【真人真事改篇】《有一種距離，是HKU和IVE仔的距離。》/《初戀2000天》: 第十二章下 「還不夠絕望 尚可更絕望 留給我日後用來形容前面境況」〈絕〉

https://www.youtube.com/watch?v=BrhBcxTXGLU&loop=10

第十二章下         第二天晚上，Jessie約了Raymond在銅鑼灣Sogo前等。
         這夜涼風颯颯，秋意甚濃，可Jessie只穿了一件橫間貼身上衣和超短牛仔褲，配一對啡色軍靴，手上還戴著James不久前，花了大半個月薪金送給她的Tiffany 項鏈。
         「我地行啦。」Jessie走到Raymond身旁，輕拍他的膊頭說。
         Raymond轉過身，發現今天的Jessie有點不同。
         這天的Jessie特意把頭頂的瀏海編成鬢辮，用板夾固定在頭頂，再把髮尾燙彎，還戴上了「大眼Con」。
         雖然衣著還是走型格路線，可這樣的打扮馬上使Jessie少了幾分距人於千里之外的冷傲，多了幾分可愛。


         可惜那時的Jessie還不懂化妝，不然大概還會化個全妝，修飾一下她那張憔悴得不行的臉才出門。
         「你唔凍架？」Raymond看著精心打扮的Jessie說。
         「唔凍喎，行啦，我想去買衫。」Jessie微笑地對Raymond說。
         依個女人平時好少笑架喎⋯⋯Raymond總感覺這天的Jessie有點奇怪。
         「好，咁你想去邊買呀？」Raymond說。
         Jessie沒有說話，只默默地往前走，Raymond便跟在她身旁，開始說起些會讓人反白眼的冷笑話，可這天Jessie竟跟著笑了起來。
         終於，Jessie踏入一間服裝店。
         哇，成兩千幾蚊買件得幾個字嘅T-shirt，我係Hollister可以買到幾件⋯⋯Raymond看著價值不菲的衣服，不禁瞠目結舌起來。
         看了幾件，才發現走來又走去Jessie的手雖然像在挑選著衣服，但視線根本不在衣服身上，而是四處張望，像是在找些甚麼。
         直至到Jessie的視線不再飄忽，Raymond才找到Jessie來這裏的原因——是James。


         距離Jessie大約兩個身位，穿著一身黑色衫褲的James正蹲在地上執捨貨品，直至他不經意抬起頭的瞬間，才留意到Jessie的存在。
         James的眼神沒有一絲驚訝或厭惡，卻有無限眷戀。
         蹲在地上的James仰視正俯視自己的Jessie，發現這天的Jessie有點不同，沒有了往昔的傲氣，卻有種揮之不去的悲傷。
         我好掛住你⋯⋯Jessie心想，卻知道這句話再也不能像往日一樣，可隨意對James說出。
         對望了大約三秒，James像有自知之明似的，低下頭，繼續埋頭苦幹，然後拿著衣服走到櫃枱，禮貌地替客人結帳，沒有再理會目不轉睛地盯著自己的Jessie。
         Jessie本來想過千萬種再見James時要說的話，或是刁難他的方式，例如故意試十套、八套衣服，然後投訴他的服務態度有多惡劣，讓他失去這份唯一的兼職。
         然而，當真正看見James的那刻，Jessie的腦袋卻停止運作，這些幻想頓時煙消雲散，卻只上衝上前抱著他。
         原來，她只是想來看James一眼，看看沒有她的他是不是還是過的那樣好，才發現，對方的日子還是一樣過得好好的，過得不好的只有Jessie自己。
         Jessie努力把快要從淚腺瀉出的淚水咽回去，便匆匆地推門而去。
         Raymond見狀，看了James一眼，便放下手上昂貴的衣服，連忙跟著Jessie的步伐離開。


 
         從服裝店出來，Jessie沒有說過一句話，只默默地走看著自己的腳尖走路。
         「啊，都肚餓啦，要唔要去食D野？」Raymond提議說。
         走到時代廣場前，抬頭一看，巨大的電視屏幕上，正播放著《丹麥女孩》的預告片。
         那套James答應過和Jessie一起看的電影。
         「不如我地去睇戲？」Jessie看著電視屏幕說。
         「好呀，依套聽人講幾好睇，我都想睇好耐，我Check下幾點有場。」Raymond馬上掏出手機搜尋場次，「咁啱Times仲有二十分鐘就有下場，我地去睇？」
         「好呀。」Jessie微笑說。
         於是，二人便乘升降電梯，上到UA戲院。買過電影票後，二人來到電影小賣部。
         「你想食咩？」Raymond問道。
         「我無咩胃口，你食啦。」Jessie仍然微笑著說。
         「喔。」雖然Raymond口裏沒說甚麼，卻買了一個二人套餐，打算用香氣誘惑Jessie。
        
