【真人真事改篇】《有一種距離，是HKU和IVE仔的距離。》/《初戀2000天》: 第二十一章上 「你的她長存不死 過路人垂手可得怎可以比」 〈過路人〉

https://www.youtube.com/watch?v=agoYlc29eNQ
第二十一章 
        凌晨一時多，剛和姊妹倒數完的Kay剛回到家，拖着疲累的身軀躺在床上，再次拿起手機，點開與James的對話記錄。
        二人最後的一則信息，是Kay零時零分發出的：「聖誕快樂！」而James到現在還未回覆，甚至連最後上線時間都是幾個小時前。
        你究竟係邊，做咩唔覆我？Kay想了想，還是決定打給James。
        「嘟，嘟嘟，嘟⋯⋯」然而，電話響了良久還是沒有人接聽。
        「叮！」這時，手機傳來了信息的聲音，是Amy：
 


「你返到屋企未呀？」「可能返工攰得滯姐。」「可能訓着咗？」「邊會呀，你地一齊兩個幾月咋喎。」 
        打到這句，塵封的記憶突然一湧而來，Kay想起和每一位前度和自己快要分手的時候都是這樣，不論是Ray、Edward，還是Denny⋯⋯
想到這裏，Kay的眼眶一片霧氣氳氤，被朦朧的視線再無法看清Amy傳來的信息，只是不斷憶起過去的他們是怎樣傷害自己，尤其是Denny。
        Denny快和自己分手的時候，也是這樣，不再每夜一起打機、FaceTime，信息亦久久沒有回覆。儘管如此，她仍愛他，於是她嘗試挽留，她不再要求他做甚麼，甚至委曲求全說自己會改掉所有壞習慣。
        然而，換來的，卻是Denny無情的背叛。
        James會不會也和她的那些前度一樣？
        看着手上的情侶手鏈，Kay嘗試安慰自己：唔會嘅，James應承過，會永遠陪住我，唔會好似Denny咁對我架，係佢係我最需要人陪嘅時候陪住我，我要信佢。
 


        第二天，Kay醒來時，已是中午了，她再次拿起手機，發現James還是沒有回覆自己。Kay於是又發了一則信息：「你係邊呀？記得今晚約咗我食聖誕大餐架，我依家去買料啦。」
        然而，一直到Kay梳洗完畢，手機還是沒有一點反應。
佢應該唔會唔記得約咗我掛？唔理啦，都係去買定料先，Kay心想。
        於是，Kay隨便換了套衣服，便跑到樓下的超市，開始準備今夜的聖誕大餐。站在貨品架前，看着新鮮的美國大雞腿、西班牙黑毛豬、免治牛肉⋯⋯Kay卻毫無頭緒，不知道該選甚麼好。
        既然如此，Kay決定先轉戰較為簡單的飲料區。可是，遊走在多不勝數的飲品前，看着可樂、檸檬茶、啤酒⋯⋯Kay還是拿不下手。
        James鍾意飲咩呢？Kay心想。
        雖然已經一起兩個多月，這刻，Kay卻發現自己好像不怎了解James，甚至連他最愛吃、喝甚麼，或是最討厭些甚麼她也不知道。
        Kay糾結地拿起手機，又發了一則信息給James：「你今晚想食咩？想要豬肉定雞肉，定牛肉？仲有呀，你想飲咩呀？」
        可是，James還是沒有回覆，Kay只好順着自己的心意去挑選。
 


