然後,佢又跑去另一個人身邊,嗰個身影係......老婆?

等等,佢身旁仲有其他人,不過佢哋兩個都背對著我,無辦法睇到係邊個,但我估都應該係佢嘅朋友或者同事。

呢位訪客帶埋自己小朋友嚟探老婆,嗯,應該係咁,等我都行去打招呼先。

「媽咪我要食嘢!」突然,小朋友對住老婆叫媽咪,佢叫得我老婆做媽咪,代表住我係爸爸?我又做人爸爸?

我真係夠資格?我質疑自己能力,畢竟,我連自己個女都唔了解。





「爸爸!我要食嘢!」老婆似乎無理到小朋友,所以佢轉去問爸爸攞嘢食。

「你想食咩啊?爸爸煮比你食。」我開口問。

咪住先,好似有啲唔妥,點解個仔唔係對我講,而係對住另一個男人講?

呢個時候,嗰個男人擰轉身,抱起個仔問:「肚餓啦?想食咩啊。」

我終於見到對方嘅真面目,佢個樣係我呢世都唔會忘記,但......佢點解會出現翻?





出現係我面前嘅係,

德利明。

「點解......點解你會係度,你唔係死咗咩?我明明望住你死㗎喎!同埋,點解呢個小朋友叫我老婆做媽咪,叫你做爸爸㗎?你你你,死咗㗎喎!」我震驚到語無倫次。

德利明放低小朋友,仰天大笑幾聲:「乜你真係信㗎?你真係信呢個世界有嗰啲......嗰啲咩話?啊,喪屍病毒,好天真啊安吉金。

一切都係假㗎,你目擊到我死亡過程,都係我安排出嚟嘅。至於呢個咁可愛嘅小朋友,就係真嘅,只不過,佢係我由我同你老婆生嘅。





係我哋玩你咋傻仔,你仲未明啊?」

「你講咩啊?但我真係有喪屍病毒的徵兆喎,真係有人控制我身體,我感受到㗎!

加上,我同你無冤無仇,點解你要做咁多嘢呃我,我真係唔明喎!」我唔相信呢一切都係無中生有,亦唔明白佢動機。

「唉,你又係幾慘嘅。

你唔知自己有多重人格,又成日以為人哋想害你,每日都疑神疑鬼,你老婆同個女都頂唔順,所以先會成日唔翻屋企。

咁啱你老婆同我訴苦,於是我決定把心一橫要試下你,於是將人格分裂嘅病徵包裝成喪屍病毒嘅故事,你覺得好啱好準嘅話,就代表你係患者。

不過你老婆又唔捨得講個真相你聽,怕你會受唔住刺激發顛,所以我就安排假死。

點知你好似變得越嚟越顛,日日疑神疑鬼,加上我同佢又有咗小朋友,最後決定話真相比你知。





事到如今,無得你唔信啦。」說罷,佢抱走小朋友,離開我視線範圍。

我崩潰跌坐係地下,腦海入面一直浮現重覆又重覆嘅問題。

我有人格分裂?所有事都係我幻想出嚟?喪屍病毒係假嘅?我被人帽咗?我被所有人拋棄曬?

「啪!」忽然,腦海中聽到啪一聲,就好似有啲嘢斷咗。
已有 0 人追稿