         進到電影院不久，飢腸漉漉的Raymond已開始吃起熱狗。
         「嗯，好好味！你真係唔食？我買咗兩個喎，幫手食D呀。」Raymond把熱狗遞到Jessie面前。


         「其實我都好想食，但我真係無胃口。」Jessie無奈地看著眼前的熱狗。
         「一係食少少燒賣或者爆谷呀？」Raymond還是不願放棄，「睇在我特登陪你出黎搵佢，仲陪你睇戲嘅份上。」
         雖然Jessie只是勉為其難地吃了一粒燒賣，Raymond已馬上露出一個勝利的笑容。
         過了不久，電影便開始放映，由於《丹麥女孩》有極佳的口碑，這場戲幾乎全場滿座。
         然而，Raymond卻不時偷看Jessie，發現Jessie的視線雖然在大銀幕上，但眼眶卻快被淚水淹沒。
         Raymond馬上掏出紙巾，遞到Jessie手上。
         Jessie沒想到Raymond會看到自己哭的樣子，馬上尷尬地用紙巾印去快滴下來的眼淚。
         「我無諗過咁耐無見，佢見到我，一D反應都無⋯⋯」Jessie壓低聲音說。
         佢望你個眼神明明就好開心，佢只係唔敢表現出黎⋯⋯Raymond心想。
         「唔好喊啦，佢唔值得你咁做。」Raymond大土中Jessie耳邊細聲地說。
         「佢值架，佢明明對我咁好⋯⋯」Jessie哽咽著說，「上個月先用咗半個月嘅糧送咗條Tiffany頸鏈比我，點解佢要咁做？」
         Jessie看著銀幕上，Eddie那被淚水模糊了的臉說。
         「但佢已經選擇咗第二個人啦。」Raymond百般無奈地說。
         「點解佢要揀佢？我地五年感情啦，佢地識咗個幾月咋。」
         愛情邊可以用時間黎衡量架？Raymond心想。


         「乖啦，唔好再喊啦，佢唔值得你咁做。」
         「我知，你地講嘅我都知，佢一腳搭兩船，我唔應該再留戀，我要move on，但⋯⋯我真係仲好掛住佢，我唔想move on，你明唔明？」Jessie的眼神空洞而沒有焦點。
         佢嗰陣係咪都係喊得咁淒涼？Raymond心想。
         看著Jessie那張哭花了的臉，Raymond不禁心疼起來，可是他知道沒有人可以幫到她，只有時間可以。
 
         從電影院走出來，剛才兩個多小時都幾乎只顧著聊天的二人都說不出自己剛才究竟看了些甚麼，只零零碎碎的記得幾個畫面。
         「不如我地去食D野？」Raymond看著只吃了兩粒燒賣的Jessie說。
         「我唔肚餓，我想去行下。」Jessie雙眼紅紅地看著Raymond說。
         「好，你想行邊？我陪你行。」
         經過希慎，過了馬路，來到SOGO，再往金百利中心、銅鑼灣地帶方向走。
         走著走著，來到24小時營業的惠康
         「我想飲酒。」Jessie突然停下了腳步說。
         「唔好啦，散下步算啦。」Raymond勸說。
         「但我真係好想飲，飲咗會舒服D架，你明架？」夜夜失眠的Jessie想起她父親有事沒事都會喝酒，每次喝完就會滿足地去睡覺，一覺睡到天光，令她有種一醉就能解千愁的錯覺。
         「但你無食過野喎，一係你買D野食，我就陪你飲。」Raymond也是一個酒鬼，他能夠明白Jessie的心情。


