《EU超時任務》續作: Chapter 2：2016年4月1至3日(上)
2016年3月31日23：55
轉眼就快過了一年，在這些年間，各人有各的去向。
我繼續幫周生發展新界用地，而為了運輸工程資源，籮斗，喊爆開設了物流公司，原來的大鼎物流倉也屬於他們。但好景不常，不久之後要賣給大公司。
雖然是這樣，他們有了可觀的錢去做小生意，改了個鋪名「包籮大爆」，我也算是合伙人。
而筲箕，警方一直調查威嫂失蹤一事，依然沒有頭緒，威爺經常為此分心，而決定離職。據訓嘰笠所說，他家中很亂，摺的紙鶴多得可以存放在物流倉，
真是痴情。
說起最近香港又開始多人失蹤，世界上每一秒都有人失蹤，所以沒有人會關心這些新聞，不覺得是大件事。
Tim的兒子出生了，見到他與老婆Suki 幸福，證明我與訓嘰笠所做既事是對的，這些值得去改變。
郭尚正結果都是和訓嘰笠分了手，一個人離開香港，聽聞在美國一間公司任職高層，最近郭偉誠中了風，他才神神秘秘回港探監。
自從那次探望賀展祥之後，幾乎都沒有打聽他的近況，起碼都安好，碩士在監獄攻讀博士學位，喪Q之前因為吸毒過多影響神經，所以行為燥狂，一段時
間治好後，不喪，要改口叫阿Q。
有件事情我意想不到的，當天的玩笑居然會有可能發生，一向毒男的光仔，雖然還是有點毒，但比以前成熟了，不會對甲蟲自言自語，因為小美成為他傾
訴對象，閒時出雙入對去探祥媽。
光仔有著落了，我與訓嘰笠又如何？沒有了郭尚正，我們關系也是依舊沒變，她繼續做Eu，我還是村長，大家經常鬥鬥嘴，有時經過閒聊數句，老媽行動
不便而搬了入村，我可以看著她，有時燕姐會與她唱唱戲，海叔會叫風帶五青汗給她，我又多了機會接觸訓嘰笠，這樣兩家人的生活不錯。
還有五分鐘就到2016年4月1日，一年前的4月1日正是所有事情發生的開始，我與訓嘰笠多次穿越時空 ，解決不同事情。
1. 報警捉四賊
2. 陪媽子跳舞戒賭
3. 幫JOYCE拆彈
4. 提醒亞添SUKI個胎有事
5. 幫康仔同賤昌講和
6. 起出賀展祥毒品
7. 通知ICAC黑警真正身份
8. 渠頭愛差婆!
頭七件事相信已經沒有下文，只有我愛訓嘰笠是永遠不能解決的。 不知道今年的4月1日會否如上年一樣充滿變化，可以再次穿越時空？
不過經過時空的洗禮，我的想法就是：
命運 從不在手
但奇蹟 郤可尋找
將來 也許可以改變
但最美麗的原來早已在手
緊緊擁抱 你所擁有
晚安訓嘰笠。
2016年4月1日08：10
「死渠頭......」
「訓嘰笠，早晨。」
我從床上起來關上響鐘，卻還是聽見訓嘰笠叫喚的聲音，是有幻聽嗎？
「死渠頭......開門啊！」
原來不是幻聽，而是風在屋外拍門，這樣心急？不會老媽出了事吧？
「黎啦，唔好嘈。」我說。
我一開門，她這個模樣明顯是剛起床就跑過來，上氣不接下氣。
「早晨，咩事啊？抖下氣先講，Madam。」我說。
外面天色暗淡，她入屋，我關上門。
「死渠頭......關鼎名......」
她沒有說甚麼事，看著我的眼神不像平時，平時極少叫我全名關鼎名，今日撞鬼了？
「Madam，你係唔係最近好大壓力，一個月親戚到，要搵我出氣？都唔使一早就黎啊......」我說。
她拿出沙漏項鍊，只見項鍊有點兒閃爍，就好像一年前4月4號的情況，現在她一早來找我，叫我關鼎名，又帶來沙漏項鍊，難道？
「訓嘰笠......你？」我說。
