［愛情甜故前傳--無糖純愛］曾經嘅我地，都係兩條平行線⋯: 04. 前度男友

我都冇咩特別在意，只係繼續耷低頭望住筆記本溫書，因為最後兩堂有一個測驗

對於我而言，測驗係為咗考驗自己嘅能力，所以一定要認真看待，冇任何嘅理由令我可以輕視每一個測驗

「Miss Yiu又點你做嘢…班上面明明有咁多人…」靜愉望向我，成個人都傾向我，細聲抱怨道，「但偏偏就要搵你幫佢。」

「唔緊要啦～好小事啫，而且我應該好快就做完可以番屋企啦～」我微笑道，「所以唔緊要啦～」

「係你先咁好人㗎咋…」靜愉托住頭望住安靜溫書嘅我，「你成日都做好人會比人恰㗎…」



「我先唔怕呀～」我望向靜愉，然後笑咗一笑，「有你喺度嘛～我又點會比人恰呢？」

「嗯哼…」靜愉無奈咁點點頭，突然邁咗一步踏出位去到我隔離，喺我耳邊細聲講道，「係你先咁好人，個個做錯啲咩之後嚟同你講句對唔住你就原諒人…睇下嗰個周樂恆就知啦！因為出軌同你分手，明明你自己都親眼睇到啦，佢講分手嗰陣你都唔當場踢爆佢，仲要維護佢嘅面子…」

靜愉一直都係個有義氣嘅人，特別係對我，佢話過我係佢珍而重之嘅朋友，可能係上一世拯救咗地球先會遇上我呢啲咁善良嘅朋友

不過我覺得識朋友都係一門學問嚟，我靜愉當我係知己，我都當靜愉係知己，畢竟知己難求

「真係唔知你係點樣生存到宜家…」靜愉好似係喃喃自語咁講，不過我聽到囉…



「叩叩。」

突然有人企喺課室嘅門前敲咗兩下門

Miss Yiu望向門口，點一點頭示意佢可以推門入嚟

「Miss Yiu，我地班想借一下粉筆。」一推門入嚟，原來係周樂恆，佢禮貌地講道

周樂恆目測168cm，左手手腕上戴住手錶，行路時挺直腰板，一副認真嘅模樣，一睇就知係乖學生



我望住周樂恆入嚟，不過冇咩太大感覺

「哦，好呀～你拎啦～」Miss Yiu微笑道

周樂恆行去黑板前拎粉筆，喺拎完粉筆之後，周樂恆嘅目光自然咁投向我，望咗我一眼

我同周樂恆嘅目光對上，我禮貌地微微一笑，然後移開了視線，唔係因為尷尬，因為我冇咩要尷尬，理虧不在我
周樂恆轉身離開課室，行番去隔離班房

「其實你兩個真係好襯。」坐喺我前面個女仔突然轉身對我講道，一臉惋惜咁講

「都散咗啦～」我微笑講道，「過去嘅事就隨佢過去啦～」

過去嘅事就隨佢過去啦～成日都回首過去嘅話，我地就只會沉醉喺過去嘅回憶之中，無法前行



我同周樂恆呢對前度，我地一齊咗嗰段日子，好多人都話我地好襯

我地嘅性格都係差唔多，而且我地都幾似，特別係我地兩個都係中意讀書嘅人，喺級上都係屬於上遊，所以以前我地經常都一齊溫書，互相激勵一同努力，做對方嘅學習好榜樣

邊個話求學時期拍拖一定係壞事？我地拍咗拖之後成績一直都係進步緊，可以話我地兩個嘅化學反應好好，不退反進

兩個人互補長短都係好事嚟，我數理一般，文科就比較好；而周樂恆數理好，文科一般，當兩個人一齊溫書嘅時候，就可以做到互補不足嘅情況

其實我的確係原諒咗周樂恆，但喺我心中仍然記得佢背叛我嘅事，呢個係無可否認嘅事實嚟…所以話要復合係冇可能嘅事，但仍然留有做朋友嘅餘地

「周樂恆嗰件事，簡直就係佢嘅污點。」靜愉對我講道，靜愉口中嘅「嗰件事」，就係指周樂恆出軌

我望向靜愉，抿唇然後苦笑

都過咗去啦～仲提嚟做咩？咪當我同周樂恆冇緣份囉～佢揀咗出軌，我揀咗放手，我冇當眾拆穿佢令佢冇面，大家好嚟好去啦



「你要搵過個比周樂恆好嘅人，等佢後悔死呀～」靜愉笑笑口講道

「好過佢嘅人呀…」我側着頭，若有所思

「當然啦！你值得更好！」靜愉用力點頭

喺呢一刻，我嘅腦海中有一個人影快速閃過，我抬眼望過去，偷偷地瞄咗一眼

「又會諗起佢嘅…？」我托住頭，腦海中浮現嘅人係葉子朗，一個同我完全冇交集嘅人

我稍稍挺直腰板坐好，但又不自覺咁托住頭耷低頭望住書

我望住書入面嘅一字一句，但我卻一個字都記唔到入腦咁…搞咩呀突然？陣間就測驗啦，要溫熟啲先得㗎嘛…



「到底點樣先叫好過周樂恆…？點樣去定義…？」我嘅腦海中淨係諗到呢個問題，「乜真係有男仔係會好到唔想分開㗎咩…天下烏鴉唔係一樣黑咩…？」

我曾經…對於愛情都有一份憧憬同嚮往，但係當嘗試過被背叛嘅滋味後，對於「愛情」呢兩個字就冇咩信心，就好似童話幻滅一樣…

就算再沉睡，始終都有夢醒嘅一日…

本來我都以為，周樂恆會係我心中嘅童話嘅主角，但佢令本來沉睡嘅我醒過嚟…令我知道世上並冇童話…

係殘酷，但總好過唔醒過嚟…

IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link