[無糖故]我既女神係樂隊既主音: 第一章

HI，我係阿頌，今年大學一年級，讀緊人人都話毒撚科嘅Engine。雖則話係毒撚科，但係其實我都唔算係一個毒撚，我外貌唔差，身高１米７５，同埋我都有拍過拖。

中五果年，喺某啲活動上，識左當時嘅女友，阿晴。佢同我同年同級唔同班，雖然佢唔係話好靚女，但性格好nice，同好多人關係都唔錯，加上佢性格成傻更更咁，令我識左佢冇幾耐就鐘意左佢，後尾仲喺埋一齊。果陣真係好開心，日日都同佢糖痴豆咁，個個人都話我地好襯。唔知點解，關係愈好既野好似愈唔擺得耐咁。

中六果年，佢突然間話要過去英國讀書，當時我冇阻止佢，一來我冇理由阻止佢未來既發展，二來我已經感覺到當時我地既感情開始轉淡。可能呢個只係我單方面既想法，無論如何，當時我做既只係喺機場同佢道別，即使佢到左英國，我地都有保持聯絡，但感覺上，係朋友既互相關心。我相信我地既關係算係無疾而終。即使某日佢同我講佢識到新男朋友，或者再唔聯絡我，我都唔會覺得奇怪，反正每件事都有佢既期限。

更重要既係，我心入面一直有根刺，拔不走，亦都不想拔走。

自從中三果一年，心入面根刺就好似固定住一樣。



－－－－－－－－－－－－－－－－－－－－－－－－－－－－－－－－－－－－－－－－－－－－－

中三果一年，我讀Ａ班，可以話係果級嘅精英班。我讀嘅中學係BAND1，自然會叫學生努力啲讀書。的而且確，我地班有好多人都好比心機讀書，為求揀到自己想讀既科，當時嘅我仲係混混噩噩，冇話咩用心讀書，好多野都係懶懶行，但偏偏有啲小聰明，學嘅野好快上手，所以一直都係班上中游既位置。

中三下學期開始，我比班主任調左去窗口位，而我心入面既刺，亦都係喺果時開始出現。

坐我隔離係個書蟲，日日攞住本書黎讀，果日教咩佢就讀咩，人人小息午息落去Canteen，得佢一個戇居居坐喺度咪書，同佢坐左成半年計都唔知有冇傾多過廿句。點都好，佢唔係重點，只係係咁意提下。我真正想提既，係坐正我前面果個女仔，中三我第一次同佢同班，果個女仔叫慧，我平時都係單字叫佢，雖然個個都叫佢英文名Michelle，但我偏偏唔鐘意叫人個英文名。加上叫「慧」果字同「喂」差唔多音，「喂，慧。」我咁樣嗌佢，感覺夠哂有趣。慧佢讀書唔算叻，但份人就好多野講，上堂好似乖乖女咁唔出聲，一有人聊佢即刻雞啄唔斷，有時真係嫌佢幾煩。佢雖然性格粗枝大葉，但眼大大臉大大咁，當時15歲既佢睇落好似12,13歲咁，睇落幾可愛。

當我第一日調去呢個位既時侯，第一時間就想走。原因無他，我啲friends全部同我坐得好遠，我坐喺班房既左面，佢地喺哂右面，搞到我上堂冇水吹。我份人不嬲好少聊人傾計，坐新位既第一日更加係靜左半日，悶到我嘔。



午息返到黎，一坐埋位就差啲嚇親，點解我張枱寫滿哂音符？自細對音樂冇興趣既我睇到一頭霧水，一開始諗係我班friends玩鳩我，但係佢地成個午息都同我一齊，點畫？

我望一望隔離隻書蟲，「喂，李新傑，知唔知邊個喺我張枱畫野？」李新傑係書蟲個名，費時直接叫佢書蟲。書蟲望左我一眼，再望一望前面，就繼續dup低個頭，睇佢本死人化學書。

