【真人真事改篇】《有一種距離，是HKU和IVE仔的距離。》/《初戀2000天》: 第十一章上「這一雙手卑鄙到 可將你放於舌上純熟地讚美 當天一光 終於要抉擇便放棄」 〈龍舌蘭〉

https://www.youtube.com/watch?v=pB8nwmbPfo4
第十一章上
         吃過聰嫂後，James便把Jessie送了回宿舍，沿途James不斷開新話題，又說了些冷笑話，可Jessie都不沒甚麼反應，冷淡得很。當James想親Jessie時，Jessie更避開了他。
        Jessie很少會這樣決絕，James意識到Jessie有多在意Kay的存在，所以當他送Jessie回到宿舍後，他馬上掏出手機，開始苦思該如果向Kay開口。
        自Lemon和K哥罵過James後，他其實有好幾次都想過要遠離Kay，但每當看到Kay可憐的一面，他總是不忍心。
        「叮！」又是Kay傳來的訊息。
        James咬了咬嘴唇，猶䂊地打開訊息，上面寫著：「你估如果我擺依張相上去，佢會唔會有反應呀拿？」


        相中的Kay只穿了一件淺藍色的比堅尼泳衣，與她粉紅色的頭髮形成強烈對比，相中的她雖然沒有能夾死人的乳溝，但有23吋小蠻腰，還有一雙又白又幼的美腿。
        「佢唔會，但我會。」James輸入了，又刪了，然後又輸入，又刪掉⋯⋯
        James用手掌掩住臉，苦惱得不行。
        「我唔鍾意成日係你電話見到佢個名。」想起Jessie那張黯然神傷的臉和那句無溫度的句子。
        James還是選擇了攤牌。
        「你唔好再咁蹧質自己啦，佢唔會有感覺架，佢已經有第二個。」James傳送了這句後，繼續打：「你以後好好對自己，唔好再諗佢啦，你會遇到下個更好嘅人，只係⋯⋯我唔係嗰個人。以後除咗做Project，都唔好再搵我啦，我地咁樣始終唔係咁好，希望你下一個會係一個好男人。」James極速地輸入這段文字，然後按下傳送鍵，馬上封鎖Kay這聯絡人，不給自己心軟的機會。
        對唔住，求下你，唔好再搵我啦⋯⋯James心想。
 
        回到家，洗好澡的James坐在電腦桌前，再次拿起手機。
        唔知佢依家係咪好傷心呢？


        當James想按下Kay的頭像時，Jessie 打來了。
        James不假思索便接了Jessie的FaceTime，放了在電腦前，手按下了Chrome，準備開YouTube來看。
        這曾經是他們的日常，每當Jessie怕寂寞的時候，James都會透過FaceTime陪著她，然後各忙各的。
「你做緊咩？」Jessie還是一張木偶似的臉，無甚麼表情。
        「掛住你囉。」James看著Jessie還是愁眉不展的臉，總想逗她笑，就像中學的時候。
        「你講咗未？」
        James知道沒安全感的Jessie還是在擔心，馬上放下手上的滑鼠，拿起本來放在電腦桌的手機，認真地對Jessie說：「對唔住，我知係我令你無安全感，我已經同佢講清楚咗，佢以後唔會再搵我架啦。」
        「你同佢⋯⋯平時會講D咩？」Jessie問道。
        「無呀，都係安慰下佢咋嘛，我已經叫咗佢以後搵其他人安慰佢。」James的腦海自動把不應該說的內容都過濾了。
        James到這刻都沒想過Jessie已看過那些信息。


