初戀係呀強，所有嘢會唔同曬吧？甚至因為咁，我有啲後悔同呀彥一齊。
我同呀強出去拍拖，可能係因為我有曬經驗，所以可以應對自如，知道點樣打扮對方先滿意。
曾經我都係新手，第一次出去同呀彥拍拖會係塊鏡面前左揀右揀，唔知著咩衫好，我想係佢面前展現最完美、最好、最靚嘅一面。
依家？我已經準備好聽日要出去拍拖嘅衫係床度。
有時候，因為有過經驗、經歷過，反倒會令你失去當初心跳的悸動。
有些事，明明都係同一件事，但就總係搵唔返第一次做嗰份感覺，「感覺」就係咁無理，因為無得解釋，你只能夠直白地描述出嚟。
即使如此，呀強亦俾我好多好多唔一樣嘅第一次，青春嘅愛情之所以深刻，係因為佢奪走了你眾多第一次。
第一次同佢逃學、第一次一齊去班會活動、第一次有男仔為我做咁多嘢。
再一次行經熟悉嘅朗豪坊，係我同呀彥成日會嚟嘅地方，而且係成班MK仔女無鳩聊聊嚟嘅地方，我之前已經行到悶，我反轉行都識行啊。
但同呀強嚟，又有另一番風味⋯⋯
明明咩都唔識，但就係度扮識咁；明明好驚青，但就係度扮曬唔驚。
係好低B，Kai Kai地咁，但心裡明白，佢咁做只不過係為咗我。
佢唔想因為自己咩都唔識，而令我覺得失望，所以佢係我眼中，認真得可愛。
之前都係呀彥陪我去睇哈利波特，仲十分不情願，好似勉強佢咁。
佢真係得扑嘢嗰陣先會主動啲，其餘時候都係咁鳩樣⋯⋯
其實喱個世界仲有好男仔，只係仲未遇到，要遇上都需要運氣，我只不過係比較好幸運嗰一個。
我可以係呀強面前做返自己，當我係鋪頭入面見到條靚嘅手繩，我第一時間諗起嘅就係呀強，個腦瞬間幻想我同佢一人一手戴一條，拖住手咁行街，真係羨煞旁人。
只係咁貴，我唔捨得⋯⋯
我諗住當無一回事就算，等遲下搵到啱嘅再偷偷地買俾佢。
第二日，我諗住約佢去放學拍下拖，我都未試過係學校一齊放學去拍拖，但出奇地呀強話唔得？！
我唔係話唔俾嘅，但總係覺得事有蹊蹺⋯⋯
本來覺得無乜嘢，咁佢都有自己生活，可能一早已經約好咗去打機呢？
但以女仔嘅第六感話我知，無咁簡單，純粹直覺。
我就一路跟係佢後面，睇下佢做乜。
但佢去旺角？我會信佢去旺角網吧打機，但我就唔係幾信其他人都會跟住佢去旺角網吧打機！
仲同我講話朗豪坊上面有網吧？？？
但佢又講到似層層咁，平時份人又唔似係會講大話，於是乎就信咗。
係我太天真了，估唔到我MK妹一世英明，會衰係個薯仔手上。
而且我根本無諗過佢會為咗我再返嚟喱度買條手繩，我當場係呆係度，幾秒先反應過嚟，真係唔係幾敢睇小佢。
估唔到佢平時份人傻傻更更咁，又幾識冧女仔喎。
我想要嘅，並唔係嗰條價值不菲嘅手繩，背後嘅嗰份心意更加貴重。
條傻仔又整濕咗我隻眼⋯⋯
依家嘅甜蜜，無人可以擔保長久，只不過係當下唔會去諗姐。
早係我同呀強鬧交之前，我已經有慢慢戒緊煙，只不過喱種轉變，佢感受唔到，亦都唔知。
以前同佢哋食煙，就好似吹水咁，講嘢就要食㗎啦，周圍借火，借煙都係常有嘅事。
而且我都好努力咁去改變緊自己，只係想脫離以前不堪嘅過去。
