［網絡犯罪］［架空世界］《一網打盡》

一九九九年除夕夜，網絡企業家高明準備從公司離開，陪家人迎接新一年來臨，臨走前，他

叮囑員工。


「你地早啲收工啦，唔使人手睇住啲系統，改做自動監控，有咩問題我會第一時間知。」


員工們一聽見這話就紛紛離開，只餘下一位仍留這裡。





「唔得既，而家城市七成都係用緊我地系統，由其今日咁重要既日子，發生咩事點算?反正

我冇野做，由我睇住得啦。」明路説道。


他欣賞有這麼盡責的成員。説實話，維城的通訊，醫療，交通系統，都是交由他們主力管理

。他深明安全的重要，每天為了城市能夠保持安穩，公司數百人輪流日以繼夜留意網絡，因

為稍一出事的話，就會歸咎於他。






但這數年，他因為建設網絡城市而忽略了家人，今晚決定做回一個好丈夫，而妻子羅愛玲正

在煮豐富的聖誕大餐等他歸來。


「咁樣唔好既......我一間再番嚟啦，你唔使孤軍作戰。」

高明拍拍他的膊頭。






「屋企人緊要既，放心，有咩事我通知你。」

明路用熱水沖了個杯麵，繼續埋首在電腦裡頭，高明離開公司。

「係高明啊，下年有咩新產品啊?早祝你新年快樂。」途人問道。

「一定會有既，新年快樂。」高明報以微笑。

走在繁榮街頭，他構想着未來的維城是個智能之城，到處充斥先進設施，無人交通工具，電

子化管理。而這一切要由發展網絡開始，他和一班科技人才滿有信心改變現狀，為市民帶來

好生活。





他回到家裡，羅愛玲狀甚欣喜上前擁抱着他，不願放手。
「做咩啊?老婆笑到咁開心，我好肚餓，食得未?」高明問道。

「你就嚟做老豆啦!」她雀躍説道。

高明聽到這個消息驚喜萬分，先是看看她有疤痕的肚子，再盯着她好一會兒，結結巴巴説道
:

