[靈異] [愛情] [我同條女敦倫外傳]我屋企養左隻女鬼...: 放飛機

另外佢呢排已經考晒試，經過呢兩個禮拜我差唔多都每日登門拜訪教佢功課同為佢不斷罐輸中史嘅野，佢已經由本身合格邊緣拉返佢去合格以上位置，

而生物亦有進步趨勢，證明我呢種洗腦方式嘅方法係work，但生物我始終要透過阿盈幫助黎洗佢腦，

我呢個所謂嘅補習老師見到咁都好滿足、好有成功感，心諗呢個mk妹懶得黎又有啲資質架喎，我不得不敬佩佢。

當然我仲有默默地熬夜幫佢做一啲佢做唔晒嘅生物功課，務求令佢唔會欠交功課，我呢個所謂補習老師都算唔話得啦，都唔知點解佢會咁懶成日都趕唔切啲功課，

我覺得最大原因係佢晚晚6點幾就會叫我走佢要出去，但我並唔知佢去邊，佢亦唔肯講，呢點我好好奇。



唔好以為咁簡單我淨係燒腦教佢，我仲不斷燒緊自己銀包…啲錢，呢兩個禮拜佢每次都叫我買定個下午茶餐俾佢，因為咁我已經買到熟晒，佢鐘意食啲咩我都知得一清二楚。

另一方面嘅出血就係佢繼續時不時向我借錢，每次借親都一兩舊水，而佢依然唔肯講個原因我知，明明佢屋企得佢一個照計都唔係家庭因素，究竟佢背後收埋啲咩不可告人嘅秘物？

仲有我覺得我真係變得好鬼死好人，事關上個禮拜佢冇啦啦攝親病病地，佢嗰排係考緊試，於是從嗰日起我每朝都會打電話叫佢起身，驚死佢會唔知醒，仲會提佢食藥、落雨嗰陣叫佢帶定把遮，

話晒佢都係我‘學生’，我點可以俾佢因為咁而耽誤，呢個試係學期末嘅一個試，對佢黎講都幾重要，但我呢啲關心同著緊係咪正常？

亦因為咁我竟然會慢慢咁鐘意左聽到佢把聲，由其係朝早，每朝我都可以聽到佢嗰把好攰未瞓醒嘅聲，感覺好真實好幸福，



齋聽到佢把聲我就已經幻想到佢未瞓醒嘅可愛樣，就好似一隻未瞓醒嘅老虎，但點解我會覺得咁回味，唔通我係一個‘聲腔’？

之後我仲陪佢去睇醫生，醫生開左啲藥俾佢叫佢唔好飲咁多凍野同盡量少係冷氣位下俾風吹，所以自此之後嘅每次起身morning call我唔單止叫佢食藥帶遮，

仲會提佢唔好飲凍野、提佢帶多件衫上堂唔好凍親，依家嘅我猶如貼身保姆，驚死佢身子會再次出事…

「方伯 我冇帶遮 你可唔可以拎把遮出黎遮我 我呢度落好大雨走唔到」

今日係禮拜日，啱先起身冇耐嘅我突然收到Chole姐嘅wts。



「做咩咁大懵 咪提左你帶遮 你之前攝親仲未好得晒架」

「你係邊？我即刻過黎」

聽到佢冇帶遮我顯得有啲緊張，事關出面真係落好大雨。

「旺角間H&M。」

又係間公廁H&M？點解個個女仔都鐘意去嗰間公廁H&M行？我同阿盈行一次已經行到厭厭地。

「做咩冇啦啦去左嗰度？你冇其他fd係度咩？」

「我俾人放飛機…(流眼淚表情)」

原來係俾人放左飛機，咁嗰條友都幾衰喎，襯落大雨先約佢出黎放飛機，更何況佢唔知Chole姐佢未好晒架咩？再病返嘅話點算？



呢一刻我睇得出佢有幾傷心、幾失望，同平時惡死嘅佢截然不同，仲有我未見過佢喊架。

「條友咁仆街嘅 你留係度先唔好淋濕 我依家即刻過黎」

唔講咁多，我即刻落樓飛10蚊小巴出旺角，只需20分鐘就衝到出去，

落車後，我開遮淋住大雨趕往H&M，因為落太大雨關係，把遮遮唔晒我自己都淋濕左少少。

經過幾條橫街窄巷後我終於黎到間H&M門口，但眼前並唔見Chole姐係門口等緊我，仆街你唔會淋住雨走左掛…？

然後我打俾佢，但得到嘅回應係…

「你的電話暫時未能接通，請遲啲再打過黎…」



做咩唔聽我電話，我更加著急，我嘗試入去搵佢係唔係入面，行到去女裝嘅時候終於見到個熟悉嘅身影，一個冇著褲look(即件T-shirt長到遮住條短褲嘅look)。

冇錯，係Chole姐，佢係度好悠閑咁睇緊衫，一啲都睇唔出佢有傷心。

「喂點解你唔係門口等我？電話又唔聽，知唔知我有幾心急，以為你直接淋雨衝走左，你再病過點算？」

我見到Chole姐後立即激動上前理論，但總算鬆一口氣。

「你理閪得我做咩姐，咁你話黎遮我我唔通半粒鐘企定定等你咩柒頭，我緊係入黎睇下衫，同埋出面落咁撚大雨我都走唔到又點會衝走，你用你個閪腦諗下啦。」

「我唔聽電話係因為我教左靜音聽唔到，洗唔撚洗我依家打返俾你啊。」

原來係咁，一切都係我過度緊張諗多左，依家佢冇事就好。

「都唔知你咁閪激動做咩，又冇人得罪你，我依家咪成個人棟撚住係你面前。」



「咁你又話俾fd放飛機？冇事嘛？」

「放飛機好閒姐，我會有乜撚野事？既然你依家都出左黎咪你同我睇下衫，等陣先遮我返去。」

「屌你我…我見你wts講到好sad咁以為你會諗唔開先即刻趕出黎咋。」

「哈哈傻閪你唔係信下話，我玩你咋，如果我唔講到咁你又點會出黎陪我睇衫。」

頂佢個肺，呢刻先知原來我中計了，枉我仲即刻衝出黎陪佢驚佢有咩事，都唔知點解我要咁著緊佢。

「仲有你出撚左黎我先有人遮到我返去架嘛。」