頭先喺空氣嘅壓迫感亦都無端端消失,剩低嘅只有可疑嘅對講機,可能都係我唯一希望。

「沙沙⋯沙沙沙⋯沙⋯」對講機傳黎雜音,好似連線中,又好似受到嚴重干擾。

「喂?有冇人?」

依然冇回應。

「唔好玩我啦,我唔想嚇死啊!」



「嘻嘻⋯沙沙⋯哈哈~」對講機傳黎一陣不明嘅恐怖笑聲,令人心寒,刺耳嘅笑聲,聽落就唔多似係人。

「你⋯驚咩~啫,哈哈哈哈哈。」驚嚇程度滿分。

「吾欲擊汝肺!」已經緊張到胡言亂語嘅我,都係趁機會9up一輪。

「Oh,wow,好勁咁喎⋯」信號仍然非常差。

「你係邊個,好快啲講啦喎,再唔講,我隊冧你。」



「你想去邊度隊冧我?本陣?定係呢度?」佢壞笑。

「本陣?你想講咩?咩本陣?」我裝瘋賣傻。

「仲扮嘢?依家你有兩個選擇。第一:完成要求。第二:參加『遊戲』並正式完成。」

「點解我要聽你講,你憑咩?」

「憑你依家嘅處境。你冇得揀,你唔做,一係自生自滅,一係自動收皮。」



呢一句說話,即係叫我一定要玩「遊戲」,如果唔係之後就冇我份,雖然好想早啲離開,但諗到本陣裏面嘅某一個人,我深深明白,自己仲有生存嘅意義。佢就係我唯一嘅希望同動力,我唔可以失去,就算我未曾擁有。

「咁向左走向右走串?吔屎啦梁非凡!」

「你⋯仲咁串?嘻嘻⋯比多次機會你~」

頂,好淆,都係唔好得罪呢條友,如果唔係,死咗都唔知咩事。

「頂⋯你係邊個,究竟點解要捉走我,究竟我依家喺邊?我啲隊友呢?你唔好郁我啲隊友就得,唔該你,我要同人地交代⋯」

「你唔需要知我係邊個,不過頭先我好似唔小心爆咗少少嘢出黎?自己get啦,咁都唔知咩事嘅,你去死一死啦。我冇捉走你,你仔細觀察下?」

附近人煙飄渺,空氣都顯得格外平淡。自己一個人去獨享空氣,你唔好話喎,真係幾好喎,唔係一個人,應該係話兩個人,唔知另一個喺邊呢?

放眼望去,景色依舊,時間照舊流動。只係,唔見隊友,唔見感染者,更加唔見援軍。



「妖你,死心啦,仲諗住有援軍,收皮啦。」

「你又知我諗咩⋯」

「點會唔知啊⋯我,咪你囉。」

呢個情節,肯定癡咗線。

傳說中嘅聲音,喺我旁邊出現。

第二把聲音。

如果我冇估錯,我依家經歷緊嘅,混合咗人地小說嘅奇幻,科幻,喪屍,末日,愛情情節。



哇,我真係冇諗過有生之年會見識過咁荒謬嘅故事,仲要係真人真事,冇花冇假,亦都唔係真人show,曾經我都有諗過呢個都只不過係一個大型到不得了嘅真人show。

如果拍成一套戲一定好鬼精彩,當然我要自己做男主角,而佢,H小姐就做我嘅女主角,不過呢場咁可怕嘅鬧劇,都係唔可以比佢參與,費時嚇親佢,到時有咩後遺症就唔好啦,係咪先。

「你講乜啊,繼續吹。」

「我吹乜啫,我係就係。你意識唔到?呢個就係你潛意識世界啊。有呢一把聲,當然正常,我話我係你,更加正常。」

「潛意識世界?我自己?咁你係我,點解唔放我出去,要困我喺度?」

我望住手錶,時間感覺上不斷流走,但時針依然未有動作。

「人值得,命中減少幾秒,多買一隻錶~」但事實就係咁,時間一分一秒流逝,但世界嘅時間都好似停止咗咁樣。呢句歌詞真係啱用,我之後應該用多
幾秒去買隻新錶,有乜可能過咗咁耐,隻錶郁都唔郁下。
已有 0 人追稿