[無糖故]我既女神係樂隊既主音: 第七章
星期日嘅朝早，我用哂啲時間黎彈結他。
愈練得耐，愈感覺到自己愈來愈熟練呢枝結他。
「你成朝匿埋喺間房，你搞啲乜？」突然，我老豆打開左我間房度門，見到我彈緊結他。
「結他？你無端端彈咩結他。」
「我第時想夾band，依家咪買黎練下囉。」
「你識彈咩？彈一次黎睇下。」
「就係唔識先要練丫嘛，呢枝結他都係琴日先買。」
老豆望一望我鋪滿床上面嘅結他譜，笑左一笑。
「使唔使人教？」我老豆坐落我張床度，拎起我份譜黎睇。
「最好梗係有啦，我依家都搵緊人教呀。」我照著網上面嘅譜喺度掃。
「你咁樣練鬼到咩，結他呢啲野冇人教上唔到手。」我老豆拎走我枝結他，「你想學，我教你。」
「吓？老豆你識彈結他架咩？」我以為老豆吹水。
「如果唔係當年點媾你阿媽？」我老豆開始彈起結他，彈得有板有眼，彈嘅仲要係我印出黎嘅譜。
彈左一陣，老豆就比返枝結他我。
「想唔想我教你？」
「梗係想啦。」
「想就同我出去食早餐，你阿媽佢唔肯煮，仲瞓緊呀。」
「.....」
「出唔出？」
「梗係去啦。練左成朝我都好肚餓。」
－－－－－－－－－－－－－－－－－－－－－－－－－－－－－－－－－－－－－－－－－－－－－
「話時話，老豆你當年做咩學結他？」我同老豆行落去屋企附近間茶記。
「當年溫拿鬼咁紅，我班同學仔即刻爭相話要夾band，咪拉埋我玩囉，果陣我地抽籤一人學一樣樂器，咁好死你老豆我抽到最易媾女嘅結他手，咪學結他學左十幾年。我仲記得抽到bass嘅傻仔明個樣鬼咁灰，哈！」我老豆撩一撩眼屎，「當時夾band好哂錢架，我地日日死慳死抵埋啲飯錢，兩個星期先book到間房黎練果兩三個鐘。依家諗落，呢啲野後生先做到。」「果時我冇人教，自己死學爛學，學左我幾鬼耐先學到一首歌。」行行下，我地到左茶記，「但係，冇結他，又識唔到你阿媽。」
「話時話，我到依家都唔知你地係點識。」我搵個位坐低。
「當年你阿媽都幾靚女架，係唔知點解性格有啲男仔頭，鐘意聽band。我地果年聖誕有歌唱比賽，根住我地圍內班同學仔咪諗住參賽玩下，點知好死唔死嬴埋冠軍。」老豆望住餐牌，「唔計主音，多數結他手都係樂隊入面最型果個架啦！所以你老豆我當年都幾多女追架，但係偏偏我又只係鐘意你阿媽。冇幾耐我地就喺埋一齊，直到依家。諗諗下，都成三十幾年喇。」
「估唔到老豆你咁受歡迎喎。伙計早餐A，飲熱奶茶丫唔該。」
「使乜講！伙計要個B餐沙嗲牛通加個蛋治，飲熱奶茶丫唔該！」
「你返到去記住教我彈結他呀。」
「做咩？學黎媾女？」
「都話夾band。」
「夾band都可以媾女嘅姐。」
「....」
「唉得啦得啦，返去教你一首媾女最殺食嘅歌比你，想當年我都係邊彈邊唱同你阿媽求婚架。」
「唔該哂你喎，老豆。」
「一世人兩父子，阿仔你要媾女老豆我實會幫架喎，雖然自從你出左世之後我都好少彈結他，但教你都應該OK嘅。」
「啲野食黎喇食啦！」我冇我老豆咁好氣。
－－－－－－－－－－－－－－－－－－－－－－－－－－－－－－－－－－－－－－－－－－－－－
星期一早上七點。
「喂慧，你醒左未。」我拎起電話打比慧。
「嗯嗯？岩岩醒咋，做咩呀。」慧岩岩瞓醒起身，把聲幾可愛。
「你依家返黎學校啦，去音樂室，我比啲野你睇。」
「吓？哦..好呀。」
「好啦掰掰。」
「掰掰。」
－－－－－－－－－－－－－－－－－－－－－－－－－－－－－－－－－－－－－－－－－－－－－
早上七點半。
坐左喺音樂室已經半個鐘嘅我，終於見到音樂室度門開左，係慧。
「阿頌。你搞咩呀？晨咁早叫我起身，想瞓晏啲都唔得。」
「你過黎坐低先啦。」
「？」
「話樣野比你知，星期六果日我搵到個鼓手喇。」
「吓？你喺邊度搵架。」
「小巴，果時聽佢講電話，知道佢係打鼓嘅，之後我問一問佢，佢咪話我地搵埋BASSIST就會加入。」
「係就好喇，咁嘅話我地差貝斯手咋。」慧笑左一笑，「你唔係晨早叫我起身就係講呢樣野呀？」
「梗係唔係，」我拎起音樂室枝結他，「比啲野你睇。」
我拎起pick，開始彈我老豆教我果首歌，自彈自唱。
http://www.youtube.com/watch?v=pur28DxPhj8
.
.
.
「無求甚麼 無尋甚麼 突破天地 但求夜深
奔波以後 能望見你 你可否知道麼
平凡亦可 平淡亦可 自有天地 但求日出
清早到後 能望見你 那已經很好過
當身邊的一切如風 是你讓我找到根蒂
不願離開 只願留低 情是永不枯萎
而每過一天 每一天 這醉者
便愛你多些 再多些 至滿瀉
我發覺我最愛與你編寫 以後明天的深夜
而每過一天 每一天 這醉者
便愛你多些 再多些 至滿瀉
我最愛你與我這生一起 哪懼明天風高路斜...」
.
.
.
「點呀？彈成點？我練左成日架！」我望住慧，慧好似有啲眼濕濕。
「估唔到你一日就自彈自唱到，雖然唱得唔係幾好聽，有啲走音；結他又彈得唔係好好，有時彈錯音。但係.....真係有啲感動。」慧索一索鼻水。
「好聽到喊呢？哈哈。放心啦，我好快就會彈好啲結他，幫你達成夢想。」我笑左一笑。「好啦返課室喇。你仲想聽嘅，我日日彈比你聽都得呀。」
「...」慧dup低左個頭，冇出聲。
我望一望慧，原來佢喊緊。
「正衰人。鬼死咁感動，晨早流流係都要整喊人。」慧輕輕一笑。
慧就連喊果陣都好可愛。
「唔好喊喇。我地仲要搵bassist架。」我遞左張紙巾比佢。
慧抹乾眼淚之後，先返去課室。