［愛情甜故前傳--無糖純愛］曾經嘅我地，都係兩條平行線⋯: 34. 小興奮

我同靜愉分道揚鑣之後，我就轉彎入去屋苑大廈，靜愉就繼續直行，其實我同靜愉住嘅地方唔係真係相隔好遠，只係隔咗兩個街口

我番到屋企之後嘅第一件事係沖涼，正當我除完鞋行入屋，打算行入房嘅時候，見到雪櫃上面貼咗張Memo

「雪櫃有冷飯，可以炒飯食」

我打開雪櫃，見到有一大碗冷飯淨咗喺度，我將個冷飯喺雪櫃拎咗出嚟，然後微微踮起腳尖，喺廚櫃中拎咗一罐午餐肉出嚟，再打開冰箱，拎咗一袋粟米出嚟

冇錯！我要整午餐肉粟米炒飯！不過我要沖咗涼先，因為我真係覺得好攰，所以真係要沖咗個涼等我冇咁攰先



…

我望一望手機，已經10點幾，我今日有啲攰，雖然聽日星期六，但我已經灘咗喺床度蓋好被唔想郁

我將手機放喺一邊叉緊電，我房已經冇開燈，雖然未去到漆黑一片，但昏暗嘅環境會令人增強睡眠嘅意欲，所以我已經感覺到我嘅睡意出緊嚟

我合上眼，葉子朗嘅身影喺我腦海中慢慢浮現，我頓時郁咗一郁，一個轉身由向左邊側瞓變成向右邊側瞓，雙手緊緊地攬住個攬枕

「唔好再諗葉子朗啦！你要瞓唔著㗎啦！」我喺心裏朝自己吶喊道，我想今晚好好瞓一覺呀



聽日約咗靜愉2點半，我希望我可以好好地瞓到點半，可以一覺瞓天光就最好，可以瞓到14~15個鐘，我一定精神到一個點，所以拜託！唔好再浮現葉子朗出嚟啦！我真係要瞓覺啦！

「嘟嘟嘟嘟！嘟嘟嘟嘟！嘟嘟嘟嘟！嘟嘟—」

我聽到手機鬧鐘響嘅聲音，伸手拎起放喺枱上叉電嘅手機，將手機嘅鬧鐘閂咗

我坐起身伸咗一個懶腰，一覺瞓天光都係好呀！我真係瞓足14個鐘，好爽呀～可以瞓咁耐真係好呀

梳洗好、換好衫、執好嘢之後我就出門口去靜愉屋企，答應咗靜愉要幫佢補底㗎嘛～



我去到靜愉屋企嘅時候，屋裏只有靜愉一人

「你食咗嘢未呀？」靜愉問道

「食咗啦，你未食咩？」我推開靜愉嘅房門行入去佢房，我將我啲嘢放入佢房

今日喺我過嚟之前，我已經買咗個麵包食頂住肚先，食咗個包總好過咩都唔嘅

「唔係呀，我食咗啦，睇下你食咗未啫。」靜愉都跟埋入房，靜愉喺書包入面搵番本數學書出嚟，然後拎埋筆袋就行出廳，喺餐枱前坐低

我見靜愉已經準備好，我都拎埋我啲嘢出去，我坐喺佢對面，因為感覺上好似方便啲，坐隔離冇咁方便我睇佢做成點

「你想由邊度講起呀？」我打開數學書同埋堂課簿，拎定鉛芯筆出嚟

「由呢一課一開始啦！」靜愉打開第十一課，「呢課聽完之後都唔係好明…」



「唔緊要啦～慢慢嚟。」我掀到呢一課嘅頭一頁，「由呢頁講起啦！」

…

「休息一陣啦～」我見已經同靜愉講咗兩三個鐘，於是就話休息一陣，因為我都已經覺得有啲攰

「嗯！」靜愉伸咗個懶腰，「攰死啦…」

我耷低頭睇手機，睇下IG，其中最主要都係想睇下葉子朗有冇po嘢，story又好帖文又好

咦？葉子朗真係出咗新嘅story，我即刻就㩒入去睇

「睇咩笑得咁開心呀？」靜愉行嚟我隔離，我向我部手機



靜愉一望到我睇緊嘅嘢，即刻默默企番直個人，然後嘆咗一口氣，我抬頭望向靜愉，只見靜愉默默地搖頭

「咩呀～咁啱睇到啫～」我笑道，掩飾咗一下

「係咪真係咁啱呀？」靜愉似乎已經睇穿咗我，但佢只係反問咗一句 

我笑而不語，然後繼續耷低頭睇手機，靜愉只好無奈咁搖搖頭

我望到葉子朗嘅IG story，心跳又默默加速，我鎖上手機嘅螢幕，然後伏喺枱面上

成個腦海中都只係諗住葉子朗，不過要等到星期一先可以再見到葉子朗，唉～唔知下個星期可唔可以見到佢留低打波呢？

「唔好再諗葉子朗啦！」靜愉突然間用手掌一下拍落我額頭，「開始得啦！繼續啦！」

「冇諗佢呀！」我又講咗一個大話，「繼續講埋啱啱未講完嗰度先。」



我同靜愉又繼續補底，繼續幫佢追進度




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link