「咁......咁真係Thanksgiving!新一年最好既禮物!老婆，辛苦你，以後我會留係屋企睇住你多

啲。」

「咁你唔多啲睇住公司點得啊?你心血嚟，由其而家好多地方都用緊你設計既系統。」






「我冇話唔睇，只不過比佢地發揮，你放心啦。公司仲有好多人才，好似明路咁，我諗住升

佢做副總監，以佢能力係可以帶住啲成員。」高明撫着她肚子。


「過嚟食野啦。」

二人到飯桌坐下。


「以後唔好做粗重野啦，係呢，同阿爸講咗未?」高明問道。

「er......未住，老豆近排係城寨忙緊，等佢搞掂啲野，再約佢慢慢坐低傾。」






「又係啊，聽講傅家有人比外省旗兵綁架，民安社出面幫手，唔知救唔救到人呢?但老婆你

唔好再理社團啲野啦，唔係唔只肚條疤。」


「得啦，我已經唔係以前驕橫巴辣既大家姐，只係個小女人。食野啦，凍哂。」


夫妻難得坐下來有安頓的一餐飯，過後在梳化歇息邊看電視。

「市民出外準備迎接千禧......沙沙......」

電視信號突然出現問題，滿是雪花和雜音，同時窗外傳來巨響。





「碰!」

「叮噹!叮噹」

急促的門鈴聲打擾了他們的安寧，高明前去開門，來訪者是公司員工洛仁。

「老...老細，出事啦!公司網絡比黑客入侵，而家好多地方既系統慢慢失靈，出面開始亂到七

彩，我都係行上嚟。」他上氣不接下氣説道


高明跑到自己的電腦桌前看，發現連接不到公司網絡系統，他操作數秒後還變成了黑畫面，

佈滿由無數W組成的蜈蚣圖案。

「有咁勁既病毒?冇理由咁易開到backdoor，用咗咁多年，今日先出事......」他自言自語説道
。

「我盡叫同事番去幫明路手，我地都要快啲行。」洛仁心急説道。


羅愛玲搖晃高明，令他回過神來。

「老公，我同你番公司啦。」

「唔得!而家出面咁亂，有咩意外咁點?Rock，你幫我睇住佢，留意下有冇黑客有勒索要求，

必要時報警，我自己番去先。」


還未等到他們回答，高明急忙離開大宅，已經看到不遠處因交通混亂造成的行人傷亡，

道路阻塞。紅綠燈的信號系統也是他公司研發的，如今變成車毀人亡。

「嗚嗚。」

四周混雜着救護車以及傷者呼喊哭泣的聲音，使他感到失神，不知如何前進，呆站於此。

首長府地下安全室，一眾官員商討着緊急應變方案，此處所用的網絡不經高明公司設計，所

以不受影響

「而家市面情況點?」首長冷靜問道。

「好在股市收咗市，唔係班黑客有可能拖累埋，重創個市。」金管局主席説道。

「因為路面信號亂晒，由其今晚除夕咁多人出街，撞車有好多人死傷。已經盡可能聯絡各部

門，加快派人手去處理，醫院都好受影響，唔知處理得邊樣。」政務司司長抓抓頭。

「黑客有冇咩要求?」首長問道。

「要十二點前存十億去佢地海外户口，仲要係美金。」保安局局長説道。

「十億美金?!好大貪喎!」

面對這荒謬要求，首長克制不了自己，惱怒得用力拍桌子。

「我諗比就一定要比，但不如同佢地談判，比少啲。如果唔理，賠上係成個城市。」

財政司司長表示。

「你地知唔知傅家近排有成員比人綁架，勒索十億?而家我地又係咁，下下屈服既，咁同割

地賠款有咩分别?只會一次又一次去搶!」首長説道。

這時有人員衝進來。

「機場控制塔個邊緊急通知，有班機會係幾個鐘內降落，但因為信號受到干擾，根本比唔

到指示佢，有可能到時會撞，或者偏離降落地點!最壞打算係九龍城寨附近!使唔使散啲人?」


首長顫抖的手脱掉眼鏡，在場官員保持鴉雀無聲。

「唔......唔好，出面已經夠恐慌。而家靠高明班人解決番件事。」

高明幾經波折才回到公司，一眾員工在全力修復被入侵的網絡，徧偏只有明路停下手腳。

「我懷疑公司有人同黑客合作，提供我地系統既所有信息。」明路説道。

「邊個?」高明問道。

「洛仁，我係佢電腦帳户發現同不明網絡有連結既痕跡。」


高明沒有答話，只是看着電腦在盤算甚麼。

「咁你諗住點?報警?」明路建議着。

「阻止咗班黑客先，其他野之後再講。」


他回辦公室鎖上門，打了一道電話給妻子。

「老婆，叫Rock聽電話。」

洛仁接過電話後，問道

「公司情況點?使唔使我番嚟?」

「你而家同我老婆即刻去九龍城寨匿埋，麻煩外父睇住。」

「點解啊?」洛仁不明所以。

「你聽我講，就算今次搞掂件事，公司都玩完架啦，以後有咩我嚟頂。我唔想你比人屈同黑

客勾結。」高明説道。

「我勾結人?!係咪搞錯啲咩?」洛仁提高聲量問道。

羅愛玲搶來電話罵道:

