［愛情甜故前傳--無糖純愛］曾經嘅我地，都係兩條平行線⋯: 75. 失落的感覺

「唔…！」我都唔知做數做咗幾耐啦，我挺直腰板坐，伸咗一個懶腰

放喺一邊嘅手機突然震咗兩下

我拎起手機同時順便當係休息一陣，手機嘅螢幕亮着，我見到係WhatsApp訊息嘅提示，我見到send message過嚟嘅人嘅時候，呆咗…

我一下子由頹廢嘅坐姿變成端正嘅坐姿，腰板挺直，雙腳好好地踩喺地上

「Hi，我係方芷諾」



我㩒到入去，見到佢淨係send咗一個Hi過嚟，狀態係輸入中；淨係因為佢一句咁簡單嘅開場白，我已經覺得好興奮，心中嘅小鹿亦都因此而活蹦亂跳起嚟，喺心房裏四處亂撞，有種好期待好緊張嘅心情

我雙手拎住手機，手心都不禁冒汗，我嘅視線緊緊地盯着手機嘅螢幕，一秒都唔敢移開

方芷諾嘅狀態由「輸入中」變成咗「在線上」，點解佢唔再輸入嘅？佢想問我啲咩？佢係咪有咩想同我講？

我一下子就企起身，然後喺客廳來回踱步，一直耷低頭望住螢幕，視線依舊冇離開過手機嘅螢幕

見到佢嘅狀態又再一次變成咗「輸入中」，感覺更加緊張，啱啱喺我見到佢嘅狀態由「在線上」變番「輸入中」嘅時候，心臟好似停止咗一樣



方芷諾：我想問嗰日喺圖書館走嘅時候，你有冇拎多咗一份筆記紙呀？Miss Chan派嘅嗰一份釘裝

方芷諾：我問過其他人，佢地都話冇，所以唔知會唔會喺你度，你可唔可以望下？

我見到方芷諾咁樣問我，我心中大喜，雖然佢只係問我一句會唔會係我拎咗，叫我幫手望一望，不過我都覺得好開心，連嘴角都不自覺地上揚起嚟

「等我一陣」我回覆道

我放低手機行入房，喺嗰一堆書入面搵到一個File，呢個File係我最近用嚟裝溫書要用嘅Notes用嘅，我將手機放喺書枱上面，然後打開File，抽咗入面啲Notes出嚟，見到寫中文字嘅都會停落嚟認真望一望



「咦…？」我掀到其中一份Notes嘅時候停咗落嚟，因為我見到喺呢一份Notes嘅右上角寫咗「方芷諾」三個字

我小心翼翼地將份筆記喺File入面抽咗出嚟，我企番起身，將份筆記放喺枱面，然後拎起手機

「搵到，Sorry，原來真係我唔小心拎咗」

我嘅訊息先啱啱發送出去，變成兩個灰剔兩秒都未到，方芷諾嘅狀態就由「最後上線」變成「在線上」，雙灰剔亦變成咗雙藍剔，然後變成「輸入中」

方芷諾：唔緊要，你聽日拎番比我就得

「Okay」我故作鎮定咁打咗Okay，心中卻格外地期待方芷諾嘅回復

方芷諾：Thx～

喺方芷諾講咗一句「Thx～」之後，我同佢嘅對話亦隨之而完結，雖然我有啲失落，頓時覺得心裏空空的，好難得先可以同佢講到兩句



我帶着少許嘅失落將手機螢幕鎖上並且將手機放喺一邊，喺冇人知嘅情況下偷偷地打開方芷諾嘅筆記，每一頁紙好似比燙斗燙過一樣畢直，一條摺痕或者皺折都冇，睇嚟佢有好好地將每一份筆記保存好，我諗筆記上唯一嘅摺痕應該係因為釘書釘

某一啲字句上都用淺黃色嘅螢光筆間住，喺旁邊嘅空白位置上有用藍色原子筆寫嘅字，腦海中不禁浮現出佢溫書嘅畫面，一定係一臉專注咁聽住Miss Chan講解重點，一邊拎住螢光筆同原子筆記低重點

佢喺屋企溫書嘅時候會係點？我總會諗到佢散髮嘅樣，頭微微側着，右手拎住筆，左手溫柔地將擋到視線嘅髮絲輕輕撥開然後撓到耳背

每一頁嘅筆記紙上都有標記，有用紅筆寫嘅重點，有用藍筆寫嘅提示，有用螢光筆間低嘅重點句子

我輕輕地將筆記掀番去第一頁，偷偷地將筆記放到鼻尖前，筆記好似有一股淡淡嘅清香，係唔係只要係屬於女仔嘅嘢，上面都會有一種小清新嘅味道？

「我喺度做緊咩呀…」我不禁尷尬咁笑起嚟，自己都覺得自己有啲奇怪

我將方芷諾份筆記放咗入去書包先，避免我聽日番學嘅時候會唔記得咗拎，喺我將筆記放入去袋入面之際，我將佢拎番出嚟，用個File裝住咗，然後再放入去書包



「費是佢份筆記有摺痕啦～」我一邊將File放入書包，一邊喃喃自語講道，

我拎起手機，WhatsApp冇再收到訊息通知，我冇再收到方芷諾嘅WhatsApp

「唉…」我不禁默默地嘆咗一口氣，然後放低手機，坐低喺餐枱前面繼續溫書

我不禁又偷偷瞄咗手機一眼，然後有少許無奈咁收回視線，默默地打開數學書同堂課簿




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link