［愛情甜故前傳--無糖純愛］曾經嘅我地，都係兩條平行線⋯: 70. 關注

唉…但係我表咩白啫…？萬一我表咗白，但佢唔接受我呢…？我喺佢眼中到底係點樣嘅存在…？

葉子朗呀葉子朗，你真係好廢呀…有咩係你做得好㗎？行上前同中意嘅人講句嘢唔敢，努力讀書考好啲個試又想半途而廢，更加唔好講要同人表白

「如果我同佢講我中意咗佢，佢會係點嘅反應…」我喺心裏不禁有啲好奇，到底我中意嘅女仔聽到我嘅表白之後，會係點樣嘅反應

佢會愕然、震驚、開心定係會冇反應？當初點解我會覺得佢唔吸引？明明佢嘅一舉一動、一顰一笑係如此吸引人嘅目光，就算係佢一個回頭一個回眸，都係一樣觸動我嘅心，但點解我會從來都冇發覺到呢一點…？

或者由我企喺課室門口，聽到佢親口講中意我嗰一刻開始，我就已經開始留意佢嘅存在，但我卻始終都冇察覺到因為咁樣留意而改變咗對佢嘅心，一點一點慢慢地改變着



去到我先開口拒絕佢嘅時候，我都冇發現其實我對佢已經存在咗好感，直到我開口拒絕咗佢之後，對佢嘅感覺先慢慢滲出嚟，慢慢地發現我好似總係不自覺咁就望向佢，喺我回神過嚟嘅時候，視線已經停留喺佢身上；慢慢地發現我嘅目光好似好難喺佢身上移開，好容易就比佢吸引到視線，但卻難以離開，到我發現嘅時候，我已經中意咗佢

所有嘅事好似都係喺不經意嘅情況下發生，不經意咁留意，不經意咁有好感，不經意就中意咗

「我想下年都可以同到方芷諾同一班…！」一諗到呢到，我就唔敢再懶落去，一下子就企起身行番入房溫書，唔偷懶啦，「時間好快過㗎啫！堅持多一陣就得。」

我行入房前拎起放咗喺餐枱上面嘅一大疊書，全部都係喺學校Locker移番嚟，我將佢地拎入房，暫時放喺書枱底先，我拉開張櫈坐低喺書枱前面，打開Science書，又繼續努力溫書

希望我嘅努力唔會白費，上天會見到我嘅努力…



…

「呵～欠…」我打咗一個大大嘅喊露，「宜家幾點呀…」

我自然地望向放喺枱頭嘅電子鐘，已經10點幾，我都溫咗4個幾鐘頭書啦…Science都溫得七七八八，都已經溫得差唔多啦，都已經去到最後嗰頁

我懶洋洋咁伸咗一個懶腰，企起身拉筋鬆下啲筋骨，企起身嗰下先覺得屁股有啲痛，坐咗幾個鐘郁都冇郁過，屁股受難

我由房行去廚房，然後由廚房行去梳化坐低，今日就溫咁多啦…其他就之後再溫，宜家未溫嘅應該得中文同英文，其他都應該溫晒啦，我今日終於可以早啲瞓，呢幾晚每一晚都溫書溫到凌晨3、4點先瞓，每朝早都特別難受



我一灘喺梳化就開始睇手機，同平時一樣睇下IG睇下Facebook，畢竟冇咩嘢做，唔係睇手機就係睇電腦…

「呢個時間，方芷諾會唔會都係一樣溫緊書…」睇睇下IG嘅我突然諗起方芷諾，有啲好奇佢做緊咩

但諗到呢度，我又不禁覺得自己突然間變得好細膽，我拎起手機，打開WhatsApp，喺班群入面搵到方芷諾嘅電話，因為佢set咗暱稱做佢個英文名，所以就算我冇save佢電話都會搵到佢電話號碼

我㩒落去佢嘅電話號碼，即刻就彈出咗幾個選項，我㩒咗落去「Send Message」，即刻就跳咗去一個全新嘅對話框，因為我同方芷諾冇私下傾計亦冇講過嘢，所以成個對話頁面好乾淨

我心中有股衝動想試下send一個message比佢，但問題就係我唔敢…

「佢會唔會討厭我…？」我冇辦法唔諗呢個問題，「佢…係點睇我…」

我對方芷諾嘅想法有啲在意…我想知道喺佢心中，我係一個點樣嘅人…

「我係咪應該鼓起勇氣去追佢？」我問自己，呢個問題嘅答案我自己都唔敢肯定，應該話，我都唔知我係咪真係有勇氣踏出一步去追佢，而且我要點追佢？



我一直以嚟都覺得自己唔係一個好細膽嘅人，我都冇特別驚嘅嘢，但我宜家發現原來自己都有「細膽」嘅一面

今次係我第一次感受到戀愛嘅滋味，都算係情竇初開嘅，當遇到自己中意嘅女仔嗰彈，再大膽嘅人都會突然變得怕怕醜醜，閃閃縮縮一樣

想行前一步又唔敢，但心入面又心思思想要拉近距離；想上前搭話，但又欲言又止，講每一句說話都要諗清楚先可以再講

睇嚟戀愛除咗會令人沖昏頭腦之外，仲會令人會出現一個「新嘅人格」，方芷諾都算係我嘅初戀，因為我真係第一次中意人，之前都冇試過中意人

第一次感受到暗戀一個人嘅感覺，我呀…有啲怕佢會知道我中意佢，但又怕佢唔知道我中意佢，中意一個人就會默默地留意、默默地關注、默默地在意…




IG Link: https://www.instagra.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link