「沙漏項鍊，代表我地永恆既愛，將所有唔開心既野鎖哂入4月3，所有開心既野帶到4月4繼續............死渠頭。」
她笑了笑。
沙漏項鍊是我們的約定，風......記起來了！奇蹟居然在今日發生！
「訓......嘰......笠！」
我過去擁抱她，今次再也不放手了！
「今日係愚人節啊，唔好玩我啊！你真係記得番？」我說。
「渠頭，我記得我地穿越時空 ，記得爆炸，記得你好痛苦，哩一年，我唔記得你，你好難捱......對唔住......」
風哭了，我抹去她的淚珠。
「訓嘰笠，你傻啊，為左我一個人同郭尚正講數，仲爆成咁，我一個人帶住遺憾番去，睇住咩都唔記得既你，我幾難過。」我說。
「奇蹟出現左係我地到。」風說。
「我真係好掛住你，訓嘰笠！嘴番啖先。」
我想吻下去，她阻止。
「唔好啦，你未刷牙。」風說。
「車，你夠未刷牙，唔緊要，照嘴。」我說。
「我刷左啊，快D去刷牙。」風說。
「好啦好啦，我去洗面，實有得嘴，仲有好多野要同你講。」我說。
我快快手洗完，出去看著喜歡的訓嘰笠，今日比平時更吸引。
「做咩唔講野啊？又話好多野要同我講？我唔會消失啊，唔使一路望。」風說。
「緊係要睇實啦，萬一下秒你又唔記得我咁點？。」我說。
她好像想起一些事情，望出去窗口，說道：
「我恢復記憶.......咁威爺，啊正會唔會恢復？咁樣咪.......」
哎呀，一時興奮過頭，沒有想到這個重要問題。
「威爺最多咪繼續係屋企做望妻石， 郭尚正都潛左水啦，唔會再影響我地，我都唔會比佢再害人。」我說。
「我會唔會之後又冇左記憶？奇蹟唔係成日有。」風說。
「唔好諗咁多，活在當下，記憶哩啲野，我地識條時間線咩，光仔咁博學搵佢問下，我都想搵海叔，打鐵趁熱，行啦。」我說。
「咁快？我地咁既樣，你知啦，大家都以為我地係死對頭，咁......」風面有難色地說。
「唔快啦，係唔係對我冇信心？我可能唔似威爺咁為左威嫂穿越過百次，但我同你既經歷唔係計穿越幾多次，時間冇意義，珍惜，
好好相處既，一日等於一生。」我說。
「人地唔知冇關系，講清楚咪知，係鍾意既做咩要收埋唔比人知？我唔想再錯過同你一齊，扮野好辛苦。」
她走到門口，轉身說：
「渠頭，其實我都唔想再鬥嘴，你講得對......我唔駁你啦，我地行啦。
一出門居然撞見籮斗與喊爆，他們看著我和風拖手，好奇又興奮說：
「渠頭哥！同Madam一齊？估唔到！WOO~村長，村長夫人早晨！」
「你兩個......唔使咁大聲啊，訓嘰笠幾唔好意思呢，不過........幾好。」我說。
「再見村長，村長夫人！」
看見風想惡又怕羞的模樣，真是哭笑不得。
「行啦，冇你地咁好氣！」風說。
「你平時好男人婆，今日正常過喪Q。」我說。
「你冇野啊，死渠頭，搵我同喪Q比？係都搵過正常比啦。」她說。
「喪Q哥從良啦，咁我搵香港小姐,朱千雪比，得啦掛。」我說。
「咁就差唔多。」
她笑了，笑容是像陽光的，看到令人感覺溫暖與甜。
到了風家外，海叔在打理花園。
「海叔，早晨啊！」我說。
「渠頭？啊女，你兩個......我冇睇錯啊？」海叔錯愕地說。
「爸.....我唔知點解釋......不過我地係一齊左......」風說。
他還是不相信的樣子：
「女，你唔係因為同啊正分手而受刺激啊？」