但係最應該體諒我嘅呀強並唔係咁諗，佢好似覺得我做得仲未夠咁⋯⋯
而且仲拎自己嚟講笑，儘管我知佢唔會咁樣做，但真係講下都唔得，萬一⋯⋯真係有個萬一佢因為我走去學食煙，我寧可分手。
後來慢慢我都戒走咗食煙，好似同過去切斷咗一樣，班MK仔女無再聯絡，無再見過呀彥，亦唔再玩勁舞。
我好似開展咗一個新嘅人生般。
「如果你仲係Keep住食煙，好啊！我陪埋你一齊食！」
當呀強咁樣講嘅時候，好似逼緊我咁，同埋攞自己嚟威脅我，嗰刻先發現，原來自己越來越愛佢⋯⋯
當你發現自己越嚟越唔想失去佢，唔想佢離開你嘅時候，先了解到自己原來係不知不覺間，踩得咁深了。
原來自己咁努力去改變，只係想變得更加好，去襯返呀強。
係！以前嘅我會覺得自己襯唔起呀強咁好嘅男仔，自己又煙又酒，又唔潔身自愛，成日出去蒲，有個咁嘅屋企。
我最怕嘅係俾呀強嫌棄⋯⋯
如果佢話我污糟，MK，我真係連駁都無得駁⋯⋯
尤其是聖誕節過後，我覺得自己好似離唔開佢咁。
正當我擔心唔知送咩禮物俾呀強好嘅時候，我察覺到佢成日都有意無意咁提到頸巾⋯⋯
佢係咪真係女仔傻㗎？！
我唔係幾想織頸巾，因為好麻煩，而且我份人又無乜耐性，但佢又三番四次咁提起，似乎真係想收我織嘅頸巾。
唉⋯⋯最後都係上網睇教學，然後自己去買材料。
當中係有幾分無奈，但漸漸帶著新嘅體會。
一開始學織係好麻煩，但後來織下織下，我會一路諗呀強戴住我一手一手慢慢織出嚟頸巾，係一件甜蜜而又幸福嘅事。
織織下滿滿嘅少女心都爆發出嚟。
講起少女心，嗰陣時睇君比啲書都好鬼有少女心，哈哈！
我返到屋企坐低溫書，做功課，都係拎起個冷，一路織，織到變成反射動作添，隻手都係曬繭。
我諗，我再也織唔出第二條了吧？
而且一直都期待聖誕節可以同自己鍾意嘅人出去，去邊都無所謂，只要同佢一齊就好夠好夠啦。
第一次同呀強出去拍拖都無咁緊張，今日大時大節反而好認真咁對待，唔係幾識化妝嘅我都去學下點樣化小小妝。
我一路都無同呀強講會織條頸巾俾佢，應該可以俾到啲驚喜佢嘅。
點知平安夜喱晚一出門口就俾個傻仔玩返轉頭，原來佢一早已經係樓下等緊我，其實佢有時好貼心，好體貼。
個感覺就好似⋯你無時無刻都會感覺到佢係著緊你，緊張你，愛你。
打開呀強送俾我嘅禮物，見到一堆心心，唔知佢用幾多時間摺呢？
好似對比起我份禮物，更顯得弱雞⋯⋯
我真係感動到唔知點講好，亦難掩我開心之餘，又興奮嘅情緒。
嗰一晚，係我人生過得最最最開心嘅一晚，我將自己嘅所有嘢都俾曬呀強，不論身心⋯⋯
就連呀彥都未曾試過咁，呀強係我第一個全心全意咁愛嘅人。
個傻仔嘅小心思，我點會唔知先得㗎。
喺聖誕節過後，我再一次開打呀強送俾我嘅禮物，想再好好回味一番。
咁啱我張枱嘅枱燈係一盞好強嘅白色燈，係燈光嘅照射下，我拎係手上嘅心心入面有啲密密麻麻嘅嘢。
我不禁奇怪，點解入面會有嘢嘅？
我慢慢照住個痕跡拆開嗰一顆心，我好小心翼翼咁拆，好驚我會拆爛咗佢，之後復完唔返。
