簡介

唔知大家有冇幻想過有平行時空,多重宇宙呢? 呢一個宇宙可能只係眾多宇宙既其中一個 宇宙同宇宙之間都係分隔相離 但係若果可以俾你穿越眾多宇宙既話 你會點呢? 係另一個宇宙遇上「自己」 想必係一個驚奇亦有趣既故事





常言道,中學係人生中識到最知心好友既六年

但係亦有都市傳說話,大學係人生中最後最自由,最多野玩,唔洗讀書既地方

相信每一個中學生都曾經幻想過,究竟入到大學係咩一回事呢?

大學入邊既生活究竟會係點?有冇人所講咁多姿多彩呢?

大學既五件事,又係唔係真係可以做得齊呢?





但係不幸既,好多人無同你講,你要揀岩科同埋你個人要唔係毒撚先得架

而我呢位數學系毒撚,就似乎同大學生活無緣喇

「好,今日落堂,記得後日會有份功課deadline」教授如是說

「喂你地功課做成點啊」我聽到後邊一群人開始傾起呢份功課,好奇心驅使我向後望

「疑家榮,你識唔識做呢份功課啊」一位同學問





啊,未自我介紹,我叫家榮(唔係用枝槍對住人心口射果個交通警關家榮),張家榮,暴大Y1讀數學既

讀得數學既人,大家都清楚,多數都係講野口疾疾,不修邊幅既毒撚,我都唔例外

大學五件事當中,上莊?真係無咩興趣。做PT?讀得數學既邊有時間做PT

以我讀緊呢科ANALYSIS為例,每隔星期一份功課,但係果一份功課係可以做到你R爆頭都落唔到筆

仲未計其他科啊,通識啊,邊有時間做PT啊





常言道大學最緊要玩OCAMP,但係真係唔好意思喇,我覺得OCAMP真係一點作用都無,只係一班人群埋一齊做堆低能野

然後識左唔夠幾日就話一世好朋友既肉麻說話,我唔係好受呢套

可幸既係,識人唔一定要玩OCAMP,我黎到上堂都識到一班毒撚老死

岩岩問我野既係典型肥宅阿權,佢係一個好鐘意二次元動漫野既人,佢間房基本上就係放哂果堆女角色模型

阿權隔離既就係阿賢,雖然佢都係主修數學,但係佢既正職根本唔係數學,而係政治啊!

佢由中學已經對政治好有熱誠,當年反國教反普教中佢亦係校內參與得最多既搞手

亦因為咁成日被校上當成眼中釘

黎到大學就唔同哂,佢可以盡情發揮佢既小宇宙,參選書院既學生會





「點會可能做哂,份野咁鬼長,又咁鬼難」

「疑,你地係到傾緊乜野」一把聲音傳來道

「唉,咪提啦,你肯定識做啦DAVID」阿賢話

「哦哦,最新果份功課?我未睇啊,我今晚要陪女朋友食飯,可能要聽晚先做到」

行過黎既叫DAVID。先前我話讀得數學既多數都係毒撚,佢應該就係少數既例外。米八,運動健將,高大靚仔,有家底,最可惡既係佢除左掃盡中學學界既籃球比賽冠軍外,佢仲係本港奧數冠軍