「海叔！我同啊訓嘰.....啊風其實一早開始左，不過係地下情，希望你成全我地啦！我地經歷左好多生死！好多痛苦先一齊！唔理之前大家點睇我，我對佢一心一意，唔係郭尚正咁走去......總之我愛凌晨風！」我說。
「爸.....渠頭係認真既。」風說。
「唉，一早就咁同我講，我要時間接受，入去再講。」
海叔搖頭，我們一起入屋。
只見光仔，燕姐在這裡，小美呢？應該在睡覺。
「燕姐！光仔！早晨啊！」我說。
「唔好嘈到小美，佢頭痛。」光仔說。
光仔真有小美心，哈哈。
「我聽到你地出面講咩啦，我冇意見，風老豆話得既，我都得。」燕姐說。
「唔明你地後生點諗，玩玩下，見你好好地就算啦，唔好對我個女唔住啊。」海叔說。
「海叔！燕姐！多謝你地！搵埋媽子去飲茶慢慢傾！」我說。
風卻在回覆手機信息，誰啊？這個是見家長的重要時候。
「風？」我說。
「威爺話搵番威嫂，係醫院檢查緊，叫我地一間去。」風說。
失蹤一年，照道理威嫂有CANCER應該死了，還有威爺要我去，相信已經恢復記憶了，加上風，今日出現3個奇蹟。
「大奇蹟日啊！能蟹過丁蟹，燕姐今日去買實升啊！」我說。
「係就好啦。」燕姐說。
「不如我地早啲過去搵威爺啦，睇下咩事都好，我一間要番工冇時間。」風說。
「咁啊......海叔，燕姐，得閒再飲茶。」我說。
離開之前，小美落樓，說道：
「原來你話出生入死個個人係晨風。」
「小美你頭痛休息多啲。」風說。
「係啦，光仔會睇實佢，訓嘰笠行啦。」我說。
「仲叫啊女訓嘰笠？」海叔說。
「SORRY，改唔到口，其實叫訓嘰笠同叫BB一樣。」我說。
「爸，由佢啦，死渠頭，行啦。」風說。
「Bye海叔，燕姐，光仔，小美。」我說。
離開風家，出村時每個人都看著我們，金童玉女多人看是正常的。
「威爺見到我地實好安慰。」我說。
「威爺邊得閒理你啊，難得見番威嫂，不過奇怪，威嫂應該得番兩星期命，而家過左成年。」風說。
「所以咪話大奇蹟日囉。」我說。
「今日個天同上年4月1差唔多，直覺話我聽又有事發生。」風說。
「我直覺中六合彩，威爺等緊我地，上車。」我說。
不過風說得沒有錯，開車過去的時候，電話信號難接收，外面又響雷，代表準備可以在電塔下穿越時空，但今次我們應該沒有不幸事吧。
到了醫院，上病房時在lift看見兩個西裝男，其中一個帶著手提箱，另一個在發信息，不說以為是特工，我又想起碩士同喪Q。
病房外，看見威爺在等待。
「威爺。」風說。
「Madam.......村長.......好耐冇見。」威爺說。
他久違了的笑。
「威爺，大家都出現奇蹟啊，威嫂點？」我說。
「希望先係天長地久，你同Madam經歷咁多終於都一齊。芷澄，今朝有路人報警見佢係街，頭先醫生檢查發覺佢癌細胞居然正常左，但大腦有傷害，所以唔係好記得野，不過都係短暫，總之冇生命危險，奇蹟，我以為老婆失蹤
成年都死緊。」威爺說。
「咁咪好囉，唔使再係屋企摺紙。」我說。
「威爺，番黎啦，好需要你哩個車長。」風說。
「我唔做邊個睇住Madam？一間亂黎，又唔知引起幾多蝴蝶效應，頭先打番去上頭，佢話幾時都歡迎，聽日我會做番。」威爺說。
「咁就好囉，威爺入番隊，有咩事都唔使怕。」我說。
我不能夠時常與風一起，EU方面，要靠威爺看著。
「唔好當我一定會幫你地手，而家我老婆冇野，但我唔想佢之後有野，所以唔係必要既，唔好影響我地。穿越時空哩啲野可一不可再，既然4月1日會恢復記憶，咁我番唔番去都得啦，如果冇錯，你地番去會見到恢復記憶既我，一早搵你地。」威爺說。