呀強嘅字跡並不秀麗，但寫出嚟強而有力。
戇鳩咁講句，我就係鍾意佢咁戇鳩。
『其實我真係唔識點樣溝女，但偏偏俾我溝到你，我諗⋯⋯我淨係識點樣去溝你一個掛？』
唔知係邊度學埋啲嘅甜言蜜語。
『他不懂愛惜你 我樂意操勞』
我明，亦都知佢好努力咁做緊。
喱首方力申同鄧麗欣嘅好心好報，真係好多人都識唱，甚至一聽歌詞就知係佢哋兩個嘅歌。
根本上好多人都好羨慕佢哋嘅愛情，男嘅有型靚仔，女嘅又索又靚女。
係好多人心目中的嘅金童玉女，但又邊個估到最後嘅結果會係咁？
十年，唔係結就分。
原來真係好諷刺。
個傻仔唔知係邊度搵咁多喱啲歌詞，而且講咗好多心底嘅說話，包括佢第一次見到我，甚至佢點樣鍾意上我。
而係份禮物度，我隱隱約約感覺到，呀強其實都好怕失去我，有時喱種怕會逼到人喘唔過氣。
份禮物係我收過最有心思嘅禮物，我諗條傻仔實估唔到我會咁快知份禮物嘅秘密啦？哈哈哈！
佢一定係度沾沾自喜緊，嘻嘻！
我仲將佢喺心心入面寫嘅嘢拍低佢，然後再用手寫返出嚟，中間曬我唔少功夫㗎，但我覺得係可以記一世嘅嘢嚟，就去做lu！
最後我再將佢嘅心心一個一個摺返起佢，放返落個盒度，我諗我每次打開喱份禮物，都會記返起啱啱打開嘅喜悅吧？
之後新嘅學期，我同呀強同枱嘅命運就咁硬生生拆開咗。
其實睇到呀強咁難過，我自己個心都唔好受⋯⋯
我又諗到，其實將來我哋都需要面對好多離別，我哋無可能一直都坐埋一齊，我哋都需要向前行，都需要進步，需要改變。
係呀強教識我⋯⋯
所以我先可以由一個MK妹變到依家咁，係佢俾我係佢身邊任性，我先至有動力去追求自己一路以嚟想要嘅嘢。
人與人之間就係咁相互影響著。
我好明白呀強依家嘅失落，無精打采咁，之但係，我更看重嘅，係我哋兩個之間嘅將來，我唔想因為依家顧住拍拖，而將來無得繼續同呀強一齊啊！
調完位之後，我同呀Ken一齊坐，其實佢對我都幾好，只不過佢好鍾意講嘢，有一刻我懷疑過佢係咪唔過嘢會死。
佢會撩我講嘢啦，會撩前面講嘢啦，會撩後面，周不時上堂無聊就玩下前面女仔嘅馬尾，又會成日係度轉筆。
係班上面，我最好嘅朋友就係子晴啦，係上面班會活動過後，我同佢意外地投契，因為一齊上個廁所咋，傾兩句就熟咗。
至少lunch time唔洗成日自己一個人食飯，有時會一大班，有時會同呀強，有時會同子晴。
感覺我依家真真正正咁享受緊中學生活。
依家嘅一切都得來不易，因為知道唔容易，先會更加珍惜。
珍惜兩個字唔係就咁用口就做到，要真正做到，要好用心。
子晴同我講，話呀強成日上堂都呷呀Ken醋。我聽到之後笑出聲，個傻仔咁都好呷醋？我唔係好明呷醋個位係邊，呀Ken油腔滑調，口甜舌滑全班都知，個個女仔都俾佢撩過，唔會真係以為我會鍾意佢啊嘛⋯⋯？
「佢成日上堂都偷偷地望你兩個㗎。」有一次我同子晴放學，去附近KFC食個下午茶，然後佢就要去補習啦。
「下？佢呷醋呷到咁？」雖然嘴裡常嫌棄，但心入面有幾甜唔通又話過你知咩？
