女兒，希望你能彌補我的遺憾: 第十一節 - 抉擇
「曼聯呢幾場打得幾好，今年前四打歐聯有望啦。」難得去踢球輕鬆一下，賽後當然要和球友們吃宵夜，談談足球經。
「係啊，難得雙殺曼城。」
「新買個中場好好波啊。」
大家興奮地回顧上場賽事點滴，我冷冷地回應：「大家依家變得咁低要求，前四就得，有得踢歐聯就咁開心，以前我地可以四年內入三次歐聯決賽架。」
「咸豐年前既野，唔好回望過去啦，老餅。」球友不留情面的反駁。
我回望的不單是當時的曼聯，而是放棄現場觀看歐聯決賽的往事。
------------------------------------------------------------------------------------------------------------------------
「Yeah，曼聯贏左阿仙奴，入左歐聯決賽啦！」在酒吧看完四強賽事後，我回到宿舍，開心地和素妍分享喜悅。
「恭喜，Park 有無出場啊？」Park Ji Sung 朴智星，就算完全不懂足球的素妍，都會認識這位大韓人民英雄。
「Yes，佢今晚入波添啊。」
「Very Good，咁下場幾時踢啊？」素妍難得對足球感興趣。
「五月尾啦，決賽係羅馬踢啊。如果可以入場睇曼聯踢歐聯決賽，咁就perfect 啦。」
「咁你快d 買飛啦！」
「哈哈哈，d 飛已經炒到差不多一萬Euro 一張啦，仲要就算有錢都未必買到。」
「ooo… too bad..」素妍輕輕的一句回覆，完成了這次簡短的對話。
幾天之後，我在晚飯後無聊地上網，突然見到阿恩MSN online ，心想香港已經是深夜兩三點了，為何她會突然online 呢？再細看，她的status 寫著：is it a right decision? 天真的我，立刻對號入座，難道她覺得放棄我是一個錯的決定？難道我加倍努力，可讓她回心轉意？那應該做什麼才可以打動她？一連串問題如潮水般湧出。
我想追問她，但我怕知道真相後會失望。
我想忘記她，但我怕以後找不到一個比她更好的。
正當我苦思之際，有人在門外敲門。
「我可以入來嗎？」原來是素妍，她都完成晚飯了。
「Sure」
「我想問曼聯場決賽係邊日啊？」我很好奇她為何會突然這樣問。
「我都唔肯定，等我上網check check 先，五月二十七日，場波係羅馬踢。」我回答她。
「ok， thx」她就回去了。
五月二十七日，不止是曼聯的大日子，亦是阿恩生日的日子，今年將是她十八歲生日。
當天為她親手做蛋糕，當著數十人面前與校長抗衡的片段在腦海浮現。想到今年有人取代我的位置與她慶祝，心突然的隱隱痛，如空穴來了陣寒風，在聽到這首歌後，我下了一個決定。
用我青春押一注 換你回頭停留是處
只想你到最後 心中會內疚
還後悔付出的愛不夠
我決定完成當初和阿恩之前的約定，獨自到冰島環島遊，再於當地選購十八份生日禮物，於五月二十七日當天，親身飛回香港送給她，希望這個最後的掙扎，可以換來奇蹟的出現。
接著的數天，我埋首計劃整個冰島遊行程和安排機票回港的事宜。思緒都全被她佔據，情緒又被她MSN的status牽動，重回幾個月前行屍走肉的狀態。除了午餐及晚餐時間，其餘時間都獨留在房間，不知就裡的素妍亦察覺到不妥，在晚飯時間直接問我所為何事。
「你又掛住你個ex 啊？」她直接地問。
「小小啦，不過可能係我自作多情姐。」我沒有將我的計劃告訴她。
「今晚我地去公園行下？唔好成日留係房啦。」素妍提議著。宿舍附近有個公園，我們每天上學都會經過，環境相當不俗。
「唔啦，我仲有d野要搞。」因為我還沒計劃好行程。
「去啦，我有野想同你講同有禮物送比你啊。」她盛意拳拳地邀請。
「咁好啦，一陣九點鐘樓下等啦。」我亦不欲拒人於千里外。
我準時九時正到達宿舍正門，還沒見她的踪跡，亂逛一圈後，素妍來了。
她，化了淡淡的素妝，穿了短短的迷你裙，著了高高的高跟鞋。今晚的她，挺美的。
「之前都無見你打扮成咁既？」我問道。
「無啊，今晚想化下妝姐，唔好睇？」她緊張的問道。
「唔係啊，你今晚好靚。」我真心認為她今晚是很吸引的。
走了大約十分鐘後，我們在一張長椅坐下。
「我有份禮物想送比你，希望你會鍾意。」她在手中拿出一個信封，遞到我手上。
「上次你話好想去現場睇既，我地一齊去羅馬睇啊。」信封內的是兩張歐聯決賽，曼聯對巴塞的門票。
「點解你會買到既？」當刻的我十分驚訝。
「其實我屋企同Park Ji Sung兩家人係世交，我托爸爸問佢攞。」門票上面寫著Manchester United VIP，看來所言非虛。
「到時我帶你去見下Ji Sung哥哥，可能可以見到其他曼聯球員架。」她興奮地跟我說。
「咁貴重既野，你點可以送比我架？」這份千金難買的禮物，我真心覺得太貴重了。
「我知道你鍾意曼聯，所以想同你一齊去睇。我唔想見到你唔開心啊。」她不敢直視我，自言自語地說出這句話。
「多謝！我…」
我一時語塞，不知如何回應之際，她突然吻了我一下。
「I love you！」她拋下一句後，臉紅紅地飛奔回宿舍。
我呆坐了一會，再細看一下球票，上面寫著比賽日期：27 May 2009