「而家都唔知係唔係咁，同埋之後發生咩事，起碼你會有個三日既經驗，你唔番，我地番去個個威爺都係同你而家一樣。」我說。
「渠頭，威爺都講得冇錯既，之前都麻煩左佢好多次，放心啦，我地有咩會自己處理。」風說。
「當然啦，如果係我認為要出手就一定會，冇需要你搵我都冇用。我可以唔準時放工，但一定要安全收到工。」威爺說。
威爺還是愛理不理的樣子，不過都正常的，如無意外，我與風剛開始，希望平平安安過活就算，不希望再穿越時空解決事情。
「而家冇大單野發生，威爺可以日日煮糖水比威嫂 。」我說。
「我早兩日係街見到郭尚正，佢有同我打招呼，仲問起Madam，好似冇野。但如果今日大家都恢復記憶，咁件事就未必完。」威爺說。
「我之前殺郭偉誠，今次拉郭偉誠，佢仲中埋風，一定好憎我。」我說。
「或者係未清醒哂姐，恢復記憶要時間。」威爺說。
風神情變得古怪，看著手機，我問她：
「又邊個搵你啊？」
「啊.....tim姐，冇野，佢話請假......」
「威爺，學埋你成日請假......風，邊個？係唔係郭尚正？你又諗住一個人面對？」
她支吾以對，確定是郭尚正，他又有甚麼計劃？
「佢只係一句：好耐冇見，出黎傾下。或者啊正冇恢復呢？唔係既就一早黎搵我地報仇。」風說。
「你唔可以信佢，如果有恢復呢？我係你男朋友，唔比你見佢得唔得？」我說。
如果還以理性看待郭尚正，只會重複之前的痛苦。
「Madam，渠頭，我唔理你地點解決，上次郭尚正迫到我都痴線，你地又爆炸收場。今次唔理你地講數又好，隊佢都好，唔好煩我，我要睇老婆同做車長，係咁，聽日見。」
威爺入病房，我與風變得無言，她說道：
「總之我唔會再令你擔心，我番工先啦，今晚再傾。」
(凌晨風角度)
看著眼前的他，我想分享一個故事。
我試過有段重複穿越三日的奇幻經歷，為了拯救家人而不斷穿越，卻因為種種蝴蝶效應，引起了不同的責任同任務。
我與家人，朋友面對了很多未知的生關死劫，這些痛苦與悲劇，我不能掌握一切。
幸好有一個人幫我，起初我們互相討厭對方，我叫他死渠頭，他叫我訓嘰笠，貼錯門神般。
後來在穿越的經歷中，大家出生入死，他有情有義，在我心中都變得重要了，大家愛上對方。
但快樂是短暫的，我為了維護他，最後死了，他帶著遺憾穿越回去，選擇再次重覆去經歷，但這個我沒有對他的記憶，他一個人孤
獨地痛苦活著。
現在奇蹟出現了，我恢復穿越過的記憶。
未知的蝴蝶效應，生命的變幻，我們穿越也未必掌握得到。
人性的善惡，事件的好壞，我們是可以選擇的。
你說過穿越多少次是沒有意義的，只要互相珍惜，好好相處的，一日都已經是一生一世，
我們能在這三日中愛上大家，三生有幸。
渠頭，對不起，要你遺憾痛苦這麼久，我不會再離你而去，無論發生甚麼，以後大家一起面對。
我們到醫院門外。
「風，番工小心啲，有咩都唔好衝動，唔好再理郭尚正。」
渠頭擁抱我，他不想放開，我也是。
「得啦，長氣，成個威爺咁，今晚再見啦，你一個番去，我坐的士。」我說。
他 指指嘴巴，真拿他沒有辦法，就輕吻了他一會。
「我真係走啦。」我說。
「咁今晚見啦，BYE。」渠頭說。
他目送我離開，這個渠頭，以前我與啊正相處時都沒有感受到如此著緊，大家好像貌合神離。當天知道他與水晶梨關系時，更令我