女人係成日咁口不對心㗎啦。
「佢幾憎條狗公下。」子晴就似一座冰山，講句嘢都可以無乜表情，穩如泰山，但其實心入面好溫柔善良。
有時做人真係唔好睇表面，有啲看似開朗活潑，人緣好嘅，其實就不知幾八婆。
可能我哋性格比較相近，所以啱key啲掛？畢竟我哋朋友都唔多。
「等佢有下戒心都好嘅。」我直言。
「咁你呢？你同蕃薯仔點啊？」其實我都幾關心佢兩個㗎⋯⋯
「咩⋯⋯咩⋯咩點啊？」子晴顧左右而言他，係度裝模作樣。
「咩點？你唔係唔知蕃薯仔鍾意你啊？」
「我⋯我知。」子晴一臉無奈，「但⋯⋯」
「但咩姐？最緊要你鍾唔鍾意人先？」我同子晴無乜秘密唔講得嘅，經過喱排相處。
「其實我係有啲鍾意佢嘅⋯⋯」子晴好嬌羞，細細聲咁講。
「下？咩話？！」我努力地故作鎮定。
「我都唔知啊！」子晴雙手摀住自己塊面，眼前係一個純淨、情竇初開嘅少女！
「我都唔知係咪鍾意佢，好似有啲咁，會去在意佢，亦都知其他人一直都俾機會我哋，儘管當其時係幾尷尬，但又唔反感。」
哇⋯⋯
我都仲好震驚，甚少見到子晴喱一面，與此同時我又幾高興，一來係高興子晴竟然係對蕃薯仔咁嘅感覺，二嚟高興在佢會坦白同我講，有種被信任嘅感覺。
「你哋兩個都鍾意嘅就好心一齊啦！」我好言相勸。
「但我依家唔想拍拖住啊⋯⋯」子晴臉有難色，睇怕佢依家只係鍾意，仲未真係愛上蕃薯仔吧？
愛同鍾意，係好有分別。
如果子晴足夠愛，就唔會咁樣左思右想。
「又因為屋企人唔俾你中學拍拖咁古板？」喱啲咁老土嘅劇情成日都發生係現實生活入面，整定咁款。
「你又知嘅！？」子晴訝異地望住我，一副難以置信咁。
我無佢咁好氣，道：「喱啲橋TVB成日都有㗎啦，你屋企人係咪睇得TVB多啊？」
「佢哋想我讀好啲書啊嘛⋯⋯」
「嗱！人生就你自己嘅，要唔要一齊，同邊個一齊，好應該你自己話事，你讀得好書，又拍得好拖，兩樣嘢可以同時做㗎。」
往往，幫人哋諗問題嘅時候，都可以清晰獨到，果斷行事。但一到自己陷入當中，就會亂曬大籠。
子晴聽後，靜靜地飲佢杯可樂，唔出聲。
而我又不禁好奇，究竟點解子晴會鍾意上蕃薯仔嘅呢？
屌！女人啲八卦心即刻湧曬上嚟，抽起咗條癮！
「係呢，其實你鍾意蕃薯仔啲咩啊？佢份人咁呆呆濟濟咁。」
「而且你又有咁多男仔追你，你咪有個高form師兄溝緊你嘅？你唔心動啊？」
我上次同呀強一齊食lunch返嚟見到佢同個師兄一齊行返入學校㗎喎。
「你話Johnny？」唔知我再多形容，子晴就即刻講到邊個出嚟，可能唔止一個Johnny呢？」
「係啊係啊！就係佢！」我都唔知係咪佢，就當係佢先啦。
「嗯⋯⋯佢啊⋯的確各方面都好好，甚至有啲完美添，但同佢出去就好似同朋友出去咁，無乜嘢特別嘅感覺。」
「我覺得自己唔會點睇外表外型，有無感覺先緊要啲。」子晴呆頭呆腦咁講一本正經嘅說話，樣子特別滑稽。
「咁蕃薯仔呢？佢俾到咩感覺你啊？」我並唔係唔支持蕃薯仔，但子晴比起蕃薯仔，子晴更加係我好姊妹，我當然要為佢著想啦。
