《夾出一個她》: 第六十一集-承諾（上）
我：「如果你之後都喺都住，我可以同你承諾，我一定包你幸福一世，照顧你一生一世。你喺呢度得到嘅愛，一定俾你之前嘅屋企多。」
-
呢十幾年楚翹受過嘅傷害，由我同楚翹去一齊面對，呢個係做男人嘅責任、做人男朋友嘅責任、亦都係做人老公嘅責任。
-
楚翹：「如果唔夠咁點先？」
-
我：「咁我會一世慢慢咁補償俾你。」
-
楚翹：「即係我冇得走啦！」
-
我：「你入得嚟呢度，想走都難。」
-
楚翹：「咁你以後都要俾我煩住㗎喇！」
-
我：「即管煩我，任煩唔嬲。」
-
經過我氹一氹，楚翹終於笑喇！相信每個男仔見到自己鍾意嘅女仔笑，自己一定俾個女仔更加開心。
-
楚翹：「你之後唔準後悔㗎！」
-
我：「永不後悔吖！」
-
楚翹：「你應承我先啦！」
-
我：「啱先咪應承咗囉！」
-
楚翹：「都冇戒指，唔計。」
-
我：「凌晨時份喺邊度搵隻戒指俾你呢？」
-
楚翹：「我唔理吖！總之我要見到啦！」
-
有時女仔搵你傾計，唔係想聽你講道理，而係安慰佢、陪伴佢，同佢一齊分擔佢嘅傷感。
-
楚翹：「你做咩攬我啫，我係要戒指喎。」
-
我：「我咁矜貴，做住隻戒指先囉！都係捆住你啫。」
-
楚翹：「放手啦衰鬼！」
-
我：「戒指戴咗上手就除唔返㗎喇！」
-
楚翹：「你有本事就攬一世。」
-
我：「咁你第時唔好後悔，我已經鎖死咗你喇！」
-
楚翹：「我……真係好幸福，可以有幸識到你……」
-
楚翹講嘢開始一嚿嚿，連句嘢都未講完，就已經冇晒電，攤咗喺我大髀到瞓咗，見佢笑住瞓，我都唔忍心抱佢返房，由得佢繼續瞓喺我大髀上面，享受一個雖然沉靜，但心靈上係互相慰藉對方嘅時光。
-
［想我抱緊你任由時間過，輕輕的唱情歌，心境平和，蜚語流言不想聽太多。］
-
我成日覺得，相識係一種緣份，呢個世界咁大都可以認識對方。而我真係好好彩識咗楚翹，當初楚翹唔介意跟一個陌生人走，只係為咗離開佢自己嘅家，尋獲一個新生活，而我當時就知道，自己有少少鍾意咗楚翹，好想俾楚翹一個溫暖嘅家。
-
［想抱緊你未來陪我過，就算日子不好過，未忘記愛，未忘記有人苦苦撐住我。］
-
雖然一日相識嘅時間好短，但其實一日已經好多。第一眼望到佢，嗰個楚楚可憐求我收留佢嘅眼神到而家都仲記憶猶新，就好似尋日發生嘅一樣。呢個眼神，完完全全吸引到我，真係一見鍾情。鍾意一個人，唔係計識咗幾耐，唔係要諗佢係咪鍾意我，而係好簡單咁我望住佢笑，我就想一生一世都望住佢笑。
-
［這背影每天沿路照應，不需得到掌聲，當天答應，想兌現著，一生的笑聲。］
-
楚翹換取一生嘅自由，但呢個代價就係捨棄下半生嘅幸福，放棄屋企人鋪排嘅人生路，不過可以脫離專政嘅魔爪。如果當初夾走楚翹嘅唔係我，唔知楚翹呢個大賭注係會赢得比而家多，定係輸到一蚊都冇呢？
-
［偏錯失了，未陪伴細聽，哪些內心的感性，請不忘重拾步履，行過最幸福小徑。］
-
或許我唔係一個最好可以收留佢嘅人，但我一定會全力做好，令到佢覺得自己冇揀錯人，即使佢冇咗自己嘅屋企人，都有我作為佢最強嘅後盾，亦都係佢下半生嘅屋企人。
-
呢一晚，我諗咗好多嘢，隨著眼皮越嚟越沉重，諗瞓前一刻，我再望多眼瞓著嘅楚翹，佢都係笑住口，就好似一個BB咁，真係超級可愛。
-
我哋兩個就坐咗喺梳化瞓覺，直到天光，我好希望，我哋可以一齊跨過一切障礙，行到永遠。
------
阿妹：「阿哥，醒吖喂！」
-
我：「咩事吖？」
-
阿妹：「我見你哋瞓到咁，咪叫下你哋囉。」
-
我：「乜我哋瞓得好差咩？」
-
阿妹：「你望下你下面。」
-
尋晚明明係好甜蜜嘅相處時間，但而家就變咗一個兒童不宜嘅情節：我條褲鏈鬆開咗，而楚翹就反轉咗個人瞓，個口就正對住……吖！我唔講喇！呢個係兒童節目嚟㗎嘛！
-
阿妹：「睇嚟尋晚你餵人食腸食得幾開心喎！」
-
我：「真係冇吖！尋晚好正經㗎。」
-
阿妹：「咁條鬆開咗嘅褲鏈同瞓得好淋嘅楚翹又點解釋呢？擺明你尋晚榨乾佢啦！」
-
我：「究竟我點講先可以令你信我係無辜呢？」
-
阿妹：「真係信唔落喎，咁多證據証明你哋尋晚嘅『活動』。」
-
我：「就算你攞支槍指住我都好，我都會同你講冇做到吖！」
-
阿妹：「咁你哋尋晚做咗啲咩？」
-
我：「尋晚我打打下機，突然楚翹敲門入房嗌肚餓，咁我就去煮個麵俾佢食，我哋就邊食邊傾自己嘅過去。去到楚翹講自己嘅過去嗰陣時，佢可能太過崩潰而喊，咁我就做佢嘅樹窿，安慰佢，佢傾傾下就唔覺意瞓著咗喇！」
-
阿妹：「咁你有冇趁佢瞓著就做啲曳曳嘢先？」
-
我：「我就嚟講到口臭，真係冇。」
-
Madam，我大聲講嘢唔代表冇禮貌，但我大聲講嘢就嘈醒咗楚翹。
-
楚翹：「搞咩咁嘈吖？」
-
阿妹：「冇，睇下你食緊啲咩啫。」
-
楚翹：「尋晚我發夢同彥B去咗滑雪，我仲記得支滑雪仗暖粒粒，好好揸手。」
-
阿妹：「嗱！嗰度有啲咩揸手係似支棍又暖粒粒吖？」
-
我：「唔關得尋晚咁好瞓啦！原來發生咗啲咁嘅事。」
-
楚翹：「嘻！掂下摸下又有咩所謂啫，反正之後都係我㗎啦！」
-
我：「係囉！咁你又嘈咩啫？」
-
阿妹：「咁你個樣又尷尷尬尬，好難唔令人懷疑囉。」
-
楚翹：「唔好妒忌，這些機會不是屬於你的。」
-
阿妹：「咁阿哥你尋晚有冇呃蝦條？」
-
（待續 To be continued）
IG：chingchingstory