        最終，Kay決定煎牛扒配薯蓉。回到家，Kay稍為醃製了一下牛扒，準備好所有材料後，便去了換衣服，化上美美的妝容。直至六時多，她再發了一則信息：「我要煎牛扒啦，你到未呀？」
        然而，James卻還是沒有回覆。終於，Kay忍不住又打了一通電話給James。雖然這次James還是沒有接，但卻馬上發了一則信息給Kay：「Sorry呀，我有D發燒，黎唔到同你食聖誕大餐啦。」
        Kay馬上回覆：「你無事呀嘛？不如我黎搵你，煮粥比你食？」
Kay恨不得可以馬上跑到James跟前，看看他病得怎樣了，可是James的話卻馬上打消了她的念頭：「唔洗啦，我啱啱食咗D藥，有D攰，訓先啦。」
        「你真係無事⋯⋯」Kay還未打完這條信息，James已下線了。
        昨夜的想法再一次在Kay的腦海浮現，淹沒了她的眼線，黑色的淚水從臉頰滑下。
       
        「你咁得唔得架？」Jessie躺在James的懷裏，看着James打信息，猶䂊地問道。
        「唔係可以點？我同佢仲有份Project未做完，我唔想因為我地兩個嘅事影響到其他人。」
        「咁你想諗住幾時同佢講？」
        「完咗個Project，我會即刻同佢講。」
        「真係嘅？」Jessie的眼神盡是不安。
        James馬上扔下手機，抱緊懷裏的Jessie說：「真係架，我應承你，我一定會同佢分。你比多十日時間我，返到去Present埋，個Project就完架啦，我就會即刻同佢分手。」
        儘管眼前的James已騙過自己許多次，但Jessie還是二話不說相信了他。
        「咁依段時間，你諗住點？」Jessie靠在James的胸膛上問道。


        「除咗傾Project之外，我唔會再搵佢。」
        咁姐係你同佢仲會見面，仲會有聯繫？Jessie心想。
        眼見Jessie沒有說話，James又說：「最多我每個鐘都同你匯報行蹤，你嘅Message我絕對會秒回。」
        「真係？」
        「真係架！」
        「如果你無做到呢？」
        「如果我無做到嘅，就⋯⋯就好似溥儀咁。」
        Jessie最愛看些奇聞秘史，她想起，她曾經告訴過James，溥儀之所以無後，是因為他是陽萎的。
        聽到這句，Jessie忍不住笑了。
        「我地唔好講佢啦，不如我地出去食聖誕大餐呀？食Omakase？」James問道。
        「Omakase好貴架喎，你請呀？」
        「緊係，點會要我寶貝比錢呢？」James看着Jessie說，臉上還是掛着那Jessie最愛看的笑容。
        一切就像從前一樣沒有變過，彷彿James和Jessie分手只是一場夢。
        然而，James對Jessie的那些傷害卻又真真切切發生過，這叫Jessie很是矛盾。
        「你真係唔會再離開我架可？」Jessie緊抱着James問道。


        「真係架，」James輕撫着Jessie的髮絲說道，「我知你唔會咁快相信我，但時間會證明比你睇，我真係愛你，唔會再離開你。我地勾手指尾。」
        小時候，每當母親和Jessie許下承諾時，都會伸出尾指和Jessie打勾，然後再用姆指蓋章。
於是，James與Jessie許下承諾時，童真未泯的Jessie都會伸出尾指與James打勾，彷彿這樣做，承諾真的就能兌現。
        儘管現在的Jessie已知道，這不過是騙小孩的把戲，但她還是伸出了尾指，和James打勾，口中唸着母親的那句話：「拉勾，上吊，一百年不許變！」
 