識揀都實係揀個師兄啦係咪？
「佢平時份人雖然好呆，但成日都會係我估唔到嘅位關心我，有時俾佢嘅舉動打動咗我。」
子晴講起蕃薯仔，就好似越講越興奮，似乎更加想得到我嘅認同感。
「記得有一次，嗰日之前夜瞓，餓住個肚瞓，第二朝返學又無食早餐，個肚好鬼餓，我諗住捱到放lunch食多啲嘢咁，上堂就呻下肚餓，嗰陣蕃薯仔坐我斜後面，跟住佢小息就落咗去小食部買咗個三文治俾我。」
「佢拎俾我嗰陣我都呆一呆，佢又唔好意思，又懶係型咁⋯⋯」
「而且有一次，課室又開冷氣又開風扇，大熱天時唔會想帶件冷衫返嚟，佢舉手去熄風扇⋯⋯」
「你會唔會諗多咗啊？佢自己都凍咋話？」我笑說。
「佢自己有著冷衫㗎，佢熄完冷氣之後仲除咗件冷衫。」
「哎呀！我都唔知啊⋯⋯唔知係咪總係覺得佢鍾意我然後我又諗多咗咁，總係會有意無意咁去留意下佢，但唔⋯唔會俾佢察覺！」
「唔知啊唔知啊唔知啊！！！」佢講講下自己崩潰咗先。
「唉，點解我哋兩個都會鍾意埋啲咁嘅傻仔？」我苦笑。
「係囉！點解呢？」子晴與我相視而笑，睇怕依家只有我哋兩個明白我哋兩個吧？
可能最傻嘅，係我哋兩個掛？
自從知道子晴心意之後，因為女仔啲八婆性格，好想同自己男朋友分享！
但我都一一忍住，唔可以咁樣㗎，所以呀強想探我口風我都唔理咁多。
守口如瓶！
子晴佢講起蕃薯仔嘅次數越嚟越多，我開始明白點解出面會有毒撚拖女神，原來係真有「奇」事。
生日會上面，蕃薯仔真係好大膽，我都俾佢嚇親。
嗰陣，我以為佢會得米啦，點知一款檸檬樣。
夜晚我即刻打俾子晴，關心下佢，唔係八卦啊。
「你點啊？」
我喱頭MSN佢，轉頭子晴就打過嚟。
子晴係另一邊抽泣緊，唔算係大喊咁，佢就連笑都唔會好似我咁大癲大肺。
「咩事啊？」
「我依家好後悔啊⋯⋯」我都大約估到大概了。
「早知如此何必當初呢。」我用大師嘅口吻說道。
「你哋嗰陣究竟點姐？」
「佢追出嚟我真係好感動，但佢突然間咁樣表白，我唔知點應對好⋯⋯」
「加上又咁多人，好怕醜㗎嘛！」
「又啱嘅。」
「我嗰陣淨係想離開嗰度咋。」
「佢出嚟之後同你講咗啲咩啊？」
子晴一開頭支支吾吾咁，俾我左推右推佢先肯講。
「蕃薯仔跑過嚟然後問我係咪嬲佢，傻呼呼咁⋯⋯」我俾佢嗰個咩「傻呼呼」嘅形容詞搞到笑咗出嚟，係咪平時作文用開㗎？哈哈哈！
「笑咩姐⋯⋯」
「好啦好啦，唔笑唔笑！」
「我咪話無囉，見佢陰陰嘴係度笑，又唔講嘢咁，不知幾尷尬。」
「跟住佢問我⋯⋯問我⋯⋯其實有無鍾意佢！哎呀真係好醜死怪，無論係當場聽到定係依家講返出嚟都好尷尬啊！！」
平時成座冰山咁嘅子晴，依家成隻雀咁。
「聽到我都毛管戙，跟住呢跟住呢？」
「周圍又咁多人，邊個叫佢揀啲咁嘅地方表白姐！我⋯⋯我都唔⋯唔知點好！」
「跟⋯跟住咪拒絕咗佢，話依家唔想拍拖住囉⋯⋯」
「哇！唔怪之得佢咁嘅樣返嚟啦。」我回憶今日發生嘅事，所有嘢都連接一齊啦。
「下？佢咩樣啊之後？」輪到子晴好奇啦，又係你自己搞成咁嘅，但又關心人哋點。
