［愛情甜故前傳--無糖純愛］曾經嘅我地，都係兩條平行線⋯: 27. 順其自然就好

「靜愉，你今日係咪話想放學留低呀？」我伸咗個懶腰望向靜愉，「連上兩堂英文堂真攰死人…」

「哦係呀。不過今日都係唔啦…」靜愉望向我點一點頭，然後突然將佢連人帶櫈移咗出嚟走廊坐喺我身旁

我輕皺起眉頭，一臉不解地望向佢，靜愉望一望四周唔知留意啲咩之後突然捉住我嘅手臂

「做咩呀？」我都跟住佢望一望四周，但又冇咩特別嘢

「你同佢最近點呀？有冇進展呀？」靜愉細細聲，小心翼翼咁問我



「仲以為你突然間做咩，原來想問呢樣…」我無奈地細聲抱怨咗一句，然後又回答靜愉，「邊有咩特別進展啫…」

對上一次主動同佢講嘢已經係一個星期嘅事，今日已經係星期二，我都冇同佢講到嘢…我每次想同佢講嘢嘅時候，佢身邊總係有人

一係佢啲Friend同佢一齊，一係就佢打緊波…本來都想好似之前咁，放學可以借意同佢一齊行，但好可惜佢前一個星期都比人罰留堂，佢都冇落嚟打波，我連搵佢搭話嘅機會都冇…

「我對上一次同佢講嘢已經係一個星期前嘅事…」我細聲咁同靜愉講道，一諗到呢度就有啲悶悶不樂

「哎呀方芷諾…！」靜愉見到我悶悶不樂嘅樣就頓時皺起眉頭，用力地打咗我手臂一下



「嘶…痛呀！」我頓時皺起眉頭，鼓起兩泡腮，一臉委屈咁望住靜愉

「你呀主動啲啦！你係咪中意人㗎？」靜愉半責備式咁同我講，「見到你成日都係咁被動咁冇膽就想話你啦！」

「咁我真係唔敢嘛…」我扁起嘴，雙手嘅食指輕輕扣着，「我每次行近佢，我個心就好似十級大地震咁啦！仲話同佢講嘢…」

靜愉聽到我咁講都無言以對只好無奈咁望住我搖搖頭

「咩啫…」我仍然好似受了委屈嘅小朋友一樣，只敢微微低着頭，望住自己嘅手，「上次同佢單獨一齊嘅時候，我就已經好緊張啦！我都唔敢亂講嘢，我怕講錯嘢又怕講咗啲咩奇怪嘢…」



上次同佢兩個人單獨一齊行，我地之間縱使已經隔開咗啲唔係企得好埋，但我個心仍然好緊張，心跳又快，我連抬起頭望仍都唔敢…

每次抬起頭望佢嘅時候我都唔敢多望兩秒，好快又耷低頭，因為我唔敢同佢對上視線，仲要喺一個咁近嘅距離

我怕我同平時一樣抬起頭望佢，同佢講嘢嗰陣，佢會察覺到我嘅慌張，怕佢會留意到我泛紅嘅臉頰，怕佢會因此而發現我對佢早就唔係抱住普通嘅感覺，而係抱住男女之情去看待佢…

但我更怕佢會因為知道咗我對佢嘅感情而疏遠我，我唔想連講兩句嘅機會都冇…

每次望佢，側面又好正面又好，我都會感覺到自己嘅心跳快得誇張，臉頰都會泛紅，所以我先唔敢更主動

「我都幫你急埋一份…你中意人咪主動啲囉～」靜愉嘅左手放喺我張枱嘅邊邊上，托住頭無奈咁望住我

「我都想，不過都係算啦…其實順其自然就好啦…」我對自己嘅主動真係冇咩信心，我默默地翻開筆記本

我偷偷望向葉子朗一眼，我始終都係冇勇氣踏前一步，同普通人一樣走向佢，自然咁同佢搭話…因為我對佢嘅心同普通人對佢嘅心唔一樣…



每一次走近佢，我都難以平伏心情，我怕有一日佢會發現我對佢嘅心思，每次佢望向我嘅時候，眼神中總令我覺得佢好似快要將我嘅心睇穿一樣

但矛盾嘅，係我同時有啲希望佢發現我嘅心思，我想佢知道我中意佢，的確，我冇諗過要佢同我一齊次類，亦冇表白嘅打算，但我有時真係會希望佢知道我嘅心思

「方芷諾呀…」靜愉突然間一手拍落我個頭度，但係力度好細，好似係想要安慰我一樣

「嗯？」我望向靜愉，靜愉定睛望住我苦笑起嚟，「做咩？」

「我想話，你鼓起勇氣去到就好。」靜愉一臉淡然

我微微一笑，嘴角揚起嚟嘅弧度完全唔明顯，感覺上同冇笑都冇咩分別

「嗯…我會㗎啦…」我微微點咗一下頭



唉…有時我都希望自己可以好似靜愉一樣，做咩都咁有勇氣，勇往直前，我特別羨慕佢可以咁樣自在法…靜愉從來都唔擔心其他人嘅目光一樣，做自己中意做嘅嘢…

「唉～我都想好似靜愉咁呀…」我喺心中無奈地講道

可惜我並唔係真係靜愉，或者我都係比較適合等人嚟追，總好過要自己主動去呀嘛～

「叮噹叮噹…叮噹叮噹～」

好啦！上下一堂啦要～




IG Link: https://www.instagram.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link