        自那天起，James和Jessie就像回到從前一樣，James經常買着一大堆美食去找Jessie，每次不是買壽司，就是珍珠奶茶、雪糕、雞蛋仔⋯⋯
        這天，睡眼惺忪的Jessie打開了門，過了幾秒，James的頭才竄出來，像小孩似的笑着說：「登登！今次係香芋奶綠配拖羅丼！」
        「你唔好以為有野食就可以掩飾你遲到嘅罪行呀吓，一定又打機打到半夜先訓，所以遲到啦！」Jessie瞇起眼看着鐵門外的James說。
        「我知錯架啦，所以我仲買咗Haagen daz雪糕賠罪！」James馬上遞起左手的膠袋，「睇在我咁神心嘅份上，原諒我啦好無？」
        聽到有這麼多美食，Jessie馬上心動了，卻還是傲嬌地說：「就姑且原諒你一次啦，下次唔好啦！」才願意打開門。
        「咦，你把口好臭呀，你睇你，一定仲未起身啦，懶豬！」James故作嫌棄地說。
踏進門後，James把食物放到橢圓形的雲石桌上，便熟練地走到鞋櫃前拿拖鞋穿。
        「係呀，我見你遲到呀嘛，咪唔刷牙，特登留返D味臭死你！」Jessie故意走到James面前張開口，讓James聞自己的口臭。
果然，談戀愛會讓人變弱智，James掩着嘴巴說：「你再唔去刷牙，信唔信我放屁呀拿！」
        「放呀，我唔驚你架。」Jessie還是肆意地在James面前張大嘴巴。


        James無奈地看着智商突然降低十倍的Jessie，走到洗手間，拿起牙刷，擠上牙膏，放到Jessie的牙齒上。
        「快D拎住刷啦。」
        「唔制，我要你幫我刷。」Jessie無賴地把雙手放到身後。
        James實在拿Jessie沒辦法，只好無奈地替Jessie刷了：往左刷，再往右刷，然後是上下刷⋯⋯
        當James拿起水杯，準備替Jessie裝水的時候，滿口白泡的Jessie突然把臉伸到James面前，用力地親上James的嘴巴。
        「咦！好核突呀，我刷咗牙架啦！」James嫌棄得皺着眉頭說。
        「刷多次囉！」說罷，Jessie又強吻了James一口。
        「捨得浪口未呀？」滿嘴白泡的James無奈地把水杯遞到Jessie手上。
        「仲差少少，」Jessie又親了James的臉頰一下，才乖乖地接過水杯嗽口。
        沒料到，這時卻到James復仇了，他伸手把臉頰上的白泡都沾到Jessie臉頰上。
        「喂呀！」這次換Jessie嫌棄起來。
        「咩呀，D口水你架喎，你做咩咁嫌棄姐？」James笑着說。
        「你死緊啦！」Jessie拿起還沾有白泡的牙刷，當成劍似的揮向James，James則連忙閃開。
        就這樣，經過一番打鬧，James和Jessie都終於刷好牙，洗好臉，乖乖地坐到桌前吃不知算是早餐還是午餐的一頓。
        當James正把食物從膠袋裏拿出來時，Jessie從房間拿出手提電腦，搜尋起配飯的影片。