        「咁你點安慰佢？你地會講D咩？」
        「我咪叫佢唔好喊，同佢一齊鬧嗰個衰人囉。」
        「仲有呢？」
        求下你，唔好再問啦⋯⋯James心想。
        「同佢講依個世界仲有好多人愛佢，關心佢，叫佢唔好諗太多。」James堅定地說。
        James依舊沒選擇坦白，他選擇替Jessie營造一個他還是只愛著她的假象，因為他覺得只有這樣才是對Jessie最好的保護。
        「無啦？」
        我以後都唔會再關心佢架啦，乖啦，信我啦，James心想。
        「無啦，你信我啦。我以後都唔會架啦，我剩係會關心你一個架咋。唔好唔開心啦。」
        若Jessie沒有看過那些信息，大概已相信了一臉誠懇的James的說話。
        「我想下世做隻貓。點解？做隻貓，做隻狗，至少可愛迷人。你依家都可愛迷人。⋯⋯」
        也許是這謊言被揭穿的毫無預兆，James難以置信地瞪大了眼睛。
        「夠啦。」
        「唔緊要，仲有我，我愛你。⋯⋯」
        「夠啦！」


        這句話觸動了James的神經，逼得平日溫柔細語的James竟對Jessie吼了出來。
        「對唔住。」James的腦海無法思考，他潛意識替他選擇了逃避。
        James無法面對那被撕破的謊言，彷彿他也是受害者，他無法面對他一直不願承認的事實——出軌。
 
        電腦屏幕突然彈出一個拿著AK48步槍的匪徒，「蹦！」的一聲，James控制的人物便倒地了。
        「屌，你今日咁撚廢嘅，玩唔夠一分鐘就死撚咗！」Lemon生氣地對著耳話筒說。
        James沒有回應。
        「哇你Icon都黑撚埋，咩料呀你。」K哥問道。
        「我估我估，同Jessie鬧交。」Lemon猜說。
        「唔係比Jessie發現咗你同個女人D野下嘛？」K歌有點不敢相信地問道。
        「Jessie睇到晒我同佢嘅Message」James說。
        「你唔係上次斬咗纜架啦咩？」Lemon還未說完，畫面的角色便「蹦！」的一聲倒卧在血泊之中。
        也許是兄弟情深，每次只要Lemon或James的角色死去，另一方很快便會緊隨其後。
        「睇死佢一定無斬到啦，唉，話咗你架啦，咁咪仆街囉。」K哥說道。
        「我已經同佢講清楚叫佢唔好再搵我，點知會衰收尾姐？我搵你地唔係為比你地鬧架，幫手諗下方法啦。」


        「去氹返佢囉，唔係點呀？」Lemon理所當然地說。
        要知道Lemon可是一位不折不扣的女友奴，女朋友說一，他從不敢說二，凡事都以女朋友為先，這樣的他自然也就叫James馬上哄回Jessie。
        可K哥卻有不同的看法。
        「我地嗰日都叫咗你斬纜，你都唔肯斬，其實你係咪沉咗船？」K哥嘗試指James作理性的分析。
        雖然A0的朋友說的話比較離地，但有時也確實比拍過無數次拖的人更清醒。
        「我無，我仲係好愛Jessie架。」James嘗試替自己辯護。
        「咁點解你明知Jessie會Hurt死，你都仲搵Kay？」
        「佢好慘架，我唔忍心⋯⋯」James又想起Kay的臉。
        「屌，廢話啦，你自身難保仲諗個女人，你依D叫愛咩？收皮啦，你放過Jessie啦。」K哥聽到James那些不知所謂的藉口，快忍不住要爆James。
        「乜你咁講野架，話唔定Jessie仲等緊佢返去氹佢。」Lemon說。
        「唔係我話，人地Jessie當初DSE考幾多分？仲要入埋HKU，大把世界啦，係入面隨便識個分分鐘都好過我地幾個IVE仔，當初你對佢好就話姐，依家你都偷食啦，仲要繼續覺得個女人慘，你仲憑咩企佢隔離？」K哥總覺得身為朋友，就是要把James罵醒，讓他面對自己真正的想法。
        K哥的說話讓James想起Raymond。
        的確，佢地會睇同一本書，同一套戲，上同一堂課，而我⋯⋯
        「哇，寧教人打仔莫教人分妻呀，乜你咁架，IVE仔依家好影衰你咩，HKU一定就成功架？幾多出黎咪又係萬幾蚊個月，你洗咪咁快就咁撚自卑呀？」聽到K哥對自己的貶抑，不自覺地惱怒起來。
        「我想屌醒佢咋！」K哥激動地說。


