「鈴鈴鈴鈴~~」

[2019年8月31日 11:31 旺角家中]

「好在尋晚較咗鬧鐘啫,唔係嘅話應該又瞓到唔知幾點醒。」

咁重要嘅日子,我點可以遲到。

五年前嘅今日,2014年8月31日,人大常委會通過咗「831框架」,代表香港嘅「小圈子選舉」依然會繼續落去,「普選」正式落閘。





無論市民提出咗幾多次嘅反對,無論市民交咗幾多次form表達意見。

但,政府依然當見唔到佢唔想見到嘅畫面,當自己聽唔到佢唔想聽到嘅聲音。

大家漸漸明白到,原來得個講字,政府係唔會理你㗎。

同年9月28日。佔領中環,正式啟動。









但結束……好似都嚟得幾快。

12月11日,警方清場。

近80日嘅抗爭,政府依然無動於衷,咁多日以嚟所爭取嘅嘢都係無一樣回應過。更加令香港人明白到:

連和平示威集會都無回應訴求,唯有用較激進的行動嚟迫使政府回應。





We will be back







2019年6月,政府強推「逃犯條例」,再一次觸動香港人嘅底線。香港人係時候返嚟。

We are back










我……已經準備好。




[11:45 女主房間]

「黑衫、黑褲、口罩、水樽齊哂,走得。」唔知幾時開始,我間房越嚟越多黑色嘅嘢:本身成間房只係得平時用開嘅無良印品……Sor係無印良品嘅黑色原子筆,依家幾乎係望去邊都總有一件全黑嘅嘢。究竟我係幾時開始鐘意黑色嘅呢?

唔好惗埋d無謂嘢,同蕙約好咗12點半喺尖沙咀食埋嘢再坐船過海。

「卡拉卡拉。」房門開唔到嘅?個鎖呢個時候先嚟壞咗?唔係啊嘛?





我試吓用力撞開度門,但依然「屹立不倒」,早知就買cheap d嘅門啦。

「老豆,你喺唔喺度啊,我個門鎖壞咗,出唔到嚟啊。」我嘗試搵老豆求救。

過咗1分鐘……2分鐘,依然無人理我,睇怕老豆9成係出咗街,試吓打俾佢先。

「你所打嘅電話暫時未能接通,請遲d再打過嚟吖……」點解總係喺d緊急關頭先嚟唔聽電話㗎。

搞咗咁耐,時間已經嚟到12:45,到底要點樣離開間房?
已有 0 人追稿