［愛情甜故前傳--無糖純愛］曾經嘅我地，都係兩條平行線⋯: 47. 第十一天

「嘟嘟嘟嘟，嘟嘟嘟嘟！」我聽到鬧鐘嘅響聲，帶着少許床氣起身將鬧鐘㩒熄

今日係葉子朗拒絕咗我之後嘅第十一日，而且今日係個好日子，今日係Happy Friday

我今日起身嘅時候覺得好似突然間輕鬆咗好多咁，出門口嘅時候心情都特別好，唔通因為今日係星期五？冇理由呀～

不過唔理啦～反正開心就好啦～好似已經好耐都冇試過有咁輕鬆嘅感覺啦～

「喂！」突然有人從後一下子挽住我嘅手臂



「靜愉早晨～」我一望過去就見到靜愉，我心情特別好咁同靜愉打個招呼

「咦～有人今日心情好好咁喎～」靜愉側着頭望我，「係咪有啲咩好事發生呀？」

「好事？冇呀…」我聽到靜愉咁講之後都諗咗一諗

「喂喂～」有人拍我同靜愉嘅博頭，我同靜愉同步地望向後面

「早晨啵～」靜愉見到佢之後講道



「早晨～」我都對佢微微一笑講道

「今日心情好好咁喎～」周樂恆挑一挑眉望住我，佢行到嚟我隔離，同我地一齊行番學

「係囉，我都係咁話，但你又話冇嘢…」靜愉望向我，仲要附和周樂恆

「咁我都唔知點解嘛～」我無奈地笑道，諗番起今朝早，「今日起身嘅時候突然覺得成個人好似輕鬆晒咁…」

我自己都喺廢諗緊到底係發生咗啲咩事，如果我知道，就已經同咗靜愉講啦！但問題係我真係唔知咩事



今朝起身嘅時候，突然間覺得好似好輕鬆咁，心情都唔錯，總覺得好似有啲咩消失咗咁樣，但係一時三刻我又諗唔到到底有啲咩冇咗，感覺就好似之前一直以嚟都有一塊石頭壓住我令我好辛苦好大壓力咁，但今朝早一起身就發現塊石頭比人搬走咗，成個人即刻好輕鬆

「到底係因為啲咩呢…」我喺心中默默地諗，我喺廢諗緊最近有冇啲咩特別開心嘅事，但又好似冇呀，每一日都係咁樣過

去到四樓嘅時候，周樂恆先番去自己嘅課室，因為佢班嘅課室最近樓梯，我同靜愉都番再經過咗一個班房就到

「你諗到未呀？」靜愉一臉好奇咁問道

「未呀…」我一臉苦惱咁搖搖頭

喺我同靜愉剛剛邁步踩入課室嘅時候，突然感覺到有陣風喺我隔離快速咁入咗課室一樣

本來我望緊靜愉，突然咁樣令我嚇咗一嚇，打咗個冷震，我望向行緊番埋位嗰個人，原來啱啱喺我隔離行過嗰個人係葉子朗，佢個有有氣場都算啦，嗰陣寒風吹過真係令人打晒冷震

唔知點解我突然間諗到，如果佢喺古代嘅話，一定係嗰啲驍勇善戰、殺人無數、令人聞風喪膽嘅大將軍，點解我會突然間諗到啲咁嘅嘢㗎？不過葉子朗個氣場又真係幾似嘅～



我同靜愉行到埋位坐低，算啦～輕鬆咗開心咗總好過唔開心嘅～唔通係因為嚟緊就要考試，所以我先會比咗無形壓力自己？

或者都可能係嘅～我望向靜愉，繼續同靜愉講嘢，發現葉子朗剛好望向我呢邊，我知道佢望緊呢邊，但我完全冇望向佢嘅打算

「嚟緊考試，一唔一溫書呀？」靜愉問我

「好呀～」我比咗一個Okay手勢靜愉，「喺邊度溫呀？學校圖書館？定邊度呀？」

「小食部啦！你知你㗎啦，太靜溫唔到書做唔到嘢㗎嘛！」了解我嘅靜愉瞬間就講咗一個重點出嚟

「都係你最知我心意啦！」我對住靜愉送一個飛吻，但靜愉就反咗一個白眼做比我嘅回禮，「喂呀！」

「你個飛吻就留番比你將來個男朋友啦！」靜愉掐咗我嘅臉頰一下，鬆開手之後細聲咁問道，「喺小食部溫書你Okay嗎？」



「咩Okay唔Okay呀？」我一時間唔明白靜愉想講啲咩

「葉子朗！」靜愉細聲咁提示我，我聽到嘅嗰一刻，都冇咩太大感覺

「Okay呀！」我只係喺回答嘅同時無奈咁反咗一下白眼

我就好似普通人一樣望向葉子朗，我嘅心好似比之前又平靜咗啲啦…佢嘅冷酷仍然係佢吸引我嘅原因，佢嘅冷漠冷漠照樣係佢嘅魅力所在，佢嘅側面亦依舊好睇，只係我嘅內心掀起嘅波浪都慢慢地變成小風小浪了

或者我對佢嘅感情的確冇想像中咁深厚，佢亦只係喺我嘅青春裏嘅一個過客；或者我嘅內心深處仍然保留着對佢獨有嘅感情，只係我已經將佢地都收起

我對葉子朗嘅中意，只係一時三刻，縱使心中嘅感情有保留，但我諗成為一份屬於青春嘅見證已經不錯

我好似…已經發現咗我忽然覺得輕鬆嘅原因…






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link