老闆:「大家準備好未?今晚預計做全晚㗎喇!」
-
我:「戰車已經裝飾好,啲串燒都擺晒喺雪箱入面,我哋都食飽咗㗎喇!」
-
希逸:「飲品同乾冰都放咗落雪箱入面。」
-
老闆:「好!我哋而家執埋石油氣罐就可以出發。」
-
老闆娘:「咪住!我哋差啲發泡膠碗同膠羹未攞吖!」
-


老闆:「係喎!最重要嘅嘢都未攞,好彩記得攞啫,唔係客人就要徒手食。」
-
老闆娘:「真係辦事不力,執少少嘢都唔記得。」
-
老闆:「特登俾個位你做賢良淑妻㗎嘛!」
-
老闆娘:「我唔使做任何嘢都係賢良淑妻㗎啦!」
-
老闆:「梗係啦!你做咩我都覺得你正,唔係點會揀你呢?」
-


老闆娘:「口花花啦你。」
-
老闆:「我唔口花,點溝你啊?」
-
老闆娘:「吹脹啦你。」
-
楚翹:「兩位阿叔阿姨,放完閃未?」
-
老闆:「唔好意思,要你哋食閃光彈㖭!」
-


老闆娘:「你哋平時咪又係咁。」
-
我:「教壞細佬,學生時期不應談戀愛,你哋而家教我哋談戀愛,好唔應該囉!」
-
老闆:「『學生時期不應談戀愛』呢一句說話係一啲學生時期溝唔到女嘅人講㗎。」
-
老闆娘:「即係吃不到的葡萄是酸的咁解。」
-
楚翹:「挑!有口話人,冇口話自己,你而家咪又係學生時期談戀愛。」
-
我:「突然有個女仔撲埋嚟,俾埋機會我,唔通真係唔要,親手放棄呢個機會咩?」
-
楚翹:「搬龍門大王-歐陽浚彥。」
-
我:「隆重介紹,我係搬龍門大王-歐陽浚彥。」


-
楚翹:「你仲要講到好似好自豪咁㖭。」
-
我:「適當嘅時候搬龍門係好事嚟㗎!」
-
楚翹:「一定係咁啦!」
-
老闆娘:「大家執齊啲嘢未,我哋差唔多出發喇!」
-
老闆:「執齊喇!各位老漢,準備推車。」
-
我:「咩老漢推車啊!我哋都唔係老漢,我哋係後生仔推車。」
-
阿妹:「成班鹹濕仔講鹹濕嘢,冇眼睇。」
-


希逸:「後生仔推車,出發!」
-
幾分鐘嘅路程,就已經去到西灣河海濱公園,嗰度已經有唔少人霸咗啲靚位,等待今晚嘅倒數,而我哋都開始set爐。其他攤檔亦都陸陸續續到達,我哋就好似將太安樓啲小食檔搬去海濱公園咁。
-
入夜之後,海濱長廊開始熱鬧起嚟,間間攤檔都逐漸忙碌。隨住前嚟睇煙花嘅市民越嚟越多,海傍都差唔多逼爆。同時間,我哋都做到冇停手,燒完一轉就要即刻燒第二轉。
-
接近倒數時間,海傍氣氛已經推上高潮,有DJ喺度打碟,有人喺度Busking。而我哋……就繼續留喺攤檔!一路燒串燒,一路沉醉喺呢個舞海入面。
-
「10、9、8、7、6、5、4、3、2、1」
-
「Happy New Year」
-
我:「新年快樂,楚翹BB!」
-
我攬住咗楚翹,細細聲喺佢耳邊講。


-
楚翹:「彥B,新年快樂。」
-
「咔嚓」
-
突然有下閃光擦過,原來係阿妹光明正大咁偷影我哋。
-
阿妹:「哎吔,唔記得熄閃光燈㖭!仲諗住幫你哋偷影下相㖭。」
-
楚翹:「影相呢回事,梗係要影啦!不過下次想偷影人記得熄閃光燈。」
-
阿妹:「咁你哋要咩pose吖?」
-
我:「吖!!!好重吖你。」
-


楚翹一下跳上我背脊,搞到我差啲失平衡,差啲仆街。
-
楚翹:「你講咩吖!我俾多次機會你!乜我好重咩?」
-
我:「地球以1600公里每小時運行,突然有個好輕嘅物體壓落嚟都會變得好重。」
-
阿妹:「呢個咩解釋嚟㗎?」
-
我:「你唔好理啦!我好辛苦吖!」
-
楚翹:「慢慢影,唔使急,亦都唔使快。」
-
我:「快啲啦,我條腰就嚟要報銷㗎喇!」
-
希逸:「我哋都要影㗎!你哋快啲啦,煙花都就嚟放完喇!」
-
阿妹:「差啲唔記得我哋都要影㖭。」 
-
就係咁我哋兩對情侶就一路燒串燒嘅同時,不斷幫大家影靚相。煙花話咁快放完,市民都開始散場,越嚟越多人去唔同嘅小食檔買嘢食,串燒隊一早已經大排長龍,而家條龍更加長。一架推車已經應付唔到咁大嘅人流。老闆突然拆咗另一架用嚟裝糖水嘅車,喺車底拎咗塊版,原來架車除咗可以賣糖水之外,上返塊板,仲可以燒埋串燒。
-
雖然煙花已經放完,但市民都唔捨得走,留喺度聽歌跳舞,同時都幫襯我哋啲小販檔。第二朝,大家終於散場,而我哋都收工喇!我哋一齊推返啲車返去「燒夜店」。
-
老闆:「辛苦晒大家喇!」
-
希逸:「唔好咁講,間唔中落嚟幫手都幾好玩嘅。」
-
我:「喺海傍燒串燒,原來都幾有feel。」
-
楚翹:「但個爐頭都係鋪頭好燒啲。」
-
我:「呢個當然啦!話晒鋪頭個爐勁咁多。」 
-
老闆:「今晚大家休息下,夜晚唔使返嚟,我哋兩位老人家都要抖下。」
-
老闆娘:「你話邊兩位係老人家?」
-
老闆:「我話啲爐,燒咗成晚要休息下。」
-
老闆娘:「咁都俾你兜到,算你啦!」
-
老闆:「點敢話你老吖!自己搏打咩?」
-
老闆娘:「我咁好人,點會打你呢!」
-
我:「我哋走先喇!澄叔加油,希望之後可以見到你啦!」
-
希逸:「振夫綱!Ush。」
------
返到屋企已經攰到一個點,大家沖完涼即刻喺張床到昏迷。雖然呢一晚比平時多嘢做好多,亦都忙碌咗好多,但「除夕」呢個節日,唔在於喺邊度慶祝,唔在乎做緊咩嘅時候度過,而重點嘅就係同邊個人一齊過呢個送舊迎新嘅日子。
-
我就有楚翹同我一齊度過喇!咁你哋呢? 
-
(待續 To be continued)

IG:chingchingstory
已有 0 人追稿