［愛情甜故前傳--無糖純愛］曾經嘅我地，都係兩條平行線⋯: 01. 中三那年

「方芷諾～」有人一打開課室門口就大嗌道

坐喺後排，做緊聽日先交嘅功課嘅我一聽到有人大聲嗌我個名，既無奈又好笑咁抬起頭望向門口

「噓…靜愉呀～細聲啲啦！」我無奈咁笑，食指輕放喺唇前，「你呀好日都唔番學…今日捨得番嚟啦咩？」

「成日唔番學要比人踢出校㗎！」靜愉放低書包喺我隔離個位

呢個看似粗魯，大大咧咧嘅女仔係我嘅三年同班同學兼知己—李靜愉，簡稱靜愉，佢平日好日都唔番學，我隔離嗰位好似係長期空置一樣



基本上一個星期五日上學日，見到佢三日係正常，四人係奇蹟，五日基本上冇咩可能

「原來你知道會比人踢出校㗎？」我一臉無奈咁望住佢講道，「咁拜託你就番多啲啦！」

靜愉將書包掛喺木桌旁嘅掛勾上，然後豪邁咁坐低喺櫈上

「喂…方芷諾…」靜愉突然細聲咁嗌我同時伸手拍咗我兩下

我嘅視線又從功課上移開，我抬起頭，望向靜愉



喺望到靜愉嘅同時，我亦同時望到喺走廊經過嘅周樂恆，我禮貌地微微一笑，然後又再低頭做功課

靜愉突然行到我前面個位拉開櫈坐低，我冇抬頭，仍然好專心咁做功課

「你真係唔可以比次機會周樂恆咩？」靜愉細聲咁講道

「佢話要分手嘅時候我順佢意答應，冇講話佢出軌已經比足面佢。」我隻手拎住筆，一邊寫一邊講，連頭都冇抬起，「一次不忠，百次不容。」

「但其實佢都想同你複合啦～你真係唔原諒佢呀？」靜愉問道



「你係阿恆派嚟嘅說客定間諜呀？」我抬起頭放低筆，雙手打平交疊着，若有所思咁望向左方，「我同佢緣盡啦，做朋友已經係最後可以做嘅事…我已經好心軟，佢話做朋友就做朋友。」

「咁你有冇諗住搵過第二個target呀？」靜愉即刻調皮地笑問道

「冇呀…」我聽到靜愉咁講就忍唔住反咗一個大大嘅白眼

我同周樂恆曾經拍過拖，就喺半年前分咗手，因為…佢出軌啦…

但提出分手嘅人係佢，我發現咗佢出軌冇即時提分手，可能係我懦弱掛…

喺周樂恆同我講分手嘅一刻，我冷靜，我笑咗一笑就答應咗，咩都冇講…所以佢到宜家都唔知我係因為知道咗佢出軌所以答應分手

我對佢仲有冇感情？冇啦～就算有，都係朋友嘅感情啦～

「你地都分咗手半年啦～中意過第二個囉～中三都過咗大半段啦，好快就中四啦～」我聽得出靜愉嘅話帶有暗示性



「咁所以呢？」我側側頭問道，「係中三都過咗半年，咁所以呢？」

「到咗中四我地就係高中生啦，係新開始呀～」靜愉講道

「同我搵唔搵個新嘅target係冇關係㗎啵…」我搖搖頭

呢個時候一個目測有170cm左右嘅男仔行入課室，喺佢推門嘅瞬間，彷彿有個無型嘅氣場將佢包住，呢個男仔係呢級入面屬於高冷類型嘅男仔—葉子朗

平日佢沉默寡言，好少出聲講嘢，令人覺得佢格外冷漠

葉子朗就坐喺課室中央，對住老師枱嘅嗰一行座位嘅尾二嘅座位，成績一般，但完全唔積極學習，對老師嚟講佢都係壞學生

佢同靜愉唔一樣，靜愉成日遲到早退什至連學都唔番，但因為有啲小聰明，頭腦又唔太差，所以有我幫佢再溫下書之後，成績同學習嘅進度都跟得上



葉子朗一番到嚟就係坐低，然後伏喺枱面補眠

葉子朗喺學校稱唔上係校草，但係都有好多學妹仰慕佢，點解？好快你就知㗎啦～

「芷諾你到底做緊咩功課？」靜愉望住我做緊嘅嗰本作業簿

「聽日要交嘅數學功課囉。」我一臉平靜咁耷低頭繼續寫

「吓！？」靜愉大聲咁吓咗出聲，一臉震驚，我比佢突然發出嘅震撼性聲音嚇咗一嚇，緩緩抬起頭望佢，「你冇話我知嘅？」

「有講呀，我琴日特登喺WhatsApp打咗個功課表比你話你知有咩功課同埋邊日交，係你冇留意啫…」我默默地又再次低頭，埋頭苦幹咁做功課

「但呢兩日我都冇番，咁點算呀？」靜愉捉住我嘅手前後搖晃着，我抬頭望佢，見到哭喪着臉的望住我

「陣間Lunchtim教你囉～」我望住呢個好姊妹，不禁失笑



「但今日晏就有籃球比賽，我想落去霸定個靚位睇…」靜愉嘅左手食指同右手食指嘅指尖輕輕相互碰着

「放學抽啲時間教你囉…」我微微一笑

「你真好～」靜愉托住頭開心咁笑，「得你先對我咁好咋～」

「知啦知啦～你唔洗賣口乖我都會教你嘅～」我見時間都差唔多便將功課簿收入櫃桶，然後企起身，「夠鐘落去早會啦，行啦。」




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link