「佢之後返到嚟咪坐埋一邊，垂頭喪氣咁囉。」
「我⋯⋯係咪唔應該咁做啊？」
諗深一層，子晴又無乜經歷，又唔知應該點做，我自己俾佢多些少經驗，但其實好多位我咪一樣唔知點做好，所以無話一定嘅其實。
「咁你當下你唔想都無辦法㗎。」點解會係我安慰返子晴轉頭嘅？
「啊⋯⋯我依家又有啲後悔添。」有時就連女仔都未必會明女仔諗啲乜。
「但你做咩會後悔先？你自己要搞清楚喎。」作為好朋友，可以俾嘅意見得咁多。
「嗯⋯⋯我⋯都唔係幾清楚啊⋯⋯其實知佢用咗好大勇氣，唔知佢仲會唔會有下一次表白⋯⋯覺得好似錯過咗，就唔會有咁，我係咪應該主動啊？」
唉，睇怕其實子晴心入面都有答案，佢只不過係想我講出佢嘅答案，認同佢姐。
就算我唔講啊，子晴都會有佢嘅選擇啦，依家佢需要嘅係人哋支持佢。
我自己覺得啦，子晴其實係鍾意蕃薯仔嘅，至於點解啦喎，我都唔係好明，兩個人平時交集又唔多，尷尷尬尬咁，講句說話都怕怕地醜，除咗我哋成班起哄下佢兩個，都真係無乜相處。
感情咁複雜嘅嘢，難以滲透。
老實講啊，我都唔係幾睇好佢哋兩個，就算一齊咗都係咁話。覺得佢哋兩個嘅愛情好似係活係自己想像、幻想入面咁。
兩個人一直都保持緊距離，都唔係真正咁了解對方嘅⋯⋯
起碼至少好似我同呀強咁，互相了解先係㗎嘛。
但原來，係我錯。
我同呀強，就係因為了解而一齊，亦因為了解而分開⋯⋯
自從分開座之後，呀強成績又去返以前咁，本來我唔會點樣干涉呀強嘅成績，佢想做咩亦會由佢去做。
咁佢不嬲都唔鍾意讀書，佢只係因為我先會專心上下堂。
但就連分班選科，佢都好似無乜自己想讀想去做嘅嘢。
我知道嚟緊高form喱幾年好重要，尤其是我哋喱屆係開頭嘅白老鼠，一眨間兩年就過，我都需要為自己前途諗。
其實現實啲講，係我無得揀⋯⋯
唔通靠個咁嘅老豆，屋企人幫我諗？
我真係無邊幾個人可以依靠⋯⋯只有得呀強可以成為我唯一一處避風港，我好想一直係佢保護下過埋一世。
當時真係一諗就一世，對於未來有無窮無盡嘅幻想。同呀強一齊住，一齊返工放工，打拼，然後結婚，生小朋友，一路到老。
咩都諗好曬㗎。
係將來嘅藍圖入面，全部都係佢。
最後佢都係臨急臨忙揀好科，然後同我讀唔同班。就算內心入面有失望同失落，但又可以點，可以嘅當然會想同班，但前途比起愛情，原來嚟得更重要。
當一個選擇前進，一個選擇原地踏步，就已經足夠辛苦。
一段感情入面最難嘅，並唔係點樣開始，而係你哋點樣行落去。
上咗中四之後，班上面嘅氣氛完全唔同曬，以前低form嗰陣仲係好多吃喝玩樂，但喱一班，唔知係咪因為基本上都係由全級頭20-30名嘅人組成，個個都好專心讀書。
明明我哋又唔係啲咩名校，但讀書嘅人佔嘅比例都算多。
所以啱啱入到喱班嘅時候，我都好唔慣。
認真做筆記，唔係好似呀強臨急臨忙咁搵功課抄，今日小息係做緊聽日嘅功課。
傾嘅話題係出面邊個補習好⋯⋯
我真係就嚟悶死，我更加無辦法融入佢哋嘅話題。
