《如果你見到呢段字，救我！》: Day 10

Day 10

到我清醒翻嗰時，已經係中午時份。

一走出房門，就見到德利明坐係梳化，佢嘅出現，正正就提醒住我自己，呢一切都係真實無比。

我好快就會死。

然而，過咗一晚，我已經諗通咗。





事實上，我係因為一個夢而點化。

夢境入面，有個黑影問我：「你係一隻好蠢嘅羊？」

唔知點解，我聽到呢句說話好嬲，好似被人睇小一樣，於是我衝口而出反駁：「我唔係羊！就算我係，都會係一隻聰明嘅羊！」

之後，嗰個黑影化成人類：「咁先係我會講嘅說話。」

然後就沒有然後，夢境結束咗。





我醒翻先明白，根本就無咩黑影，所謂嘅黑影就係我自己，佢係嚟提醒我，選擇無視係無可能，要扮訓好容易，去學識面對同解決問題先最難。

德利明提過，我會不自覺咁自殺。換句話說，只要我搶翻意識主導權，就可以控制自己，當初就係咁而恢復意識。

我正打算同德利明道歉尋晚嘅失儀，就被佢搶先開口：「對唔住，或者我唔應該話咁多嘢比你聽，你未有心理準備接受。我呢度有一隻藥，佢可以令你失憶，咁你就唔洗死。」

「應該係我同你道歉就真，你無做錯，係我自己堅持要聽真相。我而加已經諗通，我係唔會認命，會好好對抗。」我堅定表示。

德利明擁抱我，以老懷安慰嘅語氣講：「咁我都可以放心離開，交代最後一件事比你聽。」





「唔會㗎！你可以好似我咁，用意志力對抗。」

「我已經比預計時間生存得耐，去到極限。

我救下你，幫我做埋最後一件事。」佢突然跪低懇求我。

「我幫我幫！你快啲起身！」我急忙扶起佢。

「多謝你。

我交代比你嘅事好簡單，就係活著。

只有活著，人類社會嘅命運先有機得到轉機，唔洗再被喪屍依附。

當你抗衡得到喪屍意識，三十日內無病發嘅話，請你去到鄰近嘅實驗室。嗰度會有一個機械人，你只要講密碼：09102020，佢會抽取你啲血去製成疫苗。





人類嘅未來係食粥定食飯，靠你㗎啦。」

活著，聽落簡單同正常不過嘅事，但原來無嘢係必然。

不過，亦唔代表要輕易放棄投降。

「明白，放心交比我。」

佢拍拍我肩膀，滿意點頭微笑：「咁我就安心。」

「偷食？」我衝口而出，總覺得安心係要配搭偷食先係完整一體。

睇嚟喪屍意識開始影響我。





「吓？」德利明有啲愕然。

「無嘢，呃，話說我好似由頭到尾都無介紹過自己。」

「真係咁？」話畢，佢轉身離開。

望住佢背影，忽然有啲感慨同莫名嘅熟悉感，無咗佢的話，我應該仲傻傻地咁揾真相，然後不自主自殺。

「安吉金。」我相信，呢句比起其他說話更有意義。

「我呢世都會記得。」雖然佢背對著我，但我仍然想像到佢嘅勾起嘴角嘅微笑。