第一章
我係一個轉校生,因為屋企要搬屋所以轉校。我叫Kingsley,中文名叫何子型。我有個大哥,佢就叫何子俊。我同我大哥其實差唔多樣,不過可能因為我係細仔,所以平時啲人叫我,都會型仔前型仔後咁叫我,有時聽到自己個名都會笑。

今日係我第一日喺新學校番學。話哂第一日就緊係早少少番去熟習下環境啦。我去到個課室,距離上堂應該仲有二十分鐘,個課室就得小貓三四隻。有三個男仔坐咗喺課室中間,我望咗佢地一眼,對眼就留意到課室嘅角落位,有個長頭髮嘅女仔坐咗喺到。佢戴住個耳機,對眼好空洞咁望住地下,好似有好多思緒咁。唔知點解,初嚟報到嘅我已經有少少想上去安慰佢,但以佢嘅狀態,應該都唔會理陌生人搭訕,分分鐘仲當我係痴漢一名,所以我就打消咗呢個念頭,轉而走去同果三個男仔打招呼,打算盡快識番幾個朋友。

「Hello! 你地好呀,我係插班生Kingsley呀,點稱呼你地呀?」我份人本身鐘意講野,開口同陌生人打招呼從來都唔係一件難事。佢地一聽到我開口,都好受落。其中一個帶眼鏡嘅好快就對我示好,企喺身同我握手:「早晨呀Kingsley,我叫啊曦呀,歡迎歡迎!」我好循例咁對佢微笑握手,然而眼角都係忍唔住望咗去角落果邊。

佢依然戴住耳機坐咗喺到,眼神依然好空洞咁望住地下。不過唔知點解我越望住佢,個心就越不安,腦海入面突然浮現佢拎把𠝹刀出嚟割脈嘅畫面,令到我心跳逐漸加速,好驚佢會睇唔開去做傻事。

就係啊曦隔離個男仔準備起身同我打招呼之際,我已經留意到佢伸咗隻右手入裙袋。呢一刻我咩都冇諗,淨係想阻止呢件事發生。我即刻跑過去,佢隻右手已經攞住咗把𠝹刀,仲推埋塊刀片出嚟,準備一野劃落自己左手既手腕到...



我右手嘅手臂好似俾火燒緊一樣,啲血不斷喺個傷口到滲出黎。我左手捂住個傷口,然後慢慢企番起身;而佢嘅右手仲係拎住把𠝹刀,刀片上面亦沾滿鮮血。佢抬頭望住我,我終於睇得清楚佢個樣。佢唔算好靚女,但係我對佢有種好特別嘅感覺,到底係憐憫佢,定係有啲特別嘅原因?可能呢啲係一見鐘情?我都唔知。

佢打量咗我一陣,我地四目交投,搞到我有少少覺得尷尬,所以就好自然反應咁對住佢微笑。佢慢慢除低左邊既耳機,細細聲咁問:「點解...?」

我知道佢心入面一定有好多疑惑,我亦都冇力氣去同佢解釋咁多,始終佢落刀果下真係好大力。如果我冇飛撲過去用自己嘅手臂擋住佢隻左手,我依家見到嘅,應該就係暈低咗,甚至係處於瀕死邊緣嘅佢。

雖然我同佢素未謀面,連佢叫咩名都唔知,但我知道佢一定係有好多唔如意嘅事發生,先令佢萌生呢個念頭。我咁樣做,一來係想略盡綿力去幫佢,反正我用手臂擋刀又唔會死,最重要都係心入面果種好奇特嘅感覺推動,令到我啱啱好有衝動去保護佢。

好彩,呢一刀之後,佢都冷靜咗好多,連𠝹刀都放低埋,只係望住眼前呢個無啦啦為自己擋一刀嘅新同學,欲言又止。依家我知道,出盡力𠝹完一刀,將啲內心覺得難受既事發洩咗出黎,佢嘅心情應該都平伏咗唔少。



終於,佢開聲問我:「你隻手...痛唔痛呀?」我強裝歡笑咁搖頭,但實際上,我喺到強忍緊眼淚。

「點呀?發洩完係咪舒服咗好多?」我問番佢。佢輕輕點頭,然後伸隻右手出黎:「多謝你呀,我叫晴晴呀,你叫咩名呀?」

由一開始留意佢到依家,佢一直都處於好灰嘅狀態。依家,我終於見到佢微笑,原來仲有兩粒小酒窩,笑起上嚟真係幾甜幾迷人。

「我叫Kingsley呀,我成手都係血,點握手呀?」我笑住咁答佢,佢都笑左一下:「嘻嘻,又係喎,咁我收番啦。」講講下佢就喺書包到攞咗一包紙巾同一塊膠布遞俾我:「當我賠罪,你攞去啦。」我望一望自己對手,表示番我冇得用手接佢包紙巾,然後再望番佢:「想賠罪,係咪應該幫我護理埋個傷口先?」

我坐咗喺佢隔離個位,左手緊握住佢俾我嘅紙巾,抹乾淨手掌上面嘅血;而佢就用紙巾喺水樽到沾左少少水,然後命令我:「你擺隻手上黎啦!」



我仲傻傻地咁望住佢,聽到佢叫我,我先不慌不忙咁將自己隻右手遞俾佢。佢捉住我隻手,突然間,因為呢種突如其來嘅身體接觸,我成個人好似觸咗電咁;同時亦因為對佢果種特別嘅好感,令到我個心好暖好舒服。佢隻手好柔和,幾隻纖幼嘅手指捉住我嘅手腕,另一隻手就用啱啱沾左水嘅紙巾,先幫我抹好傷口周圍嘅血跡。

我目不轉睛咁望住佢,佢嘅一舉一動,都好似天使下凡咁,根本唔會覺得佢幾分鐘之前竟然係灰到諗緊割脈嘅人。我已經彷佛當咗成個班房得我地兩個,而且喺旁人眼中,我地依家應該好似一對熱戀中嘅情侶一樣,羨煞旁人。唔知點解,我有啲沉醉喺呢個環境之中,有啲想時間就咁停喺呢一刻,等我可以繼續凝望佢。
已有 0 人追稿