之但係，我亦都慢慢受到感染，因為本來成績算好嘅我，係佢哋面前我瞬間做咗墊底嗰個。
我好唔鍾意喱種感覺，本來好勝心算強嘅我，變到接受唔到，我亦都唔覺得自己頭腦會同佢哋有咁大差別。
講醒目，佢哋唔會係醒目嗰群，佢哋只不過係勤力讀書姐，甚至乎我會覺得佢哋都唔太識得做人。
佢哋可以做到嘅嘢，點解我做唔到？
所以中四我都開始慢慢放多啲心思係讀書上面，當我開始向前行嘅時候，先發現，原來呀強一直都係我後面。
我一路都知道，佢好愛我，就算有時佢會變得冷淡，看似感情淡咗，凋謝咁樣。但其實佢依然愛我，只係彼此愛嘅方式會隨住時間而改變罷了。
好似生日咁，佢努力儲錢買部Iphone俾我，只不過我需要嘅並唔係物質上嘅嘢。本來物質上嘅嘢唔會長久，我自己都唔知點解會咁認為，我都需要錢，我屋企又窮，細細個擁有嘅嘢又無人哋多，人哋有靚靚嘅玩具，我只能夠係一邊睇人哋玩得好開心。
就算係咁，我都好珍惜呀強為我做咁多嘢嘅心意。
我從來都唔會質疑佢唔愛我，但我會想同佢心靈上同步。
我想佢用喱份愛我嘅時間，去增進自己。
如果當初我哋學識點樣分配時間，更加有效率，達到雙贏局面，你話多好？
只不過當初就無如果。
我中四努力地爬入我哋頭中間嘅時候，呀強只係顧住拍拖打機打波，我嘅擔憂，只係淪為佢覺得煩心嘅壓力。
分手嘅念頭，一早就萌生係心裡頭。
「你無諗過會有一日同呀強分手咩？」當子晴問起我嘅時候，我就早有幻想過。
兩個結局都有幻想過。
話無諗係呃人，就算再夾都好，難免會想幻當嗰個人唔再係你身邊，唔再出現係你身邊嘅時候，先會確認自己究竟有幾愛佢。
如果你未曾幻想過，係你愛得唔夠吧。
如果你連幻想下佢離開你都覺得痛嘅時候，到無哋真正分手，會痛上好多好多倍。
「話無你會信咩？」我苦笑地回答。
「咁係點㗎？」子晴好奇。
「世界末日咁囉。唔知聽邊個講，15、6歲時鍾意一個人，會係一生中最難忘嘅人。我諗呀強就係我最難忘嘅人掛？」
「有無咁誇張啊？」子晴佢半信半疑。
我無回答。
因為當真係發生係你面前嘅時候，係一啲都唔誇張。
邊個話提分手嘅人唔痛？被分手嘅人先痛？
你唔會知咁樣需要嘅勇氣遠遠超過你表白時嘅勇氣，光係要做喱個決定，都已經好艱難啦。
升中五嘅暑假，我想學下其他人咁去返下暑假工，儲定錢去補下啲補習班，自己啲數唔好更加需要惡補一下。
反正暑假又無乜嘢做，去搵下錢無壞，亦都想改變自己，一路以嚟我都不停地改變緊自己，我想自己變得更加好。
我搵咗屋企附近嘅KFC返part time，暑假好多時間返工，都係啲手板眼見功夫，好快就上手，直至有個新嚟嘅MK仔，令我勾起返以前啲回憶。
「呀詩？」我一開工，就有把熟悉嘅聲音叫住我。
「咦？你又係度嘅？」喱個樣貌仍舊MK嘅MK仔，係呀彥以前嗰堆嘅MK仔之一，個朵叫「雷哲」，因為佢平時就好雷。
我依家唔敢叫佢個朵，覺得我撚柒⋯⋯我嗌唔出口。
「第一日返工啊嘛，儲錢養條女啊，條女大咗肚。」雖然佢轉咗髮型，由以前個陰長到淨係睇到一隻眼，變為飛機頭，架飛機睇嚟幾大架。
