《我想做你一世守護神》: 序章（一）

「親愛嘅女王殿下，放咗學賞個面一齊去睇齣戲？」我喺份中文筆記到撕咗個右下角落嚟，寫咗呢句野上去，對摺兩下，然後踎低扮綁鞋帶，再將張紙仔掉過去隔離行晴晴嘅凳底，張紙咁啱打中佢隻腳。

佢望一望地下，再擰轉頭望住我。我眼尾見到佢望咗過嚟，我都即刻彈番起身，送左一個飛吻俾佢。晴晴唔小心「噗哧」咁笑咗出聲，再回贈我一個女神的飛吻，然後就慢慢烏低身，喺腳邊汁起我掉俾佢張紙仔。佢一打開張紙仔，好快就擰番過嚟，笑住咁對住我點頭。佢又望番出去繼續聽書，而我就坐番好，開始趴低長眠...
 
我拖住佢隻手行出戲院，可能因為啱啱部戲太悽慘嘅關係，晴晴竟然喊到停唔到，啲眼淚就好似缺堤一樣係咁流，對眼同個鼻都紅哂。我地行到出嚟，我就指住個洗手間，同佢講：「傻豬，你入去洗下面啦，好肉酸呀喊到咁！我喺出面等你。」然後輕輕錫左佢額頭一啖。佢依然喊緊，不過喺我深情嘅一吻之下，佢嘅情緒好似都冷靜咗好多。佢輕輕打咗我隻手臂一下，然後一邊抹眼淚一邊點頭。佢慢慢放開咗我隻手，向住洗手間果邊行，而我就趁佢行咗兩步，再喺後面撲過去攬實佢：「點解我既老婆豬連喊都可以咁迷人嘅？」我聽到佢細細聲笑咗一笑，仲自言自語講左句傻瓜。我慢慢放開佢，等佢可以快啲入洗手間汁好個貓樣，變番我平時果個好清純可愛既女朋友。我親眼望住佢行入女廁，而我就企喺戲院同洗手間嘅轉角位到等佢出嚟。時間，呢一刻係五點五十八分。
 
唔少人仍然陸陸續續咁喺戲院出嚟，亦都有唔少情侶手拖手好甜蜜咁行出嚟，而貼心嘅男朋友們就為女朋友們抹乾眼淚。我喺出面等咗五分鐘，都未見到佢行出嚟。一向第六感好強嘅我呢刻感覺到有少少唔妥，好想佢盡快出嚟，然後送佢番屋企。
 
六點零六分，我聽到有人喺女廁入面大叫，我即刻衝過去睇下發生咩事。我唔敢相信我眼前所見到嘅野，我崩潰咗咁跪咗喺到。晴晴訓咗喺洗手盤附近嘅地下，周圍有唔少水漬，應該係佢準備行出嚟嘅時候跣親。



我嚇到即刻彈起身，發現自己仲係坐喺班房，仲係上緊沉悶嘅中文堂。老師好似知道我啱啱訓醒，除咗問我做咩上堂成日訓教之餘，當然唔少得又罰我企啦。
  
晴晴望住我，臉上帶有少少陰笑，好似喺到笑緊我又一次俾人罰企。我眼甘甘咁望住佢，佢真係好得意，好charm，佢其實又唔算係靚到天上有地下無，但相信化個淡妝都已經可以令到唔少男仔神魂顛倒。當然，情人眼裡就緊係出西施啦，無論幾時我都覺得佢好完美，就算我俾老師罰企，對眼只要望住佢，我都可以好自然咁笑得出，而呢種笑，應該係發自內心，係打從心底發出果種好幸福嘅笑容。

然而呢一刻，我內心同時亦好忐忑，因為我知道，啱啱夢到嘅野，已經出現咗好多次，而且係每日都會喺我腦海出現，所以應該唔係一個惡夢咁簡單，而係好似一個預知夢，俾我預知即將會發生嘅事咁。我真係完全冇頭緒點解我每一日都會夢到啲咁嘅野，冇頭緒點解每一次個主角都係晴晴。我個腦依家有好多好多個問號，雖然我唔知道呢啲事係咪真係會發生，但係我真係好愛呢個女仔，無論係真定假我都唔會想冒險令件事有機會發生，每一次我都會專登避開我所夢到嘅情境，今次都唔例外。所以我決定咗今日放學一定唔會同佢去睇戲。