「芷諾,芷諾!你做咩瞓喺廳呀?」

「佢咁攰你就唔好嘈醒佢啦…由佢喺度瞓囉~」

「等佢入房瞓嘛,喺廳瞓陣間凍親嘛!」

邊個喺度講嘢?我想瞓多陣…但我感覺到有人不斷輕拍我博頭,我眉頭一皺,用力睜開眼

「你地番咗嚟啦…?」我見到我媽企喺我旁邊,手仍然搭喺我博頭上



「你做咩喺廳度瞓呀?連校服都冇換到…」我媽柔聲道,我緩緩坐起身,揉揉眼

我諗我爸媽應該啱啱先番咗嚟一陣,因為佢地都未換番屋企衫

「嗯…有啲攰…」我單起一隻眼,因為屋企嘅廳燈開住,我嘅雙眼仲未適應到突然光亮咗咁多嘅環境

「去沖個涼先啦,陣間出嚟食飯,今晚早啲瞓啦~」媽媽輕輕摸一摸我頭,然後就行咗去廚房嗰邊

「嗯…」我喺梳化上呆坐咗一陣,然後就企境身,朝睡房行去



都係沖個涼先啦…如果唔陣,我怕陣間食飯食到瞓着咗,一路食一路瞓就唔好啦~

我拎埋啲衫褲入去廁所沖個涼,好等我個人可以精神啲

我任由花灑嘅水打落我嘅臉上,除咗係想要清醒一下之外,仲洗洗滌一下今日莫名其妙地疲累嘅身軀

「舒服晒~」我閂上水制,冇即刻拉開浴簾,只係將手伸出去,摸到毛巾然後將毛巾從架上拎落嚟

我先將身體抹乾,然後慢慢跨出浴缸,踩落地上嘅毛巾地毯上;我拎起毛巾將頭髮抹咗兩下,先拭一拭乾頭髮嘅表面,然後用毛巾將頭髮包住,當好似扭毛巾咁向右邊扭,盡力令毛巾吸晒頭髮嘅水份,陣間吹頭嘅時候就唔會咁吃力



「呼…」我將毛巾拉番出嚟,仍然係半濕嘅髮絲順住毛巾嘅被拉嘅方向緩緩滑落,搭喺我嘅博頭上,遮擋了我嘅鎖骨

我拎出風筒,較到最大風,但只用暖風唔用熱風,用手輕輕撥着半濕嘅頭髮,將頭髮吹乾

我半日習慣將頭髮吹到時8成乾就算,淨低嘅2成就由佢自然乾啦~

沖完涼嘅我拎住要洗嘅內衣褲行去洗衣機前,打開洗衣機嘅蓋將佢地掉入去之後,我就行番出去然後入房

靜愉:點呀今日?進展如何呀 ?

一拎起手機就見到靜愉send咗WhatsApp比我

我見到靜愉咁問,唔知點解嘴角好自然咁就上揚起嚟,我將手機解鎖,然後回覆靜愉

「okay啦~今日進展一般啦~不過我都心滿意足啦~」



我諗起今日籃球場嘅時候,我同葉子朗之間嘅對話,感覺上我地之間嘅距離好似拉近咗啲一樣,雖然未係真係好近,但係我覺得已經好足夠,雖然如果可以再近啲就好啦,不過我覺得呢啲嘢冇得勉強,所以就算一直都好似宜家咁我都已經滿足啦

靜愉:哎喲哎喲~你咁易就滿足嘅?你唔想同佢嘅距離再拉近啲咩?

「總要一步一步嚟嘅~」我又回覆道

中意得一個人,就預咗一切都要慢慢嚟,或者去到最後未必真係有結果,但係有嘗試過嘅放棄總比冇嘗試過嘅放棄好

呀~好想快啲到聽日呀~好想快啲到聽日要葉子朗~可以見到佢係我番學嘅最大動力嚟!每日都可以見到佢真好呢~我地同班實在太lucky啦~

如果下年都可以同葉子朗同班就好啦…同一科都唔錯,不過當然都係同一班比較好啦!因為咁樣就唔洗等到上選修科堂嘅時候先可以見到佢,平日喺課室都可以見到佢

我放低咗電話,呢一刻嘅我,腦海中忽然閃出一個念頭:好唔好真係同佢表白?



其實我同佢表白都係一件好事,或者佢會接受我呢~不過若然失敗咗…其實佢都冇咩可能會接受我…

唉…點解中意一個人咁麻煩?好似要考慮好多嘢先可以中意一個人咁…明明中意一個人只係一件好簡單嘅事,但偏偏真係要實行嘅時候,往往就係最難

中意一個人,又要諗方法接近佢同時,又唔可以比佢發現你中意佢,做所有事都要就住就住,唔可以過火但又唔可收得太深

「唉…」我不禁嘆咗一口氣,「你會唔會中意我呢…?」

我自言自語道,唔知葉子朗對我係咩感覺呢…?

係中意定唔中意,定討厭定冇感覺?我喺佢眼中又係一個點樣嘅人…?佢會唔會覺得我好煩…?又或者佢會唔會其實…已經睇得出我中意佢呢件事呢?

到底我喺葉子朗心中係一個點樣嘅人?我唔想去探討喺佢心中我喺咩位置,但係至少,我想知道對佢嚟講,我係一個咩人…






IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link