[喪屍][愛情][奇幻] 滅屍救港: 三十二 黃大仙(6) 消息
(有粗口,請留意)
-小芳視角-
我們正想進睡時,收到一個意想不到的消息。
「叮」眾人的手機都響起來。是香港政府發出的消息!
「香港政府將會在今天(5月13號)解散。香港進入無政府狀態。空投將會取消。」
「唔係一路都冇政府咩?」老馬問。
「有個官員話政府未死,想搞佢嘅,over my dead body喎。」一個女火魔法師說。
我們都在笑了。
「好似有唔妥。
其實因為我預知裏面話最後會係喺金鐘政府總部打一場仗,如果冇咗政府,好似...唔合理?」一心突然提出。
「你啲預言啱唔啱㗎?」允恆問。
「我唔知。」一心說。
「你哋係咪講緊預知者?」一個老伯問。
「我係。」一心答。
一心被老伯拉到一邊,像是商量一些要事。
與此同時,我的視線落在了「空投」二字。
「空投?」我問。
「你哋頭先攞嗰啲水就係空投嘅。」另一個老伯解釋。
「其實你哋係咪知道啲嘢?」老馬問。
「我哋幾個都幾廿歲咯,咁啱先一齊行。你哋唔係想搵我著數呀嘛?」老伯說。
「唔係。」老馬說。
「依家政府解散,形勢好嚴峻。我哋打喪屍嗰陣好似仲有啲顧慮...」一個女槍手說。
她說到這句話時,我不其然地望向小華。難道我顧慮的,是他嗎?
「不嬲都冇政府,喪屍都係靠我哋普通人打,就算政府係因為突然多咗喪屍而陷落,都係咁打㗎啦,算係嚴峻咗咩?」白宏問。
「你有資格講嘢咩? 你已經唔係我隊長。
你失策你事,如果唔係你組員制止你,我哋成個黨都會因你而死!」女槍手激動地反駁。
白宏推了她一下。「終於都講出口啦咩? 公園係我哋不嬲都有嘅勢力範圍,你知唔知我哋嗰日跑入現崇山嗰陣,我係第一個入去,之後班居民鬧我啊! 佢哋連馬哥都冇鬧,當我始作俑者,我爭啲俾佢哋打! 我其他隊員都俾佢哋鬧,話要掉我哋出去俾喪屍食。最後馬哥叫我哋出去搵著數,先唔使受佢哋氣!咁我都係唔想著數黨俾班人嫌三嫌四,先心急搵新據點!」
「搵據點就要搵一度咁多喪屍㗎咩? on9仔!」電魔法師隊的隊長喝道。
「你想溝女先幫佢喳嘛! 屌你講粗口大晒啊? 我唔撚識講啊?」白宏罵道。
XYZ!&$......
老馬翹著手在「食花生」,明顯沒有叫停罵戰的意思。
我實在看不下去,想去勸停他們,但小華叫住我。
「等陣佢哋用技能打你點算啊?」小華按住我的手。
「唔通俾佢哋繼續鬧交咩?」我嘗試掙脫。
我們正想著如何制止他們內部分化時,拿著一盒麻雀的老伯說:「個小妹妹叫你哋去搵佢。」
他所指的小妹妹必定是一心吧。
坐立不安的我們立即去街市的暗角找一心。
「時間無多,我哋要離開呢度。我冇咁多時間解釋。」一心說。
「不如叫埋白宏走。」幼羚提出。
「你哋識唔識路㗎? 你哋幾個𡃁仔三更半夜盪失路點算啊? 都係我哋陪你哋啦。」老伯說。
「又唔好意思嘅...」一心說。
「唔使咁喎小妹妹,我哋幾個老嘢,都半隻腳入棺材咯,就算幫你哋擋喪屍都唔緊要。」老伯說。
「咁麻煩你哋啦喎,連伯。」一心客氣地說。
我們走回大門,只見老馬和白宏坐在那裏,望向月光,不發一言。
「我哋走啦。多謝老馬你關照。」允恆說。
「唔使。保重。」老馬說。
白宏聽到這句,也站了起來,說:「我都走啦,唔翻嚟啦。馬哥保重。」
老馬拍拍他的肩。「白宏,保重。你搵翻你舊teammate?」
「係啊。」白宏說。
我們離開街市,等待著我們的,並不是甚麼好東西。
「我聞到陣喪屍味。」拿著麻雀牌的老伯說。