又一日,琴日喊完今日又要如常返工,我帶住一個沉重嘅心情返工,我到依家都唔敢相信我同樂兒關係竟然會變到咁,都係一晚之間發生嘅事。

唐生見到到我苦口苦面咁亦都留意到我有啲野過黎問我,我將大概嘅內容講左俾佢聽,佢感到驚訝然後予以安慰,我當然都冇咁快就平復到。

工作期間,我腦海中一直浮現出樂兒嘅畫面,係惠康入面每一個疑似樂兒嘅影子我都會望過去,我都會好奇究竟係咪佢,

但當然都唔係佢本人、每一個都只係‘似’,佢並冇再好似之前咁出現係我面前,以前嘅日子不再復返,我冇得再同佢鬥嘴、同佢去玩同埋見到佢…

時間怱怱過去,好快又到收工時間,我同以往一樣沿住一條冷清嘅街道行返屋企,沿途只有一啲靈界朋友陪住我,而其中有啲仲要係情侶黎,



佢地好恩愛咁係我附近行過,心諗依家連鬼都有拖拍、佢地死左都仲可以咁恩愛,反觀自己就乜都冇、繼續一支公毒撚一個,就只係跳級享受左‘敦倫之樂’而已,以為可以開始之際但正正就結束了…

經過一條後巷之時,又令我回憶起嗰陣同樂兒係嗰度嘅經歷,我可以拖住佢隻手走,真係好開心,但依家冇了,都係過去式…

返到屋企門口時,我望到昔日樂兒係門外屌我嘅日子,我嗰陣俾佢屌到狗血淋頭,而我只係當佢陌生人好平淡咁回應佢,

之後佢亦係呢個門口同我講想我同佢做朋友,再之後嘅每一次出街佢都係黎我門口等我…

唉,每次諗起都會好心酸,果然回憶都是美好的,依家想再經歷多次都冇可能。



望住不遠處樂兒屋企嘅門口,見到嗰日俾佢趕我出去嘅畫面,真係點都估唔到有呢一日,同第一次好開心我會黎佢度教功課形成一個好大嘅對比,我真係唔想以後都見佢唔到…

諗到呢度,我又忍唔住眼框充滿淚光。

我想上前去㩒佢門鐘問候下佢,但唔可以,佢講過唔想再見我我格硬咁做佢一定會反感更加唔理我。

唔好再諗唔好再妄想啦,諗咁多都改變唔到啲咩,返屋企先,離開呢個望到過去影子嘅地方…

返到去後,今晚阿盈竟然唔係度,佢去左邊?冇左阿盈係度嘅屋企,家中一片清靜、呢種感覺好空虛好孤獨,就好似每一個都離棄左自己,或者我終於真正感受到樂兒嗰種寂寞嘅感受。



係呢個咁寧靜且得自己一個人嘅環境下,往往會令人思緒泛濫,而我正正就係咁,我好似琴日咁坐左係地下挨住張梳發喊,

腦海中控制唔到地不斷浮現出琴日以至以前同佢相處嘅畫面,鬥嘴俾佢打俾佢鬧、接佢放學、唱k、軍營救佢等等,真係好開心好有愛…

最後我喊到開始有倦意就去左沖涼,然後我就上床準備瞓覺,因為倦意來襲我已經合埋左對眼,呢個時候我腦海依然未能停止諗佢,係眼淚不停流下嘅情況下慢慢就瞓著左,

然而阿盈到呢個時候仲未返黎,唔知佢去左邊…
.
.
.
過左唔知幾耐後,我聽到外面有好多嘅雀仔聲吱吱渣渣、耀眼嘅陽光照住我,我慢慢打開雙眼,原來已經日頭,我擰頭向隔離望左一望,驚見阿盈就坐係隔離,我嚇左嚇。

「哇你嚇死我咩,冇啦啦我瞓醒你就坐係隔離。」

「咪玩啦,見我都嚇親,我係有啲野想你起身即刻同你講先坐係你隔離。」



阿盈變得好凝重咁。

「發生咩事?點解你琴晚會唔係屋企嘅?」

「講之前首先我想同你道個歉先,搞到你琴晚自己一個係屋企喊到豬頭咁。」

「冇啦啦道咩歉,你都冇錯,係我控制唔到自己思緒,咪住先,你點知我喊過黎?」

「冇啊,返到黎見你瞓左見你對眼腫晒仲要濕濕地就知你喊過黎。」

「俾你發現左添,咁發生左咩事咁緊要要我起身就即刻同我講?」

「係關於樂兒…」



「關於樂兒?佢係咪發生左啲咩事?」

一聽到樂兒兩字,阿盈未講完我已經變得好激動問發生咩事。

「你冷靜啲先,我都未講完,但你之後都必須要保持冷靜聽埋佢。」

「嗯…你講啦。」

「琴晚我咪出左去唔係度嘅,因為我出左去跟蹤佢,我由7點幾佢出門跟到佢放工。」

唔怪得我返工前都唔見佢出街但放工就唔見左佢,原來佢係我返工後就暗地裡跟蹤樂兒。

「你跟蹤佢?」

「嗯,因為我覺得件事冇咁簡單、一定要蹺蹊,所以我想去跟下佢睇下有咩收埋唔見得光。」



「咁你見到啲咩?」

「件事係咁嘅,因為之前聽你講佢成日都7點幾就出街,所以我琴晚咁上下時間就係屋企門口伏住佢,見到佢真係7點幾就出門,拎住個袋著到靚一靚咁唔知去邊,咁我就開始跟住佢。」

「佢上左部小巴直衝出旺角去左間酒吧,佢換左件酒吧衫、好性感,之後就開始做野,嗰陣我先知原來佢係黎酒吧返工。」

「酒吧…?」

我聽到佢去呢啲地方返工後,先知原來佢係酒吧妹,我對佢了解實在太少了。

「嗯,佢做野唔單止遞下酒水,仲會周不時同啲客陪飲下,間中仲會俾啲客抽下水,然後就俾幾舊水佢做貼士…」