但深邃嘅黑眼圈，喱一兩年都無變到。
「係啊？大個仔啦喎，做人老豆啦喎。」除咗恭喜，我都唔知講咩好。
「依家先知做人老豆唔易。」一個MK仔無聲的慨嘆。
係幾抵死嘅。
成日都想扑嘢唔戴套。
「係呢，呀彥仲有無搵你啊？」雷哲佢把火好似收曬咁，以前成大班人好鬼囂屎㗎，雖然我都係佢哋一份子，但我自己知唔會去到咁盡。
依家嘅我，真係唔再係以前嘅MK妹。
「無啦，做咩？」我不慍不火地道。
我唔係太想提起以前嘅事。
「佢依家仲成日話掛住你姐。」我聽唔出呀哲嘅說話係甜言蜜語定點⋯⋯
「係咩？」我依然冷冷地說。
「不⋯⋯不如你做我呀妹啊？咁樣你哋遲下見返都易啲啊。」
聽完後我就知喱啲都係男仔氹女仔講嘅嘢，嗰時班MK仔對身邊啲MK妹都講唔少啦。
依家仲興招細佬妹？
「我都唔需要呀哥。」我輕輕一笑，已經對佢算係客氣。
之後佢都無乜點再講，但同事之間都會接觸下，如果唔係返工，我可能未必客氣。
就算呀強無為自己諗，但比起其他男仔啲花言巧語，已經係清泉啦⋯⋯
嗰日放工，收工我同呀哲禮貌性say個bye，咁啱俾嚟接我收工嘅呀強睇到。
我好開心佢會嚟接我收工，女仔俾自己鍾意嘅人接收工，好容易就會心花怒放！
與此同時，我有不祥嘅預感，覺得呀強睇到嗰一幕會亂諗嘢。
果不其然，一張呷曬醋嘅表情印係臉上。
要我氹幾耐先氹得掂啊？
仲要叫個女仔氹⋯⋯真係攰上加攰，但見到佢都特地為咗我而嚟接我收工，我幾攰都撐住。
我以為我幾攰都撐得住，但當一開學嘅時候，我開始攰到仆街。
因為又要返學又要返工，甚至仲要補習，以我之前辛辛苦苦賺落嚟嘅part time錢，根本唔夠俾咁耐嘅補習費，三個月就會洗曬我辛辛苦苦儲返嚟嘅錢。
搵錢真係好難。
搵快錢可以好易，但真係認認真真靠自己努力搵錢，喱樣先難。
係喱啲時候，我都驚自己撐唔過去，會放棄嘅時候，我最需要嘅，其實係呀強嘅支持。
但佢只係想我多啲時間陪佢。
我都想可以係佢身邊扭下計，可以卸下身上嘅包袱，明明之前係佢面前我可以做返自己，但依家我好似要學返點解堅強咁。
一直以來視佢為我嘅避風港，卻開始刮起狂風暴雨。
最後一次嗌交，喺係佢送我去補習社嘅途中。最近我哋都一直係度嗌交，慢慢係度消磨緊我同呀強嘅愛。
我知佢努力就想維持好似以前咁，但忽略了最重要嘅現在同將來。
如我所預料，呀強因為我少咗陪佢，覺得我係打工嗰邊對住個MK仔仲多過對住佢。
「你唔好再當我係以前個MK妹啦好無？」我忍唔住，我已經好努力咁改變啦。
「係，你依家唔係MK妹，係女神啊嘛！女神實唔同啲㗎。」聽到喱句之後啲火就上嚟，我只係感到佢依家對我極唔信任，衝動嘅我明知隔離補習社仲有一段距離，我都即刻衝落車。
架巴士一埋站，我落車後，就開始後悔。
莫名其妙地感到後悔，覺得自己衝動。
我緩緩地向前行，架巴士離開嘅時候，我仲向上層最後嘅位置瞄了一眼，呀強都係無落到嚟，只見佢目光呆滯咁，亦都無望落嚟。
架巴士就咁樣開走咗。