［愛情甜故前傳--無糖純愛］曾經嘅我地，都係兩條平行線⋯: 82. 散學禮

去到散學禮嘅嗰一日，我就喺早幾日決定咗要同方芷諾表白，而我就係決定咗要喺今日散學禮完咗之後表白

散學禮完咗之後係初中生涯中最後嘅班主任時間，我諗住喺完咗班主任時間，放學嘅時候同佢講

但問題就係我要點樣先可以有同佢單獨相處嘅機會然後同佢講？

「順其自然。」唔知點解喺我腦海中浮咗呢幾個字出嚟

雖然順其自然都係一件好事，不過，我始終都想要話比佢知我嘅心聲，而且…我想同佢道歉，講一聲對唔住，我始終都覺得我差咗佢一個對唔住



宜家仲係班主任時間，嚟到學期尾要派番所有功課、測驗嗰啲，嚟到最後嘅班主任堂，感覺上好似都比平日輕鬆，或者因為已經考晒試派晒卷，而聽日就係暑假嘅開始

我嘅心情有啲矛盾，終於放暑假，我覺得鬆咗一口氣，初中最大壓力嘅一年—中三已經嚟到尾聲，亦要完結，去到下年就係高中生；但比起輕鬆，我心入面更多嘅係一種難以言喻嘅感覺，因為放暑假啦，我真係唔會見到方芷諾，我要等到9月先可以見到佢，我真係好想可以分到同佢同一班

方芷諾喺出面幫Miss Yiu派緊嘢，我嘅雙眸跟住佢移動

一諗到今日要同佢表白我就覺得好緊張，手心都出汗，手都不禁顫抖着

前幾日派卷，我每一科嘅成績都唔係獨差，只少全部都合格先，我諗我今個學期嘅成績表唔會差得去邊



派完嘢嘅方芷諾行番埋位，我嘅視線跟住佢郁

「佢會唔會接受我？定佢會揀拒絕我嘅表白？」我不禁喺心中諗到呢個問題

我其實對於我係咪真係應該表白仍然有啲猶疑，我為我的確怕…怕佢會拒絕我…我心中的確會怕…

但既然我已經決定咗今日要表白，咁無論最後嘅結果係點，我都會接受，既然已經決定咗要同佢坦白

「中三嚟到呢度就真係完結啦！」Miss Yiu拎起咪對大家講道，「下年大家都係高中生啦，無論最後你地讀到咩科，係咪你地中意嘅科都好，上到高中之後都要努力讀書啦！」



差唔多到班主任課嘅尾聲，Miss Yiu同大家講一啲鼓勵嘅說話，都係嘅，都已經嚟到尾聲啦…

「生性啦你地都要！」Miss Yiu講道，「高中要比心機，高中同初中係兩回事嚟，你地更加要努力。」

Miss Yiu平時好似好惡咁，其實佢對我地好好，Miss Yiu呢半年一個人負責晒我地班嘅嘢，佢地好辛苦

「叮噹叮噹，叮噹叮噹～」

鐘聲嘅響起意味住一整個學年嘅完結，同時代表住我地初中嘅生涯到此為止

我企起身執嘢，下意識偷偷望向方芷諾，佢同佢班friend一齊講緊嘢

「咁我地晏啲見啦！」游悠對李靜愉同方芷諾講道，然後就同張雯茵、李詩雅一齊走

李靜愉同方芷諾企喺度一邊講嘢一邊執嘢，我要搵個機會同方芷諾講先得，但都要等我地班啲人走得咁上下先



「葉子朗，出嚟幫我手拎嘢落教員室啦！」Miss Yiu又會偏偏喺呢個時候叫住我都有嘅

但我冇理由唔幫Miss Yiu，所以我都係行咗出去，但我個書包就擺喺位，陣間番上嚟嘅時候先拎

「你今次成績唔錯，終於發奮讀書啦？」Miss Yiu喺行落去教員室嘅路上同我講道，「上到去都要Keep住努力呀。」

「嗯…」我嗯咗一聲回答道

「見到你終於努力讀書，成績又有咁大進步，作為你嘅班主任都覺得好開心。」Miss Yiu笑着講道

Miss Yiu好少笑住咁同我講嘢，因為我成日都路交功課，Miss Yiu多數叫我都一定係發緊火，好嬲咁嗌我個名

但宜家Miss Yiu講咩都好，我都冇心機聽，因為我成個腦都淨係諗緊方芷諾會唔會已經走咗



喺我幫Miss Yiu拎啲嘢去到教員室門口之後，Miss Yiu就自己拎番啲嘢入教員室，我即刻就跑向樓梯然後跑上去

「佢唔會走咗掛！」我心中既不安又緊張，好怕我番到課室嘅時候方芷諾已經走咗

我上到去4樓，見到課室嘅燈仲開著，我先放心落嚟，慢慢行向課室

喺我行到課室門口嘅時候，我聽到入面有人講緊嘢，係李靜愉同方芷諾，方芷諾仲未走！

正當我打算瑞邁步行入課室，叫住方芷諾嘅時候，我聽到佢地嘅對話，我瞬間就剎車停落嚟，企喺門邊冇行入去

「你呀，係咪仲對葉子朗有感覺啫？」呢一句明顯地係李靜愉問

方芷諾冇即刻回答，反而係靜咗落嚟，佢呢一個沉默令企喺課室門口嘅我不禁緊張起嚟

四周嘅氣氛都因為我開始加速嘅心跳而緊張地凝聚起嚟，我嘅心跳得好快，我都聽到自己嘅心跳聲，身上每一條神經線都突突地跳動着






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link