［愛情甜故前傳--無糖純愛］曾經嘅我地，都係兩條平行線⋯: 06. 變得不一樣的心

我放好筆記之後就行後面樓梯落去，行到落樓下嗰陣，我冇即刻行向校門離開，反而行去小食部

因為有小小口渴但又唔想飲清水，唯有去買包嘢飲當獎例自己啦～

「買包嘢飲先走…」我行到小食部，企喺籃球場旁邊嘅飲品機前喃喃自語，「飲咩好呢…」

「噠、噠、噠、噠。」

宜家都就嚟6點啦喎，邊個仲喺籃球場打波呀？



喺籃球場傳嚟拍球嘅聲音吸引咗我嘅目光，我望向籃球場，見到著住校服同皮鞋喺球場獨自打波嘅葉子朗

唔知點解喺嗰一刻，我嘅目光彷佛離唔開葉子朗一樣，視線一直停留喺葉子朗身上

葉子朗獨自一人打籃球，成個球場就只有佢一人，我都唔知點解，目光突然冇辦法從葉子朗嘅身上移開

忽然冇辦法移開視線…忽然淨係望到佢嘅存在…忽然覺得呢個男仔嘅亮光好似又多咗一點…

其實葉子朗個樣唔差，但呢一刻嘅佢散發住一種獨有嘅魅力，喺第二個人嘅身上搵唔到



顏值唔差嘅人喺學校入面有好多，但係葉子朗散發著嗰種難以言喻嘅獨有魅力，就只可以喺佢身上先搵到

佢好似有啲咩獨有嘅魅力一樣，我嘅目光好似無辦法輕易地由佢身上移開，好似有一種不為人知嘅引力一樣

我手上仍然拎住要入落飲品機中嘅硬幣，但目光卻停留喺葉子朗嘅身上

到底我點解會咁樣望住佢？佢又冇咩特別…

心臟嘅跳動好似又快咗…比喺午膳時更快、比啱啱差啲撞上時更快、比喺佢開口同自己講嘢嗰陣更快



心動嘅感覺，從來都係難以解釋，因為佢只係一種感覺，好難用詞語去表達感覺

就算我話：心動就好似係有了離心力嗰一刻，心臟緊緊地揪咗一下，然後快速咁跳動着

又有幾多人可以完全明白呢種感覺？言語無法形容感覺，只有喺真係感覺到嘅時候先會明白係咩感覺

呢種久違嘅心動…有啲似層相識…

「我唔係真係中意咗佢呀嘛…！」我嘅手放到臉頰上，臉頰有啲熱，我不禁瞪大了眼

言語會講大話，但心臟唔會，佢永遠都係最坦白，冇嘢可以欺騙心臟

冇可能㗎冇可能㗎…！我唔會中意佢嘅…

我好想…好想要避過呢種感覺，我連嘢飲都冇買，將硬幣放番入裙袋就轉身離開



行咗一段路之後，心情先慢慢平伏落嚟

「錯覺啫…」我喺心中不禁地同自己講道，「錯覺啫錯覺啫…」

我又點會中意佢呢？我同佢又唔熟…我地講嘅嘢不嬲都係一句起兩句止…我地唔熟唔了解對方，只係同班同學，我又點會中意佢呢？

「我又點會中意佢呢…？」我喺心中自言自語道

點知喺腦海中突然閃出葉子朗，心跳又突然加速

我頓時加快腳步，急步行番屋企，盡量保持腦袋空白一片

「我先唔信我中意佢…」我喺心中重複地同自己講道



我番到屋企門口，用鎖匙開門，番入屋內將皮鞋除咗落嚟，然後拖住已經疲倦咗一日嘅身軀行到梳化前，一下子灘落梳化

「唉…肯定又係叫我食自己…」我行入屋嘅時後眼尾瞄到喺雪櫃上貼咗張黃色嘅Memo紙，已經估到紙上面寫住咩

我疲倦地將書包除落嚟放喺梳化前面，然後企起身行向開放式廚房，企喺對住客廳嘅雪櫃面前，將嗰張Memo紙拎咗落嚟：「枱面放咗$100,你去買飯食啦　媽媽」

我深呼吸一下，回頭望向餐枱，枱上的確放咗$100, 我轉身行咗兩步行到去餐枱前拎起張$100,手又垂咗落嚟

「明明間屋有三個人住…但感覺好似得我自己一個人住咁…」我望住只有自己一人嘅房子苦笑，喺心中講道

望住閂晒燈嘅屋企，只有我一個人，屋內嘅光都靠外來嘅天然光，窗簾打開着

我爸媽每日都係番工番工同番工…屋企只有我一個人…一直都係，我偶爾都會覺得孤獨，但係其實早就習慣咗呢個生活方式，我足夠獨立啦…

諗起佢地平日問得最多嘅都係「最近讀書點呀？」、「就考試啦？你要加油Keep住成績呀～」、「今次考成點呀？」，又或者係「聽書嗰陣唔明記得同老師講」



我同爸媽嘅話題，永遠都只有講唔完嘅讀書話題一樣…有時我都好想有人關心下我，想有人攬下我話我知我已經好叻好努力㗎啦…

不過算啦～都習慣咗啦…

我將張Memo紙貼番喺雪櫃，行番去梳化前面拎起個書包行番入房，然後去沖涼




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link