        沒想到，平日也是YouTube送飯的James這天竟說：「食飯唔好睇戲啦。」
        「點解呀？我想睇喎。」
        「我想同你傾計呀。」James像小孩地說道，「算啦算啦，你睇啦，反正我有得睇你就得啦。」James看着Jessie的臉說。
        James這句話馬上把Jessie打敗了。
        「好啦，唔睇啦，咁聽歌得啦掛？聽王詩安首〈愛存在〉囉？」
        「咩黎架？」
        「係我最近嘅最愛！」Jessie挑起眉頭說。
        「你鍾意啦，我可以望住你食飯，你鍾意聽乜、睇乜都得。」James繼續盯着Jessie的臉說。
        聽了James這些甜得發膩的說話，Jessie也甜滋滋地笑了。
        就這樣，二人一邊聽着張敬軒的〈騷靈情歌〉，一邊吃飯，一邊聊天。
        「哇，個拖羅好鮮甜呀，依間野係邊架？你點搵到依間餐廳？」說罷，Jessie把一塊肥美的拖羅放進口裏，完美的油脂分佈，馬上擄獲了Jessie的心。
        因為⋯⋯Kay拉過我去食，James心想，卻不敢說出來，改口道：「係佐敦嗰邊。無呀，我上網見D人話好食咪去試下囉，好食嘅下次再買比你食呀。」
        「好呀！」Jessie高興起說，「一陣你有咩做？不如我地去行山囉，今日天氣咁好。」
        「唔得呀，我一陣有野做。」
        「有咩做？」
        「我⋯⋯我一陣要返學校傾Project。」James眼神閃縮地說道。
        姐係，要見到Kay啦？想到這裏，Jessie臉上的笑容馬上消失了，可是她沒有說話。
         「我只係去傾Project咋，你唔好唔開心啦。」James連忙放下手上的筷子說道。
        「你幾時同佢講分手？」Jessie明知道James那天說過十天後便會和Kay分手，可是還是忍不住又問了一遍。
        「好快架啦，仲有幾日就Present，到時就完架啦。」
        「你依幾日仲有無搵過佢？」
        「有覆過佢Message⋯⋯」James坦白地說道。
        Jessie瞧了James的手機一眼，雖然明知道James的手機應該還保留着和Kay的對話記錄，卻不敢伸手拿起來看，也不敢再問下去，只是默默地吃着飯。
        「喂呀，唔好唔開心啦。」
        Jessie仍舊沒有說話，連看都沒有看James一眼。
        「喂呀，唔好咁啦。」
        唔通我仲要笑住同你講：好呀，去搵佢啦，我無野架，我好開心喎，咁先得？Jessie心裏這樣想，卻不願說出來。
        因為她知道，即使說了出來，也無法改變事實，James還是會去找她，而一旦他見到她⋯⋯
        想到這裏，Jessie內心更加不安，臉色也就更難看了，還是忍不住說：「你可唔可以唔去？你用Skype視像都得架。」
        「唔得呀，我地要返學校整舊野出黎先Present到，Skype傾唔到。乖啦，我真係唔會再同佢有D咩架啦，最多我下次請你食好野呀好無？」James摸着Jessie的頭頂說道。
        「我以後都唔洗你買好野比我食，你唔去好唔好？」Jessie放下了手上的筷子，水汪汪的的一雙眼睛看着James哀求道。
        James內心盡是為難，也不知說甚麼好。
        「做一次Freerider又唔會死嘅，最多個grade核突少少姐，你連走堂都得，爛次Grade又有咩所謂喎。」
        「就係因為我成日走堂，我今次再做唔好份Project就Fail，就grad唔到架啦，你點解唔肯信我一次姐？就信多一次咁多呀，好唔好？」James握着Jessie的手說道。
        我以前都信你架，結果呢？你叫我仲點信你？Jessie心想。
        然而，儘管Jessie已挽留過了，James卻還是堅持要去，Jessie便知道，一旦她愛James，比James愛自己多，她就失去了談判的籌碼，不，應該說她從來都沒有談判的資格。
        無論她再說些甚麼，James也不會為自己留下。
        是甚麼讓他這樣堅持要回去做Project？Jessie不敢再想下去，只是低下頭默默吃着碗裏的壽司飯。
        而信用破產的James也知道自己無論說些甚麼也沒有用，因為他早已傷透Jessie的心。
        於是，二人也沒有再說些甚麼，客廳裏，只剩下從手提電腦播出的悠揚歌聲。
 