失望，水晶梨都幾乎沒有再見過，最後他選擇一走了之，一年後卻重新聯繫我？就算是恢復記憶也好，難道他會對我們沒仇恨嗎？
這是沒有可能的，渠頭說得對，我不可以感情用事，否則會經歷悲劇，沒有下次的奇蹟。
回到EU總區，只見tim在按手機，自從他成為人父之後，無時無刻都緊張家庭，但在工作上是會有影響的。
「tim。」我說。
「Madam，老婆話要帶個仔打針，通知聲，傾完啦。」tim說。
「Madam唔怪得啊tim既，如果威爺係到，佢都會掛住威嫂。係wo，威嫂搵番，聽講威爺聽日番黎，咁我就唔使開車咁有壓力。」二哥說。
而二哥，如果威爺是扮愛理不理，二哥他就是懶洋洋的人，阿Dee就不太說話。
「係啊，最近街上好多人失蹤，大家打醒精神留意，準備出發。」我說。
「Yes Madam！」
2016年4月1日12：00
今天的巡邏與平常一樣，看來沒有特別事發生，也好，終於明白威爺要安全下班的道理。
不遠處出現了一輛白色大貨車，讓我想起一年前的3月31號，威爺幫我們閃躲了大貨車，不然就撞倒了，我有點懷念與威爺意見不合
的日子，而經歷這麼多，我也學懂了冷靜行動。
「咁大架貨車都唔知運咩，madam，要唔要去睇睇啊。」二哥說。
「冇野既，繼續行。 」我說。
「哩排咁多人失蹤，可能係運人，真係睇下好啲。」二哥說。
倒也是的，去檢查也無壞。
「tim，DEE，落車過去睇下。」我說。
tim好像沒有聽見我的說話，DEE下車，他還在按手機。
「tim！聽唔聽到我講咩？」我大聲叫喚。
「係，madam。」tim說。
「tim，小心啲啊，你咁分心，有咩事點睇住SUKI同個仔？」
「Sorry，MADAM。」」tim說。
他收好電話，與DEE走過去白色大貨車，二哥說道：「MADAM收左火WO，以前做咩都親力親為，同威爺嘈到咩咁。」
「安全收工好重要。」我說。
「威爺金句。」二哥說。
二人還未靠近，白色大貨車就開動，果然如二哥所說有異常！tim，DEE馬上跑回來上車，EU車響起藍燈，追趕白色大貨車。
「MADAM，使唔使call 手足set roadblock？182係就近。」tim說。
「唔使住，二哥追緊。」我說。
「我冇威爺手車咁掂。」二哥笑說。
或者差距太多，二哥又好像不著急，追下去不久，貨車駛進大街。
「佢有心入大街。」二哥說。
如果是運不見得光的東西，不會用這個路線走，他停下EU車來。
「MADAM，前面有車。」二哥說。
待所有車走過，白色大貨車就這樣消失在視線。
「哎，追失左。」二哥說。
如果不是他提出檢查白色大貨車，現在我會認為他有心放走，上次啊正知道自己EU車的鍾永俊是黑警，我也有想過這個問題，但現
在郭偉誠都沒辦法帶領，都不應該懷疑的，之前懷疑威爺是黑警，迫到他幾乎傷害我與渠頭。
「叫手足睇下有冇白色大貨車蹤影，應該唔走得遠。」我說。
電台通知：
「Eu181車，請到下白泥村。」
「電台叫WO，仲追唔追？」二哥說。
過去經驗而言，如果死命針對某人某事，不但找尋不出真相，還會適得其反，反而不著急理會可能有線索出現，都是照電台通知工
作好，要引起最少的蝴蝶效應。
「calling電台，Eu181而家去。」我說。
「Madam真係唔同左，以前好火，話追就追，而家諗下先做。」DEE說。
「我知我以前為查案係衝動，而家想大家安全，唔係好多野冇左，就可以番轉頭改變，咁好唔負責任。」我說。