        「佢當初追咗Jessie咁耐，邊個唔知佢對Jessie最好？五年嘅感情，話散就散呀？⋯⋯」Lemon繼續發表他的意見。
        James忍不住掛線了。本來已經不知自己想怎樣的James，在聽完他們兩個的說話後，更是頭昏頭脹，更加不知道自己想怎樣。
        James關掉電腦，躺在床上，手機的主屏幕背景是兩人中學時的合照，看著照片裏二人單純而燦爛的笑容，James哭了。
 
        之後幾天，James都沒有聽Kay的電話，上學又特地遲到，下課又馬上離開，甚至連電梯都不坐，直接走樓梯，為的就是避免與Kay有任何接觸。
        可是Kay還是追了上來，在樓梯口拉住了正急步離開的James。
        「等⋯⋯等等埋呀。」Kay喘著大氣說。
        為免Kay哮喘發作，James馬上停了下來。
        「你⋯⋯你依幾日做咩⋯⋯唔聽我電話，仲走咁快，⋯⋯你係咪有心避我？」Kay喘著氣問道。
        你知就唔好再搵我啦⋯⋯James心想。
        「我WhatsApp已經講得好清楚，唔好再搵我啦。」James還是背對著Kay說。
        「點解？因為你女朋友？」Kay問道。
        「我地其實只係普通朋友，我只係想我地做返普通朋友應該做嘅野，你明唔明？」James沒有正面回應Kay的問題。
        「我無話我地唔係朋友呀，但你話過會陪我渡過架？朋友都要遵守承諾架。」Kay說著說著，聲音開始變細。
        James可以猜到，Kay的眼淚應該在眼眶打轉。


        「鈴！」當James快要心軟，準備回過頭看Kay的時候，一個熟悉又陌生的電話打來了。
        是Joey。
        James輕輕地推開了Kay的手，走到一旁聽電話。
 
        「喂，你究竟想點架？Jessie WhatsApp咗你咁多次，點解你覆都唔覆下佢？依家係你做錯野定佢做錯野呀？」電話一接通，Joey便一口氣問個不停，語氣盡是指責。
        James沒有回應。
        這幾天，Jessie一直WhatsApp James，叫他來找自己，和她說清楚究竟是怎麼一回事。
        James不是沒有看到那些信息，只是他不敢回覆。
        「喂，比D反應呀，你究竟想點架？佢明明咁愛你，你點可以咁對佢架？」
        「就係因為佢太愛我，我唔敢去搵佢，我面對唔到佢呀，你明唔明呀？」James的罪疚感快要壓得他喘不過氣來。
        「你知唔知平時食野大過天嘅Jessie，依幾日竟然咩都唔肯食，明明比你Hurt到咁，眼淚都唔流一滴，日日就掛住做Assignment、溫書，傻咗咁，你竟然同我講你面對唔到佢？我睇到都覺得心痛呀，你點可以咁對佢架？」
        明明是Jessie派Joey打給James，叫James來找自己，Joey卻忍不住痛罵James一頓。
        James其實也很想去找Jessie，可是他面對不到自己。
        「佢仲肯原諒我咩？」
        「佢仲Keep住WhatsApp你，你覺得呢？」Joey反問James。
        James苦惱地按著額角。
        「我⋯⋯一陣就去搵佢。」
 
        James掛線後，走回Kay身邊。
        「你女朋友打比你？」Kay抹過臉頰的淚問道。
        「嗯。」James不敢直視她，繼續背對著Kay。
        「你係咪要去氹返佢啦？」
        「對唔住，係我唔啱，我亂咁應承你一D我做唔到嘅野⋯⋯」James還未說完，Kay竟走到James面前，掂起腳尖吻了上去。
        James驚訝地盯著Kay，過了好幾秒，James才想起自己答應過Joey的事，才抓著Kay的膊頭，拉開了她。
        「對唔住。」James頭也不回地走向樓梯，只留下了這無法改變事實的三個字和Kay。
        明明你鍾意嘅就係我⋯⋯Kay不甘心地抿著嘴唇。