        下午四時二十分，James比約定時間遲了二十分鐘才到學校。
        「咁遲架你，我地開始咗啦。」Amy埋怨道。
        「Sorry呀，啱啱塞車。」James邊說邊從背包掏出手提電腦。
        而事實上，James其實是為了避免和Kay單獨共處才故意遲到。
        「算！反正今晚大家都唔洗旨意走。」Amy說。
        「吓，點解呀？」James驚訝地問道，「唔係差少少咋咩？」
        「本來就係嘅，但我啱啱睇返份功課要求，原來佢之後仲有Upload一份Guideline，但我地完全無睇到⋯⋯」
        「唔撚係掛，你唔早講？」Kelvin也驚訝得瞪大了雙眼。
        唯獨Kay沒甚麼反應，只托着下巴呆呆地看着James。
        「喂，你地唔多謝我及時發現到個問題，仲話返我轉頭嘅，依家你地無責任睇架？」Amy不憤地說道。
        看到Amy快生氣的樣子，James和Kelvin都閉上了嘴巴。
        「嗱，根據之前嘅分工，我同Kelvin負責依Part，James同Kay就負責嗰Part嘅，」Amy指着電腦屏幕說，「你地嗰Part可能要大執，同埋要用3D print重新Print過晒D野，所以今晚可能要留耐D，你地O唔OK呀？」
        「我有得講唔OK咩？」James無奈地說。
        「一係我同Kelvin可以負責埋個PowerPoint啦，咁就可以慳返D時間，咁樣好唔好？」Amy問道。
        「你話點咪點囉。」Kelvin說。
        「OK，咁開工啦！」話剛落，Amy的電腦屏幕便黑掉了，「弊，無電添，要借學校D電腦用⋯⋯」Amy尷尬地看着Kelvin。
        「唉，行啦行啦。」Kelvin馬上拿起電腦跟着Amy走，留下James和Kay二人。
        「我覺得其實依部分嘅野都可以Keep返，係全部野變Double姐，你話呢？」James問道。
        點解你依幾日都無點搵過我，又無再搵我打機同FaceTime？Kay滿腦子疑問，卻不敢開口問，深怕會聽到她不願聽的答案。
        看到Kay黑臉的樣子，James忍不住嘆了口氣，不耐煩地問道：「又做咩呀？」
        Kay知道她已失去發脾氣的資格，只能收起一貫的脾氣，問道：「你好返晒啦？」
        「好返啦。」James簡潔地回覆道。
        「咁就好啦，我整咗D曲奇比你食呀，你試下呀。」Kay從袋裏掏出一個裝有不同形狀的手作曲奇的密實袋，然後拿了一塊心形的遞到James口邊。
        James沒有馬上吃進口，而是伸手從Kay手中拿起曲奇，然後才放到嘴裏。
        Kay無奈地放下懸在半空的手，嘗試用笑容掩飾內心的失落，問道：「好唔好食呀？我今朝親手焗架。」
        曲奇充滿牛油的香氣，香脆可口，又甜而不膩，確實挺好吃，可是James卻只簡潔地說：「唔錯呀。」
        「今晚唔知要做到幾點呢，你肚餓可以食喎。」Kay索性把整包曲奇放到James手上。
        「唔洗啦，咁大包。」James推塘道。
        「我特登整比你食架，你唔鍾意呀？」Kay扁起嘴巴說。
        看到Kay這表情，James馬上改口說：「邊係呢，我驚你比咁大袋我，你無得食姐，多謝晒。」然後把曲奇放到背包裏。
        「依家食先好食架。」
        「太好食我唔捨得一次過食晒，都係今晚返去先慢慢享受啦。」James微笑道。
        「你鍾意食嘅，我下次再整比你食呀。」Kay雀躍地說。
        「唔洗啦，咁麻煩。」
        「唔麻煩，你鍾意食就唔麻煩。」Kay的臉上揚起一個燦爛的笑容。
        James也不知道該說些甚麼好，連忙把焦點轉移到Project上，問道：「你覺得隻色洗咪變？」
        「我覺得隻色可以Keep返，但⋯⋯」
        「叮！」這時James的手機傳來了信息，馬上拿起手機，把屏幕調至最暗後，才敢點開Jessie傳來的信息：「你做緊咩呀？」
        James馬上回覆：「傾緊Project。」
        「我好掛住你，幾時傾完呀？」看到Jessie傳來的信息，James的嘴角竟不自覺地往上揚，甜滋滋地回覆：「我都掛住你，但今晚可能要做通宵，聽日黎搵你好無？」
        「邊個搵你呀？睇得咁開心⋯⋯」Kay忍不住問道。
        James回覆了一句：「我做野先啦，一陣再覆你。」後，便馬上放下了手機，對Kay說：「無呀，個Friend send咗D搞笑圖片比我睇咋嘛。我地繼續呀。」
        就這樣，James和Kay一直做到晚上八時多，才勉強完成了一半的設計圖。
        「好肚餓呀，不如我地去食D野囉。」Kay說道。
        「食你整嘅曲奇呀。」James正準備從背包掏出曲奇時，Kay卻伸手阻止了他，說「唔好啦，嗰D整比你食架。不如我地出去食野啦。」
        「但出去食野就會搞到好晏架啦喎，不如我去7-11買D野食返黎呀。」James提議道。
        「吓，但我真係好肚餓喎⋯⋯」Kay渴求地盯着James的臉說道。
        「乖啦，快D做完就可以快D返屋企。」
        「你錫我一啖就考慮下啦。」Kay指着自己的臉頰說道。
        然而，Kay不會知道，James之所以想盡快做完這個Project，並不是真的只是為了可以盡快回家，更大的原因是不用再見到她。
        為了達成目的，James只好輕輕地親了Kay一下，便馬上跑了去買食物。
 