「你諗住自己拆掂?有冇問過我同bb?我都冇錯，唔會匿埋架!要匿就佢去啦。」


「老細，我唔知發生咩事，但我信你唔會點我行黑路，我就去避下風頭。」


「仁，忍耐一陣，我會幫你離開維城。」


羅愛玲馬上寫了一封信給予洛仁，他動身前去九龍城寨投靠民安社。

「好啦，啲細安頓咗，你諗住點?」

「救番維城。」

説罷，高明掛線，開始全力應付黑客。


眼見政府立場堅決不肯交錢，黑客組織領袖看着一片混亂的環境，正思索下一步做法，他可

能會作出退讓，但最終還是他們勝利。


前往維城的其中一班機上，有對父母正哄着兩歲兒子入睡。

「言，乖乖。好快番到去。」母親説道。


小孩倦極，手中的飛機玩具鬆開跌到地上，父親彎身替他拾回。

「老公，如果唔係國際刑警要你番維城接管分部，我寧願留係英國。你睇阿李同個仔係蘇格

蘭場個邊生活幾好。」她抱怨説道。

「佢地要查黑客犯罪集團，好大可能潛伏係維城，我地熟悉哩到嘛。好可惜阿李半退隱狀態

，唔係我地拍住上查案。」

「咁佢個時老婆死咗咁大打擊，又要睇住個仔，邊有心情時間再做野。希望二叔同佢partner

幫到手，話晒佢地係名偵探識咁多人。」

九龍城寨內，居民正議論紛紛外面發生的禍亂。

「本身約咗個客架，而家條路塞成咁，佢應該嚟唔到。」牙醫説道。

「睇嚟哩個禮拜都送唔到貨比我。」士多老闆説道。

「好在我地城寨仲未搞咩網絡姐。」


一名穿着唐裝的中年男人在士多旁，和其他老人在圍觀下棋。

「阿強，民安社唔係要幫手救人咩，你咁得閒係樹睇我地捉棋?」


「出面咩網絡大亂喎，強仔，高明好大鑊。亅又有一人説道。

「天地有正氣，班外省佬遲早死。阿明，佢搞得掂架啦。」羅漢強氣定神閒回應。


民安社成員走到他身邊，輕聲説道:

「阿公，出面有個叫洛仁既，叫我比封信你，話係小姐寫。仲有傅家個邊請你過去傾野，架

車係出面等緊。」


他拆開信封，戴上老花眼鏡細看內容，一會兒後告訴手下:

「帶佢入嚟，安排地方比佢住先。」

他拿出大哥大電話致電女兒。

「阿明啲細我收留咗，佢個邊點?出面咁亂你番嚟哩到住先啦。」

「我冇野。」

「女啊......你有咗，自己保重，唔好再好似以前咁喊打喊殺。」

自她嫁給高明後，父親想她重投正常生活而遠離，見面甚少，但還是一直暗中關注着她。

「你......點知?」

「我有揾私家偵探定期查你地動向。」

「......解決咗件事，我地番嚟睇你。」她哽咽着。
「我都好耐冇見你，唔知你肥定瘦咗。」他感慨説道。

「我唔要再透過電話傾，你唔好再揾人跟住我!」

「好好好，你話事，我唔講住啦。」

「唔阻你，你係外面小心。亅


他只好在亂作一團時前往傅家。

兩歲的傅嘉韻不知父親被綁架，她母親告訴是在玩捉迷藏，仍在房間天真地等待他回來，而

在大廳，傅老先生正和何氏兄弟商討對策。

「傅生，班省港旗兵背後係有犯罪集團指示既。」何仕説。

「我收到消息，國際刑警查到佢地同維城一個新興黑客組織有關，而家出面立立亂。」

何志誠補充説。

傅老先生先是喝了口茶，摸摸殘缺的左手尾指。

「哩啲我都知，政府仲比黑客勒索十億美金。我以前都比人綁架過，但我冇驚過，對住惡人

，你要惡過佢，死淨把口都要同佢地玩到底。你地唔得既，我揾其他人幫手。生意既野，我

冇心情傾，走啦。」


兩兄弟互望着，他們只是稍為發跡的生意人，根本沒有能力對付龐大的犯罪集團，更何況黑

客。但若果能夠解決綁架案取信於傅氏，就必定能於城內立足。

「放心，你比一日時間我，我保證傅少係千禧年第一日平安番嚟。」何仕誇大説道。


何志誠心想如此保證，若辦不到，下場不只是做不成生意這麼簡單，看來他要為兄弟想辦法

了。

「好，你地走啦。」

傅老先生根本不相信他們能力，礙於二人父親是羅漢強相識才給幾分面子。

何氏兄弟離開之際，與羅漢強擦身而過，不小心碰跌他身上的電話。


他拾起電話，入屋後看見傅老先生，不忘恭敬地打招呼。

「過嚟坐低啦，沖咗茶，鐵觀音。」

「我最鍾意飲哩隻，真係有心。」羅漢強笑道。

二人仿如一早認識。

「阿強，記唔記得三十幾年前，我被人綁，個時你係澳門仲係一般古惑仔，咁啱有日比你行

過藏篸處，你又夠沙膽，番去班馬嚟救人。」

「我唔係諗住做英雄，都係為咗錢同上位先搏命。估唔到比你睇得起，就有自己社團做咗人

阿公幾十年......而家真係做阿公安享晚年。」


「你有孫啦?恭喜，但係而家高明一身蟻，好可能連累你個女。」傅老先生説道。


「以前豪哥同我講過生死有命，富貴在天，唔諗得咁多。而家唯一要做既就係救你個仔，之

後我就解散民安社，為咗個女同孫。」羅漢強説道。


電視正播放着突發新聞，記者在不同地方進行採訪。

「因為網絡系統失靈，市面同室內一片混亂。我而家身處醫院，大批傷者係到等緊醫治，由

其係蘭桂坊嚴重既人踩人事件，仲有哩到本身既病人，人手不足以應付。」

「我而家係首長府外，有好多市民抗議，要官員出嚟交代實際情況，有防暴警察在場維持秩序。」

高明公司門外亦擠滿記者，員工説道:

「大家唔好再企係到啦，我地盡力搶修緊系統。」


「咁有冇話幾時搞掂?我有民航處朋友報料話影響飛機喎，有可能撞落九龍城寨周圍喎!」

記者此消息一出，令所有人嘩然。


「咁真係死得人多!你地既系統係殺人兇手」有人起哄説道。

面對指責，員工憤然回應:
「發明槍既人冇諗過用嚟殺人，我地既網絡系統係用嚟發展城市，係班黑客利用做衰野!唔

關我地事。」


他不再理會外面的人，回到公司向高明説出事態嚴竣。

「老細，再搞唔掂信號，可能架機去唔到啟德，撞落九龍城寨個邊。」

高明瞪大雙眼，他外父和洛仁在那裡，不計外面，單是整個寨城有數百人，若飛機失事，定必造成重創，自己就是殺人兇手，難辭其疚。


他馬上致電羅漢強，但未能聯絡上，只好打給民安社。

「我外父係咪到?」

「老細?佢去咗傅家。」

「阿洛?而家你同我用盡任何方法，要叫所有城寨既人離開，最好唔好留係九龍城。亅

「咩事?你又叫我匿係到，而家又走。況且我邊有咁能力，不如你叫得高望重既羅生番

嚟。」

「我打唔通，趕唔切架啦，再唔走死得人多，飛機失事!」高明強調。


洛仁聽見這消息當然恐慌，吞了數次口水，還未回過神來。

「喂!聽住啊，最後一句，靠你啦。」


掛線後，他不知所措，只能合上雙眼祈禱。

「主啊，求你賜比我好似摩西咁既力量，帶領所有人遠離危險，阿門。」


距離飛機事故倒數兩小時，高明眾人在公司盡力解決問題，但他已作好最壞打算，甚至不理

政府封鎖消息，要傳媒散播整個九龍城，務求減輕傷亡。

這時他收到羅漢強來電。

「明，洛仁頭先嚟傅家揾過我，我地就番到城寨，你放心，我會撤離班居民，你盡力去

做。」

「你唔係要幫傅家咩?」高明問道。

「救一個有錢人定幾千人，你咁都唔識計?冇野既，仲有其他人出手，唔好講廢話啦，你做

野。」

掛線後，他心才定了少許。

在城市混亂之際，何志誠不知在哪居然帶來了被綁的傅少爺，並對何仕説道:

「我地去交人。」

「細佬......你點揾到佢架?亅何仕疑惑問道。


「你唔好理，總之以後我地大富大貴。」何志誠説道。

盡管何仕滿是問題，但其他事情不需要他理會就好，弟弟永遠可以替他解決。


麥言父母身處的飛機上，傳來廣播:

「各位乘客注意，半個鐘頭後可能有少少意外，請扣緊安全帶，唔好亂走。」

此話一出，引起乘客恐慌。

「唔係撞機啊?!」

「一般氣流姐。」


有些人遠處已到看到九龍城的景象，再說到:

「咩氣流啊?我地就到啟德啦。」


飛機控制室內，機長與控制塔失去聯絡，他只能憑專業判斷去升降，目的地就是啟德。


高明公司內，有人通報:

「架機出現啦!」

「市民仲散緊，根本唔夠時閒。」高明懊惱着。

整個九龍城亂作一團，人們爭先恐後逃難，連羅漢強也沒法讓城寨的人冷靜。

「今次關二哥都阻唔到啦。」他打定輸數。


羅愛玲獨自在家，不想看着窗外四周火光，回到房閒抱頭抖震。

飛機為了避開磨擦及前方障礙物，因此令機上情況顛簸。


「哇!會唔會撞架!?」

「死啦!」

「救命啊!」

機上乘客有的哭泣，有些準備遺言，麥言父母牢牢抱緊自己兒子。

「頂多三分鐘，睇下撞咩。」機師接近放棄。

政府眾人眼見無可挽救的情況，都坐在椅子一言不發。

「我係咪做錯決定?」首長陳任全低頭說道。


就在全城的人陷入低谷之時，明路大叫:

「呼，搞掂!信號恢復緊，機場個邊應該可以發出指示。」


高明立即檢查網絡，難以相信明路在危急關頭擊退黑客，同事們歡呼。

「你點做到?」他問道。

「唔重要，等飛機安全降落先叫冇野。」

機場控制塔馬上發出指示給航班，收到後，機師照安排改道而行，逐漸遠離九龍城寨。

「冇野啦?」乘客問道。

「睇嚟就係。」

廣播:「經過各方努力，而家解決咗危險，好快順利降落啟德，請各位原諒。」
乘客們放聲大哭，鬆一口氣。

「高明搞掂咗，各地方信號恢復緊，飛機冇事。」人員報告給首長。

首長抹去一額汗，說道:

「後續工作好重要。」


「冇野啦。」高明急忙致電妻子。


「我知你做得到。」她欣喜說道。

「係明路搞掂，我諗我唔會冇野······」

他黯然掛線，自己網絡令城市陷入危機，已是代表理想和人生徹底失敗······


「係早前黑客入侵維城網絡一事，今日法院宣判高明勾結不法份子危害社會罪名不成立，但

因個人產品令城市引致重大傷亡罪成立，被判破產以及軟禁在家。」新聞報道說。


高明從此陷入失常狀態，每日將自己關在房間對着零件，羅愛玲心痛，但沒有辦法，只能定

時送飯給他。

直至有一日她開門······

「老公······」她當場痛哭。

高明用多條縛起的電線上吊自殺。

他因網絡而生，最後被它奪走性命。

「今日網絡危機過咗三個月，市民發起悼念死難者活動，政府下旗致哀，而剛上市的新天地

集團主席何仕成立基金恊助重建及幫助遺孤。」機場電視播放着新聞。


「女，真係唔使我同你去英國?你大肚冇人睇住你。」羅漢強憂心沖沖。

「我想一個散心，唔好理我。洛仁已經係個到，有咩我會揾佢。你幫我拜阿明。」

「我會，咁你好好生活，保持聯絡。」


「我上機啦，你保重。」
父女擁抱，她往登機處前去，看着維城雨紛紛之景，只能黯然離城。

她知道維城已隨高明所死去。