「Madam又唔使咁認真，我地講笑姐。」二哥說。
到了下白泥村，入內只見周炳仁的手下，一班南亞工人，與渠頭在這裡，他按著流血的頭！
「渠頭，你有冇事啊？比人打啊？又做咩啊？」我說。
「Madam，冇事冇事，自己撞到，班工人同周生有少少錢銀誤會姐，而家解決左，你地可以收隊啦，今晚記得左BOOK左餐廳食
飯，著好D。」渠頭說。
「傷成咁仲掛住哩樣。」我說。
「去包下我個大渠頭咪冇野，又唔係傷個口。」渠頭笑說。
「好啦，你小心啊，快去包啦。」我說。
「有冇聽我講冷靜做野啊？」渠頭說。
「頭先有不明白色大貨車逃走，二哥追唔到就算數。」我說。
手足們笑嘻嘻看著我同渠頭，教我不好意思。
「收隊，上車。」我說。
「今晚見。」渠頭說。
我們離開，上頭通知要回總區報告事件。
「李SIR又唔知咩事咁緊張啦，會唔會係頭先貨車單野收到料？」二哥說。
「我地做好份內事唔怕比人話。」我說。
回到EU總區，上司李震昇督察比平時更嚴肅的模樣，不知有甚麼特別事件？
「首先，重新調配人手工作，聽日威爺會番黎181做番車長，二哥繼續之前位置，樂芝番番182，如果有需要再調車。」
「好囉，威爺番黎一天光哂。」二哥說。
「yes sir。」樂芝說。
「講番case，最近香港好多人失蹤，上面好關注，懷疑係大型人口販賣，重案個邊都想我地巡邏個時注意，頭先你地追既白色大貨車，搵到啦，但得空車。」李SIR說。
如果是有人，應該沒有可能短時間運走，除非空車本身是用來引開注意。
「風，我想知點解唔搵182幫手？」李SIR說。
「Sir，我覺得當時唔需要，handle得到。」我說。
「我唔覺得咁叫handle得到，如果係軍火係生化武器咁點？下次有咩事，唔好自把自為帶埋班手足做。」李SIR說。
「Sir，唔使講到咁大既，madam佢....」
「程亮添，唔好諗住幫口，我知道你番工好唔上心，係唔係便衣就可以HEA？你再係咁，我調走你。」李SIR加重語氣說。
大家靜默，李SIR繼續說：
「唔該以後打醒精神啊！散會！」
2016年4月1日16：00
小休期間，Time繼續機不離手，只見李SIR與一白頭男人進房間聊天。
「知唔知個男人係邊個？」我問。
「二哥，你成日收料，應該知既。」Dee說。
「我冇見過，威爺就知，飛虎隊、機場特警、機動部隊，毒品調查科都做過，咁有經驗見過唔少人，係差英女王未見過。」二哥
說。
過了一會，他們從房間出來，到了茶水間。
「我同大家介紹，前總警司蔡興國大SIR。」李SIR說。
看李SIR尊敬的模樣，這位前總警司來頭不少吧。
「唔好講哩啲啦，仲大SIR？我都退左休安享晚年。」蔡興國說。
「大SIR當年差啲就升左警務處助理處長，可惜之後離開左，講幾句教下啲細。」李SIR說。
蔡興國搖搖手，感慨說道：
「之前聽見老郭坐監，中埋風，唉，做黑警有咩謂啊？貪到命都冇，」
他口中的老郭是指啊正父親吧，看樣子又有另一個故事。
「敢問大SIR，你同前總警司郭偉誠好熟？」我問。
「熟，當年警隊貪既風氣好流行，老郭為左醫老婆貪埋一份，我冇，唔係話我清高，結果鬼頭調我去做閒事，文職，守水塘，我樂
得清靜。直到唔覺意發現單大案破左，鬼頭先叫番我做正常野，個時老郭已經升緊職。之後我又破左大案，97回歸，總警司個位比
左我做，老郭係高級警司，真係時也命也，個幾年我多病痛，唔繼續升警務處助理處長，總警司都冇做，就到老郭，諗諗下唔做係