         「好啦。」Jessie馬上妥協。
 
         凌晨十二時，Raymond和Jessie來到人煙稀少的維園，隨便找了張長椅坐了下來，Raymond便開始從膠袋裏掏出面包、薯片和啤酒。
         「拿，你應承過我會食野我先同你飲架，乖乖地食咗個包，我地先開始飲。」Raymond把面包遞到Jessie手上。
         「放心，我講得出就做得到，我都唔想自己爛胃。」Jessie馬上接過面包，大口大口地咬下去。
         看著終於肯吃東西的Jessie，Raymond才放下心來。
         「嚓！」一聲，Raymond把打開了的啤酒遞到Jessie手上。
         「飲酒係爽嘅，我嗰陣都飲咗好多，但你酒量得唔得架？」Raymond呷了一口啤酒問道。
         「緊係OK啦，我三歲就開始飲啤酒啦。」Jessie得戚地說。
         「哇，好威喎。」Raymond諷刺地說，然後往口裏塞了塊芝士薯片。
         Jessie看到Raymond質疑的眼神，馬上放下咬了半個的面包，一口氣灌了半罐啤酒。
         「喂你飲慢D啦，仲有成半打，無人同你爭架。」Raymond連忙按住Jessie手上的啤酒。
         「你有得我啦。」Jessie不顧Raymond的勸止，又喝了好幾口。
         「其實你鍾意佢D咩？點解佢咁衰你都仲鍾意佢？」Raymond忍不住問。
         Raymond的問題，喚醒了Jessie埋在腦海深處的記憶。


         「我都唔知，可能鍾意佢夠低B掛。」Jessie的笑容竟帶著點甜蜜，「中一、二嗰陣，佢幾乎係全級最曳嗰幾個，成日比D老師鬧，偏偏佢每次比人鬧又嬉皮笑臉咁，我真係唔明點解有人面皮可以咁厚，諗起都覺得好笑。最好笑嘅係，嗰陣先得中二，佢竟然話佢好鍾意我，仲追咗我好耐，講真，嗰陣咁細個，鬼知咩叫鍾意咩，諗起都覺得好笑。」
         那種甜滋滋的笑容，讓Raymond想起他的初戀，他好像能理解到Jessie為何這樣難以釋懷的原因。
         「最好笑嘅係，係老師眼中係乖乖女嘅我竟然又肯應承佢，完全就係一個九唔搭八嘅組合。」Jessie笑著說，話剛落，手上那罐啤酒也剛巧喝完了。
         於是，她又拉開了新一罐。
         「偏偏追我嗰個係佢，飛我嗰個都係佢，哈！」Jessie冷笑了一聲，又咕嚕咕嚕地喝了大半罐啤酒。
         聽到這句，Raymond的心像被甚麼刺了一下，逼他也面對自己那段不堪的往事，不堪的自己。
         「男人就係咁賤格，鍾意你嗰陣，用盡一切方法都要得到你，偏偏愈易得到就愈唔珍惜，又貪新厭舊，真係講起都無地自容。」說到這裏，Raymond也喝下大半罐啤酒。
         「我知呀，所以如果佢依家肯返黎我身邊，我可以當無事發生過架，點解佢唔肯返黎？」Jessie失落地說，「如果我當初無揭穿佢就好啦，點解我唔可以再忍下，明明佢都話咗會斬纜，點解我仲要逼佢？逼走咗先黎後悔，點解我咁蠢？」Jessie激動地說。
         「錯嘅唔係你呀，你係應該要揭穿佢架，係佢唔啱呀。」Raymond突然抓著Jessie的膊頭，看著她的臉說，才發現臉紅紅的她原來在哭。
         「我知呀，但我寧願咁樣，咁我就唔洗比人飛，佢就仲係我身邊呃緊我，我可以隨時都見到佢。好過依家，佢連Message都唔覆我啦。」Jessie突然掙脫Raymond的手，站起來說。
         Raymond這才發現，在不知不覺間，Jessie已喝了四罐啤酒。
         「點解我明明咁聰明，但就偏偏咁蠢揀咗揭穿佢？點解呀？」Jessie開始發酒瘋。
         「你冷靜D坐返低先。」Raymond又把Jessie拉到長椅上。
         「鈴！鈴！鈴！」這時Raymond的手機響起，「你等我陣先，我聽個電話，喂？」
         趁著Raymond聽電話之際，Jessie掏出手機，輸入了指紋識別後，按了幾個鍵，然後把手機放了在耳邊，直至她開始說話，Raymond才留意到她在打電話。
         「喂，我好掛住你呀，你黎搵我好唔好？⋯⋯我係邊？我係維園，係呀，我飲咗好多好多酒，但我無醉！⋯⋯我係咪好犀利呢？⋯⋯」
         Raymond回過神，連忙拿走Jessie的手機，才發現她打了給James。
         「你醉啦，我地搭的士返Hall啦。」Raymond把Jessie手上的啤酒罐奪去，拉著Jessie準備走。
         「我唔走，James應承咗會黎接我，叫我坐係到等佢。」Jessie甩開Raymond的手，把手機奪回。
         「佢唔會搵你架，佢已經有第二個啦，佢唔會理你有無醉，死得未架。」Raymond苦口婆心地說。
         「唔會架，佢應承咗架，佢話過會黎就會黎，我要係到等佢！」Jessie抓緊手上的手機，堅定地說。