我苦苦說服希望可以變返以前咁叫我買野俾佢、我好想脫離依家呢種距離感變回以前嗰種親密感,點解你就唔可以俾我付出下…?

「總之我今日唔想買,你可以慳返啲錢,我睇下就得架啦,你嘅好意我真係心領。」

結果佢依然好決絕地叫我唔洗買俾佢,果然依家連付出都唔再需要我,一切都變得陌生。

說罷好快我地睇完就搭車返去,我帶住一個失落嘅心情陪住佢。

「其實呢…點解你今日好似唔同左…你係咪唔再當我係朋友?」





返去之際我終於忍唔住對今日嘅事問左佢一下。

「um...傻啦,你係個好人,又冇做錯野,我點會唔當你朋友,我其實之前應該都對你咁樣,但我偏偏做左一個衰人。」

「唔係架,我鐘意之前嘅你,係咪因為我同你表白左…?」

「又或者係因為呢刻當我好人所以變成咁樣?如果係咁嘅話,我寧願你當返我係壞人,好似以前咁打我鬧我串我。」

樂兒靜左幾秒。





「啊,話說你今日第二次玩Antman真係勁左喎,同我分數好接近,我地之後再玩你可能已經超過我。」

最後佢直接迴避埋我問佢嘅野,我都希望仲有下一次可以陪你去迪士尼玩。

「嗯係架,我下次一定可以超越你,如果你仲肯俾我陪你去迪士尼的話…」

既然佢唔想答我,我都唔迫佢答,我諗我都知答案,但我今晚講埋呢啲野真係唔知仲會唔會有下一次黎迪士尼玩。

「唔知呢,總會有機會嘅…(聲線漸細)」





然後樂兒越講越細聲咁答我,好一句總會有機會,即係好多時都再冇機會再陪佢黎玩、象徵住下次將會變得稀罕,

我亦唔知佢講到咁嘅呢句係真係假,可能佢口就咁講純粹安慰我,但其實內心就唔再有機會…

「好啦,咁你下次得閒就再叫我陪你,我幾時都可以,唔好唔記得你仲有個好強嘅對手‘追’緊你。」

我特登強調個追字,唔知佢聽唔聽得明,希望藉此可以令佢心動。

「嗯,我記得架啦,我…得閒會再叫你陪。」

之後佢都係疾左一疾先講出口,我覺得呢啲都唔係佢嘅真心話,唔通呢次真係最後一次陪佢去玩…?我唔敢再諗落去,越諗越心痛,我唔想面對呢個事實…

「不過呢,之後就算我真係好耐都唔得閒叫你陪我去玩,而你又好想去玩嘅,你都可以約住你其他fd去住先、唔洗就我,相信你地都會玩得好開心。」

佢咁講即係咩意思,係咪想推走我…?種種跡像都顯示佢唔想再有下次,俾著以前嘅佢根本唔會咁講…





「其實我唔鐘意去玩,你去玩我先鐘意去玩、我亦淨係鐘意陪你去玩、陪你一齊癲,我唔需要其他人陪我,況且我本身都冇乜朋友,佢地冇人會想去迪士尼。」

然後樂兒又靜左兩秒。

「我…咁啱出面有啲fd去開迪士尼,我可以介紹俾你識,咁樣就可以有人陪你去玩唔驚冇fd陪。」

「你有冇聽清楚,我咪話我淨係鐘意陪你去玩去癲,我唔需要其他人陪我,因為其他人唔再見唔到你嘅影子,所以你唔洗介紹fd俾我去玩!」

就正如我鐘意你一樣,我只係鐘意你一個,其他人我一概唔接受、亦唔需要其他人取代你。

然而唔知佢係特登定真撞聾,我有少少激動地重覆返俾佢地聽。

「嗯,咁樣嘅話,就睇下我幾時得閒再叫你陪我去啦。」





說罷樂兒就死死氣地屈服我唔再話介紹朋友,但佢講得咁唔情願,睇怕都只係用黎安慰我嘅說話而已…

過左一段時間,我終於送到樂兒返屋企,過程中佢都冇咩同我講,而我內心亦只有隱隱作痛,以為今日去玩會係開心嘅一日,點知原來呢日只係想我睇到佢對我嘅改變,諗返我都覺得我真的太天真了。

「好啦返到屋企你好好休息下,今日都行到攰,冇咩事我…我走先。」

「唔好走住,我帶你去一個地方做啲野。」

正當我想走之際,樂兒突然叫停左我,然後佢就拖住左我隻手向前走,直到佢帶左我入佢間房閂埋門,我心跳突然又跳得好快。究竟佢叫我入黎做咩?

第一次入去間閨房發覺佢間房好靚,幅牆同樣都係粉粉地色,周圍啲野擺得好有條理好整潔,仲有著陣陣香薰嘅氣味,

一入到去已經俾佢呢個地方吸引住,估唔到我會有幸見到女神平時瞓教打理嘅地方,呢個機會好難得,

而佢間房一入去就係對住張床,隔離有張細枱同兩個櫃,細枱同櫃分別擺左盞床頭燈同擺滿公仔,佢真係好有少女心,





隔離仲黐左啲佢同fd影嘅相,相入面嘅佢地好開心、打扮好mk、好稚氣,唔知係幾耐之前了,而其中有幾個fd我認得係之前接樂兒放學嗰陣見過,

舊相果然係舊相,依家嘅佢地已經反晒面、大家已經唔再係朋友,就連對我都已經改變…相中只保留著佢地昔日嘅友誼、成為歷史。

「樂兒,你帶我入你間房做咩野…?」

入到黎觀察過環境後,我帶著疑問地問左佢一句,佢就唔知做咩地深深的凝望住我,

下一秒突然就錫左埋黎我嘴,左手撓住我條頸、右手不斷搓揉我心口、越搓越落,一切都黎得太突然,我已經唔識反應,只知道我心跳快到就黎彈出黎,究...究竟做咩事!?
已有 0 人追稿