好決定，而家警察令人反感，又咁多黑警，做好差人真係唔容易，有幾多個真心正義？」蔡興國說。
原來有這一段往事，不過無論如何啊正父親是黑警，甚麼理由也不能解脫錯事。
「我相信總有正義既人，去對付黑警。」我說。
「後生女咁有志氣係好事.....凌晨風，我記得啦，老郭之前講過正仔結婚，你係佢女朋友.....不過相信係過去既事，唔緊要既，人各
有志，李SIR，哩個係警隊明日之星，仲有一個好有經驗，可惜唔係到。」
「大SIR，陳勁威聽日復職。」李SIR說。
「威爺 威名遠播，大SIR都識。」二哥笑說。
「人才係要認識，好好用佢地，而家只係識培養黑警有咩用？當年有班中東佬係香港
運軍火，SDU有行動，我老婆係街差D出事，陳勁威救左佢，仲有唔少人，可惜佢老婆
有事而放棄所有野。都唔繼續想當年啦，我未飛之前睇下有冇時間搵佢，唔阻你地做
野。」蔡興國說。
除了威爺我行我素的性格之外，工作能力其實是超班，一個人解決四悍匪拯救我，多
次與黑警決戰。
「大SIR，我同你出去。」李SIR說。
「好，我老啦行得慢。」蔡興國說。
他們離開，二哥提議：
「講起威爺，MADAM幫我地打電話問候威嫂，好唔好？」
「係囉，今日未有時間去探威嫂。」TIM說。
見還有時間，我打電話給他
「威爺，威嫂情況好啲未？成班手足關心。」我說。
「有心啦，佢記憶模糊，不過仲記得叫我番工，煮糖水，成日想出院，無辦法啦，醫
生檢查冇咩大問題開左啲新藥，夜晚出院。」威爺說。
「威爺，頭先有個前總警司蔡興國探李SIR，同我地講你以前中東佬單野，救過佢老
婆。」
「哦，係咩，邊個都好啦，我救過咁多人，唔救人唔通隊人咩。唔講啦，聽日見MADAM，記住冇我唔好亂黎，唔好引起幾多蝴蝶效應啊，BYE 。」威爺說。
「得啦，渠頭學埋你咁長氣，BYE 。」我說。
2016年4月1日20：30
幸好今日不用OT，下班之後，我換好衣服趕到餐廳，渠頭已經在這裡等待。
「訓嘰笠，我點左野啦。今日點啊？」渠頭說。
「你幾時變左我handler，今日咪答左你囉，李SIR話我唔CALL182幫手自把自為，我
已經好冷靜處理啦。」我說。
「上司係咁麻煩啦，之前ICAC我個handler......」
渠頭還未說完，有名西裝人士走過來。
「劉SIR.....劉世邦，ICAC調查主任。」渠頭說。
「關鼎名，咁都撞到你，仲有Madam，估唔到你地一齊，唔怪得咁容易拉郭偉誠
啦。」劉世邦說。
「唔關佢事。係囉，日頭唔好講人，夜晚都唔好講人啊，聽講你升職，有咩大案
follow？」渠頭說。
「又咪咁，CASE我唔講得。不過我估唔到你恢復身份之後唔再做金融，繼續做村長， 同周炳仁做生意好多油水啦，有咩野ICAC會睇住你地，哈。」劉世邦說。
「你啊奶啊，講笑，差人有黑警，ICAC冇二五咩，你小心就真。」渠頭說。
「好啦，唔阻你地，希望以後冇野搵你幫手，再見。」劉世邦說。
「你都知阻我地呢，再見啦。」渠頭說。
劉世邦離開，我看見窗外有熟悉的身影經過.......是水晶梨，都已經一年沒有見，不知
最近如何？
「渠頭，你坐住先，我行行出去。」我說。
「去邊啊？D野就上。」渠頭說。
我沒有回應，出去找水晶梨。
「水晶梨。」我說。
她愕了愕，再微笑說道：
「風？最近.....點？」
