佢感覺到有人拍佢嘅博頭,喺佢回頭嘅一瞬間,佢嘅馬尾一下子甩過,搭喺佢嘅左邊博頭上,伴隨住嘅係淡淡嘅洗頭水花香味

「唔該。」佢對住我微微一笑,然後遞手想接過我拎住嘅紙巾

我望住佢嘅微笑望得入神,不禁加大咗捉住紙巾嘅力度,想再多望佢嘅笑容兩秒,想再同佢對視多兩秒…

「呃…葉子朗?」佢感覺到我用力地捉住咗包紙巾,佢嘅頭微微一側,一臉疑惑但又保持住微笑咁望我

我頓時鬆開手,佢接過紙巾將佢放入裙袋



「要快啲落執啦,就嚟打鐘。」方芷諾提醒咗一句,然後就轉身急步行落去,我心中不禁有啲小興奮

方芷諾對所有人都好,明明我當時講咗啲咁嘅說話,但係佢都冇討厭我之類,反而對我都一樣帶住微笑,或者佢心裏面係討厭我,但佢都冇揀表現出嚟,佢對我就好似對其他人一樣,當我係普通一個同學咁樣對待

我忽然諗起佢對周樂恆都係一樣,微笑着,溫柔的對待…我不禁苦笑起嚟,咁樣對待每一個人真係好傻…對人好往往都會被欺負,好人只會成為吃虧嘅一方,咁樣就變咗「老好人」,大家都會恃住你一定幫手而每一次都搵你幫

幫咗九次,大家會覺得你係一個好人,善良同時對人又好;但當你喺第十次嘅時候選擇咗拒絕,大家就會覺得你唔好,一個小小嘅忙都唔願意出手幫助,喺你背後話你假好人

幫咗一次,就要幫第二次?明明唔想就可以拒絕唔幫,但明顯地方芷諾係就算唔想都會幫,唔好意思拒絕人所以唯有幫手



「呵~欠…」我又打咗一個喊露,今日嘅早會特別悶,可能係因為我夜瞓又覺得好攰所以先會咁

平日嘅早會都係咁悶,但今日嘅早會係特別悶,悶到我都可以企喺原地唔郁直接瞓着…

今日已經係星期一,仲有兩日就進入考試週,我要把握剩落嚟嘅時間好好溫書

喺Lunchtime嘅時候,我決定溫中文,因為溫Science,雖然呢一科我有信心可以考得好,但係都要溫一溫,咁我放學番到屋企之後就可以再背一次加強記憶

「葉子朗你溫書呀?」坐喺我隔離嘅余嘉偉一臉愕然咁望住我,「少有喎~」



「今年揀科嘛…」我隨便搵咗一個借口搪塞過去,雖然今年要揀科都係一個事實,不過唔係我努力溫書嘅主要原因

我耷低頁望住課本,但視線卻移向方芷諾,我偷偷地抬眼望方芷諾,佢同我一樣正用Lunchtime呢段時間溫書,但係佢同我唔同嘅係佢冇望向我,佢嘅目光已經有一段時間冇再帶着同其他人唔一樣感情落喺我身上,我諗佢對我嘅感覺已經又番到原點…

我嘅心裏有啲失落,如果佢中意我嘅時候我都中意佢咁就好…希望有一日佢會再一次留意到我啦,不過我宜家嘅首要任務係好好溫書

我用晒成個Lunchtime嚟溫書,一邊食飯一邊溫書真係第一次,不過冇辦法啦,時日無多

Lunchtime之後係班主任堂,Miss Yiu入到嚟就派番之前啲功課比我地

「星期四就考試啦!咁大家加油啦,宜家就派番之前啲功課比你地,同埋提一提你地,今日要清Locker呀!」Miss Yiu一放低嘢喺枱面就不停講,不斷提點我地呢樣嗰樣,「Venus出嚟幫我派嘢,Wilson都出嚟派嘢啦~」

Miss Yiu叫咗方芷諾出去幫佢手派嘢,我望住方芷諾踏着小跳步行出去,喺老師枱前面拎起咗一疊淺綠色嘅Newspaper Cutting File,將橡筋除咗落嚟,放喺枱上,然後就抱住疊File喺黑板前行嚟行去派嘢

我托住頭望住企喺出面派嘢嘅方芷諾,我可以假發呆真望佢



坐我前面嗰個女仔轉咗一疊嘢比我,我搵到寫住自己個名嘅功課簿同工作紙仲有File,然後就將剩低嘅嘢傳去比我後面嘅Wilson個位,我就咁幫佢將啲嘢放喺枱面

方芷諾派完嘢番到埋位坐低,一邊收拾自己嘅枱面,一邊將唔屬於佢嘅嘢傳去後面,我諗我可以就咁望住佢一日都冇問題

去到放學嘅時候,我跪喺Locker前面,將入面啲嘢都執晒出嚟攬住,我今日諗住上去圖書館溫書,圖書館嗰度都有枱,而且嗰度靜好多,本來我今日都想番屋企溫書,但係琴日晏就嗰陣隔離屋唔知係裝修緊定點,嗰啲鑽牆聲嘈到啲嘢都記唔到入腦

為咗避免今日又有同樣嘅悲劇發生,我選擇留喺學校溫書,喺圖書館一定唔會有人嘈住

我攬住一大疊書行入圖書館,感覺上好似比人炒魷魚咁…我行到去一個喺窗邊嘅位,學校嘅圖書館有一度好,就係佢有長枱,我指嘅長枱唔係食飯嗰度啲

單邊長枱貼住窗邊,可以坐高櫈,而且唔洗同人面對面咁坐,溫書做功課做到攰攰地就可以望下街,完全唔洗怕見到對面個人會尷尬






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link