《夾出一個她》: 第二十四集-阻人的情侶
希逸：「唔緊要，我哋改為今晚劈酒，不醉冇歸。」
-
我：「作死你吖！想隊醉我阿妹。」
-
希逸：「點敢呢！我都唔飲酒嘅。」
-
我：「你個大話真係講得好假，嗰次我哋兩個去camp，你醉到除晒衫，就嚟除埋褲㖭。」
-
希逸：「嘩！呢單嘢真係癲，我嗰日真係醉到啤啤夫，你都唔係好得去邊咋喎。」
-
我：「我邊有醉呢！」
-
希逸：「唔知邊個醉到喺camp site扮猩猩 叫，仲要攬住我瞓。不過好彩我屎忽無事。」
-
我：「哎屌！啲柒事就咪再提。」
-
楚翹：「不如我哋之後都搞個camp？」
-
希逸：「冇問題吖！我同浚彥有齊營、爐、cookset之類，隨時出發都冇問題。」
-
我：「我哋係露營高手嚟，5分鐘就起好一個營。」
-
希逸：「梗係啦，唔知邊個唔識起營，要請槍幫手呢？」
-
我：「新嘢就梗係要磨合㗎啦！」
-
希逸：「屌閪之前又唔見你磨合咗再插？」
-
我：「嘩！你咁講嘢嘅！呢度有女仔㗎！」
-
希逸：「你平時開金口都同我差唔多啦！」
-
我：「你條茂利食完飯，拎埋阿妹走就喺我地頭踩我場，真係未死過。人嚟！攞刀斬，新鮮人子只限兩粒，好食過雞子。」
-
阿妹：「我要食，我要兩粒，我要人子刺身。」
-
希逸：「咁樣真係口爆㗎喎。」
-
阿妹：「呢啲補品嚟㗎！貴過出面買嗰啲精華液。」
-
我：「出面化妝品嗰啲精華液就真係可以保濕嘅。呢啲冇用㗎。你哋真係好核突，可以 做鹹濕二人組。」
-
楚翹：「咁呢啲「精華」又係咩味呢？」
-
我：「夠喇！呢個話題真係好核突。」
-
希逸：「你平時講啲嘢爆咁多，呢啲都算普通啦！」
-
我：「去露營又點同呢！得我哋兩個梗係放飛啲㗎啦！」
-
楚翹：「不如我哋新年搞camp？」
-
希逸：「楚翹你唔使拜年咩？」
-
楚翹：「唔使吖！你呢？」
-
我：「咁多位！雖然大家新年都唔使拜年，但你哋唔好唔記得3月開始就要考DSE。」
-
楚翹：「溫書真係日日溫咩？」
-
希逸：「咪係，溫書中間都要休息啦！」
-
我：「你哋唔為自己嘅將來打算一下咩？」
-
希逸：「嘩！最唔讀書嘅人同我講呢句，好冇公信力喎。」
-
阿妹：「堂堂瞓覺、又唔做功課嘅人講未來，慳啲啦！」
-
楚翹：「我又唔太care啲學業嘅。」
-
我：「你唔care，但你啲屋企人care呢！」
-
楚翹：「理得佢哋吖！」
-
希逸：「就咁話！新年假期就去露營啦！」
-
阿妹：「好！」
-
打完邊爐、希逸做埋佢嘅懲罰-洗碗。之後佢就返咗屋企攞衫過嚟瞓。阿妹同楚翹就輪流沖涼，而我就喺廳等沖涼之際，我就碌緊電話。碌碌下之際，突然有隻手掩住咗我雙眼。
-
「估下我係邊個。」
-
我：「唔使估都知啦！你咪就係我最愛嘅楚翹BB囉！」
-
楚翹：「口甜舌滑。」
-
楚翹坐咗喺我隔離，啱啱沖完涼嘅洗頭水味真係好香。飄逸嘅秀髮真係好正、好香。我都唔知點解女仔啲頭髮可以咁香。
-
我：「今個月真係好奇妙吖！」
-
楚翹：「何出此言？」
-
我：「一直都冇同你講過其實我同阿妹嘅關係唔係太好。即係咁，我成日覺得我好似虧欠咗佢咁。夜晚同佢食完飯、洗完碗就落去返工，好少時間同佢傾計，平時都係一句起，兩句止。」
-
楚翹：「都唔係吖！喺我眼中，你哋關係都唔差吖！你成日就佢食咩，搞到佢變咗個公主咁。」
-
我：「你嚟到，我哋兩個嘅關係先好咗好多。」
-
楚翹：「其實阿妹唔係唔想同你講嘢，係驚阻住你休息啫。」
-
我：「咁又係，我見到佢嘅時候，一係收工之後，一係就嚟返工。」
-
楚翹：「咪係囉！佢都係費事阻住你休息啫。其實你哋兩個關係算好㗎喇！」
-
我：「我成日諗，我搵得唔多，我驚平時俾阿妹嘅零用錢唔多，驚佢因為窮而唔敢約朋友去街。」
-
楚翹：「傻豬嚟嘅，點會呢？」
-
楚翹攬住我，我亦都攬住佢，楚翹錫咗我一下，而我都嘴返佢一啖。楚翹伸出佢條脷，我亦都唔執輸，伸埋條脷出嚟。
-
楚翹：「嚟多次吖！」
-
「嗯！」
-
呢個茄輪，足足打咗成分鐘，直至……
-
「啪！」
-
阿妹：「我……我係咪阻住咗你哋兩個吖！」
-
阿妹沖完涼一開門就見到我同楚翹嘴緊，我哋即刻縮開咗，真係阻人打茄輪尤如殺人父母。
-
楚翹：「唔阻，唔阻。」
-
阿妹：「我入房整一整嘢，轉頭再出嚟吖！」
-
我：「頂！咁樣搞一搞，真係乜mood都冇晒 ！」
-
楚翹：「嚟多次啦！啱先都打得唔夠過癮。」
-
我：「咁我嚟喇！」
-
我輕輕推倒楚翹，脷都伸埋，準備嘴落去，爭在未除褲嘅時候……
-
「叮噹」
-
冇晒mood嘅我去開門。希逸條粉腸真係好唔識do。
-
希逸：「我返嚟喇！你哋兩個個樣咁黑嘅？」
-
我 ：「頂你個肺，你哋兩個真係好合拍，專係最有feel嗰下先阻住人。」
-
好彩希逸都蠢唔晒……
-
希逸：「吖 ！阿妹啱先叫我搵佢，我入房先。」
-
我：「係就快啦！」
-
希逸：「知道大佬！」
-
我：「承接返啱先嘅活動？」
-
楚翹細細聲喺我耳邊吹咗一下，跟住講……
-
楚翹：「梗係冇問題啦！」
-
（待續 To be continued）
IG：chingchingstory