「都係咁啦，不過我同左渠頭一齊，佢對我好好。」我說。
「噢！估唔到你地。」
我留意到她無名指戴著戒指，她結婚了。
「水晶梨你都有好歸屬啦。」我說。
「係，都好耐冇見小美，得閒再見啦，我有地方去。」水晶梨說。
她離開，總覺得水晶梨對我很冷淡，還是因為啊正的原因嗎？都過去了這麼久，就算
她現在告訴我是和啊正結婚，我都會祝福，經歷多了，渠頭才是我命運中的一個。
「你企係到望咩啊？」渠頭出來找我，我想得太入神了。
「肚餓啦，入去先講。」我說。
用餐過程，我將剛才的事告訴渠頭，他沒有正經地說道：
「水晶梨結左婚，話唔定係賀展祥呢，上次佢兩個都一齊死，整定一對。」
「仲講上次，佢只不過係鬥氣，而且今次賀展祥未接觸水晶梨，就比人拉左，冇可
能。」我說。
「唔講水晶梨，講我地啦，有次同小美去探賀展祥啊媽。佢當我祥仔問我幾時結婚，
我話結婚一定請佢，訓嘰笠.......」
渠頭笑嘻嘻的模樣，我當然知道他的心意，亦相信他對我好好，不過現在才開始，不
用心急結婚。
「結婚啊？今日先開始，我未準備好啊，渠頭，要諗清楚。」我說。
「我都知你性格，之前郭尚正比到你結婚恐懼啦。我都未準備好啊 ，比唔夠你安全
感，反正你冇得走，做硬我村長夫人，我等你。」 渠頭說。
感謝你體諒，無論甚麼身份，我也會在你身邊。
2016年4月1日22：30
回到村裡，渠頭送我回家，一路上他總是在笑。
「做咩係到傻笑啊？」我問。
「估唔到有今日，唔笑都唔得，訓嘰笠你都一齊笑啦，你笑得好好睇。」渠頭說。
「仲有聽日，後日，大後日，以後有排你笑。真係冇你咁好氣，你笑得好衰，如果我
冇恢復記憶，實話你變態，夜啦，我今日好累。」我說。
他不再說話，大家靜靜地漫步回去。
到了家門，光仔在打理小花園，都夜了還在這裡？
「你地有個共通點。」渠頭說。
「咩共通點？」我問。
「一心情唔好就會打理海叔既植物。光仔有心事啊，你家姐都唔理佢。」渠頭說。
「你做咩咁緊張光仔？又想講小美啊？雖然佢同我地住左成年，光仔係同佢熟
左......」我說。
「唔係咁講啊，你係我村長夫人，光仔係舅仔，咁小美可能係舅弟婦，賀展祥又係我
邊個？嘩，今次一家親！」
渠頭走上前說道：
「光仔，係鍾意小美就去馬，唔好收埋，唔係會有遺憾。」
「我......我都唔知你講咩，我番入屋。」
「光仔咁大個人識諗，夜啦，早抖渠頭。」我說。
「好啦，聽日威爺番工，我都放心D，早抖訓嘰笠。」渠頭說。
看著他離去背影，我覺得有安全感。
在梳洗之後，見小美還未睡覺，就閒聊一會。
「小美，今日我見到水晶梨，原來佢結左婚。」我說。
「佢終於都結婚啦......以佢性格，我仲諗佢最遲結婚，不過最估唔到係你同渠頭，人
人都一對，我仲未有。」小美說。
小美看著天花版，好像有心事的樣子，但又不告訴我。
「好快啦，哈，訓先。」我說。
很快又4月2日，暫時沒有嚴重事件需要穿越時空 ，不過所有大事必作於小，都要記錄。
2016年4月1日
1：記憶恢復，同渠頭，威爺相認，
2：公開同渠頭一齊。
3：搵番威嫂。
4：啊正打電話比我，冇理。
5：巡邏發現神秘白色大貨車，但係個局。
6：渠頭同周炳仁班工人有錢銀誤會，受傷。
7：番總區報告事件，認識前總警司蔡興國。
8：同渠頭食飯見到ICAC劉SIR，仲有結左婚既水晶梨。
9：光仔，小美有心事。
2016年4月2日00：00