女兒，希望你能彌補我的遺憾: 第二十節 - 酒後吐真言
「今次exhibition result 好好，Good Job Ronald。」這兩個月的工夫總算沒有白費，大老闆對整個活動十分滿意。
「Ronald, Kelvin。下個星期五，公司會搞個party，同埋你地d 同事一齊去relax 番晚啦。」我對這班sales 沒有好感- 一班唯利是圖，見高拜見低踩的小人，尤以頭目Kelvin為甚，此人公認淫賤，是小人中的小人。
會後，我在admin姐姐口中得知，原來那個party是sales team 向老闆爭取基金去舉行的。他們已經在諾士佛台某間主打一個價錢任飲的樓上劈場bar包場，十分配合他們MK的性格。
「Ronald，辛苦曬，今晚眞係要敬你幾杯，多得你幫手先有咁好成績。」我一踏進酒吧，這班小人已經排著隊來灌我飲酒。這些酒，嗅起來像天拿水，喝下去像甲醇，肯定是傳說中的假酒。
「Marketing 同事，你地都辛苦啦，今晚飲多幾杯。」另一堆禽獸趁我被圍攻，分批去騷擾我的同事們。正當我想提醒他們要小心之際，Kelvin又拉著我。
「Ronald，真係一萬個thank you你...」我很討厭人講thank you 你，係完全唔識英文，但又要講英文的人，才會犯這種低等錯誤。
「重要thank you 你地個妹妹，佢落場都好幫手架，佢係邊啊？我想同佢飲番杯。」色狼終於都露出牠的尾巴來。
「唔好搞d 細路女啦，我陪你飲啦。」我下意識替她擋了一著。
「果然係好老闆，咁幫d細既。好，我地再飲。」我一邊喝，一邊在搜尋阿琳的位置，希望盡快到她身邊保護她，以免這班人渣有機可乘。
「阿琳，佢地無來隊你啊嗎？」我終於在一角的沙發找到她。
「無啊，阿Ray同阿Dave陪住我去攞野食，都無咩人理我地。」幸好，團隊內的男同事機警地包圍著她。
「阿妹，終於都搵到你啦，成晚最想多謝你，同你飲番杯。」人渣Kelvin終於找到來了。
我見阿妹面有難色，立刻盡上司、阿哥的責任，跳出來頂：「唔好搞阿妹啦，人地乖乖女，唔飲得架，我幫佢頂。」這些假酒，莫說是平常不嚐杯中物的阿妹，正常人都喝三數杯，都會開始有上頭的感覺，實在不能讓阿妹接觸到這些垃圾。
「Ronald 眞係好老闆。Sales team 過來，我地一齊敬Ronald一杯。」唯恐天下不亂的Kelvin，自恃人多，使出人海戰術。一群怪獸立刻蜂擁而至，你一拳我一腳，我一時間應接不暇，只好酒來肚擋，喝酒的兩大禁忌 - 喝得太急及溝酒 - 都通通犯透。轉眼間就進入了醉酒的第一階段 - 精神亢奮，俗稱High High 地。
在這種低檔的劈酒場，必然會有那種低檔的卡拉ok 系統，給半醉的酒客去高歌（或鳩叫）一番。在旁人慫恿及酒精影響下，我忘我地高歌不止一曲，鳩叫著從來沒有飲品只有酒..
我為何讓你走
一走了你永遠再不回頭
然後我像跌入洪溝
誰也沒法拯救
我為何讓你走
只因你說你有你的自由
無奈我為你易放而難收
從此飄於世間像夢遊
似醉還未醉的我，望著台下，心中分不清楚歌詞的這個「你」，究竟是阿恩，還是阿琳...
「Encore Encore...」台下的歌迷叫著。
「好，下一首歌，我想唱比一個人聽，希望佢留意歌詞。」 明顯地，我開始失去理智，居然大庭廣眾講出這些那麼老套的話和唱一首那麼女性的歌...
徘徊在似苦又甜之間 望不穿這曖昧的眼
愛或情借來填一晚 終須都歸還 無謂多貪
猶疑在似即若離之間 望不穿這曖昧的眼
似是濃卻仍然很淡 天早灰藍 想告別 偏未晚
我唱畢這首曖昧之後，見到阿琳向門口方向走了。當刻的我，有飛奔追上的衝動，但被台下的人群包圍著，紛紛向我敬酒。重重圍困下，她無影無踪地消失了。
失望的我，變成唱著千杯酒已喝下去都不醉，埋頭再劈，瞬間進入醉酒的第二階段 - 語無倫次，或酒後吐真言。
我的同事察覺不妥，醒目地將我拉到一邊去，以免被那班sales繼續追擊。
「阿妹呢？你地有無見到佢啊？」
「佢話佢唔係好舒服，走左啦。」阿Dave答道。
「佢無事嗎？佢唔舒服，我要送佢翻屋企。」我想起來跑出門口，但腳步浮浮下，幸好有兩位男同事扶著我，才不致仆街於人前。
「你仲點送人番屋企啊，你就要比人送你番屋企啦。」
「我住銅鑼灣，行路都行到返去，佢住得好遠，自己返去好危險架。」我大叫著。
「得啦，一陣我幫你打比佢啦，你飲杯茶先啦。」難得阿Dave如此的細心。
「如果你係女仔，我估我都會鍾意你啊，阿Dave咁細心。不過你係我條靚，我係唔可以愛上自己既下屬架，會比人唱我偏私架。」酒後吐真言，正式開始。
「得啦，唔洗講啦，明架啦。」阿Dave不想我再亂說話，開始打斷我。
「但係佢又有男朋友，我又有女朋友。我怕飛左阿婷之後，又追唔到佢，咁就仆街啦，連朋友都無得做。所以我唔敢同佢講我鍾意佢啊，我係咪無Q用啊？」
「得啦，收聲啦。比人聽到你就仆街架啦。」
「我係一個仆街，鍾意阿妹既仆街，鍾意人又唔敢同人講既仆街....」話未說完，就進入醉酒的第三階段 - 嘔吐，及後斷片。
————————————————————————————————————————————————————
我醒過來的時候，已經在自己的床上，旁邊的是阿婷。
「你醒啦？做咩飲到咁醉啊？」阿婷體貼的問著。
「點解你會係度既？」我問道。
「你d同事話你飲醉左，打比我，叫我送你番屋企架。我去倒杯茶比你飲啦。」其實，她是一位賢妻良母的料子。
「我ok 架啦，你不如早d番屋企啦。」我看過電話，原來時間都只是十一點多。假酒真的害人不淺，想不到十二點都未到，就已經打敗仗。
「你眞係ok？」
「ok 啦，洗唔洗我同你去搭車？」我問道。
「唔洗啦，你休息下啦，我平時都係自己去搭車架啦，唔洗送啦。」是的，我平常從不會送阿婷回家，來回銅鑼灣和大埔太遠了...
因為那些假酒，我頭痛欲裂，整個週末無法離家。
因為那些假酒，我胡亂唱歌，整個週末阿琳沒有找我。