我望前面，就見到慧同佢死黨阿敏一齊，兩個陰陰咀笑望住我。

我大概估到咩事，即刻行前問佢地兩個做咩。

「你地兩個畫我張枱？」我一邊問佢地，一邊指住我張枱。



「冇呀，冇呀。」阿敏笑笑口咁，一睇就知咩事。

「無端端做咩畫我張枱，陣間有排擦。」我望一望張枱，原來仲係黑色原子筆黎，真係比佢地玩死。

「哈哈哈哈哈哈～～」突然慧笑到停唔到口，我當堂呆左。

「你識唔識睇架，呢個鋼琴譜黎架。」慧拍一拍我膊頭。
「如果你估到呢首係咩歌，最多我請你飲野賠罪。」慧笑住同我講，臉頰泛起酒渦。

「你話架，我音樂不嬲好勁。」我懶係野咁，查實望住成枱豆豉諗到R哂頭。

「收皮啦，你細細個音樂就好水皮架啦！連牧童笛都唔識吹。」阿敏串我，佢自小學三年班就識佢，可以話係青梅竹馬。

「冇你咁好氣。」我坐返低，望住一枱嘅音符。就連之後果堂數學堂，我都喺度研究個琴譜，研究嘅其間，慧成日都會無端端擰轉頭望住我，然後笑住咁望返前面。



「諗左成堂數學堂，都唔知乜黎。」我心諗。「呀咪住...」

－－－－－－－－－－－－－－－－－－－－－－－－－－－－－－－－－－－－－－－－－－－－－

放左學之後，我叫左我個friend傑仔，佢雖然細細粒，但鋼琴有八級，真係天生我材必有用。

「喂傑仔，你知唔知呢堆咩黎？」

「琴譜囉。」

「呢個我都知，我係想知呢首咩歌呀。」

「呢段野咁熟口面既..呀我記得喇！係...ehh...」

「...」



「唔記得左咩名，但記得個旋律，呢段係chorus黎。」

「唉！傑哥幫下手啦。」

「做咩咁緊張？話時話你張枱無端端做咩有琴譜？」

「屌咪問啦。」

「兄弟都唔講得？」

「....」

「唔講就算。今晚返去幫你搵搵，搵到比條link你啦。」



「..唔該。」

－－－－－－－－－－－－－－－－－－－－－－－－－－－－－－－－－－－－－－－－－－－－－

Dododo！

我個MSN響起，我click入去，係傑仔。

http://www.youtube.com/watch?v=RBlcZMSdU3g&feature=youtu.be&t=1m55s

「係呢段啦。記得請飲野。」傑仔send左一條link黎。

「thanks！」

我上網查返呢首歌嘅琴譜，一睇，果然同佢今日畫嘅琴譜一樣。知道左答案嘅我，反而多左一個問題：點解佢地要喺我張枱畫琴譜？成件事古古怪怪。



「都係聽日先算。」我off左MSN之後就走去沖涼訓覺。

－－－－－－－－－－－－－－－－－－－－－－－－－－－－－－－－－－－－－－－－－－－－－

今日晨咁早就醒左，個天落住微微雨，但係我七點三就返到學校。因為太早，課室都唔比入住，唯有入canteen坐下。

一入到去，人好少，最多得兩三個人，多數都係高form。搵唔到熟人嘅我只好坐埋一邊。

突然，一樓既音樂室突然傳出鋼琴聲。坐近樓梯嘅我聽得好清楚，呢首歌係琴日傑仔send比我果首，亦姐係慧同阿敏喺我張枱畫嘅琴譜嘅歌。好奇既我即刻行上樓梯，睇下發生咩事。

