[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: 《我係一個平凡至極嘅中三學生，但從個一日開始......》Ch.1海濱一行

《我係一個一無是處嘅中三學生》ch.1海濱一行
「唉！混混噩噩又過一日啦！」是咁的，我係一個中三嘅普通學生。呢種生活，數下手指，都最少過咗三年啦。依家全世界人都知，香港係全球樓價最高嘅地方。一層樓郁啲就五百幾、六百萬，甚至去到千萬起計。

一個正常嘅香港人，基本上要唔飲唔食三十年先可以上樓。

我望住呢個一直上升嘅樓價，不禁諗起要三十年唔飲唔食嘅悲慘生活，到我投身社會可能都要四五十年啦。

哇！真心希望睇緊呢篇嘢嘅你都唔好諗，真係心都離一離，我呢D廢青都係乖乖地係屋企打下機，同班朋友吹下水算。行到出街，見到每個人都黑口黑面咁（係喎，依排肺炎肆虐，個個都戴住口罩，你地都記住戴啊！）不過我一從呢班人身邊經過，見到佢地銳利嘅眼神都睇得出帶有一絲絲嘅殺氣，心裏面諗緊咩，你地懂的。（笑）

行過每一條街，我都係帶住一個閃閃縮縮嘅眼神同埋驚驚青青嘅心情快步走開。好彩依排疫症令到「路上行人欲斷魂」咁嘅款，我先肯破天荒咁出一次街咁大把。你冇聽錯，亦冇睇錯，真係出一次街咁大把！



一早起身，好彩我前一日已經準備好我呢一日久違嘅出門日，如果唔係我嘅拖延症候群又會發作，計劃完，又一個夜晚，到時真係和味囉。

所以我一早起身決定咗去中環碼頭呼吸一下新鮮空氣，搭上我地九巴嘅111號線，順個靚便又可以望下個景，唔使日日夜夜咁望住屋企對面嘅垃圾場。難得一日放假冇乜人，我總算可以安安靜靜咁獨佔呢個豪華嘅海景，經過咗111號線嘅45分鐘車程，我發覺我呢個足不出戶嘅薯仔頭，真係十足一隻井底之蛙，我咁多年冇出過除咗X鐵觀塘線同荃灣線之中嘅任何一個地方。

呢個世界，呢個香港，正在以迅雷不及掩耳嘅速度發展。我逐漸追唔上呢個城市嘅步伐，你話可唔可悲，呢個係我最愛嘅香港，我竟然咁大個人冇好好去認識過呢個屬於我，屬於呢個世界其中七百萬人嘅家，呢個家對我黎講已經變得陌生，我係時候要好好了解呢個地方，有時間就收集新嘅資料，探索香港嘅大街小巷，遊遍呢度嘅千山同萬水，食盡街頭巷尾嘅地道小食，諗起都覺得幸福～就算呢度之後會變成一個人間煉獄，點樣令人覺得難以接受，「生於亂世，有種責任」。我會永遠守護係呢一度，因為我係一個香港人，正所謂香港精神，超越世人（呢句我吹嘅，但係我相信事實的確如此）！香港人係打不死嘅！呢種精神係香港人獨有，永遠冇人可以取締！

雖然依家科技好發達，日行千里，秀才不出門，能知天下事，但作為一個普通嘅學生，我反而唔認同呢種情況，香港人工作繁忙，每日廢寢忘食，三餐不繼咁樣，連運動都冇時間去做，旁邊美麗嘅大自然都冇辦法動搖佢地想返工嘅精神，導致壓力爆棚，每次見到新聞話有人猝死係辦公室或者跳樓自殺，都不禁釋出我低落嘅情緒，因為佢地都只係為咗個雞碎咁多嘅人工，打份工姐大佬，使唔使咁玩啊，可惜為咗養活家中嘅人，大部分成年人都冇辦法避免呢個情況發生，似乎已經成為咗香港人嘅病態，家家有本難念的經啊！我都唔想多作評論！