男神呢個稱號令我食左唔少女(有甜）: 陸運會(三)

我同佢行到運動場之後，就即刻鬆脫佢隻手，因為我覺得珮恩會係到。

果然無估錯，我見到佢嬲爆爆咁望住我，而雯雯都比佢嘅氣場嚇親，行左去第二到。

我：「傻妹，做咩唔上去看台到坐呀？」我摸一摸佢個頭再講。

珮恩：「你講！！點解全校公認嘅女神會係你隔離？！」

我：「我地頭先有啲野要傾，所以咪一路食飯一路講。」



珮恩：「咁點解你唔同我講？你知唔知我頭先搵左你幾耐？搵極都搵唔到你，原來你就係去左撩女神！！」

我：「Sorry呀，因為件事太突發，所以我緊張得滯唔記得同你講，但我真係唔係去左溝女，你信我呀。」

珮恩：「你已經有好多前科，仲叫我點信你...？一係你同我講你地傾啲咩。」

哦，我地傾緊扑野個陣會唔會鍾意左對方姐，好小事。

我：「哦，咁你知佢係藍社嘅社長，啱啱傾左個啲社接名單，佢話想搵我跑姐。」



珮恩：「咁簡單又點會要約埋一齊食飯傾？」

我：「唔可以比其他人知份名單架嘛，唔係嘅話其他社啲人可能整傷我地啲人，所以我同佢咪秘密進行會議囉。」

咁都比我作到個故仔出黎，而且佢又真係信左我，阿燕呀阿燕，你幾時先可以做返個誠實嘅小孩子？

佢無再嬲，仲扮哂野咀左我一啖，比好多女仔見到我地，我只係諗緊要唔要同其他人公開我地嘅關係，應該只係得珮恩個班嘅人先知佢同我一齊左。

不過有人問起先算啦，可能根本無人想知我同邊個拍拖，好快就要集隊等上看台，而阿彥一早就排好隊，比佢問雯雯身材點、個波大唔大，我只係同佢講「你屌過咪知」。



果然，上返看台之後就有好多女仔行過黎問我同珮恩係咩關係，而我都無再忍冪，同佢地講個事實，不過佢地無人信一個食家會認真拍拖。

睇黎有啲野比人認定左就係認定左，無論做咩都改變唔到自己嘅形象。

我同阿彥吹左一陣水之後就黎到甲組100m召集，而我亦都一樣，咩都無換就落左去跑道隔離點名，居然比我見到一個熟人。

志霖：「咦？又會係到遇到你嘅？估唔到你又跑100m喎。」

我：「嘖，我年年都有跑100m，係你唔記得姐。」

志霖：「咁又係，我邊會記得咁多手下敗將，記得你算好架啦。」

無錯，有一年我100m唔知點解輸左比佢，當我諗住同佢再鬥多次個陣，佢已經無再報100m，直到宜家終於可以報仇。

我：「個次算你好彩，今次我實贏你。」



志霖：「係咩？不過話時話，如果男神呢個稱號令你食左唔少女，我想講贏過男神呢個稱號令我食左更多女。」

我：「咁又點？食女我一早就食得厭，而且我先唔係好似你咁要啲女幫你做哂所有野。」

志霖：「講到好似好偉大咁，你咪又係屌完條女就閃，同我有咩分別先？你同我根本就係同一類人，不如同我一齊傾下點樣可以玩盡所有女仲好啦。」

我：「我先唔係同你一樣，你係仲cheap過我嘅玩家，將人地嘅感情玩黎玩去，你知唔知你令到幾多女仔唔再相信愛情？你呢啲咁嘅仆街。」

志霖：「佢地投入得一段感情就預左受傷，唔怪得我。」

我嬲到想衝過去打佢，但比阿彥捉住左，叫我唔好意氣用事，而我亦都冷靜落黎。

然後就輪到我個Group開始跑，但志霖唔係我個Group到，未有得同佢鬥住，所以宜家一定要贏，跟住入決賽同佢鬥。



「呯！」

我即刻向前衝，將啱啱嬲嘅感覺轉化為動力，我發哲一定要收佢皮，最後當然攞左第一，跑左11秒幾。

我慢慢行返去跑道起點，除左睇埋阿彥跑之外，仲要串柒呢個玩家。

志霖：「唔錯喎，比起之前的確快左好多。」

我：「唔通好似你咁？贏左一年之後就驚輸，唔去跑下100m係咪因為知自己愈跑愈慢呀？」

志霖：「乜真係咁咩？比你睇下到底我唔跑100m係驚輸定驚贏得太多。」

「呯！」

佢同阿彥亦都開始跑，無理由...點解會咁...平時只係慢我少少嘅阿彥居然....輸緊...？



好快佢地就跑完，我望一望上面嘅計時器，「10.60」，你玩緊我咋嘛...？仲打破左學校歷史記錄...

佢亦都行返過黎，仲好似一面勝利者嘅姿態望住我。

志霖：「宜家你知點解我唔跑啦？我一跑就破埋記錄，其他人仲邊有機會贏，而你就一直唔比機會人，你先至係仆街黎。」

我無野講，因為我真係駁唔到，望住佢行返上看台嘅背影，係到諗緊原來佢一直都勁過我。

我甚至開始覺得恐懼，好似啲動漫人物遇到一個比自己勁十倍嘅人，所帶比佢地嘅恐懼感。

我：「哇！好痛！！」諗諗下唔知比邊個一拳打左落我個頭到。

阿彥：「諗咁多野做咩姐？宜家代表你聽日一定會輸咩？」



我：「只不過...」

阿彥：「雖然我今日都輸左比佢，但我都入到決賽，聽日有我同你一齊跑，你唔係孤身奮戰。」

屌，講到宜家好似打仗咁，但聽佢咁講唔知點解個心好似有一陣熱血衝左上黎。

我：「嗯！！聽日我要比佢睇下乜野係閃電俠！！」

阿彥：「咁咪啱囉，我都要開20馬赫出黎！！」

初賽日，就係樣完左，期待聽日嘅...決賽日。