一行入音樂室，鋼琴聲即刻停左。坐喺鋼琴前面既慧望住我。

「俾你嚇死。我以為係阿sir或者miss黎左。」慧擰翻轉個頭，繼續彈琴。

「估唔到你又彈得唔差喎。」我搵個位坐低。

「唔我睇我咁丫，我鋼琴都有八級架。」慧陽光般微笑著咁答我，相反窗外嘅雨反而落大左。

「話時話，點解你要喺我張枱畫譜？」我問佢，佢停低左彈奏。

「咁你知唔知我琴日畫嘅譜係咩歌？」

「你依家彈緊呢首囉。」

「犀利喎，一日就搵到答案。」

「係咪請我飲野？」

「冇咁易，你知唔知呢首歌嘅歌名係咩？」

「鬼知咩，歌名係日文黎。但好似有幾隻中文字，咩明日...」

「明日晴れるかな...中文名係『明日會是晴天嗎？』」慧望一望出面愈來愈大既雨。

「你又識日文？」我聽到佢講日文呆左下。

「識少少啦。」佢笑一笑。「喂..咁你又估下聽日係唔係好天？」慧望住我。

「聽日一定會好天既...」我用廣告名言回答佢。

「你點知架？」笑左一笑嘅佢都用返廣告名言回答我。

「因為我睇左天氣報告..」我即刻作出懶搞笑嘅回應。

「好好笑喎...」點知慧笑都冇笑。

「屌，柒左。」心入面屌左聲既我唯有戇居居咁打圓場。「搞下gag姐，諗左成晚架，比下面啦。」

「諗左成晚先諗啲咁既gag你都好失敗。」慧串到我體無完膚。

鐘聲響起。

「都七點半啦，返課室啦同學。」我柒到無地自容，快步行出音樂室。

「我執返好啲野先，你上去先。」

臨走既一刻，我眼尾睄到慧喺度偷笑，佢笑起上黎有酒渦，睇落好可愛。

「睇落好可愛」，係我對慧嘅第一印象。

－－－－－－－－－－－－－－－－－－－－－－－－－－－－－－－－－－－－－－－－－－－－－

一返上課室，已經見到書蟲坐左喺位讀書。今日係數學書。

我施施然坐返埋位，見到成枱樂譜，忽然醒起一樣野。

「點解慧要喺我張枱畫譜。」諗極都諗唔明既我決定等慧返黎先問佢。

喺慧返黎之前，阿敏返左黎先。

「黑色原子筆黎架擦唔甩架啦，換過張枱啦。」阿敏坐喺慧個位，望住我張枱。

「唔換啦，廢時煩。」我口就咁講，其實心入面係想keep住啲琴譜。

「喂係喎話時話，點解你地兩個要畫我張枱？」我問阿敏。

「冇～我地見你調左新位好似好悶咁，咪比畫啲野你睇下，解下悶。」阿敏笑住講。

「你知我音樂不嬲廢..」我細細聲咁講。

「係呀，所以我地本來諗住你一睇到就會即刻換過張枱，點知冇。」

「咁..你知唔知呢首咩歌？」

「知呀。但想我話比你知，冇咁易。」

「我知答案啦。我係想知點解你地會喺我張枱畫呢首歌嘅譜。」

「你知唔知呢首歌講咩？」

「唔知喎..」

「算啦冇野。」

「....」
「係呢..你同果個女仔，幾時識架？」我好奇咁問佢。

「Michelle？好似係中一同班到依家。」阿敏中一，二都同我唔同班。

「哦...」

「做咩呀？鐘意人呀？」阿敏笑住咁問我，但睇落好似有啲嬲，可能係我敏感左。

「痴線！」我即刻否認。

同時間，慧佢返左黎。

「傾緊啲咩？」慧走過黎，坐喺阿敏隔離。

「講緊你畫啲野囉。」我回應，望住慧。

「唔係我..」慧講講下野，班主任林sir入左課室，阿敏同慧即刻返自己位。

「你岩岩講咩？」我問前面嘅慧。

「算啦費事講。」慧好似面有難色。

「搞乜..？」我心入面又多左個問號。

－－－－－－－－－－－－－－－－－－－－－－－－－－－－－－－－－－－－－－－－－－－－－

第一，二堂係悶到嘔嘅Bio堂，聽住個五十幾歲嘅阿叔講書真係悶到想死。一望到隔離隻書蟲係咁抄notes，上堂更加難頂。百無聊賴嘅我即刻搵慧搭嗲。

「喂，你今朝講『唔係我』，姐係點？啲譜唔係你畫？」我拍一拍慧既膊頭。

「吓，算係啦。」慧模稜兩可咁答我。

「算係？姐係點？」我比佢啲答案搞到一頭霧水。

「姐係阿敏畫架囉..雖然我提議既。」

「無端端畫我張枱？仲要係你提議？話時話我地好似係第一年同班咋喎，你又會整蠱我？」