        過了一會兒，James終於拿着燒賣、魚蛋、撈面等一堆小食回來了，說：「外賣仔到，食啦。好彩部手機係漏咗係到姐，幾驚係跌咗呀。」James連忙拿起手機看信息。
        然而，Kay卻不為所動。
        「隻眼做紅咗嘅？」James把頭伸到Kay面前問道。
        「無野呀，太眼訓姐，你買咗D咩呀？」Kay努力掛起笑容說道。
        「唔知你想食烏冬定撈面，我兩隻都買咗，我去一去洗手間，你揀剩比我呀。」James拿起手機往洗手間的方向走去。
        事實上，James站到一旁，只是為了回撥Jessie的未接來電。
        「喂，我啱啱行開咗，你打比我做咩呀？」James溫柔地問道。
        「我以為你比人拐走咗，唔記得咗我添。」Jessie酸溜溜地說道。
        「邊會呢，我一直都有掛住你架。」
        「你可唔可以⋯⋯」Jessie說到一半又猶䂊了
        「可唔可以咩？」
        「可唔可以即刻同佢分手？我好不安，⋯⋯你明唔明？」
        「我地講好咗Present完，我就會同佢分手架嘛，乖啦。」James安撫道。
        Jessie猶䂊了幾秒，還是忍不住把這句話說了出口：「咁我依家同Alan一齊，等你同Kay Present完，我再同佢分手好唔好？」
        「咁又唔好。」James連忙說道，深怕Jessie真的會這樣做。
        「我唔係想威脅你，但你可唔可以體諒下我？」
        「好，但你要比D時間我諗下點同佢講。」
        「好啦。」
        「夜啦，你早D訓啦好無？」James說道。
        我有乜可能訓得着⋯⋯Jessie心想。
        「好啦，早抖啦，返到屋企話我知啦。」
        「好啦，拜拜，啜！」James對電話親了一口，直到Jessie也掛線了，他才敢放下電話回到電腦前。
 
        吃過簡單的晚餐後，James便繼續努力拼搏，而Kay的軀體雖然仍在，靈魂卻像飄去數萬里似的，一直心不在焉。
        終於，James忍不住問道：「你係咪攰啦？」
        「我今朝好早就起身整曲奇⋯⋯」Kay低着頭說。
        看一看手錶，James這才發現，原來已快十二時了，這時Amy和Kelvin也回來了。
        「算啦，睇黎今晚都做唔晒，我地搵日再返黎做啦。」Amy邊說邊收拾着。
        「吓，唔好啦。」James卻不願停下來。
        「你睇Kay個樣就死咁，我唔理你呀，我走先啦。」Amy說道。
        「我都走啦。」Kelvin和議道。
        眼見組員都一副心意已決的樣子，James也只好收拾東西準備離開。
 
