我轉過頭去,只看見低著頭,面無表情的Hazel。

此刻的她雖則美貌不改,如冰山般的氣質卻與她毫不相襯,甚至讓我渾身一冷。

「其實…你今日做既野,我的確有幾分心動。」她抬起頭來,看著我。

「好溫柔咁拍我個頭、好紳士咁幫我拉櫈、好浪漫咁book間海景餐廳…一切一切都好完美。我甚至…覺得自己有啲鍾意咗咁既你。」她眼裡泛著光亮,微笑著繼續道。

「但…見到聽到一個鋼琴錯音就咁大反應既你…我開始諗。」



「諗起我第一次見到你,你就係以一個鋼琴狂熱愛好者既身份係我身邊,同我過每一日。」

「我想要既到底係平時果個同我一樣有住個令自己著迷既興趣既知己,定係今日咁浪漫又溫柔既你?」

「我知道只要選其一,另一個就會從此消失。所以,頭先整段路,我都一直諗緊。」

「我好貪心,我兩個都想要。」她說到此處,鼻音已漸漸顯露出來,雙眸裡閃閃發亮著。

「我想知道,你可唔可以兩個你都做曬?」她與我四目相對著,淚光劃過那滑如絲的臉頰。



「我知我呢種心態好卑鄙…所以…唔好同我一齊啦…好冇…我唔想…害咗你。」她雙手捉住我的衣領,把頭埋進了我的胸前,哭了起來。

「我唔介意wor。」我說著,右手輕放在她後腦上。

「我介意呀…唔好吖好冇…」她嚎啕大哭著,聲線少不了顫抖。

……

摩天輪已轉完一圈,我們身處的座艙也落到了地面。



她還在哭著,我輕力拍了拍她,牽著她走出摩天輪。

她擦了擦眼淚,卻止不住源頭。

我雙手捉住她的雙肩,柔聲道:「比多一轉摩天輪既時間我,好冇?」

她看著我,雙眼已然哭紅了。

.

「你覺得,我係一個咩人?」我問。

「好鍾意鋼琴既傻仔。」她道。

「咁你覺得頭先果個我係咩人?」我再問。



「…頭先果個你…咪你囉。」她想了片刻,回答道。

「咁鍾意鋼琴個傻仔係咪我?」

「…係。」

「咁點解唔可以兩個都揀?係你需要知音既時候,我就係你既知己;相反,係你需要愛情同安慰既時候,我就係溫柔既我。何來其中一個消失一說呢?兩樣野合一,就係我。」我站了起身,看著她道。

「…點解你要咁認真說服我?」她看著我,眼淚漸漸止住了。

「Um…我頭先咪話我係鋼琴愛好者同溫柔浪漫二合一既?」我道。

「嗯。」



「我改一改,應該係三合一先啱。」我笑道。

「仲有第三個我,係一個好好好好鍾意妳,鍾意到不能自拔,鍾意到只要係妳身邊就開心到不得了既傻仔。」

她看著我,愣了愣,眼神中的渾濁已然褪去,取而代之的是渾濁之後那澄澈的眼眸。

她呆呆地看著我,沒有回答。

我雙手輕輕放在她臉龐兩側,輕輕地把她的頭托起,使它朝向我。同時,我彎下了腰。

她仍然沒有回答,但那與我緊緊貼合的雙唇早已勝過千言萬語,解釋了一切。

霓虹之中的命運之輪,繼續悄然轉動著。

.



「天~荒地老~流連在~摩天輪~」我那止不住的快樂使我的行為舉止隨心所欲而行,再也無暇顧及一切問題。

「喂,傻仔,大把人望緊呀。」在我身旁,緊牽著我手的Hazel笑道。

「望又點啊?我開心,今日就比佢地望啦~」我轉過頭去,放開了牽著她的手。

「做咩啊?唔抵得你專屬既男朋友比人睇蝕曬呀~?」我雙手托住她的臉,像對待貓狗一般,搖起我的頭,讓我的鼻子左右移動著,不斷蹭著她的鼻尖。

「唔知醜。」她甜笑著推開我。

「嘻嘻~」我繼續傻笑。

「係呢,你今朝其實到底有咩做架?」我突然想起,便問她道。



「冇啊,陪屋企人咋嘛。」她理所當然地回答。

「哦…咁點解唔關我事wor…」我難掩低落。

「以後有咩事,我都會同你講,得未?」她手指輕點我鼻尖,笑道。

「乖喇~」我拍拍她的頭。

角色轉得有些太快了,一瞬間由她安慰我變成我稱讚她了。

但,有什麼所謂呢?

此刻的我,大概是世上最幸運的人了。

.

「下~到咗嗱…」走到她家樓下,我竟不想讓她回家。

「早啲休息啦!你聽日仲有表演架嘛!」她拍了拍我左邊臉,道。

「嗯…好啦,你返去啦。」我才想起明天有個和她一起鋪排已久的演出。

「Byebye~」她揮著手,正要開步。

「等陣~係咪少咗啲野啊?」我說完,舉起了下巴,閉上了眼睛。

「切。」她笑了笑,親在了我的嘴唇上。

好好好好好甜啊!

生於這世上實在是太好了。

結果當晚,我太過興奮,凌晨三點才入睡。

.

翌日

打了個大呵欠後,我洗了個臉。

稍稍修整了外觀,我拿出手機。

「訓醒未呀~?」我whatsapp Hazel。

「醒咗好耐啦,幫你執緊野呀。」她回覆道。

「我黎你屋企接你啦。」

說完,我便出門了。

.

「嗱,我本來就唔洗返學既,特登早起身黎幫你準備,諗住睇你good show架。」她走下樓,和我會合後道。

「點帶你入去好呢…」我喃喃自語,盤算著。學校今天也需要穿校服這一點真是麻煩。

「下?我冇諗過入去架wor。」她似乎嚇到了。

「呢個show,都係因為你先做得成,你係最大搞手,梗係要比現場你睇啦!」我道。

「一係…扮校友?」被我這麼一說,她似乎也來了興致,開始想著辦法。

「你咁後生,點扮呀?」我點了點她的鼻尖。

此時,我心中橫生一計。

我whatsapp了劉海欣。

「你今日drama club係咪會換衫演出?」我問。

「係呀,做咩?」

「你有冇洗好既校服?」

「有既…你要黎做咩?你唔係…好呢味野掛…?」

「妖,唔係啊。遲啲解釋,借黎!學校門口等!」

.

我站在鄰近學校的體育館附近的天橋上等著。

「喂。」Hazel走過來,伸手碰了碰我。

我看過去,只見她已經穿上香城中學的校服。

「咁樣得唔得架…」她焦慮地調整了一下身上的校服。

「你轉個身黎睇下。」我伸出右手手指,轉了個圈,道。

她照著我的話轉了個360度,只見校服相當合身,不太鬆也不太窄。還好劉海欣和Hazel身形差不多。

「得啊。」我道。

「嘖…我都唔係你學校啲學生,咁樣著你地啲校服唔係咁好囉…」她焦慮不減,續道。

「我都著緊校服啦,咁你梗係要襯我啦係咪呀?」說著,我伸出了手讓她牽著。

她臉上的焦慮褪去,取而代之的是甜笑。

她牽起了我的手,我舉起便是作勢要咬。她也笑著使勁把手拉回了一下。

我牽著她,走向學校。


~~~~~~

IG:kong_yue_
已有 0 人追稿