聽聞佢IQ有至少160,真係唔怪得佢可以咁輕鬆話聽晚先做,無他,佢份份功課都係臨交先做,但係次次都滿分,上年GPA更加係4。0

有時我都會諗,點解世上咁唔公平,會有呢D全能屈機既人光芒四射,而自己?只係平凡得不再平凡既毒撚





話口未完,佢就行出左班房,拖住囡囡隻手行走了,眾人只能妒忌同無奈

順帶一提,毒撚還毒撚,但毒撚唔代表運動唔得架!我記得中學果陣,睇完「葉問」同「殺破狼」覺得好吸引

膽粗粗走左上一間泰拳館到學泰拳,一學就六年,中學更加拎過中學生泰拳比賽冠軍

只可惜啊,鐘意既運動偏門,加上其貌不揚,又點會吸引到人注目

「唉,如果我有DAVID一半咁勁就好」阿權話

「基因意外啊,常言道,投胎揀岩緊要過中六合彩,你都係期望你下世搵到個好老豆老母啦」阿賢道

一望個鐘,原來都不知不覺傾多左十五分鐘,就黎天黑,再夜D就無校巴返宿架喇

「唔講住,有咩WTSAPP再講,我返宿先」





「你就好啦,有宿,日日可以同囡囡夜夜笙歌」阿賢笑道

「邊有咁多囡啊,唔好唔記得我地讀緊咩科啊CHING」

就係咁,我就暫別老友。順帶一提,由於佢地都係住係沙田附近,基本上有宿既可能性近乎零。而我呢D住遠地方既,有宿就自然正常不過

坐上無冷氣既熱狗巴,慢慢咁返到書院,再途步行上宿舍

我果間宿舍係男女宿,姐係有男有女,分男女層。可能因為開學無耐,七點左右宿生返到黎已經開始層層開P咁濟

見到宿生打成一團既我自然有點兒失落,你可能會問,你唔去融入佢地,你點會有新既圈子呢?

唉,要融入到先得架,身為一個毒撚,無咩自信,唔識同人溝通,去到只會係勉強自己,都係不了





我就係一眾歡樂聲之中入左自己房喇

有人曾經講過,毒撚其實唔係真係咁毒撚姐,只係身邊既人太過耀眼,顯得毒撚好似未夠班咁

恰好我既同房RYAN正係如此,我既存在好似就係襯托住佢既成就咁

RYAN其實都係類近DAVID果批人,不過係傳統名校,DSE  35分讀MEDIC

「疑你咁早返既」平時RYAN同宿生會班人玩,唔似會咁早返到

「哦我地宿生會今晚出去食新X源啊,係到HEA陣再出去」

RYAN JEL恆個頭,著住件CHOCOLATE,同我身穿既頹T成強烈對比

講開又講,其實我中學成績唔係算差,選修科同數學都平衡有5—5*,只係因為中英文太差,所以揀唔到MEDIC姐

係我放底書包無耐,RYAN就著好鞋行左出去

落CANTEEN食完飯後,上返間房就開始做功課喇

「唔,呢題要prove佢係monotone...」

其實讀大學有樣唔好就係每個課程每個教授教既野,都係唔統一無一樣標準

好多時候佢亦會假設你已經識左某類野知識,教既野亦都可以完全同功課無關

就好似我做緊呢份咁,內容根本上堂係無咩講過架,咁呢個時候你最可靠既同伴係邊個?緊係GOOGLE啦

如是者,係GOOGLE上留連左接近兩個鐘,我都開始累喇,放低枝筆,伸個賴腰

望住窗邊,吐露港夜晚唔算多車,呢邊光害亦唔嚴重,隱約見到幾粒閃星

其實咁樣都幾舍意啊

大學五件事好似變左任何人入大學必需要經歷既階段咁

但其實一樣米養百樣人,一百個學生有一百種唔同既大學生活

何必拘泥於世俗既眼光?我開左個youtube聽住哥哥唱既「有誰共嗚」

「風也清 晚空中我問句星 夜闌靜 問有誰共鳴...」

不知不覺經我就跟住個旋律唱起上黎

「嗚...嗚...嗚。。。」

宿舍有樣唔好,就係冷氣機好似係好舊的,所以周不時會發出D怪聲,開頭住既時候覺得好恐怖,但慢慢就習慣了

亦都阻唔到我係獨自一人房中大聲唱歌既機會

「一望你~眼裡溫馨已通電~」

「嗚...嗚...嗚」

奇怪喇,通常冷氣久唔久先會出怪聲,點解咁快又出怪聲既?

唔係爆炸下化。。。我唔想咁快死,拿拿聲熄鬼左個冷氣先

「嗚...嗚...嗚」

明明我已經熄左冷氣機,何解仲有D怪聲出現架?正當我想望下係唔係因為未關好窗所以有風吹入既時候

我望向窗入邊既反射影像,入邊當然係我間房既鏡像,但當我望向自己既樣既時候,有樣好奇怪既事發生左

原本應該係我既鏡像既位置,唔知點解邊左一個長頭髮既。。。人。。。

「嗚...嗚...嗚」聽到呢把聲既同時我隱約見到個「人」好似係到。。。喊緊?

「咩。。。事啊。。。」

果個「人」忽然慢慢咁轉面望向我,但係我邊有咁多時間留意呢D野啊!!!!!

「哇!!!!救命啊!!!係鬼啊!!!!!」

我上衫都未著,拿拿聲起身跑左出房門
已有 0 人追稿