        與Kelvin和Amy道別後，James一如往常地送Kay回家。
        然而，心不在焉的Kay卻不小心被自己的鞋帶絆到，一個勁地摔倒在石地上，手掌和膝蓋都被摔破了皮。
        「做咩咁唔小心呀，」James連忙扶起Kay，溫柔地替她拍去膝蓋和手掌的灰塵，「有無事呀？」
        「好痛。」Kay疼得眼泛淚光。
        「流晒血，緊係痛啦，咪啦，都係唔好行啦，我地直接搭的士啦。」說罷，James走到馬路邊，伸出手截了一輛的士，再走回Kay身邊。
        當Kay正準備起動的時候，James卻叫停了她：「咪住！」
        「做咩？」Kay不解地問道。
        這時，James竟蹲了下來替Kay綁那鬆開的鞋帶。
        「原來係鞋帶鬆咗，下次綁實D呀嘛，行啦。」James小心翼翼地扶着Kay踏上的士。
 
        終於，回到Kay的家，Kay的父母早睡了，只剩Kay和James二人在客廳。
        「你沖完涼記得擦消毒藥水，無咩事我走先啦。」James說道。
        「你可唔可以等我沖埋涼，然後幫我擦藥水？」Kay拉着James的手腕低着頭，細聲地說道。
        看見Kay那還淌血的傷口，James馬上答應了Kay的要求，說：「好啦，你小心D。」
        過了一會兒，Kay終於洗好澡了，頂着一頭濕漉漉的頭髮走出來，抹了抹頭髮，拿起風筒準備吹頭。
        Kay為了避開手掌的傷口，只用姆指和食指拿起風筒，然後用手指撥弄着頭髮，看起來極不方便。
        James實在看不過眼，便拿起了Kay的風筒，說：「坐低，我幫你吹啦。」
        James把風筒調至中速，手指輕輕地撥弄着Kay的頭髮，使風可以更全面地把頭髮吹乾。
「你吹得好舒服。」Kay說道。
        「緊係，我有練過架嘛。」James想也沒想就回應道。
        係Jessie身上練過？Kay想到這裏心就不太舒服，按住了James的手，說：「差唔多啦，我慣咗唔洗吹太乾。」
        「你消毒藥水係邊？」James問道。
        「係個櫃上面有個盒。」Kay指着門邊那個櫃說
        James連忙把盒拿來，拿出裏面的紅藥水，滴在棉花棒上，蹲下來，小心翼翼地塗在Kay膝蓋的傷口上。塗好後，又拿起Kay的手，輕輕地抹上藥水，還不忘溫柔地輕吹了幾下。
        「有你真係好。」Kay盯着James那張專注的臉說。
        James抬起頭的瞬間對上了Kay那情意濃濃的眼神，馬上分神了，不小心用力地用棉花棒按了在Kay的傷口上，疼得Kay叫了出來：「呀！好痛呀。」
        「有無事呀？邊個叫你同我講野搞到我分心。」James馬上收起棉花棒說道。
        「咁係真架嘛，每次我傷心嘅時候，你都陪住我，我跌親都係你送我返黎，幫我擦藥水，有你真係好。」說罷，Kay竟往前緊緊抱住了James。
        過了幾秒，James反應過來，掙脫了Kay的擁抱，說：「未貼膠布呀。」
        然後，從盒子裏拿出膠布，替Kay貼上。
        「搞掂啦，你早D休息啦，我走啦。」當James轉身準備走的時候，Kay卻從後抱住了James說：「可唔可以唔好走？」
        「乖啦，夜啦。」James轉過身，看着Kay說。
        「但我唔捨得你。」
        「乖啦，Project仲未做完，仲會見架嘛。」
        「咁你錫我一啖先啦。」Kay嘟起她的櫻桃小嘴向James索吻。
        James嘆了口氣，還是在Kay的嘴上輕輕地吻了一下，然而當他準備抽身離開時，Kay卻雙手交叉放在James的後頸，用力地親吻James。