「午息果陣，你出左去食野，我同阿敏咪傾下計囉。傾傾下無端端傾到你，佢話見你換左新位好似好悶咁，所以我就提議話不如搵啲野玩下你，就係咁。」

「你話呢啲屎橋阿敏諗就話姐，估唔到你又會諗啲咁爛嘅橋，仲要用原子筆畫，擦唔到。」

「妖，中一中二果陣我成日都聽阿敏提起你，但果陣又唔識你。直至升到中三同你同班，咪玩下你囉，點知你咁小器咁唔玩得。」

「邊度有小器？我有話你唔畫得我張枱咩？」

「咁姐係之後都畫得？」

「..唔係。」

「哈～」慧笑左一聲就擰返轉面。

「份人幾古惑」，係我對慧嘅第二印象。

－－－－－－－－－－－－－－－－－－－－－－－－－－－－－－－－－－－－－－－－－－－－－

午息食完飯返黎，望到同琴日一樣嘅樂譜，等我仲以為佢地又會畫野。

我望一望坐埋一齊既慧同阿敏，同琴日一樣陰陰咀望住我笑。

「今次又搞乜？」覺得奇奇怪怪嘅我，醒返起陣間果兩堂英文有功課，即刻攞本英文書出黎做。

「仆你個街！」一拎本英文書出黎，我即刻鬧左聲，慧同阿敏隨即爆笑。

成本英文書封面都係漫畫公仔。仲要用Marker畫。書蟲望一望我本書，又dup低頭睇返佢本英文書，但咀角陰陰咀咁笑，我見到都想打柒佢。

「又玩乜呀？」我拎住本書行去慧同阿敏果度。

「又係你話唔畫枱。咁咪畫你本英文書囉。」慧笑到眼水都出埋咁濟。

「玩野咩..個死人陳卓峰又鬧我一獲架啦！..」陳卓峰係我地英文阿sir，煩到仆街。
「呢啲公仔又咩意思呀？」我問佢地兩個，佢地又keep住笑，唔同我講。

笑多十幾秒，佢地終於出聲。

「聽日有VA堂呀，題目好似係漫畫。咪拎你本書練習下囉。」慧指住上面啲公仔。「拿我地仲有幫佢地改名架，呢個公主叫阿敏，個勇士叫阿慧，隻怪獸叫阿頌。」慧笑住咁同我講，隔離阿敏又係笑到停唔到。

「唉屌。」我冇佢地咁好氣，坐返埋位諗定解釋。

－－－－－－－－－－－－－－－－－－－－－－－－－－－－－－－－－－－－－－－－－－－－－

放學，個個都返哂屋企，得我一個留喺課室。

原因唔使問，陳卓峰要我留堂反省，仲比左成堆練習我做。

一路做嘅我一路喺度諗點解我要認哂係我做，唔拉埋佢地兩個落水，依家得我一個留低，有啲後悔。

「做得好辛苦咁喎。」突然有人拍我膊頭，望一望，係慧同阿敏。

「..做乜唔走？」我擰返轉頭，繼續做我嘅passive voice練習。

「仲以為你會踢爆係我地兩個做添，估唔到你居然認哂咁傻仔。」慧。

「你想我報串？呢啲小學雞野我先唔做。少少練習鬼會難到我，係哂時間啲姐。」

「成日懶係野咁。我仲記得小學五年班果陣，我整蠱鼻屎仔，扔左佢個筆袋去垃圾桶。明明你得個睇字，鼻屎仔同老師報串你竟然攬哂上身，後尾仲好似通知家長同記左小過。」阿敏講返啲小學往事，老老實實我自己都唔記得呢件事。

「好少事姐..老豆打左我幾鎚就冇左件事。」我扮哂冇野咁，其實果陣比老豆打完喊到仆街。

「你呀，好心咪咁好人啦，我地玩你都唔還手，仲嬲都冇嬲。」慧同我講，一時之間我都唔知答咩好。

「男人老狗比女人蝦好樣衰架嘛，阿頌細細個已經好要面子。」阿敏笑笑口咁講。

「咪阻住哂啦，返屋企啦。有排都未做完呀。」

「使唔使幫手呀，我地兩個英文唔差架喎。」慧。

「唔使呀，走啦。」

「車。..」
「話時話，你睇唔睇劇架。」慧問我。

「咩劇？TVB？」我份人不嬲唔鐘意睇劇，只係食飯時係咁意睇睇，就連依家夜晚播緊咩劇都唔知。

「唔係呀。講緊日劇呀。」慧。

「日劇咁鬼無聊，女人先鐘意睇。」老老實實我又真係冇睇過日劇，因為真係冇興趣。

「唔識貨。」慧講左句就拎走我一份練習。
「你幾點on MSN？我做完今晚比答案你，你聽日抄返。」

「你有我MSN？」

「我問阿晴咪得囉。係咁啦，掰掰。」講完呢句慧就同阿敏走左。

「唔想欠人人情」，呢個係我對慧嘅第三印象。